قصص واقعية (لهدير ابراهيم)

يا_ولي_تولى_أمري

صلوا علي رسول الله

********************************

#يا_ولي_تولى_أمري !!

لسه باقي على الحلو تكه وتكمل قِصتي بس حبيت اشارك معاكم بجزء منها
بصي ي ستي أنا بنت فتحت عنيها ع خناق بين والدي ووالدتي مش عارفه بصراحه فضلوا مستحملين بعض إزاي لحد م انفصلوا وانا في أولى ثانوي.. في بداية الانفصال كانوا بيتخانقوا مين هياخدني عنده مش حباً فيا طبعا لا دا مجرد انهم بيعاندوا بعض وخلاص..
المهم اني عشت مع والدتي لحد م والدي قرر يتجوز هنا والدتي هي كمان قررت تتجوز هي كمان😃 ورجعتني عند والدي
في الوقت دا كنت خلاص داخله تالتة ثانوي..يعني أهلي مش صغيرين في السن بس كل واحد فيهم كان بيفكر في نفسه مفيش حد منهم فكر فيا وكانوا أنانيين جدا معايا..
عشت مع والدي اللي كان اتجوز خلاص وطبعا طبعا زوجته كانت تطيق العمى ولا تطيقني..بدأت تعمل اي حاجه لمجرد انها تضايقني وصل بيها الأمر انها تزن على والدي اني اقعد من التعليم علشان مصاريف دروس الثانويه كتير واني كدا كدا مش نافعه وفلوس ع الارض وبلا..بلا..بلا...
وللأسف والدي عمل بكلامها وقالي مفيش فلوس دروس ليكي عندي روحي خدي من أمك اللي رمتك ليا!!
وهنا ربنا بعتلي ملاك الرحمه اللي في حياتي وهي خالتي اللي كانت مسافره وعايشه بره مصر ورجعت لما زوجها توفى وعلشان ليها ابن اكبر مني عايش معاها مكانش ينفع تاخدني اعيش عندها..ولما لامت والدي ع معاملته ليا وانه رافض يدفعلي فلوس دروسي شتمها وشتمني وضربني في وقالها عاوزاها خديها اصرفي انتِ عليها م انتِ راجعه من بره ع قلبك اد كدا..بصي هو قال كلام وغلط كتير.. بس خالتي يكرمها ربنا كانت بتساعدني بالفلوس من ورا أهلي وكانت دايما بتشجعني وتقولي ان خلاصي وحلي الوحيد ليا هو في تعليمي واني ادخل كلية كويسه تساعدني في المستقبل..

تالتة ثانوي كانت بالنسبالي من اسوء وابشع السنين اللي مريت بيها في حياتي..
كنت بنزل الدروس بالعافيه ومرات أبويا بتعاملني ولا الخدامه وابويا بيعاقب أمي فيا حياه بشعة بكل ما للكلمة من معنى
وكانت خالتي الوحيده اللي بتصبرني واتعلمت منها #قيام_الليل اللي فعلا لولاه كان زماني #انتحرت من زمان..
كنت اقف في الصلاه بالليل والكل نايم وافضل ادعي ربنا واشكيله حالي كله واقوله انت مطلع يارب ع اللي بيحصلي..وانا راضية بس راضي قلبي يارب واجبرني في مجموع الثانوية.. وكان على لساني دعاء مش بردد غيره "يا ولي تولى أمرى" كنت بردده بقلبي وعقلي ومتيقنة تماما ان ربنا عنده الحل والجبر والعوض..
لحد م جبرني فعلا ولله الحمد وجبت مجموع عالي وم الفرحة مكنتش مصدقه ولا حد م اللي يعرف مشكلتي مصدق مجموعي وروحت البيت بقى وانا مبسوطه ومستنيه افرح والدي بقراري اني ان شاء الله قررت ادخل #طب_أسنان بس للأسف فرحتي مكملتش ومراته قالتله هتتنطط علينا بعد كدا ومش هترضى تخدمنا! متخيله والله انها قالتله كدا لا والكارثه انه قالي اني ماليش علام بعد كدل واني طالما هعيش في بيته يبقى ع مزاجه وع مزاج ست البيت اللي عي مراته يعني..
فضلت اعيط وكلمت خالتي اللي جات هي وابنها وخدوني من البيت وابن خالتي قرر انه يعيش في شقه تانية علشان اعرف اقعد براحتي مع خالتي..
والحمد لله دا اللي حصل فعلا وقدمت في طب أسنان وحاليا في سنة تالتة❤
حصل مشاكل طبعا كتير ومرات والدي طلعت عليا سمعة مش كويسة واني قليلة الادب وقليلة الأصل واني مرافقه ان خالتي وعك كتير.
بس يمكن كلامها دا بسببه حصلت افضل قِصة حب بالنسبالي ودي اللي هبقى احكيلك عليها لما تكمل ان شاء الله وتتم #بالعقد 😌
ومش مع ابن خالتي لا علشان الناس اللي هيجي في بالها التصور دا😃

المهم اني حبيت اشارك معاكم علشان اللي بيمر بفترة امتحانات وضغط ثانوية عامة او أي ضغط عامةً
طالما عملت اللي عليك وتوكلت ع ربنا متيأسش وخليك دايما فاكر ان ربنا مطلع ع كل شئ
ومهما كان الوجع والألم اللي مريت بيه ف ربنا كفيل يبعتلك فرحة من جمالها تداوي كل كسر وألم ووجع حسيت بيه..
وادعولي كتير بالله عليكوا إن #الطيران يفتح ويعجل لي برؤية خطيبي ونعقد وتكمل قِصتي وفرحتي ع خير.. وكمان ادعوا لملاك الرحمة اللي في حياتي #خالتي واغلى الناس ع قلبي ❤
🌸🌸🌸🌸🌸🌸🌸🌸🌸🌸
اليقين وسحر الدعاء والإستجابة وإن ربنا فعلا قادر على تغيير كل شئ في لحظة وتحقيق المستحيل..

"يا ولي تولى أمري" من أحب واقرب الادعيه لقلبي
عرفته من واحده صاحبتي #شيماء وقولته لواحده صاحبتي تانية #مروة واستُجيب دعاءها وكان ليها قِصة معاه لو فاكرينها ❤ وعقبال يارب استجابة دعوات #شيماء 🥰

ادعوا الله بيقين مهما ضاقت واشتدت عند الله الفرج وتحقيق المستحيل 💜

#من_الرسايل
#حكاوي_هدير
#هدير_ابراهيم

صلوا علي رسول الله