صلوا علي من جلس علي ركبتيه يواسي طفلا مات عصفوره
#فَلَنِعْمَ_الْمُجِيبُونَ !!
دي تقريباً أطول قِصة ممكن اكون نزلتها مهما قصقصت منها بردو طويله 🤷♀️
القِصة عن #النقاب ف ناس معينه اللي هتقرأها ..
ناس كتير ممكن تشوف صاحبتها #اوفر بس بنات تانيه هتحس بكل حرف اتكتب فيها ❤
انا مغيرتش حاجه ع اسلوب صاحبتها لانها كتبته بإحساسها ...!
هاشتاج باقي قصصنا 👇
#قصص_واقعيه_لهدير_ابراهيم 💌
🎀🎀🎀🎀🎀🎀🎀🎀🎀🎀🎀🎀🎀🎀🎀🎀
باخد بالي دايما يا هدير ان معظم قصصك النقاب بيبقي جزء كبير منها 💙 وان بطلة القصة الله عزوجل بيجبرها بالنقاب وبيعزها وحياتها بتتغير ١٨٠ درجة بعد ما تلبسه.. بس انا عايزة اقولك ان قصتي كلها بتدور حول (السِتر) وهو #النقاب !!
اكيد كلنا عندنا احلام وامنيات كبيره جدا وساعات بنحس ان صعب الوصول ليها يمكن عشان بنحس اننا مش قدها او عشان اللي حوالينا بيحبطونا او مجتمعنا نفسه رافضها
بس انا مكنتش اتوقع ان حلمي هيبقي صعب وشاق بالشكل ده واني هحارب لوحدي كل اللي حواليا 💔
وببساطه شديده انا كان حلمي النقاب!!
الحلم بدأ يتكون في قلبي بل في كياني كله وانا عندي ١٦ سنة وقتها كنت مختمرة وكان بقالي تقريبا تلت او اربع شهور مختمرة وبصراحه اهلي معارضوش خالص بالعكس فرحوا بيا جدا وشجعوني والدتي دايما كانت تنزل تشتريلي خمارات عشان تفرحني وهي مبسوطه بيا ولكن؛
من اول ما طلبت النقاب ووقوفهم ليا ابتدا !! هما طبعا رفضوا رفض شديد جدا وكان طلبي غريب لان النقاب ده حاجه كبيره جدا عليا وازاي بنت في سني تطلبه انا يعتبر بالنسبالهم لسه #طفلة !
بس عايزه اوضح نقطتين اول نقطه ان علاقتي بأهلي بفضل الله جميله وقريبة منهم وعلاقه سويه بفضل الله بعيدا عن ان والدي عصبي جدا تاني نقطه ان اهلي كويسين واهل صلاة وبيسعوا علي اد ما يقدروا واحسبهم علي خير ولا ازكيهم علي الله ومكنوش بيمنعوني من اي حاجه ترضي الله عز وجل
ولو اعترضوا بيبقي خوف عليا
.. انا لا قلبي ولا عقلي مقتنعين باني ملبسش النقاب عشان ظروف البلد ورفضهم للنقاب كذا حاجه في بعض
اما لانهم شايفينه تشدد ..او علشان م اتإذيش بسببه أو اصبري لما تتجوزي علشان يبقي معاكي راجل !!!!
بالله الراجل ده مش هيحميني لو ربي اراد بي ضُر
عارفه انهم اب وام ومش هحس الا لما اكون في مكانهم ..
بس انا كنت بسمع الصحابة مش بيهمهم ارواحهم إلا طاعة الله ورسوله عندهم .. الله ورسوله فقط يا هدير 💔
كنت اذكرهم بأية قُل لَّن يُصِيبَنَا إِلَّا مَا كَتَبَ اللَّهُ لَنَا هُوَ مَوْلَانَا ۚ وَعَلَى اللَّهِ فَلْيَتَوَكَّلِ الْمُؤْمِنُونَ
واذكرهم بحديث وَاعْلَمْ أَنَّ الْأُمَّةَ لَوْ اجْتَمَعَتْ عَلَى أَنْ يَنْفَعُوكَ بِشَيْءٍ لَمْ يَنْفَعُوكَ إِلَّا بِشَيْءٍ قَدْ كَتَبَهُ اللَّهُ لَكَ وَلَوْ اجْتَمَعُوا عَلَى أَنْ يَضُرُّوكَ بِشَيْءٍ لَمْ يَضُرُّوكَ إِلَّا بِشَيْءٍ قَدْ كَتَبَهُ اللَّهُ عَلَيْكَ رُفِعَتْ الْأَقْلَامُ وَجَفَّتْ الصُّحُفُ»
وان الله عزوجل قدر لي كل شئ وانهم ميخافوش
لكن احنا ياهدير محتاجين فعلاّ نؤمن بكتاب الله محتاجين نتعامل معاه بمصداقيه وان ده الحق
احنا كلنا عارفين الايات عارفين اية قل لن يصيبنا بس محتاجين نؤمن بيها بصدق ونعمل بيها
لو امنا بصدق حياتنا هتتغير هنبقي فعلا عايشين حياة الصحابه لكن احنا إيمانا ضعيف 💔 إلا من رحم ربي
بدأ كفاحي مع أهلي والنقاب من وانا عندي ١٧ سنه في تالته ثانوي قررت البسه وانزل بيه طبعا بعد محايله بعدد شعر راسي وطبعا الردود كانت بتبقي صعبه جدا ..
منها مثلا كلام والدتي تقولي النقاب ده تلبسيه ان شاء الله لما اموت كانها ضربتني بسكينه في قلبي لانها امي واغلي الناس عندي .. وابي يقول نفس الكلام !!
المهم
اني قولتلهم اني مش قادره استحمل كده وعايزة البسه وطبعا رافضين
قولت انا هستخير الله وهعمل اللي هحسه استخرت وقولت هنزل بيه بكره
لبسته عند واحده صاحبتي وروحت بيه الدرس وبنت خالتي كانت بتاخد معايا الدرس ده وطبعا بكده اهلي عرفوا والكلام وصل لامي وابويا عايزه اقولك ان قلبي ده كان خليط من المشاعر فرحانه جدا اخيرا نزلت بيه ومستورة وفي نفس الوقت حزينه اني مش واخده موافقتهم وهم احب الناس لقلبي وخصوصا يا هدير اني بطبعي مطيعه وبسمع الكلام عمرى ما وقفت قصادهم ولا قولت لا علي حاجه طلبوها مني.. مره واحده اوقف قدام الكل وانا في سني ده صغيره جدا ! علي اني اقف قدام اهلي في قرار زي ده فالموضوع كان صعب جدا علي قلبي وانا مش واقفه قدام امي وابويا بس لا اهلي كلهم وصحابي وكل اللي حواليا !!
