قصص واقعية (لهدير ابراهيم)

أهل الله وخاصته

صلوا علي من جلس علي ركبتيه يواسي طفلا مات عصفوره

###############################

#أهل_الله_وخاصته!!

بنت بعتتلي المسج دي من شويه:
" مش عارفه هتشوفي رسالتي دي ولا لا بس بدعي من ربنا انك تشوفيها،
كنت بسمع كتير جُمل زي "أهل الله وخاصته أو أهل القرآن" ومكنتش ببقى فاهمه معناهم لحد ما حصل معايا الموقف دا
انا جدتي تبارك الله من الناس الكبيره اللي مكملتش تعليمها إلا إنها كانت مصممه ع قراءة القرآن بعد كل صلاه وكانت تقرأ بصوت عالي وتقعدني جانبها انا او اي حد موجود في البيت بحيث يصححلها أي خطأ تقع فيه رغم انها اصلا م كتر سماعها للقرآن اقدر اقولك انها بنسبة كبيره كانت حفظته وبالتجويد كمان..
هي عندها 71 سنه بس اقسملك بالله ولا مره حد فينا ساعدها تقف علشان تتوضى مثلا
بالعكس كانت لوقت قريب بتنزل تصلي في المسجد اللي جانب بيتنا ولما بدأت تكبر وحركتها تقل كانت بتروح المسجد من قبل المغرب وترجع بعد صلاة العشاء..
ولما نظرها ضعف كانت تلبس النضاره وتحط وشها كله في المصحف وتبدأ تقرأ
نقولها ي تيته ارحمي عنيكِ، مش هيحصل حاجه لو شغلتي القرآن جانبك وسمعتيه او تقرأي غيباً اللي انتِ حفظاه
كانت ترد تقول ان #مسكة القرآن وملمسه في ايديها بالدنيا وما فيها وانها ع العكس مش متضرره خالص بالعكس دا قراءته بتنور عنيها وقلبها..
كنا بنقعد نضحك ونقول انها #بتبالغ!!

لحد م حصل موضوع #كورونا والدنيا اتقلبت وبدأنا نسمع عن قرب انهم يقفلوا المساجد..كلنا رددنا انه افضل وانها خطوه لازم تتاخد بسرعه علشان التجمعات وهنا لقينا جدتي قعدت #تبكي!
قعدنا نفهمها خطورة الفيرس والتجمعات، ردت علينا انها بتبكي ع الحال اللي وصلنا ليه بسبب #كِبر الناس في العالم كله ويا ترى إيه اللي عملناه لدرجة ان ربنا يبعت #جندي من جنوده يخلي العالم كله يلف حوالين نفسه!
وقعدت تقول يارب احنا لو كنا شفنا #الظلم بعنينا وسكتنا ف دا علشان مفيش بإيدينا حاجه نعملها بس انت مطلع وعالم اننا كنا بندعي بقلوبنا وفي صلاتنا..

منعنا جدتي تنزل المسجد م قبل القرار اصلا علشان خوفنا عليها.. هي كانت مقدره دا وساكته بس يشهد ربنا انها وقت كل آذان كانت بتبكي وكانت تيجي في الوقت اللي بتقعد فيه في المسجد وتقعد في البلكونه اللي قدامها ع طول المسجد وتقوله يا عالم الغُمه دي هتنزاح امتى وهيبقى فيا الروح ساعتها ولا لا..وتبكي.

* نسيت اقولك ان جدتي ليها طريقه عجيبه في قراءة الورد بتاعها.. هي مثلا بتقرأ 3 أو 4 صفحات بس مثلا ممكن تيجي ع اخر صفحه وتلاقي آخر آيه فيها عن الكافرين أو فيها عذاب، كانت تقول لا هقرأ اللي بعدها كمان المهم ان آخر آيه تقرأها تكون فيها رحمه أو وعد بالجنه اهم حاجه تكون بعيده عن العذاب..
وقبل يومين بالظبط من قرار قفل المساجد كنت قاعده جانبها بعد الفجر وبتقرأ #الورد بتاعها عادي من سورة البقرة وقفت عند الآية دي
"مَّا يَوَدُّ الَّذِينَ كَفَرُوا مِنْ أَهْلِ الْكِتَابِ وَلَا الْمُشْرِكِينَ أَن يُنَزَّلَ عَلَيْكُم مِّنْ خَيْرٍ مِّن رَّبِّكُمْ ۗ وَاللَّهُ يَخْتَصُّ بِرَحْمَتِهِ مَن يَشَاءُ ۚ وَاللَّهُ ذُو الْفَضْلِ الْعَظِيمِ"
وقالتلي لا هقرأ الصفحه اللي بعدها كمان.. قولتلها وانا خلاص بسقط في النوم يا تيته دي آيه عاديه متكبريش الموضوع كدا قالتلي لا وبدأت في الصفحة اللي بعدها لحد م وقفت عند الآيه
"بَلَىٰ مَنْ أَسْلَمَ وَجْهَهُ لِلَّهِ وَهُوَ مُحْسِنٌ فَلَهُ أَجْرُهُ عِندَ رَبِّهِ وَلَا خَوْفٌ عَلَيْهِمْ وَلَا هُمْ يَحْزَنُونَ"

قولتلها مبسوطه كدا وارتاحتي؟!
قالتلي الحمد لله فضل ونعمه..
ودخلنا ننام وصحينا كلنا تاني يوم إلا جدتي!!💔

مش قادره اكتب والله وعماله اعيط بس حاسه اني وحشه اوووي.. جدتي وكأنها كانت بتهيأ نفسها كل مره إن لو دخلت تنام وماتت يكون آخر كلامها هو كلام ربنا.. وانا اللي كنت شيفاها ست كبيره ومعقده الدنيا ع نفسها وان الدنيا بسيطة.. بس الحقيقة انها الوحيده اللي طلعت فاهمه الدنيا صح..
ومن رحمة ربنا بيها إن اتصلى عليها في المسجد ومعملناش جنازه علشان التجمعات وكلنا افتكرنا لما قالت انها سمعت من شيخ ان الجنازه #بدعه وكانت تفضل توصي والدي ميعملهاش جنازه رغم اننا كنا عارفين ان والدي بياخدها ع اد عقلها..

طلع عقلها هي اللي احسن مننا وربنا حققلها كل اللي كانت بتدعي بيه..

انا بس بتمنى منك لو شوفتي رسالتي تنزلي عندك للناس تدعي لجدتي بإن ربنا يرزقها مكانه عالية في الجنه ويهدينا ويجمعنا بيها على خير!..
🌸🌸🌸🌸🌸🌸🌸🌸🌸🌸🌸🌸🌸🌸
الله يرحم جدتك وجميع موتى المسلمين يارب ويرحمنا ويحسن ختامنا..
بس حقيقي بعد اللي قراءته دا احنا اللي محتاجين اللي يدعيلنا والله💔

#من_الرسايل💌
#حكاوي_هدير
#هدير_ابراهيم

صلوا علي الحبيب