صلوا علي من ياتي يوم القيامه ويقول امتي
#وبشر_الصابرين !!
قِصة انهارده تقريبا موجوده في اكتر من نص البيوت المصرية 🤷♀️
هاشتاج باقي القِصص👇
#قِصص_واقعيه_لهدير_ابراهيم 💌
🎀🎀🎀🎀🎀🎀🎀🎀🎀🎀🎀🎀🎀🎀🎀🎀🎀
انا بنت اتربيت في بيت ملتزم وكمان والدي صعيدي فلكم ان تتخيلو كميه القيود الي كانت حواليا كنت زي مابيقولوا قطه مغمضه والدي كان بيخاف عليا جدا جدا والحمد لله ربنا رزقني بقدر كبير من جمال الشكل، فكان والدي محوط عليا اوي .. مكنتش بختلط بحد. عشت طفوله حلوة بس كنت احيانا اتضايق اني مش بعرف البس فستان واخرج في العيد من خوف والدي عليا حتي وانا معاهم لان كنت فعلا ملفته للنظر جدا وكمان كنت في بلد عربي فكانت القيود بقي حواليا تقيله اوي ..
كنت مبعرفش العب زي الاطفال لان جسمي كبير وشكلي حلو فمينفعش اتنطط زيهم بس في المجمل كانت طفوله سعيده الحمد لله.. نزلت مصر واتصدمنا بفرق العادات وابويا اتحكم فيا اكتر واكتر لدرجه مكانش راضي اكمل تعليمي!!
كنت بحارب علشان اكمل وقدمت وكنت بحاول اجتهد علي قد م اقدر بس كان في قيود في الدروس ومرواح المدرسه وكنت عكس البنات اهلي عاوزين البس النقاب وانا كنت بحارب اني ملبسهوش لاني مبحبش الاوامر !!
المهم قضيت اعدادي ولقيت ان المدرسه مش مُجديه قدمت منازل في ثانوي وكنت بحارب اني اروح الدروس وعدت مرحله الثانويه بكل صراعاتي مع ابويا من القيود الي حاططها حوليا وكانت امي الوحيده اللي بتصبرني وكان مشترط انها تيجي معايا كل الدروس.. متخيلة البهدلة والتحكم وصل لفين!
المهم لحد مادخلت كليه ادبيه عاديه لان مكنش ينفع اروح كليه عمليه بتحكمات والدي دي وروحت الكليه كنت برضو بروح بطلوع الروح ولو اتاخرت ٥ دقايق تبقي مشكله ولو عندي محاضرات مثلا الساعه ٥ محضرهاش وفضلت احارب لحد ماوصلت سنه تالته بدأ يسيبني انزل سكاشن شويه وابتدا تقديري يتحسن كنت بطلع من المحاضره جري علي البيت ولو حد من اللي معايا في الكلية كلمني انه عاوز يتقدم اهرب منه بسبب الخوف من والدي!!
ده باختصار البيت عندي ودراستي نيجي بقي للشق الاجتماعي من وانا في اعدادي كان بدأ يتقدملي عرسان.. والدي كان بيرفض علشان لسه صغيره واول حد سمح انه يتقدملي كان عندي ٢٠ سنه ومحصلش نصيب وبدأ ناس كتير تتقدم وبابا يرفض من غير م اشوفهم اصلا ومكنتش فاهمه سبب الرفض بس فضلت كده لحد ٢٣ سنه حسيت اني كبرت بقي ولازم اخد الموضوع جد واختار مش اسيب والدي يرفض وانا ارفض وخلاص فبدأت من الوقت ده افكر انا عاوزة ايه ؟ شكله ومستواه الاجتماعي و اخلاقه!!
اه صحيح نسيت اقولكم ان كان عندي عقده من الملتزمين أو اللي بيطلقوا ع نفسهم المسمى دا.. لان طبيعي اني كنت شيفاهم زي والدي من تحكمات وقيود وخلاص وكنت اي حد ملتحي يتقدم كنت برفض فورا ..
