صلوا علي الحبيب
##############################
#الكريم_إذا_أعطى
جاتلي كذا مسج م بنات بيسألوا
يعني بجد في أمل يحصل حمل ونكون أمهات في يوم رغم ان الكل قال #مستحيل ؟
لقيت المسج دي دلوقتي لسه واصلاني حالا ف قولت اكيد هي #رسالة ربنا يطمن بيها قلوبهم..
🌸🌸🌸
السلام عليكم
ممكن أحكيلك حكايتي مع الدعاء
تزوجت بعمر العشرين
وتأخر حملي أربع سنوات مرت أول سنة كلها حزن وعياط وكشوفات وأشعات وتحاليل .. كلهاا بتاعتي وبتاعت زوجي كانت سليمة وده كان بيحيرني ويحزني أكتر كنت بقول لو إن في علة أو سبب نعرفه ونعالجه يمكن يكون أهون لكن سبحان من قال "يجعل من يشاء عقيما" حتى لو توفرت كل أسباب الإنجاب وربنا أراد إنه ميحصلش مش هيحصل
كان دكتور من اللي رحتلهم بعد أما استوفى كل الفحوصات قالنا كدة خلاص متجوش تاني مش في ايدي حاجة اقدمهالكم عليكم بالدعاء
دكتور تاني كان يقول الدنيا تمام والرحم مرسوم رسم يعني مفيش أي حاجة تمنع
"عقم غير مُسَبب"
المهم بعد أول سنة رميت الحزن ورا ضهري وسلمت لله أمري .. طنشت كلام الناس واسئلتهم وحشريتهم .. بكشف اه وبتابع طبيا لكن مش منزعجة زي الأول ولا بحسب باليوم والشهر قررت ألتزم الدعاء في كل وقت وحين والرقية وأستغفر كتير واتصدق عدت سنة وكمان سنة وأنا نفسيتي أحسن ومطمنة جدا جدا وجوايا يقين شديد إن ربنا هيرزقني بقيت كل أما أشوف الحيض كل شهر أحمد ربنا واسترجع "أقول إنا لله وإنا إليه راجعون اللهم أجرني في مصيبتي واخلفني خيرا منها" شهر بشهر ومن كتر ماربنا قذف في قلبي الرضا بقيت استحي اسميها مصيبة
كنت كل أما اسمع بواحدة حملت أفرح جدا واقول اهو اللي رزقها هيرزقني اكيد زيها
ومع كل حيض في كل شهر كنت اقول اهو بيقربني من أمنيتي بإذن الله هانت
مرت الأيام ورحت سافرت لدكتور كبير كنت استشرته ف حالتي عن طريق النت وقالي نعمل منظار نطمن
سافرت بالفعل مسافة سفر كبيرة أكتر من سبع محافظات ووصلت العيادة ويشاء القدر إن البنت السكرتيرة شدت معانا على الدخول المفروض في شروط معينة للحجز بنقولها إن الدكتور سمح لنا نيجي ف التوقيت دة وحتى ادخلي اسأليه رفضت بشدة وقالت دة نظام ومعرفش ايه
مشينا بدون كشف قدر الله وماشاء فعل رجعت وبعدها بتلات شهور بالزبط حملت سبحان الله العظيم بدون منظار أو أي حاجة
ربنا حقق ظني فيه وأكرمني ورزقني بولد بس القصة منتهتش هنا
كان ابني عمره يادوب عشر شهور وحملت تاني بس العجيبة إني مكتشفتش الحمل إلا بعد أكتر من تلات شهور
كنت مرضع وقتها وأما شكيت في حمل بسبب غياب البيريود والاعراض المصاحبة عملت تست وطلع سلبي وبعد فترة عدته وبرده سلبي ومع ذلك البيريود مش بتيجي وكل اللي حواليا اقنعوني إنها بتلخبط وتركن مع الرضاعة فسكت لحد أما ألم المعدة زاد عن الحد ورحت أكشف وفوجئت بالدكتور بيقولي في بني آدم جوة عمره أكتر من تلات شهور و رزقت بابني التاني
منح ربانية أحمد الله عليها إلى يوم موتي
أسأل الله أن يباركلي فيما رزقني وأن يمن على كل مشتاق
قولوا اللهم بارك ❤❤
وادعوا كتير .. ادعوا بقلب ويقين وحسن ظن وخدوا بالأسباب كلها وتوكلوا على الله هو الرزاق ذو القوة المتين
كل عام وانتم بخير😊
🌸🌸🌸🌸🌸🌸🌸🌸🌸🌸🌸🌸
سبحانك ياربي وعدت امبارح اني انزل قِصتين بس رجعت قولت انهارده هنزل واحده بس ونسيت ان بردو توقيت نزولها دا مش بتاعي دي رسايل من الرحمن لناس معينة ف لعل شخص واحد حتى مستنيها وسخرني انزلها دلوقتي علشانه❤
#من_الرسايل
#حكاوي_هدير
#هدير_ابراهيم
صلوا علي الحبيب
VOUS LISEZ
قصص واقعية (لهدير ابراهيم)
Spirituel^-^ صلوا علي حبيب الله^-^ قصص واقعيه بسرد الاشخاص الحقيقين لهذي القصه اكيد كتير وهو داخل يقراء عارف من هدير وايه هي قصصها قصص منها من يبهرنا ومنها من يجعلنا نحمد الله ومنها من تشعرنا بالسعاده والامل جميهم اشخاص تعلقو بالله لينعمو ^-^صلوا علي حبي...
