قصص واقعية (لهدير ابراهيم)

القسم علي الله

صلوا علي من جلس علي ركبتيه يواسي طفلا مات عصفوره

###############################

#القسم_على_الله

معتقدش إن في إحساس في الدنيا ممكن يضاهي إحساس البكاء وقت #الجبر وإنه اخيراً استجاب!!
🌸🌸🌸
شوفت حد مشير بوست من عندك عن فصل الدعاء واستجابته لقيت نفسي من غير تفكير ببعتلك رغم ان دي أول مرة أدخل صفحتك..
من سنتين كان عندي 25 سنه ومش متزوجة، عارفة ان السن دا يُعتبر صغير لسه على كلمة #عانس بس في البلد اللي انا منها بيعتبروا اللي وصلت لسن ال 20  عانس وكأنها وصلت لل30 واكتر..
ومن أول ما خلصت جامعة تحديدا وبدأوا يعيشوني في جحيم مش بس أنا لا وأهلي كمان وكانوا الجيران يحرقوا قلب أمي عليا بتأخير زواجي..
مكنتش بسلم من كلامهم في الرايحه وفي الجايه
لحد م كنا في رمضان وبعد صلاة التراويح الشيخ كان بيتكلم حوالي ربع ساعه، وفي اليوم دا اتكلم عن #القسم على الله في الدعاء!!
أنا أخدت الكلام منه ونفذت ع طول وأقسمت على الله اني مخرجش من رمضان دا إلا وأنا مكتوب كتابي..
اللي جانبي سمعتني تقريبا من انفعالي كان صوتي عالي شويه..المهم قعدت تضحك وتقولي ي شيخة طب ادعي حد يدخل بيتكوا حتى مش داخله ع كتب كتاب ع طول(صحيح بعد ما شطح بطح)
قالت الكلام دا بصوت عالي وضحكت كل اللي كانوا في المسجد عليا
رد فعلي بقى اقسملك بالله ما كنت متخيله اني اعمله اصلا
انا لقيت نفسي بقولها اني واثقه ومتأكدة ان ربنا مش هيرد قسمي ومش هدخل من باب المسجد هنا غير ودبلتي في ايدي ومكتوب كتابي..وسيبتهم ومشيت..

طبعا واخده الطريق كله للبيت عياط وع ما افتكرت الكلام اللي قولته ندمت ع تسرعي واندفاعي وانا بس اللي خسرانه..خسرت صلاة التراويح اللي كانت بتخفف عني كتير ومش بس كدا لا دا انا اصبحت مادة دسمه للتريقه اكتر..
بس تعرفي الغريب ان دا اداني دافع اكبر #للدعاء.. طبيعي كنت بدعي بس م اليوم دا كان دعائي مختلف تماما وكان عندي يقين رهيب والله العظيم انه هيستجيب!!
اليوم دا كان 5 رمضان.. فضلت ادعي ربنا وكل م كان يمر يوم كنت ازود في الدعوات وألح فيها وازيد م قسمي ع الله واني عندي يقين وحسن ظن فيه،
وكنت كل م ايأس اذكر نفسي انه مش هيستجيب الا باليقين واطمن قلبي اكتر ان الحمد والشكر لله إن الإستجابة بإيد رب الناس مش الناس نفسهم لانهم بشعين إلا من رحم ربي..
مر بعدها بالظبط 10 أيام وكان في بيتنا #العريس !!

شوفي بقى تدبير وترتيب ربنا اللي مفيش حد فينا بيكون عامل حسابه او متوقعه
الشخص اللي اتقدم دا يبقى أخو واحدة صاحبتي من أيام الكلية واعرفه كويس بس ولا مره خطر ع بالي انه يدخل بيتي في يوم لأنهم تبارك الله مستوى اجتماعي عالي وكمان من المدينة وانا من الأرياف(دي كانت وجهة نظري ان قليل لو حد م اهل المدينه ارتبط م الريف)
المهم سألته وانا لسه تحت تأثير الصدمه ايه اللي خلاه يتقدملي دلوقتي؟
قالي انه مسافر بره مصر وكان نازل اجازه يخطب والموضوع م تمش ومامته أثرت يشوف بنت تانيه ويخطب قبل م يسافر
قولتله لا مش قصدي..اقصد اشمعنى انا ؟!
قال انه قدراً من حوالي أربع أيام شافني وانا بشتري حاجات وكان مع اخته وقالتله بسرعه يقف علشان تسلم عليا بس كنت أنا مشيت وسبحان م خلاها تهزر معاه وتقوله طيب م تخطب هاجر.. قالها هي لسه م اتخطبتش؟! لو ليكِ كلام معاها عرفيها وهاتي رقم والدها..