وهنا بدأ والدي يعند معايا وانا اعند معاه كنت اوافق علي اي حد مش ملتحي وهو يرفض ويوافق علي كل واحد ملتحي اقوم انا رافضه وعموما سواء ملتحي او لا كان بيحصل تصرفات من الاشخاص غريبه وغير لائقه فمندمتش اني رفضت حد او انهم يترفضو لحد م والدي غير تفكيره وشاف فعلا ان الملتحين مش هقول كلهم تصرفاتهم لاتمت للشرع ولاللدين ولاحتي للانسانيه بصله _ الا م رحم ربي _ وبدا يتقبل تفكيري انا عاوزه حد معتدل انسان طبيعي بيصلي زيي وبيحترم الناس وقد كلمته واخلااااق فكان بيتقدملي نوعين من الشباب شباب ملتزم او الي بيقول علي نفسه ملتزم وشباب عاديه والصنفين مكانوش نافعين معايا الملتزم كان أول كلمه ينطقها لازم نقاب وانا مش منتقبه ولاهنتقب بأمر من حد أو غصب عني .. والشباب الي ميعرفش دينه كويس وبيقطع في الصلاه وبيسمع موسيقي مش نافع معايا فضلت محتاره لحد ماقولت انا الي هينفع معايا تيار معين من وجهه نظري وقتها انهم متوسطين وركزت بقي اني عاوزه اتخطب للناس دي وصلت ل٢٨ سنه ومش لاقيه اللي عاوزاه
هحاول اختصر ال٨ سنين الي قابلت فيهم عرسان كنت من كترهم بعدهم وكان حوالي فوق ٧٠ عريس اللي اهلي يرفضوهم واللي انا مرتحش واحاول اضغط علي نفسي ومش قادره اكمل واللي اذاني واهلي بتصرفاتهم أذوني نفسياً لأن تصرفاتهم معايا فعلا كانت غرييه جدا بس كنت بصبر نفسي وبقول علشان محصلش نصيب لسه وكنت ببرر تصرفاتهم انها بسبب قلقهم عليا وخصوصا إن الناس بدأت تتكلم ازاي جميله ومتعلمه ومحترمه ووصلت للسن دا م غير جواز!!
كنت بطنش م هو مش هتجوز علشان الناس ومكنتش اقدر اتخطب لحد مش قادره اتقبله لمجرد اني اخرس ألسنة الناس!
في الفتره دي بدأ والدي يتغير وخلاني انزل اشتغل واكمل ماجستير وبدأت افكر واعرف اكتر انا محتاجه ايه في شريك حياتي وده كان مصعب الموضوع اكتر
لحد م جالي واحد من التيار اللي كنت فاكره انه هيتوافق معايا وكان محترم ومعاه ماجستير هندسه وشاريني وكل حاجه بس كان في حاجه جوايا مش ريحاني بس تحت ضغط اهلي وافقت وخصوصا ان سني وصل ل ٢٨ سنه !!
يوم قرايه الفاتحه قولتلهم مش هقدر اكمل قالولي خلاص اتفقنا مع الناس ومش هينفع تصغرينا قدامهم.. قعدت شهر مخطوباله كان من اصعب الاوقات الي مرت عليا وعملت البدع لحد م حس بيا وقال لاهلي مش هكمل وانا م صدقت انه فسخ الحمد لله
ساعتها اهلي اتعلمو انهم ميغصبوش عليا حد وفعلا عدت فتره سنه تقريبا واتقدملي شخص تاني نفس التيار ونفس الشهاده واول م شوفته انبهرت باخلاقه وحسيت انه فعلا زوجي واتخطبنا ٣ شهور كنت فعلا زي الكفيفه مش شايفه اي عيوووب لحد قبل الفرح بيوم تخيلو شخص حسيت ربنا عوضني بيه كل سنين تعبي وخلاص جهزت كل حاجه حتي الاكل في التلاجه وقبل الفرح بليله واحده العريس اتاخد اكيد عرفتوا ايه هوا التيار الي بتكلم عليه 🤷♀️
ساعتها فوقت ياااااه انا مكنتش شايفه كل ده ازااااي
لقيت اهله قلبو عليا جامد وبعتولي حاجتي وظلموني ومامته قالتله سيبها راح ببساطه الموضوع انتهي
اللي مكنتش شيفاه انه ابن امه اوووي وان هي اللي ممشياه لا هو ولا باباه ليهم رأي في حاجه الكلمة الاولى والاخيره ليها هي وبس ..
بدأت استرجع كلامه معايا وحكاياته مع اللي خطبهم قبل كده ولقيت فعلا ده شخص امه ممشياه وانا مكنتش شايفه وكمان اقريت إن التيار اللي هو منتمي ليه ده مش طريقي ولا انا حمل الهم ده نهائي لان اهلي ملتزمين بعيد عن اي انتماء..
