صلوا علي من جلس علي ركبتيه يواسي طفلا مات عصفوره
##############################
#ونحن_اقرب_اليه_من_حبل_الوريد ❤
قولت قبل كدا ان كل قِصه بنزلها هنا بيكون ليها معايا انا كمان قِصه وبيكون فيها #رساله م ربنا ليا ، والقِصه دي بالذات كان فيها اكتر م رساله !!
دخلت رمضان وفي ناس مشككاني في نفسي وبتحاول تزعزع علاقتي بربنا وكنت خايفه جدا ان التواصل بيني وبين ربنا يكون حصل فيه خلل وطول رمضان وانا بدعي ، ومع بدايات طلوع فجر اول يوم العيد ربنا بعتلي مش رساله واحده لااا #رساايل ع اني مازلت في معيته وسبحانه ربي بقيت كل م ارد ع حد بيعيد عليا الاقيهم بيبشروني ان دعوتي ليهم ربنا استجابها .. اللي هو ايه دا اللهم بااارك بجد 😍 ودعوه ليا انا كمان بدأت تتحقق الله الله 😍😍
وفي عز كل دا خطر ع بالي صديقتي اللي مفيش مره نطق لساني بالدعاء الا وكان ليها نصيب منه بالإسم ، ف قولت يارب طمن قلبي بفرحتها قريب ...
تاني يوم العيد خرجت مع اصحابي ولما رجعت عرفت ان في واحده قريبتي وللأسف قرابه م الدرجه الاولى وواحده جارتي آذوا ماما فيا بالكلام عن زواجي واني خرجت فكرة الزواج م دماغي وان أمي حصلها مشاكل نفسيه بسببي ...
زعلت لأمي جداااا لأن قلبها ميستحقش ان ناس زي دي تكون سبب في حزنه .. ودعيت ربنا وفوضت امري ليه ...
فتحت الفيس لقيت قِصة انهارده وكل م اقرأ سطر ارجع ابص ع اسم صاحبة الاكونت اللي هي صاحبة القِصه لان اسمها ع اسم #صاحبتي اللي هو اييييه دا ياربي لعلها رسالتها 😍
ولقيت فيها انا كمان م اثلج صدري ولله الحمد 😊
بعتذر ع المقدمه الطويله دي بس اصبح م حقي عليكم اشارككم معايا تفاصيل فرحتي ❤
متنسوش هاشتاج باقي قِصصنا 👇
#قصص_واقعيه_لهدير_ابراهيم ❤
&&&&&&&&&&&&&&&&&&&&&&&&&&&&&&
قصتي غريبه شويه بس بتزود اليقين بإن حسن الظن في الله قادر جدااا يصنع المعجزات ... !!
كبرت وانا عايشه حياه طبيعيه جدا وسط والدي ووالدتي واخواتي ، اهلي لا متدينين ولا العكس كانوا وسط في كل شئ ، مش عارفه متحسيش اننا بيت ماشي بالدين في كل خطواته او مثلا والدي او والدتي اتكلموا معانا مره عن حاجه ليها علاقه بالدين او التدين ،
كنا زي اغلب بيوت المسلمين حاليا علاقتنا بالدين صلاه وصيام ، لكن والدتي كبرتنا ك بنات ع الاحتشام في اللبس بس دا كان علشان المجتمع اللي عايشين فيه ونظرة الناس ملهوش علاقه بالدين ،
كان في حلقه ناقصه في حياتي مش عارفه ايه هي بس كنت دايما حاسه ان في حاجه غلط !!
مريت كأي بنت بفترة المراهقه بس انا كنت مختلفه لان كان جوايا احساس من صغري بيميل جدا لـ ابن عمتي ، وفي الفتره دي زاد الاحساس دا اكتر واكتر ...
ع الرغم انهم كانوا مستقرين بره مصر وكنا بنشوفهم في الاجازات ، بس يمكن للسبب دا اتعلقت بيه اكتر اللي واصبح البعيد عن العين قريب جدا م القلب ...
