صلوا علي من ياتي يوم القيامه ويقول امتي..امتي
###############################
#داوتني_بجنونها ❤
عندي من حوالي 7 شهور ولسه قرآها انهارده الفجر .. مش عارفه دا بسبب بوست امبارح فـ صاحبها بعتلي مسج يذكرني بيها ، ولا لأني فعلاً كنت محتجاها ..
وكلاكيت تاني مره يكون #الأسانسير ليه دور كبير في قِصتنا ☺
********
كالعاده #هاشتاج باقي قِصصنا 👇
#قصص_واقعيه_لهدير_ابراهيم ❤
🌼🌼🌼🌼🌼🌼🌼🌼🌼🌼
المجتمع الشرقي أو العربي عامةً مجتمع ظالم ، مش بس ع البنت لا ع الرجل كذلك ...
اتعودنا ان المرأه فقط اللي بتعاني م مجتمعنا وسقطت منا تمامًا حقوق الرجال ، واتظلم في النص فئه منهم حتى ولو كانت أقليه !!
وانا كنت واحد م الأقليه دي !؟
اتولدت في أسره مكونه م أب مسافر لدوله عربيه بنشوفه كل 4 سنين مثلاً مره وغالبًا بتكون الزياره دي كلها مشاكل وخناق وآخر يوم يُقسم انه مش راجع تاني ، وان كفايه علينا الفلوس اللي بيبعتها ، وكأن المال عنده هو اختصار للأبوه !!
وأم عندها سمة الخوف .. خوف من كل حاجه وأي حاجه ..
لدرجة ان انا ولد بين اختين بنات ، ومع ذلك والدتي كانت دايمًا بتتعامل ع ان عندها 3 بنات ...
الطبيعي مثلا او المعتاد انه يكون العكس وان اي ام في الظروف دي كانت هتتعامل مع ابنها ع انه راجل البيت وتنشأه ع دا ،
لكن انا كنت تابع لاختي الاكبر مني بسنتين ، كنت زي ظلها بالظبط ،
مقدرش آخد قرار لوحدي .. عايش حياتي كـ تابع وفقط ، لوقت م وصلت الثانوي واختي دخلت الكليه ، بدأت هي تنشغل عني وانا كنت في مرحله صعبه وهي مرحلة #المراهقه ،
ليه في مجتمعنا بيولوا اهتمام كبير للبنات في فترات مراهقتهم والولاد لا !؟
وفي حالتي طبيعي كنت بنجذب لبنات معايا في دروسي ، لكن خجلي كان بيمنعني اني آخد خطوه ، وكنت بشوف اصحابي اللي بيكلموا بنات ع انهم بيعملوا حاجه #خارقه واتمنيت كتير اكون في مكانهم خاصةً لما كنت بسمع حكاويهم عن البنات اللي بيكلموهم ،
اهتمامهم بأعياد ميلادهم وما ع شاكلتها وهدايا جايه وهدايا رايحه ،
طبيعي اني كنت بتمنى كتير أعيش الحاله دي انا كمان ، خاصةً بإنشغال كل اللي حواليا عني ..
لكن ظليت زي م انا لوقت م دخلت الجامعه ،
قولت خلاااص خجلي هينتهي وكل المراحل دي مرت ، وهاخد فرصتي ..
اكيد كان دا كل تفكيري ، الوسط اللي عايش فيه كله كدا ، كل اصحابي ع علاقه ببنات ، كل اللي حواليا اغلب اهتمامتهم عن البنات ،
حاولت اجرب اني اكلم بنت لكن كنت بفشل كل مره فشل ذريع وبقيت أضحوكة كل أصحابي خاصةً وان هما شايفين اني بكدا رجولتي #ناقصه !!
وفي يوم حصلت #المعجزه ولقيت بنت جايه بتكلمني وبتقولي انها #معجبه بيا ، !!