رجعت البيت والدتي اللي فتحتلي ومصدومه من شكلي طبعا قالتلي ايه اللي عملتيه في نفسك ده وعايزه اقولك اني كنت فاكره انهم هيسبوني بيه مادام لبسته مينفعش انزل من غيره ولكن اللي جاي ده محطتوش في الحسبان خالص
والدتي سابت البيت وراحت عند خالتي وغضبت عليا وابويا غضب عليا ومش هيرضوا عني الا لما انزل من غيره وامي مش هترجع البيت الا لما تشوفني بوشي
عمرى مااتحطيت في ضغط بالشكل ده وعمرى مااتوقع ان ده هيبقي رد الفعل كنت منبوذه يا هدير من كل اللي حواليا ازاي اعمل العامله دي اخواتي مكنوش بيكلموني وبقيت عايشه لوحدي والبيت بقي عامل زي المقبره واخواتي بقوا يروحوا لامي وابي بينزل شغله وانا قاعده لوحدي ! خدوا مني الموبايل عشان شايفين ان فيه بنات بتحرضني اني البس النقاب
وكأني عملت جريمه !
فضلت في البيت لوحدي عايشه في حزن شديد مش عارفه اعمل ايه عياط طول الوقت واللي بعمله اني اصلي وادعي ربنا يهديهم عليا
وقعدت اتحايل عليهم وانهم يرضوا عني ولكن امي رافضه تماما تكلمني وكلهم لما يرجعوا البيت بيعتزلوني وكاني مش موجوده ...
بس انا كنت تعبانه جدا وبموت من القهره انا دلوقتي لبسته عشان ارضي ربنا وهما غضبانين عليا طب ليه يغضبوا عليا وانا بعمل حاجه مفروض يفرحوا بيها ويفرحوا بيا وانا خايفه ربنا يغضب عليا عشان غضبهم
قلبي ده كان بيتعصر من الالم .. لو قلعته انا هموت من الحزن وهحس اني عملت ذنب عظيم ولو فضلت بيه وهما غضبانين عليا ربنا يغضب عليا
الحيرة والخوف موتوني لحد مانزلت وروحت لامي من غير النقاب وانا مكسورة القلب وده وصف قليل اللي حسيت بيه ساعتها .. منكرش اني حسيت اني اتسرعت بعد ما لقيت رد فعلهم ده لان غضب الوالدين ده انا مش حمله وخصوصا اني عايزة رضا الله في الاصل
امي رجعت البيت وحياتنا رجعت طبيعيه بس سيطروا عليا باني غلطت غلط كبير وبشع وتعليق اللي حواليا كلهم يوحي اني مجنونه .. اعتذرت لهم وخلاص مش هكرر ده تاني
بس انا قلبي وعقلي متعلق بالسِتر وعايزاه مش قادره استحمل مافيش يوم يعدي الا لما ادعي واتمناه.
والمشكله انهم مكنوش بيفهموني لما بتكلم معاهم وافضفض كانوا بيفتكروا اني شايفه انهم مش بيساعدوني اقرب من ربنا ... بالعكس تماما ده هما الخير والفضل كله اللي في حياتي وبيساعدوني علي اد ما يقدروا .. بس انا طمّاعة جدا وببقي عايزة اعمل كل حاجه وكنت دايما قلبي بيقولي ان حجابي لسه ناقص ومكملش وفضلت فتره كبيره ساكته عن طلب النقاب منهم..
لحد ما جه وقت !!
وعرفت ان فيه آراء للعلماء بإن النقاب #فرض !!!!!!!
الكفاح رجع من تاني مفكرتش في الالم النفسي اللي عيشت فيه قبل كده واللي ممكن اعيش فيه تاني واني هتحبس ف البيت وانهم كمان ممكن يغضبوا عليا !!
بس لا طاعة لمخلوق في معصية الخالق وهستحمل
انا بحثت كتير وسمعت اراء شيوخ كتير وقرأت كتير بردو وعرفت ان فيه خلاف كبير ما بين العلماء وان منهم قال فرض ومنهم قال فضيله بس انا باخد بالاحوط الخلاف احنا مش في سُنّه ده في فريضه !!
الموضوع كان كبير جدا بالنسبه لي وخوف شديد النقاب لو فريضه وانا معملتوش ازاي هبقي متطمنه وده كان شعور بيرعبني...
اتكلمت معاهم وجبت اراء الشيوخ بس من وجهة نظرهم ان الجنان رجعلي تاني ! نقاب فرض ازاي ؟ يعني كل اللي لابسين خمار دول والمتدينين دول هيخشوا النار ! واني بجيب كلام غريب واني غريبه...
الاغرب بالنسبه لي ان زي ماحكتلك ان اهلي كويسين جدا ليه موافقوش وريحوا قلبهم وقلبي وحققوا لي حلمي ولكن ربك حكيم عليم ...
كل حد فينا بيبقي خايف يموت من قبل ما يحقق حاجه معينه وانا من ضمن الحاجات اللي كنت خايفه اموت قبل ما تحصل وهي اني اموت وانا متسترش كلي
وفي يوم وانا رايحه الجامعه كنت راكبه العربيه وفيه ست ورايا كانت عايزة تنزل فقمت نزلتلها وانا جايه اركب تاني ولسه علي الباب السواق مشي وانا لسه مدخلتش طيرت من العربيه يا هدير ووقعت وشوفت الموت بعنيا المعجزة في الموقف ان دائما وابدا المكان اللي وقعت فيه ده بيبقي مليان عربيات ربك اراد ساعتها ميكونش فيه ولا عربيه ماشيه المكان كان صحرا !! ومقدرتش افسر ده غير بأن الله عزوجل خلّا المكان فاضي عشان انا مموتش !!
واعتبرت كل اللي حصل إشاره من ربي خصوصا اني خايفه اموت وانا حجابي لسه مكملش 💔
قولت انا هكتب لامي جواب اني عايزة البسه واحكيلها الموقف ده واني كنت هموت لعل الله يهدي قلبها وفعلا كتبته بس محستش انها اتأثرت كل اللي قالتلهولي ابقي البسيه بعد الجامعه وانا كنت في اولي ساعتها
وانا معنديش سياسة الصبر عن الله وانا ايه اللي يصبرني عن طاعة ربي سنين انا واحده كانت هتموت في لحظه !!!!
خدت منها الكلام وانا ناويه البسه ورسايل ربي هحطها في دماغي
وفي يوم نزلت روحت مسجد جنبه محلات لبس شرعي وجبت نقاب وكلمت والدي ف التليفون قولتله اني عايزة البس النقاب قالي بزعيق اعملي اللي تعمليه وطبعا ماصدقت قال الكلمه دي دخلت المسجد ولبست النقاب وناويه اني هستقوي بالله وهكمل بيه مهما كانت الضغوطات حواليا عشان خلاص المره دي غير المره اللي فاتت واراء الشيوخ اللي كان بيقولوا النقاب فريضه كنت بترعب فده اللي هيقويني المره دي!