ولا مره حصل بينا كلام لوحدنا ابدا ، كانت تعاملاتنا في حدود العيله ولما كبرنا اكتر قل الاحتكاك والتعامل بس كان كل واحد فينا شبه متأكد ان التاني جواه حاجه ليه ....
كنت مطمنه جدا لكون انه ابن عمتي يعني من دمي دا بخلاف انه بيخاف عليا وبيحافظ عليا ، كانت اخته الصغيره بكلامها دايما بتأكدلي ان احساسي صح وان هو كمان ميال ليا ...
كان اكبر مني بسنه واحده بس الا انه كان متأخر عني دراسيًا بسنتين يعني انا خلصت الكليه قبله بسنه ،
كنت عارفه من اخته انه بمجرد م يخلص الكليه هيتقدملي ع طول ، كنت بعد الأيام وبدعي ربنا في كل وقت انه بيطمن قلبي ويرزقني الشخص الوحيد اللي قلبي اتعلق بيه ، لوقت م حصلت العاصفه !!!
كانوا نزلوا مصر اجازه وكنت عارفه انه هيتقدملي في الاجازه دي و في يوم صحيت من النوم مخضوضه ع صوت عالي خرجت م اوضتي اجري لقيت عمتي واقفه في وسط الصاله وباب الشقه مفتوح ومبهدله أمي خناق واول م لمحتني نعتتني بأقذر المسميات وخاضت في عِرضي وكل م أمي تحاول تقفل باب الشقه تجري عليه وتفتحه وتقولها بسمع الجيران وبعرفهم حقيقة بنتك وحقيقة تربيتك ليها ، وفي عز دهشتنا واني مش فاهمه هو في ايه ولا ايه اللي حصل لقيتها بتقول اني #غويت ابنها وانها عارفه الاعيب أمي كويس وانها اللي شجعتني ألعب ع ابنها لانه المفروض عريس لقطه واننا ع اد حالنا ماديًا وطمعانين فيهم دا غير انها كانت شيفاني بايره وعانس لأني خلصت الكليه من غير م ارتبط لسه واني لعبت ع ابنها بتدبير وتخطيط أمي وان تربيت امي كذا وكذا وكذا
اتبهدلنا بمعنى الكلمه لا عملت خاطر ولا حساب لأخوها ولا أي حاجه خالص ، ومكتفتش بإنها عملتلنا فضيحه في العماره ولا في الشارع كله لا كمان قالت عني كلام وحش وسئ جدا جدا وسط العيله ، وتخيلي قرايبي اللي انا من لحمهم ودمهم اول ناس نهشت في سمعتي وعرضي واتحولت حياتنا لجحيم بمعنى الكلمه وكل دا مش فاهمه سببه ايه باردو ، لوقت م كلمتني بنت عمتي وعرفت منها اللي حصل وهو ان اخوها كان بيتكلم مع والدتهم وفجأه صوتهم علي وعرفت منه انه مجرد م قالها انه عاوز يخطبني اعترضت لانها شيفانا مش من مستواهم خالص وبمجرد م عرفت انه ميال ليا وانه حاسس ان انا كمان مياله ليه ولعت الدنيا ، واعتبرت ان دا تصريح منه بإني كنت بكلمه دايما وغويته زي م بتقول ...
حصلت مشاكل وخلافات كتير جدا ، اصعبها واكترها وجع لقلبي اني كنت حاسه ان والدي ووالدتي #اتكسروا بسببي ع الرغم انهم متأكدين اني معملتش حاجه غلط ، لكن احنا عايشين ع رأي والدي في #غابه والكل م بيصدق ينهش في لحم وسمعة غيره ....
تعبت جدا وكنت محتاجه اوووي اتكلم مع اي حد ، كنت محتاجه لحد يسمعني يهديني ينصحني يطمني ان لسه في امل او خير ، بس كان كل اللي حواليا بيزود عندي احساس اليأس والاحباط ، كنت شبه منعزله عن العالم والناس لوقت م قررت ارجع اكمل دراستي وبدأت آخد كورسات واشغل نفسي اكتر واكتر ..