بصيتلها بدهشه ولساني مش قادر يتحرك حتى – الغريب ان البنت دي م اول م دخلت الجامعه وانا معجب بيها جدًا وكانت هي في نفس دُفعتي –
قالتلي متقولش حاجه انا عارفه كل حاجه عنك ومبسوطه بكدا جدًا وقالتلي انها شيفاها ميزه انها هتكون اول بنت في حياتي ...
قالتلي انها هتعرف تتأقلم مع خجلي وهتستحمل وهتصبر معايا ...
رجعت البيت في اليوم دا وانا حاسس بفرحه رهيب وبغني في الشارع أول مره تحب يا قلبي واول يوم اتهنى .. دا انا ع نار الخب قالولي ولقيتها م الجنه .. وافرح واملا الدنيا اماني لا انا ولا انت هنعشق تاني ...... !!
حياتي اتغيرت تمااااما بمقدار 180 درجه حرفيًا ،
كنت حاسس اني مكنتش عايش واني اتولدت م اول وجديد !!
أيامي اللي مرت بعد كدا كانت كلها مع البنت دي ،
كنت بعدي عليها كل يوم بالعربيه ، ويوم الكليه كله معاها ولوقت م ينتهي يومي ،
كنت متشبس فيها جدا
وكالعاده طبعًا وزي م كنت تابع لأختي في كل حاجه كنت تابع للبنت دي ،
كانت هي تقولي اعمل كذا ومتعملش كذا ، قول كدا ومتقولش كذا البس كذا ومتلبسش كذا .... وهكذا ☺
واتنقلت م مرحلة اني تابع وظل لاختي لتابع وظل للبنت دي ...
وطبعًا اختارت قسم الكليه نفس القسم بتاعها – بالمناسبه دي انا كنت تابع ايوه في كل حاجه الا الدراسه ، كان الكل مستغرب تفوقي في دراستي غير المعتاد ، وكأن التابع دا لازم يكون غبي _ بس اقولك بصراحه انا شايف نفسي جدًا اني كنت غبي او خلينا نجملها ونقول #ساذج ، وبصراحه البنت دي كانت واخده بالها م النقطه دي جدًا وقدرت تتعامل معاها لمصلحتها –
ودخلنا نفس القسم ودخلنا في جو الافلام وان انا اللي المفروض احضر وافهم كل المحاضرات واني مسئول عن تقديرها ، والا ازااااااي هيكون شاكلها ايه قدام صحباتها لو جابت تقدير قليل وهي مصاحبه #عبقري الكُليه !!
بس انا كنت بهتم بكدا م غير م تقول لمجرد انه بيسمحلي اقضي وقت اطول معاها ،
وبصراحه كان دا الوقت الوحيد اللي بحس فيه معاها ان انا اللي بتكلم وهي بتسمع ، انا اللي بقول وهي بتنفذ ...
كانت ممكن تكلمني بعد 12 بالليل تقولي انها جعانه ، وانا طيرااان انزل اجيبلها اكل واعديه عليها في بيتها ،
حتى الهدايا كنت تنبه عليا لو في مناسبه مثلا انها عاوزه كذا ، يعني مفيش حتى مجال لإني اختار دي كمان ..
كنت بائس جدًا لكن انا تابع والتابع ميقدرش ياخد قرار لوحده ف استمريت بعلاقتي بيها ..
لوقت م وصلنا لسنه تالته هندسه ، ودي كنت بعتبرها ابشع سنه مرت عليا ،
كان باقي خلاص سنه واحده ونخلص الكُليه ،
كانت البنت دي ليها اصدقاء ولاد كتير وكنت بتضايق وكل مره كنت مجرد بس اني افكر او يخطر ع بالي اقولها اني متضايق وابدأ ألمح كانت بتفتح عليا ابواب الجحيم ف كنت بسكت قبل م انطق ..