روحت البيت واخويا اللي فتحلي طبعا نظرات مقدرش اوصفها دخلت والحرب قامت عليا تاني وطبعا مافيش نزول من غيره والمره دي كانت صعبه في حاجه زياده وهي اني في جامعه يعني حضور ودرجات واجتماعات عشان كليتي فيها عملي كتير فاالموضوع كان شاق اكتر بس انا قولتلهم اني خايفه وكل رسايل ربنا ليا بتخليني اخاف اكتر وبتثبتني اكتر وبقتنع ان ده اللي مفروض اعمله واصبر في الاختبار الشديد ده !! وانا لوحدي يا هدير 😭
امي تخلي اختي الكبيره تكلمني عشان ارجع علي اللي بعمله ده وعمتي ويجبولي اهلي ف البيت عشان ارجع عن قرارى وانا مبنزلش الجامعه وده بينرفزهم مني اكتر بس هقولك بصراحه كان في شعور بسيط دنيوي في قلبي من ناحية الجامعه وخايفه ان ده يأثر عليا لاني كنت واخده دراستي جد ساعتها وعايزة ابقي مُعيده وخصوصا ضغطهم عليا فأنا كأني ماسكه في ايدي نار فعلاً
وطبعا كنت عايشه لوحدي زي المره اللي قبلها وكله معتزلني وبسمع كلام صعب جدا وكلهم ساخطين عليا ومن الكلام اللي عمري ماانساه ان اخويا يقولي ابقي اصبري لما تتمي ٢١ سنه والبسيه عشان لما يحصلك حاجه وتتإذي ..تتإذي لوحدك متإذيش امك وابوكي وانا معاهم !!!!!! لكن سنك ده هيودينا كلنا في داهيه !!!
ده غير كلام ابي الصعب جدا جدا اللي انا فعلاً مقدرش احكيه 😭💔
ولكن ربي كان بيرحمني بوجود رفيقه ليا وهي رفيقة المحن كانت بتذكرني بالله دايما وتصبرني واسال الله ان يجعلني في ميزانها وجودها فرق معايا بشكل مختلف وعظيم جدا كانت تقولي دايما ان ابراهيم كان أُمةً كان بيعبد الله لوحده كوني مثل ابراهيم 💙
اعبدي ربك واثبتي ولو لوحدك وكل الناس عليكي كلامها كان بيطمني جدا وبيريحني وبيقويني
كلمة #اثبتي دي كانت تقولها كل يوم كل ثانيه!!
وانا علي نفس الحال لوحدي في الاوضه محدش بيكلمني ومش عارفه اكلم حد بس عايشه في الم لاني عايزة ابرّ اهلي ! وابقي قريبه منهم زي طبيعتي بُعدي عنهم وانا وسطهم ده كان بيموتني بس الحاجه اللي مصبراني اني بعمل كده لله عشان ده شرعه ومصبرني الدعاء والتذلل واليقين في الله انه هيهديهم عليا انا واثقه !
لحد ما جه يوم وقالولي احنا هناخد رأي شيخ جارنا وكان مدرس امي وهو شيخ من الازهر هنسأله لو النقاب فرض هنسيبك لو مش فرض هتقلعيه
كنت متردده ومش حابه
وقولت مش هروح معاهم قالولي ماشي ونزلوا هما وقعدت اصلي قضاء حاجه وعندي يقين عظيم بالله انهم هيرجعوا بالبُشرى وعامله حسابي اني خلاص هنزل بيه 💜 وربي هيجبر خاطري جبر عظيم
لقيت اخويا بيكلمني وبيقولي البسي وتعالي قولتله عملتوا ايه قالولي تعالي بس الشيخ عايز يتكلم معاكي وانا متطمنتش حسيت بقبضه من طريقته
ولما قولتله لا مش عايزه اجي قالي طيب البسي النقاب وتعالي ونزلت !
طلعت عندهم وكنت في موقف لا اُحسد عليه وملامح امي واخويا واضح منها جدا ان النقاب اللي نزلت بيه ده مش هيتلبس 💔
الشيخ قال ان النقاب مش فرض ومقالش حتي ان فيه اختلاف ! هو فضيله وبصراحه الابتلاء اشتد عليّا بطريقه متخيلتهاش وكنت فاكره ان الشيخ ده هينصرني ويعرفهم ان النقاب فرض وانهم مفروض يسبوني عشان هو شيخ وعنده علم !
صدمتي في انه كان عون لهم عليّا يا هدير 💔
وان بناته عايزين يلبسوا النقاب وهو مش موافق وهما كويسين كده بالخمار !! وقعد يقول كلام يخوفهم اكتر ويخليهم يحسوا انهم كانوا صح وان النقاب ده اشيله من دماغي خالص .. وان النقاب ده ! انا بسببه هتأذي !
انا دموعي بتنزل من غير مااحس ومش قادره اتكلم معاهم ولا اتناقش كنت ساكته وبس !! كنت مهدوده 💔
قعد يقولي ان فيه حاجات تانيه مفروض اهتم بيها وهى اولي من اهتمامي بالنقاب واني مينفعش اعمل كل ده .. استفدت منه حاجه واحده ان في حاجات معينه لازم اهتمامي يزيد بيها اكتر
ولكن كلامه كله ساعتها حيّرني خصوصا انه قالي رضا الوالدين اهم من النقاب وده أثّر عليا خصوصا انهم نفس الوضع مش راضيين عني
خرجنا من عندهم وطلعنا البيت وهما واثقين جدا من الشيخ وكلامه مُقنع بالنسبه لهم وخلاص انا مفروض انزل اشوف جامعتى وحالي اللي بقالي كام يوم سايباه بس من غير النقاب حسب اتفاقهم معايا !! وانا اتفقت معاهم عشان كنت واثقه ان الله هيسترني وهنزل بالنقاب وهيعوضني خيرا وهينصرني.
لكن الحال اتشقلب وانا نفسي بقيت في حيرة وتعب لما شيخ كبير عنده علم ومُعلّم في الازهر وثقة يقولي اني ارجع عن اللي بعمله واطمني النقاب مش فرض
كنت في ابتلاء عظيم من كتر الضغط النفسي مكنتش بعرف اخد نفسي لاخره وكانك حاطه علي قلبي حجر
مش عارفه اعمل ايه انا عايزة اطيع ربي في كل حاجه 💔
حكيت لرفيقتي وقولتلها انا مش عارفه اعمل ايه قالتلي كلمه واحده بس اثبتي
_______________
ضعفت ومقدرتش اكمل خوفت ابقي غلط وده يبقي في ميزان سيئاتي بدل حسناتي ملقتش اي اشاره احس بيها اني صح نزلت لتاني مره مكسورة الخاطر كنت حاسه وانا من غيره بعكس السِتر اللي حسيته وانا بيه 💔
كنت بعتبر تأخر لبسي النقاب ان انا مش صادقه في طلبه وان فيه بنات بتلبس النقاب في اسرع وقت واهلهم بيبقوا فرحانين بيهم اللهم بارك بس انا لا ف دا معناه اني مش صادقه واني مستهلوش وان كل العوائق بتأكدلي كده وانا كنت بجلد نفسي يا هدير مش بلوم لا الجلد ممكن يكون حاجه هينه بالنسبه للي كنت بعمله في نفسي ... انا ضعفت ومكملتش انا مستحقش انا انسانه وحشه مقدرتش تستحمل عشان ربها ! 💔
بس كل اللي كان بيحصل ورفضهم للنقاب الرفض الصعب ده وان كله عليا وشايفين ان تفكيري صعب واني مجنونه
انا كنت شايفه حاجه غيرهم شايفه فضل ربي عليا ان زرع في قلبي حُب السِتر انا نفسي ساعات بستغرب ازاي حبه وصل لقلبي بالشكل ده وازاي مبتاثّرش بالكلام الوحش عليه مهما حصل
انا صاحبتي المقربه في الجامعه منتقبه كانت بتقولي انتي متعلقه بالنقاب اكتر مني وان حبي للنقاب موصلش لدرجة حبك ليه
وبنت صاحبتي اهلها موافقين ع النقاب بس خايفه تاخد الخطوة دي كانت بتقولي وصلتي لكده ازاي انا نفسي احبه زيك عشان اعرف اخد الخطوة دي !
