قصص واقعية (لهدير ابراهيم)

ذرية_صالحة

صلوا علي الحبيب

###############################

#ذرية_صالحة !!

موقف م اجمل المواقف اللي ممكن اكون قابلتها في حياتي ..

راكبه عربية ومتأخره ع صاحبتي اللي المفروض هاخدها م محطة القطار والدنيا حر وزحمة وفوق كل دا السواق يتخانق مع الركاب علشان الاجرة والباقي ،
لقيت ولد صغير راكب جانبي بيقول " اللهم اضرب الظالمين بالظالمين واخرجنا منهم سالمين " ضحكت ع طريقته وعادي ،
شوية والطريق وقف وحاجة اخر زهق ، لقيته بيقرأ قرآن ،بصيتله وقولتله انت حافظ قرآن !؟ قالي ايوه ، سألته حافظ كام جزء قالي #ختمت القرآن الحمد لله .. بصيتله كدا 😳 اللي هو اللهم بارك بجد 😍
قولتله بتدخل مسابقات قرآن كتير !؟ قالي انه بيدخل هو واخواته،،
وسألني لو ينفع نعمل مسابقه دلوقتي
قولتله يا سلام بس كدا ياريت 😍
قالي : بس عليها #جوايز ضحكت وقولتله تمام بس ايه هي الجوايز ، قالي بعد م نخلص المسابقه ..
سألني حافظه القرآن قولتله الحمد لله بس متسألش كام جزء لاني مهما كان ف انا بالنسبالك اقل ،
ضحك وقالي طيب معاكِ مصحف ولا هتسأليني ازاي ،
خرجت #التاب م شنطتي وقولتله معايا app.  للقرآن ، بس المسابقه هتكون ازاي ، يعني اسأله ازاي او ايه طريقة الاسئله اللي متعود عليها ك خاتم للقرآن ..
قالي ع اختيارات كتير ، منها اني ممكن اقوله اسم السوره ورقم الآيه ، او اقوله اخر آيه في الصفحه وهو يقول اول آيه في الصفحه اللي بعدها ، او اسأل في المتشابهات .... الخ
هو بيقول الاختيارات دي وانا بردد في سري الله اكبر اللهم بارك ...
وسألته لو ينفع اقول اسم او صفه لله وهو يقول الآيه ،
قالي ماشي بس انتِ عاوزاني اقول آيه فيها لفظ الاسم ولا آيه بتدل عليه ، ولو اللفظ اقوله معرف بـ ال ولا غير معرف ...
بصيتله وقولتله الهي يكرمك قول اللي انت عاوزه انا دماغي ساحت 😂
قالي تمام وطلب مني ابدأ بالاسم او الصفه ف قولت اسم الله #الكريم .... قالي سورة #الانفطار آيه 6
يَا أَيُّهَا الْإِنْسَانُ مَا غَرَّكَ بِرَبِّكَ الْكَرِيمِ

#الرحمن مريم 93
إِن كُلُّ مَن فِي السَّمَاوَاتِ وَالْأَرْضِ إِلَّا آتِي الرَّحْمَٰنِ عَبْدًا (93) لَّقَدْ أَحْصَاهُمْ وَعَدَّهُمْ عَدًّا (94) وَكُلُّهُمْ آتِيهِ يَوْمَ الْقِيَامَةِ فَرْدًا
وهنا م جمال صوته اللهم بارك وان التچويد عنده ومخارج الحروف الله اكبر مظبوطه جدا ، وع الايات نفسها بدأت احس اني #هبكي ،
كملت ...
#الغفور المائده 74
أَفَلَا يَتُوبُونَ إِلَى اللَّهِ وَيَسْتَغْفِرُونَهُ ۚ وَاللَّهُ غَفُورٌ رَّحِيمٌ
الاعراف 153
وَالَّذِينَ عَمِلُوا السَّيِّئَاتِ ثُمَّ تَابُوا مِن بَعْدِهَا وَآمَنُوا إِنَّ رَبَّكَ مِن بَعْدِهَا لَغَفُورٌ رَّحِيمٌ

#العفو قالي الشورى 25
وَهُوَ الَّذِي يَقْبَلُ التَّوْبَةَ عَنْ عِبَادِهِ وَيَعْفُو عَنِ السَّيِّئَاتِ وَيَعْلَمُ مَا تَفْعَلُونَ

هنا حسيت قلبي بدأ يطمن بس الدموع اتجمعت ف عنيا جدااا

#المجيب هود61
وَاسْتَعْمَرَكُمْ فِيهَا فَاسْتَغْفِرُوهُ ثُمَّ تُوبُوا إِلَيْهِ ۚ إِنَّ رَبِّي قَرِيبٌ مُّجِيبٌ
#السميع آل عمران 38
قَالَ رَبِّ هَبْ لِي مِن لَّدُنكَ ذُرِّيَّةً طَيِّبَةً ۖ إِنَّكَ سَمِيعُ الدُّعَاءِ

