صلوا علي الحبيب المصطفي
##################################
#مُكالمة_منتصف_الليل !!!
امبارح قبل م انام كلمت واحده صاحبتي وقولتلها اني لسه بفاضل بين كذا قِصه مش عارفه هنزل اي واحده فيهم ، وقولتلها بإختصار مضمون اتنين منهم .. قالتلي صلي استخاره قبل م تنامي وشوفي ايه هيحصل ممكن يحصل وقد كان واخترت انهارده قصه تالته #مختلفه تمامًا ، علشان كدا زاد يقيني انها بالتأكيد #رساله مخصوص لحد ...
اوعوا تنسوا كالعاده #هاشتاج باقي القصص 👇
#قصص_واقعيه_لهدير_ابراهيم ♡
*********************
قد يقول احدهم #كلمه لا يُلقي لها بال ، ع الرغم م انها قد تُغير م حياة انسان .... !
كل واحد فينا وليه قصه مختلفه او متشابهة الاحداث ، بس الاكيد ان وقت م بنقعد نفكر ازاي كل دا حصل بنتعجب كتير وبنؤمن اكتر بالله وبرحمته وان ليه حكمه في كل شئ ، وانا اللي حصل معايا في حياتي من اعجب ما مريت بيه ؛
انا كنت بنت #عاديه جدا ، علاقتي بربنا كانت غريبه ، يمكن كنت بصلي احيانًا بس مش اللي هو التزم في الصلاه واداوم عليها ...
من ثانوي كنت بحب اوي اشوف منتقبات ف الشارع ، وكان بيبقى نفسي حقيقي اروح اسلم عليهم وبس ، رغم اني معرفش بنت منتقبه معرفه شخصيه خالص ، ولا في عيلتي منتقبات .. بس كنت بتكسف جدا اوقف اي منتقبه اسلم عليها كنت بتوقع انها ممكن تقول ايه الهبله العبيطه دي وتفتكرني مجنونه !!
لوقت م دخلت الكليه ، م سنه اولى وكان في ف القسم بتاعي مجموعة بنات منتقبات ، في ناس كانت لما بتشوف تجمعهم سوا بتضايقهم بالكلام وتستظرف عليهم ، وانهم شايفينهم بوبعات وعفاريت ، بس سبحان الله انا كنت كل مره اشوفهم فيه كنت ببقى هموت واروح اتكلم معاهم ، سنه اولى كامله عدت ومجاتليش ابدًا الشجاعه اني اروح مجرد بس اني اسلم عليهم ، كنت بحس ان ليهم رهبه فظيعه ..
في اجازة اولى كليه اخدت القرار اني خلاص هروح اتكلم معاهم ، واطلب منهم انضم لصُحبتهم خاصةً اني كنت مُقله في عدد الصحاب ، كمان كنت قررت اني هاخد وقفه مع نفسي واني لازم اقرب من ربنا ، احنا برغم كل شئ في مجتمع متدين ، حتى لو في الظاهر بعيد عن ربنا والتدين ، بس معظمنا قلوبهم جواها شغف وعشق وتمني للقرب اكتر من الخالق ...
ارتاحت جدا لقرار اني هكلم البنات ، وعيشت طول الأجازه احلم واتخيل علاقتي بيهم ،اتخيل دهشتهم اول م يلاقوني داخله مش بس اسلم عليهم دا انا كنت هموت واخد كل واحده فيهم في حضني واقولهم الله بجد شكلكوا حلوووو اوووي ، تخيلت انهم ممكن يشوفوني باردو مجنونه ، بس كنت بضحك من قلبي ، واتخيل نفسي وخطواتي معاهم للقرب م الله ، كنت بدعي ربنا كتير انه يقربني ليه ويرزقني صُحبه صالحه تاخد بإيدي اليه ، ومكنتش شايفه ان فيه صُحبه صالحه افضل م البنات دي ... مرت الاجازه كامله وكنت مستنيه اول يوم الكليه وكأنه اول يوم العيد ، حتى اني كنت اشتريت لبس واسع وطولت الحجاب اللي كنت لبساه ، واستعديت للقاء ، واول م وصلت لمكان تجمعهم لقيت منهم 3 بنات بس وهما اللهم بارك عددهم كبير ،
بس قولت مش مشكله مش كل الناس بتنزل اول يوم كليه وانا اللي مستعجله بس ، وقولت يمكن قلة عددهم تخليني اتجرأ اكتر اني اتكلم معاهم ، واسيب ليهم مهمة تعريفي ع الباقي منهم ،
طول الخطوات البسيطه اللي كانت بتفصلني عنهم كنت عايشه حلم جميل ، ودقات قلبي كل مدى بتزيد ، دا انا رايحه لاكتر بنات ملتزمه ف الكليه كلها ، البنات اللي هتاخد بإيدي لربنا وحياتي هتتغير وهيكون ليا صحاب اشكي ليهم واتحامى فيهم واطمن في قربهم ....