انا مستشعره الفضل العظيم واللي انا فيه ده انه كرم وفضل منه فقط انا فعلا يا هدير مش عارفه وصلت للحب ده ازاي ؟
________________________
هحكي موقف بسيط حصل هينفعنا قدام اوعي تنسيه
وانا وامي ماشيين في الشارع ...
كنا ماشيين وقابلنا فاطمة صاحبتي وهي جارتنا بنت في سني واللهم بارك لبست النقاب فرحت بيها جدا جدا وكانت مفاجأه جميله بالنسبه لي باركنا ليها ومشينا.
____________________________________
طبعا مكنتش بتهد وكنت بطلب منهم النقاب وكل مره بطلب فيها بكون علي اتم الاستعداد للنزول بالسِتر وببقي موقنه اني هلبسه وببقي مجهزة حاجتي كلها و الشعور ده اعظم شعور حسيته في حياتي وهو اليقين وحسن الظن بالله وده اللي بينجيني في كل حاجه بطلبها من ربي وربي بيستجيب عشان هو عند ظن عبده به 💜
مش عشان انا استاهل 💔
وطبعا الدعاء مستمر وكنت بدعي ان الله يرزقني معجزة تحقق لي حلمي اصل لبسي النقاب ده فعلا محتاج معجزة مع اهلي.. كنت ادعي ربنا يرزقني رؤيه للنبي صلي الله عليه وسلم ويأمرني فيها بالنقاب وهما اكيد هيوافقوا ...
وفي يوم قبل ماانام دعيت وقولت يارب ارزقني المعجزة اللي تخليني البس النقاب ونمت !
حلمت إني كنت ماشيه في طريق مظلم الي حد ما وماشيه مش محدده همشي يمين ولا شمال ومره واحده لقتني ماشيه يمين واول ما مشيت يمين لقيت كلام من نور قدامي عمري ماهنسي شكله والكلام ده بيأمرني الله فيه بلبس النقاب امر صريح وواضح من الله بالنقاب والكلام ده كان ايات والايات دي كنت بسمعها بصوت الله عزوجل !!😭 قعدت في الارض ابكي بكاء خوف وخشيه من الله عزوجل كنت بعرق عرق كتير جدا جدا عارفه موقف النبي صلي الله عليه وسلم لما اول مره نزل عليه سيدنا جبريل وذهب للسيده خديجه وكان عرقان جدا وقال زملوني زملوني ... كنت كده
صحيت من النوم قبل الفجر بدقائق وكنت عرقانه جدا وخايفه جدا جدا وضربات قلبي سريعه ومستشعره اللي شوفته ده وكأني عيشته فعلا !
ومبقتش مصدقه اللي انا فيه هو انا فعلا شوفت الرؤيه دي.. طب انا ربي امرني بالنقاب فعلا ..طب ده انا مشوفتش النبي وامرني بيه زي ما انا دعيت الله .. ده الامر من الله مباشرةً !!
فضلت قاعده مصدومه شويه لحد ما امي وابي صحيوا للفجر وحكتلهم !
تفتكري يكون الرد ايه يا هدير ؟
الرد صدمني وهو ان الحلم ده بسبب عقلي الباطن عشان انا مش ببطل تفكير في النقاب وقلبي وعقلي مشغولين بيه !
هو عقلي الباطن هيجبلي حلم الله عزوجل بيكلمني فيه !!
قولتلهم دي رؤيه قعدت احكيها تاني يمكن يستوعبوا معايا اللي حصل !!
مافيش فايده للاسف 💔
قولتلهم انا هطيع ربي وهسمع كلامه هو امرني بالنقاب وانا عايزة انزل بيه دلوقتي الجامعه عشان كنت مفروض انزل بعد شويه
طبعا رفضوا مجنونه صاحيه من النوم عايزة تنزل بالنقاب 💜🤓😂
قولتلهم انا اسفه مش هقدر انزل من غيره .. محدش حس باللي فيا يا هدير ده احنا بنطيع الله من غير ما نشوفه وبنحبه وبنسجد له من غير ما نشوفه .. انا هقدر ان ربي يأمرني بشئ ايا كان اي هو في رؤيه ومعملوش !! بالله ما هقدر 💔😭
تعبت اوي طب طلبت معجزة واتحققت ماهي الرؤيه دي بالنسبه لي معجزة عشان انا مستاهلش اشوف رؤية زي دي !
قعدت اقنعهم بس بردو محصلش جديد
قعدت في البيت واللي بفضل الله حصل وكان شئ مختلف عن المره اللي فاتت ان شيلت من قلبي الجامعه وشيلت كل حاجه من قلبي تماما وبقي عندي استعداد اسيب دراستي فعلا واسيب الجامعه كلها عشان الرؤيه دي ربنا قوّاني بيها كانت اقوي رساله من الله عزوجل ليا بقيت واثقه خلاص انا بعمل ايه ومبقتش محتاجه اقول النقاب فرض ولا محتاجه ادور لهم علي اراء العلماء خلاص بفضل الله المعجزة حصلت
امي وابي كانوا بيبينوا لي عدم اهتمامهم بالجامعه وخليكي قاعده وكانهم مستبيعين بس مافيش نزول بيه بس في الحقيقه انا اللي كنت مستبيعه بصدق لا جامعه تهمني ولا تعليم يهمني هو في الاصل يبقي معايا علم شرعي يوصلني لربي
والمره دي كنت بقعد في وسطهم عادي ومش بقعد لوحدي
واول يوم ليا في البيت من غير نزول عشان السِتر بدأت اكمل وردي في القرءان الكريم 💜
وكنت ساعتها في سورة الفرقان فتحت كتاب ربي وبدأت اقرأ وانا في قلبي حزن شديد بسبب عدم رضاهم وزعلهم مني وإذ بِأية وَتَوَكَّلْ عَلَى الْحَيِّ الَّذِي لَا يَمُوتُ وَسَبِّحْ بِحَمْدِهِ ۚ وَكَفَىٰ بِهِ بِذُنُوبِ عِبَادِهِ خَبِيرًا
الايات نزلت علي قلبي سكّنت الالم اللي فيه ..