لكن في اليوم دا مقدرتش اتحمل كلام اصحابي وانها بتخليني اطلع المحاضرات وتشوف هي نفسها مع اصحابها الولاد ،
اصحابي فضلوا يسخنوا فيا لوقت م خلاص اتشحنت ع الاخر واول م شوفتها قولتلها اني بتضايق م تصرفها وانها لازم تختار بينهم وبيني ولسه بقولها خُدي وقتك ، لقيتها بتقولي اخد وقتي في ايييه هو انت م كل عقلك متخيل ان انا او اي حد في الدنيا ممكن تكون في اختيار بينك وبين غيرك ويختارك !؟
دا انت لو باكو لبان هختاره ولا اني اختارك رغم ان فيكم شبه م بعض ، انتوا الاتنين #لازقه ،
لكن هو بيطلع في الغسيل وانت ماسك ومتبت ،
وبصراحه كويس انها جات منك لانك كنت #صعبان عليا !!
هي قالت كلام اكتر وكنا طبعًا في وسط الجامعه ، حسيت اني خدت دش بااارد جدااا ، بس عارفه ي هدير ايه الأصعب !؟
الأصعب اني مكنتش عارف ايه اللي المفروض اعمله دلوقتي م انا مجرد تابع ..
تخيلي اني فضلت واقف بسمع منها كل الكلام دا وألعن لكني مستني انها هي اللي تقولي ايه الخطوه اللي المفروض اعملها !
قالتلي ان قرارها اننا ننفصل وان كفايه لحد كدا وانها تعبت ..
سألتها: تعبتي !؟ طيب م ايه !!؟ دا انتِ كنتِ تطلبي الطلب ايًا كان وكنت بعمل المستحيل لوقت م اعمله ،دا انا كنت بعملك الممكن والمستحيل وكنت بخاف ع زعلك اكتر م اي حد وبنفذ كل كلامك ..
قالتلي وهنا المشكله لأني عمري م حسيت معاك انك #الراجل &&&&&&&&&&&&&&
حتى التابع بيحس ع فكره ف طبيعي جدًا اني اتألمت من الكلمه ...
انعزلت عن الناس فتره ، كنت خايف اواجه حتى بواب عمارتنا .. كنت خايف اشوف في عنيه ان هو كمان شايفني مش راجل ...
رجعت الكليه من تاني لكن رجعت بقلب مختلف تمامًا .. تقدري تقولي اني كنت مريض نفسي بس أصبحت من بعدها مختل عقليًا بمعنى الكلمه ،
كرهت كل ما يخص البنات وبقيت ألعنهم ، لو حتى جيت في يوم وصليت كنت بقضي السجود كله دعوات ع البنت دي انها تعيد السنه وانها تتألم بمقدار ألمي ،
والبنت عادت السنه فعلا .. طبعًا دا قدر كمان لانها كانت مهمله جدًا يعني مش شرط يكون دا استجابه لدعائي بس شفا غليلي منها شويه ، واتقلبت الآيه وكل اللي حوالينا نسيوا اللي هي عملته فيا واصبحوا شايفين اني فعلا عبقري لاني بمجرد م بعدت عنها وبطلت اذاكرلها عادت السنه ...
وبدأ البنات هما اللي يتقربوا مني ، بس بعد ايه كان قلبي خلاص اصبح حجر !!
كلما بنات وكتييييير جداااا ، كنت اتعلمت شويه من البنت ايه اللي البنات بتحبه وايه اللي بيكرهوه ف بدأت ألعب ع المنوال دا بجانب تمكني من دراستي ف أصبحت مشهور جدًا بين بنات جامعتي ،
بعد م كنت اضحوكه اتقلب كل حاجه ، بس حقيقي كانت ابشع فتره مريت بيها في حياتي !!
كنت بكلم كل البنات واخليهم يتعلقوا بيا جدااا وبعدين اسيبهم بلا شفقه وصلت لدرجة اني كنت بستمتع بعذابهم وألمهم وانهم بيتذلوا علشان افضل معاهم ...
