صلوا علي رسول الله
#########################
#أمل !!
اسمي حنين عندي 28سنه معايا ليسانس لغة عربية وعملت دبلومتين..
معاناتي في دنيتي بدأت من وانا في تالته ثانوي..
احنا 8 اخوات!
اتولدنا لأب وأم متشددين مش دينياً لا في التعامل معانا بمعنى ان كل حاجه كانت ماشيه #بالضرب
وكمان مفيش قرب من ربنا خالص
ودا هيكون سبب للي هحكيهولك دلوقتي!.
جيت في تالته ثانوي وبدأ الضغط عليا وانك لازم تجيبي مجموع وان مجبتيش هتضربي زي كل مره وسهر ومذاكره ليل ونهار ومتناميش
ودا كان سبب اني ادخل في أزمه نفسيه ومنها تبدأ معاناه تانية!
جالي حاله قلق وتوتر نفسي
كشفت عند كل الدكاتره يقولوا مفيهاش حاجه
لحد ماعمي فهم اهلي انها حالة نفسية ورحت لدكتور والدنيا مشيت تمام
عديت تالتة ثانوي ودخلت الجامعة..وبعد سنتين
وعلشان المعاناة تكمل
اتقدملي شخص مستواه المادي عالي جداااا
طبعا اهلي شافوه انبهرو بيه وده لان ظروفنا المادية صعبة نوعاً ما..
المهم اتقدملي واتخطبنا وحكتله علي كل حاجة بالنسبة لموضوع ثانوي وتعبي النفسي من باب الأمانه وان لو تعبت معاه يبقى متفهم الموضوع
قالي عادي دا موضوع بسيط
ونظرا لاني بقيت شخصية متوترة فتعبت في اول الجواز زي اي بنت اتنقلت لنظام حياة مختلف وجديد بس انا كان زيادة شوية
لكن اهلي بالرغم من قسوتهم عامةً في التعامل الا انهم ومن وقت تعبي اختلفت المعاملة للأفضل ف كنت بعدي الازمة ع خير..
لكن ده اتعامل العكس تماماً وبقى كل شوية يقولي انتِ مريضة
اهلك بلوني بيكي!..
وانا كل الموضوع كان شوية قلق مع خوف بسيط..
وداني لدكتور قاله خليك حنين معاها وازمة وهتعدي
لكن هو تقريباً فهم العكس وكان بيضرب زيادة..
وختامه مسك قرر يطلقني!!
انفصلت عنه والحمد لله ربنا مرزقنيش منه بأطفال..
كنت وقتها خلاص بقيت في رابعة جامعة.. خلصت جامعتي وكملت دبلومتين وكنت بشتغل مُدرسة
قعدت ست سنين مابين دراسة وشغل وبدأت ألهي نفسي واشغلها..ورفضت موضوع الارتباط نهائي
وتقدري تقولي ان ده كمان كان مش بمزاجي أوي
ودا لان الاستاذ طليقي طلع عليا اني مريضة نفسياً
وياريت بيحكي الحقيقة دا بيشوهني وشوة صورتي وسمعتي..
لدرجه ان في عريس قالهالي في وشي هتتأمري ع ايه دا انتِ مريضه نفسيا!!
منمتش في الليله دي من العياط💔
نسيت اقولك اني في الفتره دي كنت مقصره من الناحية الدينية اللي هو بقرب فترة وببعد فترة
وبالنسبة للدكتور كنت متابعة معاه علشان الموضوع ينتهي تماما
بس حياتي واقفه تماما والخوف والقلق متمكن مني!!
مكنتش بتمنى في الفتره دي غير اني اروح أعمل عمره علشان نفسيتي ترتاح..
لحد م في مره كنت عند الدكتور وقابلت واحده اسمها أمل وانا من طبعي اجتماعية شوية فقعدت احكي معاها
هي اسمها أمل وفعلا ادتني #الأمل!!
قالتلي أنا مريت بنفس تجربتك مع اختلاف بسيط في التفاصيل وبعد م لفيت كتير مابين مشايخ ودكاتره مفيش غير شيخ ابن حلال قالي يابنتي انتِ حلك في حاجة هتجيب معاكي من الآخر وهي إنك تصلي وتلزمي الدعاء..
