قصص واقعية (لهدير ابراهيم)

اعظم شخص في حياتي

صلوا علي من جلس علي ركبتيه يواسي طفلا مات عصفوره

################################

#اعظم_شخص_بحياتي ♥

القِصه دي لسه قرآها انهارده الصبح ع الرغم انها عندي م فتره ، شدني ليها اخر مسج وان صاحبتها حذفت الاكونت اللي بعتتهالي منه مش عارفه ليه بالرغم اني عيطت اكتر م مره وانا بقرأها وشايفه ان الرساله اللي فيها #عظيمه ومشرفه جدا ومفيهاش اي حاجه مُخجله ... ولأني مش تواصلت معاها ف المسجات واكيد هي متابعه وهتشوف القِصه ، كتبت كل حرف من كلامها واي رد كنت هقولهولها ..
وهسيبكوا تحكموا بنفسكوا ، ومتنسوش
#هاشتاج باقي قِصصنا 😉👇
#قصص_واقعيه_لهدير_ابراهيم

***********************************

ازيك يا هدير .. بصي انا مش عارفه اللي هقولهولك دا كتبته ليه دلوقتي !؟ أو ليه هقولهولك انتِ بالذات رغم ان ليا اصحاب كتييييير عندك ومتابعينك وممكن يعرفوا انها قصتي ، بس بالنسبالي عادي وهيكون #فخر ليا بس الفخر الأكبر هيكون لما اوصل لحاجه معينه فعلا هتخليني احكي الحكايه دي قدام العالم كله وبكل فخر وعزة نفس .... !!

بصي يا ستي انا #مهندسه عندي 25 سنه الحمد لله ع قدر من الأخلاق والالتزام ...
اسرتي عباره انا اب عمره 78 سنه تحصيله ف العلم كان محو اميه ، وام عمرها 67 تحصيلها ف التعليم المدرسي #صفر ومش بتعرف حتى تكتب اسمها !!
حصيلة بقى تربية وكفاح الاتنين دول كان 8 ابناء ( 4 اولاد منهم اتنين مُدرسين وواحد إمام وخطيب والاخير مهندس ،
و 4 بنات الكبيره ممكن نتيجه للمرحله اللي مروا بيها للاسف مكملتش تعليم واللي بعدها دبلوم وبعدين بنت مُدرسه وانا كنت الطفله الاخيره للأسره دي وبفضل الله اتخرجت م كلية الهندسه )