ربي يُكَلمُني في كتابه والايات توصيني بإن اتوكل عليه تُصَبّرُني تُقوّيني به فهو حي لا يموت لا ينساني يسمعني ويري مكاني 💔 توصيني بالتسبيح بحمده 💜
انا حسيت بمعية الله ليا بشكل محستوش قبل كده حسيت ان ربي راضي عن اللي بعمله وان عدم رضاهم ده مش في ميزان سيئاتي لانه مش في محله.
كنت كل يوم ايات الله تنزل علي قلبي بالرحمات والشفاء لقلبي العليل
تاني يوم بنفس الحال مش موافقين انزل بيه وانا مش قادره انزل من غيره .. فتحت كتاب ربي و قعدت اقرأ وردي وفي اول سورة الشعراء وسيدنا موسي خايف قومه يكذبوه ويضيق صدره ولا ينطلق لسانه وخايف يقتلوه قال الله عزوجل له قَالَ كَلَّا ۖ فَاذْهَبَا بِآيَاتِنَا ۖ إِنَّا مَعَكُم مُّسْتَمِعُونَ ... اطمنت جدا واستمديت قوة بكتاب الله من خلال الايات واني مخافش من صدهم عني وان الله معي يسمعني وانا بكلمهم وبجاهد عشانه وسبحان ربي الايات بتيجي في وقت ببقي محتاجه فعلا اشوفها واحسها .... كنت بحس بمعونة الله ومعيته كل يوم اكتر من اليوم اللي قبله وكنت حاسه بنصر الله وعلي اد ما تعبت وحزنت علي اد ما ربي كان بينصرني بأياته كل يوم ويثبتني به وطبعا رفيقتي معايا ومسبتنيش ولا لحظه وكانت بتثبتني.
ومافيش تغيير وقاعده في البيت وفيه محاضرات واجتماعات في الجامعه وامتحانات وانا قاعده عشان منزلش من غير سِتري 💜 كنت مرتاحه جدا وانا حاسه ان مافيش حاجه همّاني ومافيش دنيا هتاخدني من ربي حبيبي .
وبتمر الايام وهما علي موقفهم وانا علي موقفي
__________
فتحت كتاب ربي وقعدت اقرأ وردي وإذ بِأية وَلَقَدْ نَادَانَا نُوحٌ فَلَنِعْمَ الْمُجِيبُونَ (٧٥) وَنَجَّيْنَاهُ وَأَهْلَهُ مِنَ الْكَرْبِ الْعَظِيمِ
قعدت ابكي يا هدير 💔
ربي يكلمني في كتابه ويقول ولقد نادانا نوح فلنعم المجيبون ... ربي بيعلمني الدعاء والمناجاه ويعلمني انه نعم المجيب 😭💔 هو مش بس مُجيب لا هو نعمُ المجيب .. ربي هينجيني من الكرب العظيم ربي هينصرني وهيسترني وهيكن لي نعم المجيب هو ده ظني به
الايات كانت بتنسيني اهلي والناس والدنيا كلها 😭💔
كانت بتقوي وتشد عضُدي كنت مختلفه عن المرات اللي فاتت حتي مكنتش ببكي من الحزن ولا ببكي من الضغط كنت ببكي لما ادعي واتذلل لله ما انا امة له ذليله ضعيفه لا تقوي علي شئ بدونه خاضعه له ويعلم اني اريد وجهه العظيم 😭
وبقى دعائي اناديك رباه فلنعمَ المُجيبون💜 ببكاء شديد انا عارفه انك نعم المجيب وعارفه انك هتفرج كربي وهتنصرني وهتعزني بالنقاب وهترضيهم عني انا واثقه فيك يا نعم المجيب 😭😭 .
والفضل من الله العظيم ان دي الايات اللي اراد يهون بيها عليا ويثبتني بيها سورة الصافات كلها بالجمال ده النصر والنجاة والفرج ❤
وعشان المره دي الله عزوجل اراد يثبتني بالقرآن فكنت صامده معاهم لدرجة اني امي لاحظت عليا اختلاف عن كل مره وكانت بتقولي بالحرف انتي مالك المره دي فيكي ايه فيكي حاجه غريبه !!
كنت صامده كنت قويه بربي وبأياته وعشان قعادي في البيت طوّل غير المرات اللي فاتت فده دليل اني متغيره فعلا بس انا كنت دايما بقولهم ان الرؤيه دي اللي مخلياني كده وانا مش هقدر مسمعش كلام الله عزوجل واعرض عنه 💔
بس زي مااحنا مافيش حاجه اتغيرت !
ولكن بأيات الله انا واثقه ان هيسجيب فهو نعم المجيب.
وايات الله مستمره في التثبيت والتدعيم والنصر وكلام خليل الله ينزل علي قلبي الضعيف 💜
الَّذِي خَلَقَنِي فَهُوَ يَهْدِينِ (78) وَالَّذِي هُوَ يُطْعِمُنِي وَيَسْقِينِ (79) وَإِذَا مَرِضْتُ فَهُوَ يَشْفِينِ (80) وَالَّذِي يُمِيتُنِي ثُمَّ يُحْيِينِ (81) وَالَّذِي أَطْمَعُ أَن يَغْفِرَ لِي خَطِيئَتِي يَوْمَ الدِّينِ(82) رَبِّ هَبْ لِي حُكْمًا وَأَلْحِقْنِي بِالصَّالِحِينَ (83
ربي بيطمني بيه هو هيهديني للسبيل وهو من يطعمني ويسقين وهو يشفين وهو من يميتني ثم يُحيين وهو من يتولّي امري كله 💙
ربي بيطمني وهو يُكلمُني في كتابه ويقول جلّ في عُلاه أَمَّن يُجِيبُ الْمُضْطَرَّ إِذَا دَعَاهُ وَيَكْشِفُ السُّوءَ وَيَجْعَلُكُمْ خُلَفَاءَ الْأَرْضِ ۗ أَإِلَٰهٌ مَّعَ اللَّهِ ۚ قَلِيلًا مَّا تَذَكَّرُونَ (62
سيستجيب لي سيكشف عنّي السوء كذلك الله يا هدير
💔
وبعدها آية أَحَسِبَ النَّاسُ أَن يُتْرَكُوا أَن يَقُولُوا آمَنَّا وَهُمْ لَا يُفْتَنُونَ
لازم اختبار عشان يظهر ايماني وصدقي مع الله
ولكنه اختبار صعب وشديد