مر حوالي ثلاث سنين ونص كانت حياتي اتغيرت نسبيًا واتعينت في شركه كبيره جدا ، وبدأت الناس تنسى شويه بشويه بعد م كان كل م حد يتقدملي يسمع عني كلام سئ جدا عن سمعتي ...
لكن حال قلبي ظل كما كان .. كنت بستغرب جدا زاي قلبي مازال متعلق بيه للدرجه دي !؟
كانت اخبارهم كلها اتقطعت عننا وكنت انا اللي قررت ابعد واتجنب اي تواصل مع اخته ، قولت يمكن انسى لكن دا محصلش ابدا ...
كانت علاقتي سطحيه بكل اللي معايا في الشغل ، كنت بحاول اقلل احتكاكي بأي حد كنت عاوزه اعيش لوحدي وبس ،
وفي يوم كانوا اتنين معايا في الشغل بيتكلموا وواحده فيهم بتحكي مشكله عندها ف التانيه ردت عليها ان حل مشكلتها انها تفوض امرها لله وتحسن الظن فيه وان ربنا قريب مننا جدا ..،
كنت دايما بشوف ان الكلام دا #نظري ومفيش منه اي اهميه وانه مجرد #مسكن بيستخدمه المتحدثين بإسم الدين علشان يثبتوا اللي قدامهم بالكلام وبس ، اصل لو ربنا قريب مني فعلا هل حال دا يرضيه !؟ ليه سمح للظلم دا انه يحصل وهو العدل !!!!!؟
اللي حصل اني مجرد م رجعت بيتي وخلاص بستعد للصلاه اللي فعل روتيني بالنسبالي لقيت نفسي بفتكر كلام زميلتي في الشغل ، دخلت في الصلاه ومجرد م سجدت مش كنت لاقيه ولا كلمه اقولها ولا عارفه ادعي بإيه !!!؟
استمريت ع الوضع دا دقايق لا عارفه ادعي ولا عارفه اقوم اكمل صلاه ولا حاجه خالص ،
فضلت ع الحال دا فتره وقومت كملت صلاه وفي كل سجده كان بيتكرر نفس الوضع لا عارفه ادعي ولا عارفه اكمل صلاه وبعدين اقوم اكمل وهكذا لحد م خلصت صلاه ...
كنت اشبه بالميت روحي مش فيا ومش حاسه ولا عارفه اعمل حاجه ، بس انا محتاجه اصرخ ابكي اتكلم بس مش عارفه اعمل ايييييه حتى الدعاء مش بيخرج !؟
لقيت مصحف في الاوضه قولت افتحه لعل وعسى وكانت دهشتي في الآيه اللي عيني وقعت عليها وكانت
" وَلَقَدْ خَلَقْنَا الْإِنسَانَ وَنَعْلَمُ مَا تُوَسْوِسُ بِهِ نَفْسُهُ ۖ وَنَحْنُ أَقْرَبُ إِلَيْهِ مِنْ حَبْلِ الْوَرِيدِ "
قفلت المصحف بسرعه وفجأه قلبي دق جدا قولتله انت سامعني !؟ حاسس باللي في قلبي !؟ انا خايفه يارب ومش فاهمه حاجه !!!
هي دي صدفه ان عيني تشوف الايه دي ولا ايه !!!!؟
قولت هفتح المصحف تاني واشوف ايه الآيه اللي هتيجي عيني عليها اكيد اكيد دي مش اكتر م صدفه بس نظري اصطدم بالآيه دي
" وَلَقَدْ نَعْلَمُ أَنَّكَ يَضِيقُ صَدْرُكَ بِمَا يَقُولُونَ فَسَبِّحْ بِحَمْدِ رَبِّكَ وَكُن مِّنَ السَّاجِدِينَ "
هنا محستش بنفسي غير وانا في وضع السجود وببكي كما لم ابكي في حياتي م قبل ... فضلت استغفره ع كل ظن سئ ظنيته وفضلت احمده ع ان رغم كل ظنوني السيئه فيه الا انه بعت لقلبي اللي يطمنه بوجوده جانبي وكأنه بعد كل الناس عني وبعدني عنهم علشان الجأله هو وبس ووقتها ادركت تماما ان هو الوحيد اللي معاه شفاء قلبي بكل جروحه !!