اصلا لما هي كلمتني اقسم بالله كنت فكراها بتهزر وعامله مقلب فيا ولحد م قعدت معاه مكنتش لسه قادرة افوق م صدمة ان كل دا بيحصل بجد ومش حلم..
والأدهش بقى إني لقيت قسمي ع الله بيتحقق بدون أي تدخل مني ولقيته بيقترح ع والدي ان يبقى في كتب كتاب ع أساس اني اعرفه ويعرفني نوعا ما وانه هيقدر يجهز ورقي ف لما يرجع نتجوز واسافر معاه ع طول..
متخيله اصلا ان هو اللي كان عمال يقنعني ويواسيني اني مش هعرف اعمل خطوبه كبيرة علشان احنا في رمضان وهو طيارته تاني يوم العيد واننا نكتفي بتجمع عائلي لكتب الكتاب..
كان متخيل ان عياطي بسبب اني مش هعفرح زي باقي البنات ومكانش متخيل اني ببكي من ان مفيش اصلا بنت في الدنيا في اللحظة دي في فرحتي وفرحة قلبي.
ومن اليوم دا بقت علاقتي بربنا وبالدعاء قويى جداً واتعلمت من وقتها اليقين وحسن الظن في الله..

ربنا رضاني وجبر كسر قلبي ورجعت فعلا لصلاة التراويح وانا دبلته في إيدي ومكتوب كتابي ع شخص بلدنا كلها كانت موهومه بيه وبأهله.. واتغيرت نبرتهم ليا وبقوا يرددوا صامت صامت وفطرت ع فيل 😃

ربنا مخيبش ظني ولا رد إيدي اللي اترفعتله بالدعاء وحققلي اكتر من اللي كنت بتمناه رغم اني بردو مش الشخصيه اللي مش بتقوم م على سجادة الصلاه
بس اللي حصل معايا غير مني تماما وغير علاقتي بربنا الحمد لله.. علشان كدا حبيت اشارك معاكم بما اننا في رمضان وفضل دعوات رمضان واليقين.. وربنا يرزق كل بنات المسلمين يارب وآسفة لو كان كلامي مش مترتب او رغيت كتير❤

🌸🌸🌸🌸🌸🌸🌸🌸🌸🌸🌸🌸🌸🌸🌸🌸
عجبتني جداا قصة انهاردة خاصة انها جديدة من نوعها اني انزلها عندي خاصة #القسم ع الله..
انا كنت اعرفه طبعا بس مخطرش ع بالي ولا مره استخدمه.. وكنت عارفه بردو ان م اساسياته ان المقسم ع الله لازم يكون عنده ثقة ويقين وحسن ظن في الله وانه مقر بكونه ضعيف وانه مش بيلزم ربنا بشئ..
ومثال عليها قول رسول الله صلى الله عليه وسلم :
رب أشعث أغبر مدفوع بالأبواب لو أقسم على الله لأبره»
وفي موقف تاني «إن من عباد الله من لو أقسم على الله لأبره»
ف هرجع اكررها تاني ان السر في الإستجابة ببساطة هو #اليقين وحسن الظن في الله..

الجميل إن قد يكون كل دا اصلا مترتبلها باللحظة وبالدقيقة بس ربنا أراد انها تسمع كلام الشيخ ف تدعي..واراد انها تتمسك بالدعاء اكتر واليقين وحسن الظن ف بعتلها البنت اللي رمت كلام عليها ضايقها
كل دا دليل ع إننا لازم فعلا ناخد #بالأسباب وكان من هنا الاخذ بالاسباب هو الدعاء واليقين والتوكل ع الله🌺
ربنا يرزقنا وإياكم اليقين وكل جميل ويرزق بنات العالمين أزواج صالحين يارب العالمين ❤

#من_الرسايل
#حكاوي_هدير
#هدير_ابراهيم

صلوا علي المصطفي