ساعتها حسيت ربنا انتشلني من الجوازه دي تخيلو اتاخد الساعه ٣ الفجر وفرحنا كان ٥ المغرب!!
تاني يوم اتصدمت صدمه عمري وعلي الرغم اني عارفه ان ربنا عمل الخير ليا بس كنت متعلقه بيه اووي اوووي كنت هموت واوصله وللأسف ورغم كل اللي فات دا وإنه كمان في السجن إلا إني م حرمتش وفضلت أحاول أوصله لمده ٣ سنين كان بيشوف رسايلي ومكانش بيرد عليا وعرفت اتصل بيه وقالي لما اخرج نتكلم اداني امل وفضلت احاول واحاول قعدت ٣ سنين بالمنظر ده لحد م خليت واحده اعرفها تكلمه وتعرف منه عاوزني ولا لا وقالتلي شكله مش عاوزك ساعتها قررت اني انسي الشخص دا .. اه عدي ٣ سنين بس انا كنت تحت تاثير صدمه قويه مكنتش قادرة افوق منها خصوصا ان الخطوبه حصلت بعد اكبر صدمه في حياتي وهي وفاه اخويا في عز شبابه في احداث الثورة وكانت صدمه كبيره اووي للبيت كله واتكسرت اوووي تعبت جدااا..
كان بيجيلي برضو عرسان ومكانش بيحصل نصيب لحد مابقي عندي ٣٢ سنه !!
بس كان من نعمه ربنا عليا ان شكلي ميديش ٢٣ سنه بس كنت حاسه اني تايهه .. امتي الاقي نصيبي!!
كنت بردد لنفسي اني متأكده ان ربنا عالم باللي جوايا واني بتمنى الخير لكل الناس ف أنا متأكده ان ربنا هيجبر خاطري... متأكده ان ربنا شايلي احسن واحد في الدنيا ..
والله كان عندي يقين رهيب في الله وفي عوضه
لحد م اتقدملي واحد وكلم اهلي وشاف صورتي بس وبعدين اختفي .. هو كان مسافر وقال هيجي وفات علي كلامه سنه!! ساعتها قولت شكله زي الناس قليله الذوق اللي قبله ومش هستناه واول حد اتقدملي قرينا فاتحه انا وافقت عليه علشان للأسف وقعت تحت ضغط ان فعلا خلاص سني بيكبر وهو كان اكبر مني بسنه او اتنين .. بس للأسف مكنتش فرحانه بيه
وبردو والدي مكانش مرتاحله وهو بدأ يعمل دقات نقص ف فسخنا الخطوبة ومكملناش..
ساعتها صليت بليل ركعتين لربنا وقعدت اعيط اووي وقولت يارب انا مش قادرة اتحمل .. مش قادرة اتحمل تصرفات الناس الغريبة اللي بيدخلوا حياتي وقلة تربيتهم .. انا يارب صبرت بس مش قادرة يارب ..
ومن يأسي وضيق قلبي كنت بدعي يارب ي إما تبعتلي الشخص المناسب ليا واتخطب واتجوز ي إما م اتجوزش خالص لكن مش حمل تجااارب..
ساعتها جسمي كله كان بيتنفض كنت فعلا بدعي من اعماق قلبي عاوزة احكيلكم موقف يؤكد ليكم ان ربنا فوق الكل كان في ست كبيره صاحبة والدتي لقيتها بصتلي في مره وقالتلي لو عديتي سن التلاتين خلاص محدش هيتجوزك !!
ساعتها جسمي سخن جدا وقولتلها أنا اللي بيرزقني ربنا مش البشر وربنا قادر انه يرزقني ويعوض صبري خير انا واثقه من ربنا سكتت خالص ومعرفتش ترد ع كلامي..
مر علي فسخ الخطوبة التالته اسبوع بس والعريس اللي اتكلم من سنه ومظهرش بعدها اتصل وقالنا انه في مصر وحدد مع بابا معاد واتقدملي..
لقيته شخص مستوى علمي عالي ومادي كويس واخلاق الحمد لله والأهم انه لا بيدعي الإلتزام ولا غيره.. واخيرا شخص ذكي محترم بيصلي عارف دينه معتدل مش تبع تيار محدد وفوق كل ده مستوى علمي ومادي..