اتبدلت حياتي بحاجه ممكن يظنها البعض بسيطه الا انها ورب الكعبه كفيله بإنها تعيشك في #جنه وهي جنة قُربه ❤
كفايه الاطمئنان والونس بالقرب منه وراحة البال ...
موقعي في الشركه اللي بشتغل فيها خلاني احتك بجيراني اكتر ومجرد م حد منهم يكون ليه حاجه في شغلي اساعده واقف معاه لحد م يخلصه ، وبدأ الكل يتكلم عني من تاني بس المره دي بقيت احس في نظراتهم بالندم ، وبدأ يتعملي ولأهلي خاطر والف حساب ، وعرفت منهم ان كل شخص اتكلم في سمعتي ربنا عاقبه في حياته ، وحسيت ان وكأن ربنا سخرلي الدنيا والناس ، وتيقنت ان ربنا ابدا م بينسى حق عبده او دعوة #المظلوم ...
بدأت عنيا تشوف الكون والحياه بمنظور مختلف بعيد عن التشاؤم والاكتئاب واليأس ، وبدأت اخد بالي ان فعلا كنت اسمع كل فتره عن حد من جيراني او قرايبي حصلت معاه مشكله بس ولا مره خطر ع بالي ان كل دا #ذنبي ...
مقدرتش اسامح وقتها باردو بسهوله لان دا كان خوض في شرفي وعرضي ....
بس تخيلي ان كل التغيير دا يحصل في حياتي م مجرد بداية التفكير في #حسن_الظن في الله !!!!
مرت السنين وانا في دوامة الشغل وبحاول احقق لنفسي مستوى اعلى ومركز اعلى ، كان في ضغط م اهلي ع موضوع الجواز ، بس انا كنت بتعب نفسيا م الجانب دا ، كنت بدعي ربنا يصرف الشخص دا عن قلبي علشان اعرف ابدأ حياه جديده الا اني ولا مره حسيت بكدا بالعكس كان تعلقي بالشخص دا بيزيد اكتر واكتر ،
قولت يمكن لانه بعيد ومعرفش عنه حاجه ف بالي مشغول بإنه يعرف عنه اي حاجه ...
لوقت م يوم لقيت والدي بيبلغني اننا هنروح نحضر كتب كتاب ولازم احضر معاه ، ولما سألت كتب كتاب مين وليه لازم اني احضره !؟
صدمني بإنه كتب كتاب ابن عمتي وانها فرصه بإني لما اروح بنفسي احضر كتب الكتاب ااكد للعيله كلها اني مش شاغله بالي بيه وان تأخر زواجي ع الرغم اني وصلت لسن ال 33 هو انشغالي في الشغل وتحقيق ذاتي وبس ...
والدي ووالدتي بيتكلموا وبيحاولوا يقنعوني وان كان عقلي وقلبي في مكان تاني خاالص ، كنت حاسه ان روح بتنسحب مني وان قلبي بيتقطع تماما ...
ايوه معرفش عنه حاجه طول السنين دي بس كان جوايا امل كبير انه يكون قلبه وعقله مشغولين بيا زي م انا مفيش في قلبي ولا عقلي غيره هو وبس ...
مرديتش ع اهلي ودخلت اتوضيت قولت لعل الوضوء يبرد النار اللي جوايا ووقفت ع سجادة الصلاه واخدت نفس عميق واول م بدأت بـ الله اكبر انهارت ع الارض وبكيت وقولتله ياارب انت اكبر من كل شئ ، انت قادر تريح قلبي وتريحني من العذاب دا ، انا مش عازه ارجع اضعف تاني واسئ الظن بيك ، بس انا يارب تعبانه وقلبي مش متحمل ، يعني يوم م اعرف عنه حاجه اعرف انه هيكون خلاص لواحده غيري لا وكمان مطلوب مني احضر وفوق كل دا اكون متماسكه قدام الناس !!؟
يارب الاختبار دا صعب اوووي عليا اهديني للقرار الصح وريح قلبي او خدني عندك وارتاااااااح !!!!
