صلوا علي الحبيب
################################
#من_الرسايل !!
هدير يارب تشوفي رسالتي انا مش عارفه اتصرف وحاسه اني هتجنن..
كنت بعد الأيام علشان خلاص واخيراً هكون في بيت واحد مع الشخص اللي فضلت ست سنين ادعي ربنا يجمعني بيه
وبدل م كنت هبعتلك قِصتي وفرحتي ببعتلك دلوقتي اقولك انجديني وقوليلي اعمل ايه ولا اتصرف ازاي؟!
انا مكتوب كتابي ع اكتر شخص في الدنيا قلبي اتعلق بيه والمفروض إن فرحنا في شهر سبتمبر الجاي بس أنا للأسف شكلي #هطلق 💔
أنا مش من النوع اللي بيحكي حاجه لحد كتومه جدا بس ليا واحده كانت صاحبة صاحبتي #متدينة جدا أو دا اللي كنت معتقداه.. هي دايما تقول ع نفسها انها متدينه او #ملتزمة
مكناش قريبين م بعض اوي بس قربت منها لما سمعتها في مره بتقول ان البنت اللي نفسها ترتبط بالشخص اللي بتتمناه تدعي ربنا ومتتكلمش معاه خالص غير لما تبقى حلاله .. وبكدا ربنا هيجمعها بيه..
سألتها طيب أنا ربنا بفضله من عليا بالشخص اللي كنت بتمناه وبحلم وبدعي بيه فعلا اعمل ايه علشان احافظ عليه؟!
قالتلي اني المفروض احط ضوابط في الكلام وفي كل حاجه اللي هي ضوابط الخطوبه الشرعيه يعني وبكدا مش هنعمل حاجه حرام ف ربنا هيبارك في علاقتنا...
قربت منها جدا وبقيت اروح احكيلها كل حاجه بتحصل معايا انا وخطيبي وكنت بعمل كل اللي كانت بتقولي عليه بالظبط... ويعلم ربنا ان نيتي كلها كانت في اني احافظ عليه ومنعملش حاجه تغضب ربنا..
الكل قالي اني محبكاها اووي وانه كدا هيزهق وهيسيبني.. كنت اروح اقولها تثبتني وتقولي مترميش ودنك لحد واني اسمع كلامها هي بس..
الدنيا مكانتش سيعاني لما خطيبي قالي في يوم انه تمام مش عاوزين نغضب ربنا بس كدا هنكتب كتابنا أفضل.. فرحتي مكانش ليها حد
وجريت اكلم البنت دي وافرحها معايا واني اخيرا الحمد لله هناخد خطوه زياده في الحلال..
بس لقيتها بتقولي ان بردو كتب الكتاب م هو الا وعد بالزواج وان حرام بردو نصرح فيه بمشاعرنا
المشكله انها كانت بتتكلم بالحلال والحرام وتجيب احاديث وآيات م القرآن ومواقف تثبت ان كلامها صح..
خطيبي طبعا اتجنن بعد كتب كتابنا لما لقى ان الحال هو نفسه ومتغيرش.. وان لسه كلمة حرام حرام غ لساني وابسط الكلام الحلو مكنتش بقوله..
ولما قالي انه ازاي طيب هيتجوز واحده هو مش عارف هي بتحبه ولا لا ولا مشاعرها ناحيته ايه بالظبط..كمان كان شايف مني عدم اهتمام نهائي!!
جريت ع صاحبتي احكيلها وانا بعيط وبقولها هو اكيد زهق وهيسيبني لقيتها بتقولي هاتي طيب رقمه وهكلمه أنا وافهمه بهدوء..
طبعا المعظم ممكن يقول ايه الهبل دا ادي لمين رقم مين وانه لا طبعا
بس انا من ثقتي اللامتناهيه فيها م هي ملتزمه ومتدينه بقى وتعرف ربنا احسن مني.. كنت شايفه انها كدا قلبها عليا وعلى مصلحتي وم غير تفكير بعتلها رقمه
ومن بعدها وهو اتغير فعلا .. اتغير تماما
مبقاش يكلمني ولا يجي عندي البيت غير قليل ولو جالي مش بيتكلم وهي ساعه وبيمشي..
ظنيت في الاول انها اقنعته وانه اخيرا فهمني واني كدا بحافظ ع علاقتنا
لحد م حصل م كام يوم ولقيت حماتي بعد م كانت بتشتكي لوالدتي مني..لقيتها بتقولها اخيرا ربنا هدى الحال وبقوا يتكلموا اكتر وبقى مرتاح نفسياً !!
طبعا انا سمعت الكلام دا وتنحت!
هما مين اللي بيتكلموا اكتر.. احنا مبقناش نتكلم اساسا..
طبعا بدأت اشك انه بيكلم بنت تانيه بس ولا مره خطر ع بالي اللي اكتشفته ي هدير وهو انه طلع بيكلم نفس البنت؟!!!!
وعرفت دا منه هووو تخيلي؟!
لما واجهته بإنه انشغل بغيري قالي في لحظة غضب انه اه لقى اخيرا اللي تهتم بيه وتسأل عنه وفي نفس الوقت بردو متدينه وتعرف ربنا.. مش اوفر زيي!!
ولما سألته وانا بحاول اكدب احساسي مين المتدينه دي لقيتها نفس البنت.. متخيله طيب حالتي ؟!!
أنا دلوقتي مش عارفه اعمل ايه لا عارفه افكر ولا اتصرف ولا عارفه هنكمل ولا هننفصل
مش عارفه هل أنا فعلا بإيدي اللي ضيعته مني ولا إيه اللي حصل؟!
أنا مش هقدر انا اللي آخد قرار البُعد ومش هقدر بردو اتحمل ان حلم عمري اللي عشت سنين اتمناه يضيع من ايدي بسهوله كدا بعد م خلاص باقي شهور بسيطه ويتحقق كله..
موجوعه اوي ومش عارفه اعمل ايه بالله قولولي اتصرف ازاي وبعتذر ان كلامي كله ملخبط زي حالي دلوقتي💔
واه البنت دي لما واجهتها عملتلي بلوك م كل مكان ومردتش عليا اصلا ومش متخيله لحد اللحظة دي انها قدرت تعمل كدا فعلا💔
🌸🌸🌸🌸🌸🌸🌸🌸🌸🌸🌸🌸🌸🌸
النظام المتبع واللي متعودين نسمعه هو ان واحده اخدت حبيب ولا خطيب ولا زوج صاحبتها
انما حتت الصاحبة اللي بتقول ع نفسها ملتزمه ولا متدينه دي ف يلا ي جماعه انا عندي #حصانه واحكولي دي جديده بصراحه🤔
حبايب قلبي خلينا متفقين ان مفيش حد فينا ملتزم اصلا لان الالتزام دا معناه انه ماشي ع كل تعاليم رينا والرسول بالمسطره
واحنا اصلا عمالين نقع ونقوم كل شويه وبندعي ربنا يقبض روحنا ع طاعه مش معصيه ومرعوبين..
ف ببساطه اللي يقول ع نفسه ملتزم ف هو #كذاب!!
أما بقى كون اننا وصلنا ل 2020 ولسه في واحده #عاقله بتروح تحكي تفاصيل التفاصيل لصاحبتها وتنفذ كلامها بالملي بدون ادنى تفكير ف هي محتاجه تراجع نفسها تاني...
انا بعت للبنت رأيي ف مشكلتها في المسج
بس مستنيه اشوف رأيكوا انتوا كمان!
#من_الرسايل
#حكاوي_هدير
#هدير_ابراهيم
صلوا علي المصطفي