كنت بستمتع اني اشوف الكسره اللي شوفتها قبل كدا م بنت في عيون كل بنت كلمتها .. مش قولتلك اصبحت مختل عقليًا .. مش تبرير لفعلي بس دا اللي حصل ...
خلصنا جامعتنا .. وحصل طلاق بين والدي ووالدتي وبصراحه الموضوع ولا حسينا فيه بأي اختلاف الفلوس بتوصل عادي في معادها الفرق اننا مبقيناش نشوف والدي لا كل 4 ينين ولا حتى 10 ... وعادي جدًا !!
حتى بعد م بدأت شغل كنت بندم اي بنت تتعامل معايا لكن بقيت احاول جدًا اتجنبهم واللي كانت بتقرب مني كنت بكرهها في اليوم اللي شافتني فيه ،
كنا ساكنين في الدور الخامس وفي يوم نازل متاخر جدًا والدنيا بايظه تمامًا لقيت الأسانسير مش شغال وانا مستحيل انزل السلم 😐
بدأت انادي ع البواب وقفت ع سلم الدور الرابع لقيت #بنت بتستعد تنزل قولتلها قولي للبواب يشوف الاسانسير ماله بسرعه ..
لقيتها بصتلي م فوق لتحت وولا كأني بتكلم ومكمله طريقه ، قولتلها انتِ ياااا شاطره انتِ مش بتكلم !!
قالتلي :انت اهبل !؟
اه والله قالتلي كدا بكل تلقائيه والحياه معاها عاادي جدااا ،
لقيت لساني عاجز عن الرد تمامًا ودي مكمله طريقها عادي نزلت سلالم اكتر وقولتلها : انتِ ياااااااا هو انتِ طبيعيه ولا مجنونه ولا ايه بالظبط !؟
قالتلي : والله م حد مجنون هنا غيرك
قولتلها : وهو انا جيت جانبك دا كله علشان قولتلك قوليلي للبواب يشوف الاسانسير ماله
قالتلي : نبرة صوتك معجبتنيش ثم انك مقولتش لو سمحتِ وانت بتطلب الطلب دا ، كمان قولتلي ي شاطره .. ايه شايفني لابسه المريله ونازله المدرسه مثلاً !! 😡
قولتلها : اييييييه كل دااا هو انتِ كنتِ مجمعه كلام ومصدقتي تفجريه في حد .. طيب معلش متعطل جدًا ممكن تقولي للبواب وانتِ نازله يشوف الاسانسير !!!؟
– لو سمحتِ ..
= نعم !!!!؟
– مقولتش لووو سمحتِ 🙄
= انتِ متأكده انك فعلاً مش نازله رايحه المدرسه !!؟
– خلاص خليك واقف عندك بقى شوف مين هيقول للبواب ثم ان رجليك مالها يعني عليها نقش الحنه مثلاً 😎
= خلاص عنك م قولتي حاجه واحده هبله ومتخلفه ...
ونازل بسرعه كانت هي نازله قدامي وقفت فجأه وانا نازل بسرعه ومحستش بنفسي غير وانا بترمي ع السلم !!
بسلامتها حطت رجليها فجأه قدام رجلي وجعتني ،
ولقيتها نازله وبتقولي بكل براءه متقلقش جات سليمه شوية كدمات ، ورجلك هتوجعك شويه ، ومتقلقش هقول للبواب في واحد #متكسح بين ع السلم بين الدور التالت والرابع لو الاسانسير هيفضل متعطل يجيب حد ينزلك ع #نقاله ..
وسابتني ونزلت تجري وصدى صوت ضحكتها هيجنني ...
كملت يومي بمود سئ جدًا وعمال اتوعد للبنت دي اللي هي اصلا معرفش م سكان عماراتنا ولا لا ، ولو اه ، معرفش هي م اي دور ، لانها كانت واقفه ع السلم تظبط في شنتطها ،
لكنها فضلت مسيطره ع تفكيري فتره طويله لدرجة اني كنت لما بنزل او اطلع لازم افضل باصص ع سلم الدور الرابع كتير ... ومرت فتره وبدأت انسى الموضوع ...