من كتر البُكا تقريبا نمت وانا في مكان وصحيت ع آذان العشا جددت وضوئي وصليت وبعدها عملت استخاره اني احضر كتب الكتاب ولا لا ونمت ...
ولا حلمت بحاجه ولا حسيت بأي حاجه ف كان قلقي بيزيد اكتر ، كررت الاستخاره كل يوم ومفيش اي حاجه وليلة كتب الكتاب ووالدي مستني ردي حلمت بإني موجوده مع شخص كان غير ابن عمتي خالص وصحيت وانا كُلي حنين للشخص دا وعاوزه ارجع تاني للحلم واحس نفس احساس الامان والحب اللي كنت حساه في قربه ووجوده ....
وحسيت ان دي رسالة ربنا ليا وانه هيعوضني بالأفضل واللي هيداوي كل خدش حصل لقلبي .... !
وجهزت نفسي واستعديت معنويًا لكتب الكتاب وحصنت نفسي وقلبي بوجود ربنا بجواري ....
طول م انا في الطريق بستغفر ربنا واطمن نفسي بإن ربنا مش هيضيعني وبحاول استشعر م تاني الاحساس اللي حسيته مع الشخص اللي كان في حلمي ، وفجأه لقيت ان نفسي بتلومني ع اني بكل سهوله كدا وبعد كل السنين دي فكرت في واحد غير حبيبي اللي قلبي اتعلق بيه كل السنين دي من مجرد حلم حلمته ، وبقيت ارد ع نفسي بإن دا مش أي حلم دا #رساله م ربنا وابدا م هيضيعني ، كنت في حيييييره كبيييره وتشتت بس سبحان م امدني بالقوه اللي ظهرت بيها قدام قرايبي وخاصةً عمتي لدرجة اني حسيتها قلقانه م ثقتي في نفسي وكأنها كانت منتظره انها تشوفني قدامها وانا #منهاره ،
ع الرغم اني في الحقيقه كنت #هشه جدا م جوايا لاني في الاول وفي الاخر #بشر بيحس ....
بدأت مراسم كتب الكتاب وانا دقات قلبي كل م تزيد اسرع م #الاستغفار واردد لنفسي ان اطمني ربنا عاينلك الخير ومش هيضيعك اطمني وفجأه
سمعنا صوت دوشه واصوات متداخله عرفت وقتها ان كتب الكتاب خلاص انتهى وانه بقى رسمي واحده تانيه شالت اسمه غيري وقتها وقعت راسي ع صدري في استسلام ورددت لنفسي قدر الله وماشاء فعل ، لقيت والدتي بتكلمني وانا مطأطأه رأسي وبرد عليها وانا ع نفس الوضع لقيتها ومش قادره اركز هي بتقولي ايه بس لقيتها بتشدني م ايدي وبتقولي يلا بسرعه بقولها يلا ايه !!!؟
خلاص هنمشي !؟
قالتلي لا زوج عمتك باعت عاوزك تحت !؟
قولتلها مين !؟ وتحت !؟ ليه في ايه !؟
انا مش هنزل اسلم ع حد ، هما عاوزين يذلوني للنهايه ليه !!!!!؟
قالتلي يلا بس وشدتني م ايدي اكتر ، ومجرد م نزلت ع السلم لقيت والدي وزوج عمتي واقف وجانبه ابنه ، حسيت بمقولة ان قلبي بيقع في الهاويه بمجرد م نظرت ليه ...
