قصص واقعية (لهدير ابراهيم)

سميع_مجيب

صلوا علي الحبيب المصطفي

################################

#سميع_مجيب !!

انا بنت كانت حياتي ماشاء الله جميلة وهادية جدا لقبل امتحانات ثانوية عامة ب 3 شهور والدي تعب فجأه جامد وحالته كانت متأخره ومن رحمة ربنا بيه شهر وتوفاه الله وارتاح من الألم ومن بعدها حياتنا اتبدلت تماما!.
عمي الله يسامحه كان شريك والدي في كل حاجه وبدل م يحس بينا احنا م لحمه ودمه وبقينا ايتام تحسيه #اتصرع والله واتحول لشيطان رجيم..
أول حاجة زوجته فضلت ورانا لحد م خرجتنا من شقتنا اللي هي في نفس العماره معاهم علشان كانت خايفة جوزها يتجوز والدتي..
روحنا بيت جدي لوالدتي ومكانش في حد بيساعدنا غير خالي الصغير كان زي ظل أمي وراها في كل حته ربنا يباركله يارب.
وانا بتبهدل كل دا وباقي ع امتحانات الثانوية شهر واحد!
دخلت في حالة يأس واكتئاب وبكاء هيستيري ف لقيت والدتي قعدت معايا مره وقالتلي ركزي في مذاكرتك شهادتك اللي هتنفعك بعدين وحققي رغبة والدك..
سألتها انتِ إزاي صامدة كدا زي الجبل..قالتلي دعاء وفضلت ورايا لحد ما حفظته وقالتلي كل م قلبك يوجعك وييأس ردديه بقلبك..وحكيتلي قِصة الدعاء..كان دعاء الرسول بعد اللي حصل معاه م أهل #الطائف وكان الدعاء:
"اللهمّ إليك أشكو ضعف قوّتي وقلّة حيلتي وهواني على النّاس، يا أرحم الرّاحمين، أنت ربّ المستضعفين، وأنت ربّي، إلى من تكلني؟ إلى بعيدٍ يتجهّمني؟ أم إلى عدوٍّ ملّكته أمري؟ إن لم يكن بك عليّ غضب فلا أبالي ولكن عافيتك هي أوسع لي، أعوذ بنور وجهك الّذي أشرقت له الظّلمات، وصلح عليه أمر الدّنيا والآخرة من أن تنزل بي غضبك أو يحل عليّ سخطك، لك العُتبى حتّى ترضى، ولا حول ولا قوّة إلّا بك" !!

ف بقيت كل م آجي اذاكر واليأس يتمكن من قلبي ادعي الدعاء وانا بفتكر قِصته وسببه.. ف قلبي يطمن
لحد م خلصت بفضل الله الإمتحانات ع خير واقسملك بالله الدعاء دا كان ع لساني في كل لحظه في الامتحان لحد وقت ظهور النتيجة ومكنتش مصدقة نفسي إن مجموعي بفضل الله يدخلني كلية #صيدلة زي م كان والدي بيتمنى..
بس للأسف شياطين الإنس رفضوا يهنونا ع فرحتنا ولقينا عمي باعت مع ناس ان والدتي متطالبش بحقنا في ورث والدي وإلا هيشكك في نسب الجنين اللي لسه في بطنها ومشافش النور 💔 ودا لأن كان في بطن أمي #ولد واحنا 4 بنات!
عمي فضل يقول للناس ان أكيد لأمي دخل في وفاة والدي وانها ع علاقة براجل غريب
متخيلة يا هدير الفُجر وصل لفين؟ #قذف_محصنات!!
وكل دا ليييه أصلا علشان مال زيادة ودنيا فانية!
وأمي مستمره في دهشتنا وفي صمودها وفي نفس دعاء سيدنا محمد صلى الله عليه وسلم..وكانت تقيم الليل كله بنفس الدعاء..
وسبحان من بيده وحده كشف الغُمة هحكيلك اللي يدهشك واقسم بالله كل حرف بقوله حصل
عمي بعد فتره تعب وكان تشخيصه #كانسر وتخيلي لما الناس كانت بتحاول تفوقه وتقوله دا ذنب ولاد أخوك ورد لليتامى حقهم علشان ربنا يغفرلك
يرد يقولهم ايه يا هدير؟
قالهم إن السرطان ربنا بيبعته للإنسان تكفير ذنوب وان مفيش حد ليه حق عنده وانه هيستحمل وجعه قوم ايه بقى ياستي ميجيش نهار تاني يوم عليه إلا وهو بين إيدين اللي خلقه..متخيله؟!!!
والناس كلها بقت تردد دا حق الأيتام اللي خده كله..
وبعد عذاب أينعم مأخدناش كل حقنا بردو بس يكفي إن ربنا كان سميع مجيب لكل دعواتنا ونقلنا من المنطقة خالص واستقرينا في مكان تاني وربنا يحفظ أمي لينا ويباركلنا في عمرها هي الأم والأب لينا وكل م نقع تسندنا هي وتقربنا من ربنا أكتر بالدعاء وان لكل دعاء قِصة
بس الدعاء اللي حكيتهولك هو الدعاء اللي ع لساني وعمري والله م دعيت بيه إلا و #استجاب..
وليا قِصة كمان مع الدعاء دا بس مستنية #العقد يتم بإذن الله وتكمل فرحتي 😊 واكيد هشاركها معاكِ ومع الناس الجميلة اللي بتقرألك..بس بصراحة مقدرتش م اشاركش في قطايف رمضان وقولت احكيلك جزء من سحر الدعاء دا في #الإستجابة لعله يكون رسالة لغيري💜
بحبك في الله وكل سنة وانتِ جميلة ورمضانك مبارك❤
🌸🌸🌸🌸🌸🌸🌸🌸🌸🌸🌸🌸🌸
أكتر قِصص بتوجع قلبي هي اللي متعلقة #بالميراث وأكل حق الأيتام وان النفوس والقلوب بتتصرع فعلا قدام الفلوس وبيفضلوا يلفوا ويدوروا ويتحايلوا ع شرع الله..
ربنا يهدينا جميعاً يارب وينتقم من كل شخص أكل خق غيره!

حبيت جداً إن في حد طلع ليه قِصة مع الدعاء دا بأنه مقرب جدا من قلبي ولما بقرأه بردو بفتكر قِصته مع الرسول عليه الصلاة والسلام وببكي..
#السيرة بتعلمنا وبتربينا وبتطمن قلوبنا❤

#من_الرسايل
#حكاوي_هدير
#هدير_ابراهيم

صلوا علي المصطفي