اول م نقلنا بيتنا الجديد اختى الصغيره اكتر حد تعايش جدا مع التغير وبدأت تكون صداقات وعلاقات ،
كانت بتتجنب دايمًا تظهر قدامي اي حد م صديقاتها خوفًا عليهم مني تقريبًا ☺
وفي يوم دخلت البيت لقيت اختي بتقابلني وابتسامتها م الخد دا للخد دا وبتقولي هعرفك ع حد
والاقي ظاهر م وراها ميييين !!؟
طبعًا الهبله بتاعت السلم ،
مفيش حد عندي في البيت كان يعرف اللي حصل ع السلم ،
بس طبعًا ولانهم #بنات واللي حصل بالنسبالهم بيعتبروه انتصار ،
ولأم البنت كانت عارفه ان انا اخوها ، ف مكانتش مصدومه خالص ،
قربت منهم وقولت لأختي ابعدي كدا ثانيه ،ومش تخافي هعرفها غلطها بس ،
لقيت دي طلعالي تقولي سمعت ان الاسانسير الفتره الجايه هيكون بايظ ، ف خاف ع نفسك خاصةً وانت نازل م الرابع هاااا ...
وقالت لأختي اشوفك بكره في الدار وسابتني وخرجت عااادي جدًا !!
لقيت نفسي بقول لأختي هي صاحبتك دي مجنونه !؟
قالتلي ايوه وخاف ع نفسك انت لسه سامع كلامها بنفسك – بإبتسامة تشفي –
قولتلها انصحيها متظهرش قدامي تاني احسنلها ..
ودار ايه اللي هتشوفك فيها بكره ،
وافتكرت ان اختي فعلا بتحفظ قرآن م اول م نقلنا في دار تحفيظ ملحقه بمسجد قريب م عمارتنا " يمكن اختي دي الوحيده في بيتي اللي كانت بتصلي وقريبه م ربنا –
تخيلي اني بعدها بقيت اخاف فعلا اول م اقرب ع الاسانسير انه يكون متعطل ، وفي مره لقيته كان متعطل واشتغل بمجرد م فتح عملت علامة النصر وفضلت اقول yes yes
ظبط نفسي وقتها وانا متلبس في التفكير في البنت وتهديدها شتمت نفسي ونزلت ...
وتوالت بعدها المواقف خاصةً ان حضرتها ساكنه في الدور الرابع يعني تحتي ع طول ،والأجمل والامتع وشغا الافلام هيرجع تاني وهو ان طلعت اوضتها نفس اوضتي بنفس موقع البلكونه ،
ودي يمكن كانت اجمل حاجه عرفتها في الوقت دا ...
كدا هعرف اشفي غليلي منها ،
هي كانت بنت ليها روتين معين بتقدسه ، ودي كانت نقطه في صالحي جدااا
بقيت كل م اشوفها في البلكونه اغرقها حرفيًا بالمياه 😂
والهبله بقت تخرج في عز الحر #بشمسيه .. مش عارف ليه مركبتش تنده مثلا ..
بس كويس كانت حاجه في صالحي جدًا ..
اشتكت لوالدتي كتير ووالدتي قالتلي وانا لا انكرت ولا بينت اي اهتمام اصلا ...
وتوالت ما بينا مواقف كتير وكل واحد بيحاول يستفز التاني ويحاول يثبتله انه اتمكن منه ...
وفجأه كل دا وقف تمامًا وبطلت حتى ألمحها !!!
بطلت تخرج في البكونه او اشوفها مع اختي م البلكونه وهما نازلين رايحين دار التحفيظ ..