قلتلها طيب وبعدين؟
قالتلي صلي وادعي وابكي مع ربنا وفضفضي وطلعي كل اللي في قلبك وانتِ بين ايديه..
انا مكنتش بتكلم مع حد في موضوعي ف مصدقت اني اتكلمت مع دي علي اساس انها غريبة عني ومتعرفنيش ولا تعرف عني حاجة وسبحان الله وكأن ربنا سخرهالي علشان تقولي الكلام دا وكانت اول وآخر مره اشوفها..
رجعت البيت اتوضيت وفضلت اصلي وابكي لربنا
انه يحلها من عنده..
التزمت بصلاتي وكل شويه ابكي وصلاه الفجر والقيام بقيت اداوم عليهم
وقول لاحول ولا قوه الا بالله العلي العظيم
داومت عليها..
حسيت بعد فترة من المداومة براحة نفسية اول مرة كنت احسها..
وبعد فتره قالوا جيلك عريس !!!
اول حاجة طبعاً جات ع بالي انه هيطفش زي اللي قبله..
كل اللي عرفته عنه وقتها انه #صيدلي.. قالولي اقعدي معه ومش هتخسري حاجة
سلمت أمري لله وقعدت فعلا معاه وكانت المفاجأة انه تاني يوم بعت قال انه #موافق ومستني ردنا..
طبعا مكنتش مصدقه
انا كل اللي عملته جريت اقرأ قرآن واصلي وادعي علشان ربنا يطمن قلبي..
أهلي ردوا عليه وقالوله احنا مواققين بس تيجي تقعد معاها مره كمان تتعرفوا علي بعض
قعدت معه وكان اول حاجه قالهالي انا عارف عنك كل حاجه وعارف الظروف اللي مريتي بيها..
اول م سمعت كدا انا جسمي تلج!
قلتله ورأيك ايه في اللي سمعته؟!
قالي أنا موافق بيكي حتى لو مجنونة زي ماهو بيقول..
بعد قعدات كتيره مع بعض اتخطبنا وفرحنا بعد العيد
عاوزه اقولك ان الفرق بين ده وطليقي فرق السماء من الارض في كل حاجة..وحسيت وكأن ربنا ساقه ليا مخصوص علشان يطمن بيه كل الخوف والقلق اللي فضلت عايشة فيه طول عمري..
وكانت المفاجأه الأكبر ان والده فاتح اكبر مكتب سفر حج وعمره علي مستوى مركزنا يعني مش هعمل عمره واحده دا هو وعدني ان كل سنة هيطلعني اعمل عمره❤
زائد إن عنده صيدلية كبيرة حتى لو مرضت هتعالج ببلاش 😂
كل اللي كنت محتاجاه شخص يكون #حنين عليا وربنا بفضله وكرمه رزقني بيه💜
حكايتي هتكمل اكيد بإذن الله لما نتجوز وربنا ياارب يرزقني منه الذرية الصالحة..
بس انا بعتلك الرسالة دي علشان اقول لكل بنت ان القرب من ربنا هو طوق النجاه وانها مهما تعسرت هتفرج
بس ليا طلب انك تخليهم يدعولي ان ربنا يكمل فرحتي علي خير وميحصلش حاجة وحشة تاني ويعوضني بيه عن كل أذى شوفته في حياتي..
معلش انا رغيت كتير بس كده يعتبر والله مختصره تفاصيل واحداث كتيره كمان
نزليها بقا ياقمر وهشوف التعليقات❤
🌸🌸🌸🌸🌸🌸🌸🌸🌸🌸🌸🌸🌸
مستحيل يكون في حد لزم الدعاء وقرب من ربنا وأحسن الظن إلا وربنا عوضه وجبر قلبه..
القِصص مع اختلاف احداثها بتوصلنا لإن مهما اشتدت الظلمة وانقطع الأمل بمجرد القرب من ربنا بيتولد #ضوء_فجر جديد وبيرجع #الأمل أقوى 💙
#من_الرسايل
#حكاوي_هدير
#هدير_ابراهيم
###############
صلوا علي الحبيب