قصص واقعية (لهدير ابراهيم)

فاستجاب

صلوا علي من جلس علي ركبتيه يواسي طفلا مات عصفوره

#################################

#فاستچاب ❤

كل #قِصة وصلتني اتعلمت منها كتير جدا ، لكن دي بالذات جمالها بالنسبالي انها اديتني #يقين اكبر بإن مفيش #مستحيل مع ربنا وانه بيسمع دعواتنا ومطلع ع كل اللي في قلوبنا ، واكيد #هيستجيب لكل ما فيه خير لنا ولقلوبنا !!

هاشتاج باقي قِصصنا 👇
#قصص_واقعيه_لهدير_ابراهيم 🌹

🍁🍁🍁🍁🍁🍁🍁🍁🍁

عاوزه اقولك من البدايه اني بحب قِصتي جدا بكل تفصيله صغيره فيها بكل ألم ووجع مريت بيه حتى !!
ندخل في الاحداث ومش هطول عليكِ ؛
انا بنت وحيده اتوفت والدتي بمرض السرطان وانا عندي 13 سنه ، والدي اتجوز واحده تانيه وانا عشت مع جدتي لأمي وبعد وفاتها اتنقلت للعيش عند خالي ...
والدتي الله يرحمها علمتني #الصبر ، رغم صغر سني الا ان تجربتي معاها في فترة مرضها كونت جزء كبير من شخصيتي ،
كانت أمي لما تشوفني ببكي تقولي افتكري دايما ترددي – ربي اني مسني الضر وانت ارحم الراحمين ، لا حول ولا قوة الا بالله ، انا لله وانا إليه راجعون – لآخر نفس في حياتها كانت بتوصيني بإن منساش الكلام دا ابدا واني الجأ لربنا في كل شئ ، هي كانت مدركه تماما للي هيحصلي بعد وفاتها الا انها كانت دايما تقولي افتكري #لن_يضيعنا_الله ....

حياتي مع جدتي كانت مُريحه نوعًا ما ، كنا عايشين في شقتها انا وهي لوحدنا ولأني كنت لسه صغيره كان معظم اكلنا بنشتريه جاهز ،  بعد وفاتها طلب خالي من والدي اني اعيش معاه الا ان والدي رفض ، خالاتي الاتنين رفضوا تماما وجودي واختاروا اني اعيش عند خالي بما ان عنده بنتين قريبين مني في السن ،
في الفتره دي كنت في ثانوية عامة ، مريت بأحداث صعبة جدا لدرجة اني فعلا استغربت اني #نجحت حتى لو بمجموع قليل ودخلت الجامعة ،
حياتي عند خالي كلمة بشعه دي لا تمثل شئ بالنسبة للي شوفته ، كنت عايشه حياه اقرب لحياة سندريلا ومرات أبوها وبناتها ، الا ان الاختلاف هنا كان في وجود ناس هي اللي بتساعد في عمل الاكل وتنضيف البيت ودا نظرًا لحالة خالي الماديه الميسوره ، اللي الحمد لله كانت في صفي جدا ،
بس كانت معاناتي من نوع مختلف ، كانت مرات خالي بتضايق مني وشايفه ان وجودي هيوقف حال بناتها رغم اني مش جميلة !!
مش قادره اعرف تحديدا ايه اسباب عدم تقبلها وجودي في بيتها ، الا ان بصراحه خالي كان بيعاملني كويس طبعا من غير علمها ، انا مقدره جدا انه مكانش ينفع يختار انه يقف في صفي مقابل زوجته وبناته ، بس شوفت منها ومن بناتها ايام صعبه جدا ،
افتكر مثلا مره اتخانقت معايا خناقه جامده جدا لدرجة انها حلفت عليا اني مش هبات في البيت اليوم دا ونزلتني اقسم بربي ببيچامة النوم ، قعدت ع السلم اعيط ومش عارفه اروح فين ، بعد شويه طلعلي خالي وألقى اللوم عليا أنا للأسف وفضل يقول ان انا اللي عصبتها ووصلتها لكدا ، منطقتش بولا كلمه واستنيت اننا ندخل الشقه لقيته بيقولي هنوديكِ تنامي فين للصبح !!