كنت هموت واسأل اختي عنها ، وكل م اقول هسألها ارجع تاني واقول وانا مالي اسأل ليه دا انا م صدقت ارتحت منها وتلاقيها نقلت بسبب اللي كنت بعمله فيها " مجرد حجه كنت بقولها لنفسي والسلام "
بس تعرفي قضيت الفتره دي كلها ولقيت نفسي بعمل نفس الروتين اللي كنت اعرفه عنها ،
افتقدت جدًا صوتها في القرآن الفجر وهي في البلكونه ،
وبدأت لاول مره امسك المصحف واقرأ في نفس التوقيت ..
نسيت اقولك اني بسببها كنت بصلي الفجر تقريبًا كل يوم ، هي كانت بتقعد تقرأ قرآن وكنت بفضل استمع ليها لوقت م الفجر كان يأذن كانت بتقف ، كنت بقول انها اكيد هتصلي ، اتكسفت من نفسي وبدأت اصلي
وبصراحه كان الفجر هو الوقت الوحيد اللي كنت بصليه ...
شهر غابت فيه وانا الحنين بيزيد في قلبي اتجاهها ، كانت عملالي بدوشتها وضوضائها وكل حالتها وحركاتها وعنادها وشغبها وجنانها روح حلوووه جدا حسيت في عدم وجودها بفراغ كبييير جدًا لدرجة اني دعيت ربنا اني ارجع اشوفها تاني ومش هضايقها ابدًا ...
وظهرت فعلاً .. رجعت م الشغل في يوم بدري لقيتها واقفه مع اختي في البلكونه مصدقتش نفسي وطلعت اجري م فرحتي وكنت خايف يكون بيتهيألي ، وقفت قدام الاسانسير اللي هو تقريبًا بطل القِصه دي مش انا /
ولقيته عطلااااااان
طلعت ولاول مره في حياتي السلم وبدون تفكير ،
دخلت الشقه وانا بنهج ، جريت ع البلكونه ملقتش حد !!
حسيت روحي بتروح مني
ولقيت اختي واقفه ورايا بتسألني بتدور ع حد !؟
سكت وسيبتها ومشيت وقبل م الحزن يتمكن م قلبي لقيتها بتقولي رجعت ..
بصيتلها باندهاش قالتلي رجعت امبارح بالليل كانوا مسافرين ولسه راجعين ..
قعدت ع اول كرسي كان في طريقي وقولتلها طيب ليه مقولتليش ، وحسيت في وقتها اني اظهرت مشاعري لأختي ،وهي حست اني اخدت بالي وممكن اتراجع
ف لقيتها بتقولي بسرعه ع فكره هي كمان #بتحبك ...
احساااااس متضارب حسيت بيه ، اولا اختي العاقله الهاديه المتدينه اللي شايفه اي علاقه بين ولد وبنت غير الزواج حرام .. ازاي بتقولي كدا ..
قالتلي م انت هتتجوزها طبعًا ..
قولتلها اتجوز مين وليه طبعًا !!؟
ردت قالتلي هتتجوزها هي لانها #عوضك اللي ربنا رزق قلبك بيه علشان ينسيه كل اللي فات ويصلح حالك بيه...
مكنتش قادر استوعب في اللحظه دي كلامها او اللي تقصده ، بس لقيت نفسي بقولها خايف عليها ...
قالتلي م ايه انا اعرفك كويس واعرفها وشايفه انكم مناسبين لبعض جدا ..
قولتلها وحياتي اللي فاتت ، اخاف اتعبها معايا وادمرلها حياتها هي كمان زي غيرها ...
سألتني : بتحبها
قولتلها : جدا جدا
ايه دا انا فعلاً بحبها ، بس اللي في قلبي ليها مختلف تمامًا عن اللي في قلبي لاي بنت عرفتها ...
المهم اني حقيقي بحبها بس خايف ي حُبي ليها يخليني ارجع تابع تاني ليها ، ي خوفي الزايد يقسي قلبي عليها ...