________________________
وفي يوم لقيت ابي بيناديني وامي كانت قاعده معاه روحتلهم وقعد يتكلم معايا ويقولي انه شايف ان موضوع النقاب لسه شويه عليه وقعد يكلمني براحه واني اصبر معرفتش ارد اقول ايه قولتله بعد اذنك يا ابي وجريت علي الاوضه سجدت وقعدت اعيط وانادي ربي فهو نعم المجيب وفضلت قاعده اعيط لحد ما لقيت امي بتناديني روحتلهم وانا منهاره وشكلي يصعب علي الكافر انا لما بنهار من العياط عيوني بتتنفخ احلي نفخه 😂 كانك نفختي بلالين
صعبت عليهم يا هدير تخيلي !! قالولي خلاص البسيه مصدقه يا هدير امي وابي يوافقوا !! دي معجزة
وافقوا انزل بالنقاب وكده انا هنزل الجامعه بيه !!! معقول انا هستجيب لامر ربي وهنزل بالنقاب وقلبي هيطمئن ويرتاح
انا حسيت اني بحلم روحت سجدت تاني احمد ربي المجيب ! وقعدت مصدومه شويه من المفاجأة وقعدت احضن فيهم واشكرهم
وبعدين قولتلهم خلاص انا هنزل بكره ان شاء الله بدل النهارده عشان مش شايفه خالص من العياط عنيا مقفله ومينفعش انزل جامعتي بعيده محتاجه اكون نايمه كويس عشان اركز وانا مطبقه ومعيطه فالموضوع هيبقي مميت فانزل بكره ان شاء الله وانا مفوقه وكويسه 💜 ولاول مره انام وانا مجبورة الخاطر يا هدير الجبر اللي بعد القهره والانكسار والانهيار من العيااط ده شئ مش هعرف اوصفه 💙
نمت واعتقد اني نمت عشان تعبانه من العياط لكن لو كنت كويسه انا عيني ما تعرف تغفل لحظه من الفرحه وقومت من النوم وعايشه اجمل لحظات حياتي انا خلاص ربي اذن لي بالسِتر الجميل 💙 والمعافره والجهاد والحرب اللي عملتهم هي دي نتيجتهم هما بنفسهم قالولي انزلي بيه ربي جبرني ونصرني واذهب عني الحزن
وخلاص ساعات وهبقي منتقبه عارفه يعني منتقبه ؟؟ 💜💜💜
قعدت بقي معاهم وانا مبسوطه ومش مصدقه نفسي ومجبورة الخاطر
لقيتهم بيقولولي انهم شافوا كوابيس بسبب النقاب وانهم مش مرتاحين ومش هتنزلي بيه !
حاسين بيا !😅 انا مش عارفه ارد ولا عارفه اوصف شعورى
انا كنت بقول ان شعور الجبر بعد الكسر والقهره شعور ميتوصفش وانه فعلاً رأفه من الله ورحمة ومعجزة للقلب
بس بردو مش هقدر اوصف لما تبقي مجبورة الخاطر في حلمك ولما يكون حلمك ده هو رضا الله في شئ معين! والجبر ده يتاخد ويتسحب من قلبك في اسرع وقت انا نمت بس يا هدير! قمت علي الكسره من تاني!
قعدوا يقولولي هنصلي استخاره عشان بس يريحوني ونتيجة الاستخاره كانت بتبقي كوابيس ومقبوضين
ده نقاب ونقاب يعني سِتر ازاي ده هيبقي سبب للكوابيس والقبضه !!
رجعنا تاني للحال اللي كنا عليه
سبحان من ثبتني يا هدير وانا بحكيلك انا صدقا بقول في نفسي انا صبرت علي كل ده ! ده بفضله فقط
انا شيطاني ساعتها مكنش بيوسوس لي باني ازاي عامله العمايل دي كلها عشان النقاب! ونقاب ايه اللي احارب كل ده عشانه وحياتي واقفه عشان بس اتستر بيه ! مكنش بيحصل عشان ميقدرش يوسوس ليه في السِتر بحفظ ونصر من الله فقط سبحانك ربي
الوساوس كانت بتيجي في اني عايزة السِتر واطيع ربي وعايزة رضا اهلي
فانا عايزه الاتنين وعدم وجود حاجه منهم ده بيخوفني من غضب الله وهو ده اللي كان بيحصلي وبيرعبني وساعات بيكون سبب في ضعفي وبتهز
وفي يوم !
كنت قاعده في اوضتي بقرأ وردي وامي كانت تحت بتشتري حاجات ولما طلعت جاتلي الاوضه بتقولي انا قابلت فاطمة وانا جايه فاطمة قلعت النقاب!!
وانا ساكته.. بتقولي قلعت النقاب عشان هي بتيجي عندنا البيت كتير وبتنده علي بنات جيرانا اللي فوقينا عشان هي كمان صاحبتهم والظابط اللي تحت اللي بيحرس الكنيسه قالها اقلعي النقاب ده وريني وشك وانتي بتيجي هنا كتير ليه !!
اصل احنا بيتنا يا هدير في وش كنيسه انجيليليه
باب بيتنا في وش باب الكنيسه 🙂
قامت فاطمة قالتله اقلعه ليه وخافت جدا منه وخلعت النقاب!
متهزتش من كلامها لما قالتلي ان الظابط قالها اقلعي النقاب وانه عايز يشوف وشها ولا ان الموقف في اصله مرعب كنيسه وظابط ونقاب ! مش سهل انا عارفه
بس انا مخوفتش !
سكت ومقولتش حاجه وهي مستنيه مني رد فعل مستنيه اخاف واتصدم واتخض وارجع عن قراري قالتلي ايه مش هتسمعي الكلام وتنزلي الجامعه قولتلها اسفه مش هقدر سابتني ومشيت وكملت وردي !
وجدت ربي يفيض عليّ بأية أَلَيْسَ اللَّهُ بِكَافٍ عَبْدَهُ ۖ وَيُخَوِّفُونَكَ بِالَّذِينَ مِن دُونِهِ ۚ وَمَن يُضْلِلِ اللَّهُ فَمَا لَهُ مِنْ هَادٍ
حسيتي اللي انا كنت فيه اللحظة دي 🙂 حاسه بمعية الله ليكي وان الله كافيكي يا هدير مهما عظم الامر
اتاكدتي انك مفروض متخافيش ولو فكرتي تخافي ربك يبعتلك اياته يثبتك ويثبت ايمانك وان الناس بتخوفك من دون الله ولكن ما عليكِ الا الثبات والاستعانه بالله وتطمني وتستشعري ان الله معك بيقين !