كان باين من شكلهم انهم بيضحكوا وبيهزروا ، بس اول م وصلت عندهم ووقفت قدامهم نظرتهم اختلفت واتعدلوا في جلستهم ، منتظرين اني اتكلم ، بس انا حسيت ان لساني اتربط ،
مش عاوزه اسرد تفاصيل الموقف كله لانه بيسبب قبضه لقلبي ، بس بإختصار #اترفضت م البنات ، ومش بس كدا في بنت فيهم قالتلي جمله حتى الآن بتعجب اي شيطان تملك من لسانها وخلاها تنطق بيها ف الوقت دا !!
قالتلي : انتِ متخيله اننا ممكن نقبل نضيف لينا واحده زيك !؟ هو انتوا معندكوش مرايه ف بيتكم تشوفي نفسك فيها !؟
بلعت كل كلامها دا وقولتلها ان انا نفسي جدا اكون زيهم ، وبحاول ادور ع حد ياخد بإيدي لربنا ، ايه المشكله في كدا !؟
قالتلي بتعجب : انتِ تكوني زينا !؟ ربنا مش ممكن يساوي بين بنت كانت قريبه منه طول عمرها وواحده جايه بعد م عملت كل الذنوب تقول خلاص كفايه كدا بقى واروح اقربلي منه يومين قبل م اموت !!
قولتلها : هو انتِ م اول م اتولدتي وانتِ متدينه !؟ كلنا بنغلط ..
قالتلي : ايوه انا اهلي كلهم ملتزمين وغلط عن غلط يفرق ، ومش ممكن نتساوى ابدًا مع غيرنا من اللي بيعصوا ربنا ( حسستني انهم شعب الله المختار ف الارض واحنا ملناش اي تلاتين لازمه وم الاخر كدا داخلين النار ، او لووو دخلنا الجنه ف احنا هنكون في اقل درجات الجنه وليهم هما الدرجات الاعلى )
قالتلي انتِ طلبتي صداقتنا واحنا رفضناها في حاجه تانيه !؟
بصيت ع البنتين التانيين ، لان دي بس اللي كانت بتتكلم ، وكان سكوتهم ابلغ دليل ع انهم موافقينها ف الكلام ..
وانتهى الحلم بصدمه وكسرت نفس .. ورجعت لصاحبتي اللي كانت تعتبر مقربه مني ف الفتره دي وحكيتلها اللي حصل وانا مندهشه واستنيت انها تغلط البنت وتجبر بخاطري حتى ، لقيتها هي كمان بتقولي انتِ اتجننتي يا بنتي مش لاقيه غير دول وتعرضي عليهم صداقتك وتقربي منهم ، دول يعقدوكِ في كل حاجه ، واكيد مفيش ع لسانهم غير كلمة #حراااام ، قولتلها اني نفس اقرب من ربنا ومش عارفه ايه الخطوات ،كنت محتاجه حد يدلني حتى ع خطوتي الأولى !!
صاحبتي اعتبرت كل كلامي درب م دروب الجنان ، وقالتلي ان القرب من ربنا م هو الا صيام وصلاه وبس ف مش محتاجه كل التعب ولا التفكير دا ، بس حتى لو فعلا القرب منه ف الصيام والصلاه بس ف دا مش سهل خالص علينا ع اعتبار اننا لو صلينا الفروض كامله في يوم بنعمل فرح وبيكون عمل تاريخي وتاني يوم بنسقط فروض وهكذا ،
وبالنسبه للصيام ف هو شهر رمضان بس وبنعد من اول يوم علشان العيد يجي ونرجع لعادات كل واحد فينا الصباحيه زي شرب القهوه والنسكافيه وغيرهم ، حتى صلاة التراويح فيه بالنسبالنا كانت نوع م جلسات الغيبه والنميمه للأسف ..
ف فين هنا سهولة القرب ع اعتبار انه صلاه وصيام وبس !!!؟
ČTEŠ
قصص واقعية (لهدير ابراهيم)
Spirituální^-^ صلوا علي حبيب الله^-^ قصص واقعيه بسرد الاشخاص الحقيقين لهذي القصه اكيد كتير وهو داخل يقراء عارف من هدير وايه هي قصصها قصص منها من يبهرنا ومنها من يجعلنا نحمد الله ومنها من تشعرنا بالسعاده والامل جميهم اشخاص تعلقو بالله لينعمو ^-^صلوا علي حبي...