بس اختي طمنتني جدا وقالتلي اعمل استخاره وشوف ايه اللي هيحصل ...
كنت في حالة خجل رهيبه وانا بقول لاختي معرفش بتتصلى ازاي !؟
قالتلي الكيفيه بكل بساطه وقالتلي صلي كل يوم لاخر الاسبوع وقرر بعدها ، وفعلا صليت .. واخدت تاني يوم قرار اني #اتقدملها ..
حسيت اني مش هقدر بعد غياب الشهر دا اني اشوفها ومعرفش اكلمها ،
تاني يوم كنا في شقتهم وتمت الخطوبه ع خير ..
كنت مرعوووب م جوايا وجدًا ، بس هي كانت بتتعامل معايا بطريقه مدهشه جدااا
كل عنادها اختفى شقاوتها زي م هي لكن في حدود ، علمتني كتييير وليا كل الفخر اني اقول اني اتعلمت منها كتيييييير جدااااا
حسيت معاها فعلاً بكلمة اختي ليا وانها حقيقي #عوض ربنا ليا ...
اتجوزنا بفضل الله وحياتنا مش هقولك مثاليه رغم اني شايفها مثاليه جدااااا ....
عرفت منها يوم كتب كتابنا انها كانت عارفه كل حاجه عني قبل واقعة الاسانسير الاولى ، وان تعاملها معايا كان بالعنف دا م اللي سمعته م اختي عني وعن علاقاتي بالبنات ، وانها تعمدت تظهر قدامي في بيتي مع اختي ك اثبات اكبر لانتصارها
تعرفي اني دايمًا شايفها #هبله ودي يمكن اكتر صفه حبتها فيها ❤
هبلها دا في الحقيقه يمكن هو السبب ان حياتنا مثاليه ،
وغبائها باردو ويااا سلام لما يجتمع الهبل والغباء في امرأه
كل م نكون في مشاده كلاميه وفي عز الخناق اقول كلمه او تعبير مثلا تهدى فجأه تقولي استنى مش فاهمه الكلمه دي معناها ايه
ومجرد م اقول المعنى الاقيها ترجع تاني تتخانق بنفس الكيفيه ، والاقي نفسي بكل تلقائيه بضحك جدااا وبضمها ليا وبقولها انتِ اجمل غبيه وهبله ربنا رزقني بيها .. تضحك بدورها وينتهي الخلاف هنا وهكذا طول حياتنا وحتى يومنا هذا ❤
عالجت قلبي وصبرت عليا جدًا .. كنت مجرد م اكون متضايق واطلب منها متسألش انا متضايق ليه .. تقولي مكنتش هسأل اصلا بس خليني جانبك .. وتحضني في صمت وبكل هدوء تطبطب بإيديها عليا ..
حسيت معاها بالأمان اللي عمري م حسيته مع والدتي حتى لدرجة اني ولا مره حسيت بخجل لو بكيت قدامها ..
كانت ع اد م بديها م رعايه وحب واهتمام بتديني واكتر ... كانت ومازالت هي فعلاً العوض واللي بسببها عرف قلبي طريقه لربي ..
#زوجتي هي اجمل غبيه ومجنونه وهبله عشقتها ❤
فـ بفضلها وبوجودها كنت تابع وأصبحت #عاشق ❤❤
🌸🌸🌸🌸🌸🌸🌸🌸🌸🌸🌸
يتمكن الشيطان من قلوبنا حتى نظن اننا خرجنا من رحمة الله ومعيته ونعيش في ضلالاتنا وهمجنا .. وع الهامش #خوفنا !!
ثم فجأةً وبدون أي سابق انذار يُرسل إلينا من يُطمئن قلوبنا ويقول طالما أنا ربكم وأنتم عبادي فستظلوا في معيتي ورحمتي أبد الأبدين ❤
#أحبك_ربي ❤
#أحبكم_في_الله ❤❤❤
صلوا علي حبيب الله