دموعي بتنزل بغير ارادتي وفضلت اكمل في الايات مستكفتش بالايه دي !! لا انا كملت حسيت ان لسه فيه اكتر فيه ايات لسه هتثبتني
وَلَئِن سَأَلْتَهُم مَّنْ خَلَقَ السَّمَاوَاتِ وَالْأَرْضَ لَيَقُولُنَّ اللَّهُ ۚ قُلْ أَفَرَأَيْتُم مَّا تَدْعُونَ مِن دُونِ اللَّهِ إِنْ أَرَادَنِيَ اللَّهُ بِضُرٍّ هَلْ هُنَّ كَاشِفَاتُ ضُرِّهِ أَوْ أَرَادَنِي بِرَحْمَةٍ هَلْ هُنَّ مُمْسِكَاتُ رَحْمَتِهِ ۚ قُلْ حَسْبِيَ اللَّهُ ۖ عَلَيْهِ يَتَوَكَّلُ الْمُتَوَكِّلُونَ (38) قُلْ يَا قَوْمِ اعْمَلُوا عَلَىٰ مَكَانَتِكُمْ إِنِّي عَامِلٌ ۖ فَسَوْفَ تَعْلَمُونَ (39) مَن يَأْتِيهِ عَذَابٌ يُخْزِيهِ وَيَحِلُّ عَلَيْهِ عَذَابٌ مُّقِيمٌ (40)
مهما حصل يا امي مهما خوفتيني بالذين من دونه عارفه انك خايفه اتاذي ومن منظورك بتحافظي عليا
بس في الاول والاخر ده خوف من بشر
وانا عايزة اطيع الله ومفكرش في غيره ولا اخاف من غيره انا اقوي من اي حد بطاعتي لله
ربي ياهدير يقول لي اني لو اراد بيا ضر مين هيكشفه عني وانه لو اراد بيا رحمة مين هيمسكها عني
قولي حسبي الله وعليه فليتوكل المتوكلون !!
انسي الموقف اللي اتحكالي ومهابش غير الله عزوجل واثبت
اثبتي يا خديجه مخافش من حد انا اتربيت يا هدير اتربيت تربية متربتهاش في حياتي
النقاب ربّاني من قبل ماالبسه !! والموضوع مبقاش عوائق واقفه قصادي واني حاسه اني مش صادقه الموضوع موضوع تربيه...الله عزوجل بيأدبني !!
ولسه علي نفس حالنا ويمكن اصعب واشق
الموقف ده قلبهم عليا اكتر وانا كده بثبت جنوني اكتر يعني بالنسبه لهم ان ده موقف لنتيجة الاستخاره يعني سبحان الله مكانوش بيفكروا ف الكنيسه ومره واحده يظهر موقف يخلوهم ياخدوا بالهم منها واني ممكن اتاذي بسببها فيقويهم اكتر بان النقاب ده بسببه هيحصل اذي .
فضلت علي موقفي وكل مااحس اني مهزوزه افكّر نفسي بالرؤيه وبأمر الله وبآياته
ولكن حصل اللي قلبي مكنش قادر يتحمله والدي تعب جدا جدا وكان رافض الاكل تماما وامي كانت بتأنبني انه لو حصله حاجه هيبقي بسببي 😭😭 قلبي واجعني.
اليوم اللي بعديه نتيجتي طلعت وجبت بفضل الله امتياز ..تخيلي يا هدير
الله عزوجل ربّاني بإن قعادي في البيت كل ده واني تركت الجامعه كلها عشانه وعشان اطيعه مراحش هباء ووفقني و رزقني بأعلي التقديرات وطلعت التالته علي الدفعه شوفتي الكرم !!
كان لازم اتربّى واتعلّم انى لازم اسيب الدنيا كلها عشانه ومفكرش الا فيه 🙂
من ترك شيئا لله عوضه الله خيرا منه
عوضني في الدنيا وانتظر عوضه في الاخره
اول ماالنتيجه طلعت امي قالتلي تعالي نروح لابوكي نفرحه بنتيجتك هو تعبان نفسيا وجسديا تعالي فرحيه وتخففي عنه شويه
معرفتش اعمل ايه تحسي اني وصلت لحارة سد !!
رفيقتي قالتلي افتحي مصحفك واعملي باللي هتلاقيه
مفكرتش لحظه طبعا وفتحت مصحفي
لقيت وَوَصَّيْنَا الْإِنسَانَ بِوَالِدَيْهِ إِحْسَانًا ۖ
خضعت للقول ونزلت لابي وشوفت دموعه بالحزن والفرحه بنجاحي
بس قلبي لا يعلم بيه الا الله
خلاص يا هدير 🙂
اقتنعت ان قعادي في البيت ووقوفي ده مش بيجيب نتيجه بالعكس انا اتحطيت في وضع اني بأذي اهلي وبلّي دراعهم وانا وربي مااقدر علي كده.
ومبقاش قدامي غير اني اصبر وادعي
وكل اللي عدا ده تربيه ليّا بالصبر وحسن الظن بالله
___________
الفتره دي كانت من سنتين
والفتره دي كلها أُمي بقت انسانه تانيه في حكاية الخوف الشديد وانها تقفل عليا ..أُمي اتربّت معايا 🙂
هقولك ازاي
جه رمضان ٢٠١٨ كنت محضره نقابي وحاجتي كلها عشان هقول لابي اني عايزة انزل صلاة التراويح بالنقاب دي امنية حياتي ان ربنا يقدّر لي لبسه في رمضان وابدأ بي الشهر الكريم 💜 وعندي يقين ملهوش حدود اني هلبسه وبتعامل علي الاساس ده حتي كنت مفهمه امي اني نازله اشترى حاجه للنقاب عشان انا واثقه في الله انه هيسترني وهنزل بي خلاص ربنا أذن انا عارفه وامي قالتلي طيب بس خلي بالك هو مش هيوافق تخيلي يا هدير ان كلمة طيب دي طالعه من امي انا مش مصدقه نفسي!
روحت قولتله قعد يزعقلي ويتخانق معايا وكسّر خاطري 🙂
وكملت رمضان وانا مكسورة الخاطر بس بدعي انه يسترني.
كنت بروح المسجد قبل المغرب وبرجع الشروق البيت يعني طول اليوم برا
كان اخويا يقولها انتي ازاي سايباها برا كل ده
كانت تقوله انا سيباها عند ربنا ملكش دعوة 🙂
وعلي هذا الحال في امورى كلها هي اللي كانت تقف وتقول بنتي عايزة ربنا وانا مطمنه عليها وهي معاه
وربها معاها وعايزة اعينها وتكون في ميزاني
وتقولي مش كده انتي في ميزاني يا خديجه 💙
ربي سخرها ليا عشان عالم بحالي عالم انه مُريدي 💔
وبتمر الايام وحصل ابتلاء صعب لينا في بيتنا خلانا نسيب البيت ونعزل
مكنش يجي في بالي ابدا ان الجبر هيبقي بالشكل ده
ربي جبرنا يا هدير واختار لينا ماؤي يحبه ويرضاه
واتنقلنا لبيت أمامه مسجد 💙
الاذان والصلاه محاوطين البيت من كل ناحيه بسمع الصلاه والاذان في اركان البيت كله ❤
ورمضان السنه دي ٢٠١٩ نويت اني اطلب النقاب تاني
رغم البلاء اللي لسه طالعين منه يخليني مطلبوش خالص دلوقتي بس مفكرتش وفوضت امري لله 💙
بس قبل مااطلبه حصل عوائق تخلي اي بنت مكاني متتكلمش 🙂
بس انا خلاص فهمت ان الموضوع مش نقاب بس الموضوع تربيه .. حسن ظن بالله ... حسن التوكل علي الله
واول حاجه ان والدي العزيز كنا قاعدين بنتكلم عادي ومره واحده لقيته بيقولي ان فيه حاجه لو عملتها بعد الجواز مش هيبقي حاببها الا وهي النقاب 🙂
وقعد يجيب امثله سيئه لمنتقبات ويحكي بيحصل منهم ايه انا قعدت ادافع عن النقاب وان النقاب برئ منهم!