تعالي احكيلك ازاي #الراجل_العجوز دا اللي كان لا يمتلك م الدنيا شئ قدر يوصل لأبنائه الثمانيه لبر الأمان ، مش بس ف التعليم لا كمان ف التربيه والقرب م ربنا ....
ابويا تصميمه ع تعليمنا كان ناتج ع انه وهو صغير اتحرم م انه يكون زي اي طفل من حقه #يتعلم  ويدخل المدرسه ..
طفل اتسحب ملفه م المدرسه اول يوم وامه رايحه توديه المدرسه بسبب رفض ابوه لتعليمه بسبب #الأرض !!
متخيله طفل شايف قدام عينيه أمه وهي بتتحايل ع مدير المدرسه علشان يقبل ملفه ويرفض بسبب رفض الأب تعليم ابنه لانه شايفه ف الاول والآخر فلاح التعليم مش هيفرق معاه ولا هيفيده ف حاجه ، وكأن كُتب ع جبهة اطفال الفلاحين عبارة لا للتعليم !!
طفل اتحرم م الشخص الوحيد اللي كان حنين عليه وبيصبره ع مُر الحياه ، طفل فقد أمه وهو لسه بيعبر عُمر الثالثة عشر م حياته !!
وبالرغم م كل دا وم قسوة ابوه كان #بار بيه وبيراعي ربنا فيه وعمره م قدر حتى يرفع عنيه فيه او يرفع صوته عليه ...
بس تخيلي شخص عاش حياته بكل المحيط بيه وفقدان امه ، بالتأكيد كان تأثيره كبير جدا عليه ...
الطفل دا كبر وعاش بحلم انه يتزوج ويحقق حلم عمره الاكبر وهو ان ولاده كلهم يتعلموا ويشوفهم م احسن الناس ....
الراجل دا اقسملك ورب العزه كان بيوصل اوقات كتير انه ميكونش معاه #ثمن العيش اللي هيجيبوه الصبح للفطار ، لانه لم يرث اي شئ عن والده غير البيت اللي كنا عايشين فيه ، واخوه الله يرحمه ويسامحه كان حرفيًا ياكل حق اليتيم ...
تعالي احكيلك البيت دا كان عامل ازاي ؛
بيت مفيهوش بلاط ولا محاره ولا سقف حتى ، كان سقفه عباره عن #عريشه عباره عن جريد ونايلون يعني حتى مش سقف خشب ،
كان سريرنا هو الأرض لان مفيش ف بيتنا غير سرير واحد بس ،
بيت لا فيه تليفزيون ولا تلاجه ولا بوتاجاز ولا مراوح ولا اي حاجه من الحاجات اللي تعتبر م اساسيات اي بيت ...
كنا بنتغطى ببطاطين ملمس السجاد اهون من ملمسها ...
بصي زي م خيالك يوصل وصليه واكتر ....
#الأكل بقى كان يووووم م يبقى ف بيتنا #لحمه كانت بتبقى عباره عن نص كيلو ، ومن النوع اللي تسويته ممكن تاخد اليوم كله ع م يستوي ، وحتى دخول اللحمه بيتنا محصلش الا بعد م اتنين م اخواتي اتجوزوا واصبح تقسيم النص كيلو دا ع 8 افراد !!!
عارفه احساس الطفل اللي يجي يوم السوق يشتهي فاكهه معينه ومحرم عليه حتى انه يلمسها ، عارفه احساس ان كل الأطفال تاخد مصروف وانتِ ك طفله عزة نفسك تمنعك انك تقعدي مع اصحابك علشان ميقولوش عنك انك متملكيش حتى المصروف ...
عارفه احساس ان فطار اسره بيكون عباره عن فول بس لان مفيش فلوس تكفي انك تجيبي جانبه حتى طعميه !!
احساس ان يجي يوم المدرسه وانتِ مضطره تكملي السنه بلبس السنه اللي عدت واللي قبلها واللي قبلها واللي قبلها ،
احساس انك تشوفي ابوكِ مديون ويادوب الفلوس اللي بتطلعله  بيسدد بيها ديونه !!
احساس انك ك طفله يجي يوم العيد عليكِ وانتِ واخواتك مفيش عندكوا حاجه اسمها لبس العيد زي باقي الاطفال ...
كنا اطفال صغيرين اه بس الهم شيلناه م صُغرنا لدرجة اننا كنا نجيب ارخص الكراسات اللي كان بيبقى ورقها اسمر وكنا نتحجج لاصحابنا انها احسن وخطنا فيها حلو ،
كنا نجيب ارخص الأقلام ، كنا بنقطع م الكراسات الورق المكتوب فيه ونكمل السنه الجديده باللي فاضل فيها ، وما ادراكِ م نظرة المدرسين وجبروتهم ، تريقه واستهزاء ، بس كان في باردو اللي بيحترم وبيقدر وكان همه مستوى الطالب اللي قدامه وبس ...
مرينا بظروف صعبه كتييير  ف حين ان ابويا اقسم بالله كان بيبقى عاوز يجيبلنا اغلى حاجه بس كان لا يملك شئ ، كان شايف فينا احنا #ثروته وجنته وعوضه ، كان مجرد م يملك فلوس كان بيحاول يجيبلنا بيها كل اللي نتمناه ،
بس عارفه كل دا كان بيهون لما تعرفي ان ابوكِ كان بيفحت ف الصخر علشان يعلمني انا واخواتي ويربينا تربيه صح ...
ابويا وامي كان حلم عمرهم زي اي مسلم يزوروا بيت ربنا ، بس كل الظروف بتقول #مستحيل ، واحد مش معاه مصاريف شهر قدام ، هيجيب فلوس لـ حج او عمره ازاي ومنين !!!
بس هقولك ان واحد كان كل مبتغاه يوصل ولاده لبر الأمان ، أب بسببه قربنا من ربنا جدا وكان هو سبب ثقتنا فيه ، هو سبب اننا نحمده ف الضراء قبل السراء ، هو السبب ف اننا كبرنا وعندنا عزة نفس قويه ...
ابويا كان ممكن يقيم الثلث الاخير م الليل كله ، ولازم يصلي الفروض كلها ف المسجد والفجر ف معاده ،
ابويا كنت بشوف فيه كتير م صفات النبي او المسلم الحق ومنها #الصبر ع الابتلاء ، ومعاملته واحترامه لأمي اللي كان بيعاملها ك بنته الصغيره ، اللي بيحرص ع قربها وطاعتها لربنا ، وصلاتها اللي كان بيسألها عنها قبل اي حاجه ،
وبالتالي كل دا ساعده ف تربيتنا ويكفي اننا ولله الحمد برغم كل الظروف اللي مرينا بيها بفضل القرب م ربنا ووجود اب عظيم جانبنا زي ابونا كبرنا مش مشوهين نفسيًا ، بالعكس اتعلمنا كتير م اللي مرينا بيه ، وبقت غايتنا نرد للشخص العظيم دا ولو جزء بسيط من فضله علينا ...
نتيجه لكل اللي فوق دا ونتيجة الصبر والاحتساب كل اللي ذكرته دا اتبدل تماااما بفضل الله واتغيرت حياتنا ..
اولاً بيتنا دلوقتي بالنسبه لزمان ف هو قطعه م الجنه ..
ثانيًا ابويا شافنا بعينه واحنا كل واحد فينا مستقر ف بيته – عدا انا لاني الصغيره – بعد م كان هم ابويا كله هيجوزنا ازي ومنين !!
وشافنا ولله الحمد ناجحين ف حياتنا العمليه كمان وكل واحد فينا بيبني ويعمل لمستقبله ..
ثاااالثًا بقى كان مكافأة ربنا للأب العظيم دا والأم اللي كافحت واستحملت معاه ، كانت مش بس عُمره لا وكمان عملوا حِج 😍
ابويا يوم م فكر يطلع عمره ولا حج مطلعش غير وفي ايده الست اللي استحملت كل اللي مر بيه ف حياته بكل حب وصبر ♥