انبهرت بدماغه وتفكيره اللي طلع نسخه من تفكيري وتخيلي رغم كل دا ف البداية مكنتش مدياله اهتمام بحكم اني كنت لسه خارجه من تجربة سيئه ومشوشه وفقدت الثقه في كل الشباب وان ممكن يكون في شخص كويس..
بس هو كان بيحاول معايا وبدأ يثبتلي انه عكس كل اللي فاتو بالافعال مش الكلام ..
وعدني انه هيبقي عكس كل اللي مروا عليا .. حكيتله كل اللي حصلي .. سمعني وحس بيا سبحان الله وبرضو مكنتش قادرة اديله الثقه اتخطبنا وقولت هشوف معاملته معايا اتفق مع اهلي علي كل حاجه مافيش حاجه قالها منفذهاش عملي كل اللي نفسي فيه واكتر ..
اتحمل والدي وتصرفاته معاه الحمد لله اخيرا اتكتب كتابنا واتجوزنا ودلوقتي حامل والحمد لله يارب زي م هو على عهده معايا ياااه واخيرا في رجاله بتفي بالوعود وبتحب بجد الحمد لله يارب..
و يارب يرزق كل البنات باللي بتتمناه واكتر ..
انا حبيت اقول قصتي علشان مفيش واحده تيأس بس اقسم بالله انا الحمد لله عايشه افضل من كتير بنات اتجوزوا قبل مني ..
بالله عليكم ادعولي ربنا يديمها عليا نعمه واوعوا تيأسوا .. عاوزه اقولكم انا قبل م اتجوز بسنتين كنت عارفه ومتأكده اني هتجوز ومفقدتش الأمل زي م كل اللي حواليا كانوا فقدوه ..
نزلت اشتغل في حضانة علشان اعرف اتعامل مع الاطفال اللي هخلفهم كنت واثقه ان ربنا هيرزقني بأطفال وهيعوضني ومش هيحرمني ..
بدأت اعمل رجيم علشان لما اتجوز اكون رشيقه اهتميت بشعري وبشرتي
ربنا كان دايما يبعتلي احلام بتدل اني هتجوز وهعيش سعيدة..
هيأت نفسي وجبت جهازي كامل اني خلاص هتجوز والحمد لله حصل وربنا جبرني وفرح قلبي وعوض صبري خير..
اوعو تفقدوا الامل ابدا ابدا ربنا قادر علي كل شئ
عاوزة اقولكم كمان اوعوا تتنازلوا علشان سن او غيره انا طول الفتره دي لحد قبل م اتجوز كنت برفض المطلق من غير م اشوفه دي مش قاعده ومش معني كده ان كلامي صح ميه في الميه بس انا مكنتش حابه اخد حد جرب قبل كده وده حقي اوعي تتنازلي عن احلامك .. ادعي ربنا كتير خاصة في رمضان دا الدعاء فيه سحر ..
اوعي تتنازلي عن شرط واحد من شروطك في شريك حياتك الحياه هنعيشها مرة واحده ف ي إما نعيشها صح ي إما بلاش ..
اوعي كلام الناس يهز شعره فيكي محدش ليه عندك حاجه ربنا يرزق كل البنات بالازواج الصالحين ويجبر خاطرهم ويعوض صبركم خير اللهم آمين ❤
🎀🎀🎀🎀🎀🎀🎀🎀🎀🎀🎀🎀🎀🎀
ربنا يهدي الناس اللي بتدخل في حياة كل الناس او ياخودهم ويريحنا م شرهم وأذاهم..
ياريت نغمة ان بنت لما سنها يعدي مش عارف كذا مش هتتجوز وانها حتى لو اتجوزت مش هتخلف تختفي بقى او تتقطع لسان اللي بيرددوا الكلام دا وبينشروا المفاهيم والجهل والتخلف دا..
والأهل اللي بيرموا ودنهم للناس ويطلعوا كل دا ع بناتهم.. هو انتوا ليه مش قادرين تستوعبوا انه نصيييييب ورزق وربنا اللي بإيده كل شئ وكل بنت ربنا هيرزقها بنصيبها في الوقت المناسب
ف خفوا شويه ع بناتكم وخليكوا #سند ليهم مش يبقى العكس وتكسروهم!!
ربنا يهدي الجميع ويرزق كل البنات أزواج صالحة ويجبر قلوبهم يارب💙
#هدير_ابراهيم 🌸
لااله الا انت سبحانك اني كنت من الظالمين
صلوا علي من جلس علي ركبتيه يواسي طفلا مات عصفوره