وانا علي يقين ان ده كان اختبار لحسن ظني بالله
يعني اي بنت مكاني كانت هتهمد وتقول في نفسها انا كده مش هكلم ده مش حابب حتي بعد الجواز
ولا اتهز لي شعره وقولت ربي هيسترني انا عارفه 💙
وعائق تاني اول مره يحصلي يا هدير وكنت عارفه انه اختبار واستعنت بالله علي اني اتجاوزه واخبيه علي اهلي عشان لو عرفوا مش هيخلوني البسه
وهو اني مريضة حساسية انف وطبعا تعبها صعب وبيعمل بلاوي بس اللي كان اول مره يحصلي اني مناخيري تفضل كام يوم ورا بعض مستمره في انها تنزل دم كنت بخبي المناديل عشان ميشوفهاش وكنت اوقات بقعد في الاوضه لوحدي عشان ميشوفنيش
كنت تعبانه جدا جدا ومكنتش عارفه اتصرف ازاي لو قولت لهم عايزة دوا هيعرفوا الموضوع
والحل الوحيد اللي عندي اني ادعي ربنا يرفع عني فلا شفاء الا شفاءه وفضلت اكلم ربي واقول عايزة السِتر ياربي مهمها تعبت ومهما حصل 🙂 ومش هتهز بتعبي لو بموت ومش عارفه اتنفس عايزاه .. عايزاه لانه فيه رضاك 💙
ومن المبشرات اللي حصلتلي
اني كنت نايمه كان بعد الفجر وقلقت عشان بس اسمع الايه دي إنّا نُبشرُك 💙 وروحت في النوم تاني !!
واول يوم رمضان كنت راجعه من الجامعه بسمع درس لحازم شومان وكان بيتكلم عن الانبياء ودعائهم وانهم عارفين هما بيدعوا مين 🙂💙
سيدنا زكريا كان بيدعي بالولد وهو عجوز وامرأته عاقر بس عشان هو عارف هو بيدعي مين 🙂
سيدنا سلميان دعا بملك محدش خد قبله بس كان بيدعي عشان هو عارف بيدعي مين
فقولت في نفسي
انا عارفه انا بدعي مين 🙂💙
وكنت علي يقين بهذا الدعاء *بيدك الامر كله واليك يرجع الامر كله*💙
وكان بيقول ان الله عزوجل سخّر الجبال لسيدنا داوود وان الجبال لغةً عكس سخّرنا والجبال دايما مثل للرسوخ والثبات
سخّر الله عزوجل الجبال لعبده ..الجبال التي لا تُسخّر !!
الجبال التي لا يقدر عليها بشر ..تُذلل لعبده داوود
الكلمتين عكس بعض .. بس الله قدير 🙂💙
قدير علي ان يسخّر قلب أبي اللي مهما عملت عشان اقنعه بالنقاب بردو قلبه مقفول
وفضلت ادعي .. يا الله كما سخرت الجبال لعبدك داوود سخر لي قلب ابي 💙
وانا عارفه ان خلاص ساعات وهنزل بالسِتر 🙂💜
وان انقطعت الاسباب مافيش ولا سبب يخليني احس ان والدي هيوافق ولكن!🙂 يقيني وظني بالله جميل 💙
وفي يوم لقيت اختي جت خبطت عليا وبتقولي ان ابي بيكلم امي برا وانها هتقتنعه وطلعت تاني ..
بعدها امي خبطت ووشها كله فرحه وبتقولي هتلبسيه يا خديجه هتلبسيه
انا قعدت جاتلي صدمه بردو وفضلت اقولها بجد هلبسه واكررها اكتر م مية مره ومنهاره في العياط ولبست ونزلت عشان ميرجعش في كلامه..
ولما سألت امي ايه اللي حصل في المكالمه قالتلي انه كان بيسألها عني وبعدين قالها ايه رأيك قالتله خليها تلبسه قالها خلاص ماشي!!
ربك جبر خاطري يا هدير واتمّ عليّ السِتر بفضله وكرمه ورحمته بيا 💙
الله عزوجل البسني النقاب في رمضان زي ماكنت بتمني وبدأت بيه رمضان ونزلت الصلاه بيه 💜
وهو ده ظني به 🙂
وانا علي يقين عظيم اني لبست النقاب بحسن ظني بالله فقط
لانه قال انا عند ظن عبدي بي فليظن بي ما يشاء
وبفضله وكرمه شفاني من غير مااروح لدكتور ولا خدت برشامه واحده حتي .. الدم وقف بعد مالبست النقاب وبعدها ولا نقطة دم واحده نزلت 🙂 لا شفاء الا شفاءه .. 🙂💙
والجدير بالذكر ان امي وابي اللي كانوا بيقولولي النقاب ده يتلبس لما نموت دلوقتي هما اللي فاخورين بيا وبحجابي وامي اي حد يقول حاجه تضايقني بتبقي عامله زي القطه اللي بيضايق حد من ولادها بتبقي عايزة تخربشه 😅💙
وبتقولي وشك بقي منور من ساعة ما لبستي النقاب وابي شافني وانا بجيب حاجات قالي انا كنت واقف في البلكونه بشوف جمالك 💙
رب العزة ارضاهم عني🌸💙
_____________
وانتوا بتخضعوا لامر الله متفكروش في اراء الناس
كل حد فينا ربنا هيبتليه ويختبره ليظهر حقيقة ايمانه وصدقه مع الله
فاصبروا واحتسبوا
اوصيكم بالصبر 💜
🎀🎀🎀🎀🎀🎀🎀🎀🎀🎀🎀🎀🎀
بقت م المعجزات بالنسبالي دلوقتي اني الاقي واحده لبست النقاب بموافقة أهلها.. لازم تعب ومعافرة وكأننا بنطلب شئ مستحيل أو هنعمل حاجه #عيب !!
بس كل واحده فينا عارفه طبع اهلها كويس
في الاهل اللي بييجوا بالمحايلة والزن
وفي اللي بييجوا باننا نحطهم قدام الامر الواقع زي اهلي كدا رجعتلهم البيت بيه أمر واقع 😃 بس بفضل الله رغم الخناق اللي مستمر بقاله اكتر م 4 سنين لسه لابساه ❤
الفكره كلها في #التمسك بيه مهما حصل!!
ربنا يثبت اللي لبسوه ويرزق اللي بيعافروا علشانه 💜
عافروا لحد م توصلوا للحاجه اللي بتتمنوها اياً كانت هي ايه طالما متأكدين انها هترضي ربنا !!
#هدير_ابراهيم 💌