دلوقتي احنا بفضل الله بناكل احسن اكل وعندنا من خيرات ربنا الكتير بفضل الله .. عندنا اللي ساترنا ورافع راسنا قدام الناس ، واللي كل الناس بتحسدنا عليه واللي محدش كان متخيل ان فلاح ولاده يتعلموا كدا ...

ابويا هو جنة الله ع الارض بالنسبالنا يا هدير .. عارفه مره قالي – لو هبيع م جسمي علشان اعلمكوا هعملها – !!
ابويا دا اللي انا ماشيه ببركة دعاه ورضاه عني ...
ابويا دايمًا يقولي ان شهادته هي شهادتنا انا واخواتي .. حتى اني يوم #حفلة تخرجي قولت فيه #شِعر مخصوص علشانه ، جزء منه كان
– صبرك دا جبل يا احن اب
الكل يعشق اباه ولكني اعشق تراب قدميه –

ابويا مصبرش سنه ولا اتنين ، دا صبر صبر غير عادي ف الزمن دا ، لا اشتكى ولا مل ولا اتذل ولا خضع لغير الله كان مشتكاه الوحيد لربنا وبس ومناجاته ...
يمكن دعوة وامنية والدي دلوقتي هي ان ربنا يرزقني الزوج الصالح ، وانا كل امنيتي ربنا يرزقني زوج مثل أبي ...

قِصتي واقعيه .. اتمنى لو شوفتي فيها #رساله لحد تنشريها ، وتدعيلي يجعلني قُرة عين ليه ، ولو نشرتيها تطلبي منهم يدعولي ويدعوا للي رباني لانه يستاهل اووووووي ويستاهل فعلا احسن حاجه ف الدنيا ..
عاوزه اقولك ان لما بتضيق بيا الدنيا بجري عليه يدعيلي ، ولو احكيلك ع مواقف كتير تأكدت منها ان دعواته مستجابه هتستغربي جدا ...
وربنا يكرمك يا هدير وبحبك ف الله جدا ....

#ابويا_اعظم_بطل_بحياتي ❤

&&&&&&&&&&&&&&&&&&&&&&&&&

صاحبة القِصه اول مسج بعتتهالي ان اغلب او كل قِصصي ليها علاقه #بالزواج ف بعتتلي قِصتها وفي ظنها انها بعيده كل البُعد عن الزواج ،
ضحكت جدااااا بعد م خلصت قراءتها لان اول حاجه خطرت ع بالي اني كنت بقرأ قصة واحد مش بس أب لااا دا زوج عظييييم ،
زوج اقدر اقول عنه وبكل فخر انا كمان اني اتمنى #زوج_صااالح زيه ..
حبيبتي صاحبة القِصه ، رغبة والدك وامنيته حاليًا زوج صالح ليكِ .. امنيتك انتِ نفسك #زووووج زي والدك ...
#الزواج بالنسبالي وخاصةً لو م زوج صالح ف هو بدايه لكل شئ جميل ممكن يمر بحياتك ....
انتِ مهما كان حواليكِ م ناس صالحين ف وجود زوج صالح بجوارك بالدنيا ومافيها ....
حبيبتي انا بكتب وانا متخيله والدك قدام عيني ، متخيله الزوجه الصالحه الصابره اللي ربنا رزقه بيها وخلاها ف ضهره تعينه ع مر الحياه وتقويه ...
متخيله مكافئة ربنا للاتنين انهم وصلوا للعمر دا وهما مع مازالوا مع بعض عاشوا الحياه سويًا بمُرها قبل حلوها ...
متخيله صوره متكامله م زواج اللهم بارك ناجح ، اي واحده فينا تتمناه ....
حبيبتي احبك الذي احببتيني فيه ، وانا كمان احببتك ف الله ...
واللهم بارك في عُمر والديكِ ورزقهم ع صبرهم الفردوس الأعلى م الجنه ..
ورزقنا من يأبي ان يذهب الا وهو مُمسك بأيدينا الى بيت الله الحرام ، ويظل بجوارنا حتى بوصولنا #أرذل العمر ♥

#احبكم_في_الله ❤❤❤

###################################

صلوا علي الحبيب المصطفي