هنا بكيت بكاء هيستيري لان دي دعوتي في كل سجده وهو دعاء سيدنا #زكريا وحسيت ان كل آيه الولد بيقولها هي في الأصل موجهه ليا انا تحديدًا ، وبعدين سألته عن اسم الله
#الرحيم يس آيه 58
إِنَّ أَصْحَابَ الْجَنَّةِ الْيَوْمَ فِي شُغُلٍ فَاكِهُونَ (55) هُمْ وَأَزْوَاجُهُمْ فِي ظِلَالٍ عَلَى الْأَرَائِكِ مُتَّكِئُونَ (56) لَهُمْ فِيهَا فَاكِهَةٌ وَلَهُم مَّا يَدَّعُونَ (57) سَلَامٌ قَوْلًا مِّن رَّبٍّ رَّحِيمٍ
قالي هنقف هنا لاننا خلاص وصلنا #المحطه .. بصيت حواليا وقولتله بس لسه المحطه باقي عليها شويه ، قالي مش قصدي المحطه دي اقصد المحطه الاخيره لرحلتنا في الدنيا ، ماما وبابا دايمًا يقولولنا ان نهاية محطتنا وبداية الامان عند الآيه دي لما نسمع م ربنا وهو بيلقي علينا #السلام في الجنه ...
هنا انا انهارت حرفيًا ، وقولتله بجد ايه الجايزه اللي عاوزها اطلب اي جايزه ،
قالي م انا خلاص خدت جايزتي واديتك انتِ كمان جايزتك ..
قولتله ازاي مش فاهمه !؟ قالي لما قرأت القرآن خدت حسنات وانتِ كنتِ بتقرأي معايا ف اخدتي انتِ كمان ، ولما بكيتِ خدتي حسنات م باب عين تدمع م خشية الله ❤
هنا قولتله لو عاوز تديني جايزه كمان بالله ادعيلي ان ربنا يرزقني ذريه صالحه زيك ...
وسألته مين الشيخ اللي بيحفظك القرآن ، قالي ماما بتحفظني وبابا بيسمعلي ... قولتله اللهم بارك بس ماما بتشتغل ولا لا
قالي ماما مُعلمة انجليزي وبابا مهندس مدني ...
ف قولتله انت حافظ برواية حفص !؟ قالي لا الحمد لله القراءات العشر ...
هنا كانت نظرتي مزيج م الحب والدهشه اللي هو اللهم بارك بارك 😍😳
سألته انت في سنه كام ، قالي داخل #تانيه_ابتدائي !!!

موقف غيرلي حاجات كتييير منها ان اهوووو اللهم بارك لسه في ف الزمن دا ناس بتربي تربيه صح ،
وان الولد اللهم بارك مفيش جمله ذكر فيها الاب لوحده او الام لوحدها ، لازم الاتنين في نفس الجمله
وهي دي #المشاركه الحقيقيه بين الزوجين وهو دا البيت اللي بجد اذا رآه الرسول #تبسم 😍
سألت الولد قبل م انزل ليه كان بيقول الآيات دي بالذات لأن كذا مره يقول اكتر م آيه او يقول جزء م آيه ،
ف قالي انه مش عارف بس مامته وباباه دايمًا بيقولوا ليه هو واخواته ان ربنا بيبعت #رسايل لناس ع لسان ناس تانيه ...
اتأكدت هنا انها رسايل ليا م ربنا واطمئن قلبي اكتر ❤

متخيله الولد دا واخوه واخته لما يكبروا هيتعاملوا ازاي ولما هيتزوجوا هيربوا ولادهم ازاي ..

كان راكب جانبنا اخو الولد اسمه عمر والولد نفسه اسمه عمار وليهم اخت اسمها حفصه واللهم بارك كلهم م ختمة القرآن ..

القرآن خير حافظ ودي اجمل حاجه عملها الأب والأم لمستقبل ولادهم ولآخرتهم ....
فـ اللهم بااااااارك بجد ....
🌸🌸🌸🌸🌸🌸🌸🌸🌸🌸🌸
الموقف دا حصل معايا في 2018 وكنت نزلته ع الاكونت عندي..
مش عارفه ليه م أول رمضان وهو ع بالي ف كانت دعوتي الدايمه طول رمضان إن ربنا يرزقنا جميعاً بذرية صالحة زي الولد دا واخواته وتفاهم ومشاركة أهلهم ..
دي النماذج اللي بجد نتمنى نسمع عنها من المتزوجين 💙

#تربيه_صح 👌
#اللهم_ارزقنا_ازواج_صالحين
#اللهم_الذرية_الصالحة
#هدير_ابراهيم
#حكاوي_هدير 💌

صلوا علي المصطفي