ولدهشتي مجرد بس م لمحته حسيت نفس احساس الامان والحب اللي حسيتهم اتجاه الشخص اللي كان في حلمي ، بس ازااااي دا واحد متجوووووووز !!!؟
قربت منهم ولقيت والدي بيسألني تقبلي تتزوجي بإبن عمتك !؟
قولت هو انا بحلم ول الناس دي جرالها حاجه ول عمتي طلع عندها ابن غيره ولا ايه !!؟
ولما فضلت ساكته لقيته هو قرب مني وبيقولي خلاص مش عاوزاني !؟ الغريبه ان كان ع ملامحه نظرات كلها غضب ، كنت حاسه اني عاوزه اضرب هو مين فين المفروض يكون غضبان من التاني 😠
قولتله هو انت هتتجوز اتنين في ليله واحده ولا ايه !؟
زوج عمتي رد وقالي ان حصل خلاف وقت كتب الكتاب بالظبط واهل العروسه وضعوا شرط او ينسحبوا ولان الشرط صعب وهما مش هيقدروا ينفذوه ف انسحبوا ....
انسحبواااااا !!!!!!!!
يعني ايه !!!! بصيتله وقولتله يعني انت م اتجوزتش !؟
قالي : لا ياختي م اتنيلتش !!!
حسيت ان فيه حاجه غلط وكأنه مغصوب ، قولتلهم مش موافقه ...
كانت اخر حاجه اتوقعها ان تجيلي الفرصه دي واقرر اني اقول #لا ...
زوج عمتي قالي يا بنتي الفضايح وكلام الناس هنعمل اييييه !؟
قولتله ومفكرتش في الفضيحه اللي مراتك عملتهالي م سنين !؟
رد هو وقاله انا مش هتجوز واحده غصب عنها ، المهم احتد الكلام واتناقشوا اكتر وانه علشان كلام الناس ميزدش ع حد فينا هنكتب الكتاب دلوقتي وبعدين نقرر هنعمل ايه ...
ومشيوا علشان يكملوا كتب الكتاب بنفس التجهيزات ونفس المعازيم ونفس العريس بس المختلف ان العروسه اتغيرت !!
بس اكتر حاجه وجعتني انه بصلي وهو ماشي نظره حسيتها خنجر بيقطع قلبي ونظره كلها مزيج م الحزن والغضب ...
طلعت المسجد وانا كعادتي مش فاهمه اي حاجه وبستغفر اكتر واكتر وحاسه ان مستحيل يكون دا واقع ويارب يكون حلم وكفايه اصلا نظرته ليا ...
انتهى كتب الكتاب والكل بيسلم عليا وانا مش فاهمه حاجه ونزلنا م المسجد لقيت ايد بتشدني جامد ولقيته بيقولهم احنا هنخرج شويه وهنرجع ع البيت وخدني م ايدي جر لحد العربيه وبمجرد م ركب لبسني حزام الأمان ولقيت اننا حرفيا طايرين بالعربيه وهو عمال يتكلم بعصبيه ونرفزه وانا مش فاهمه اي حاجه ، وفجأه بصلي وقالي انتِ مش بتردي عليا ليييييه وبيزعق قولتله وهو انا فاهمه منك كلمه اصلا وبدأنا نتخانق بصوت اعلى كنت مضايقه منه جدا وبردد لنفسي ليه قت م يتحقق حلمي يكون بالطريقه القاسيه دي ، ولقيته بيقولي لبه عملتي فيا كدا !؟
قولت للدرجه دي موافقتي عليه ضايقته وانه كان بيحب البنت دي !؟ كنت خلاص هعيط لقيته وقف فجأه بالعربيه كنت حاسه اني هموت ولقيت ايده بتحجز بيني وبتثبتني في مكان بالرغم انه اصلا رابطلي الحزام بس مجرد لمسة ايده ليا حسستني بإحساس اقوى م اللي حسيته في الحلم وحسيت بتخدير في كل جسمي خاصةً بعد م قالي ليه بسهوله سيبتيني زمان وانا حبيتك ولسه #بحبك !!!
بصيتله اللي هو 😳😳 مين !؟ ايه !؟ انا مش فاهمه حاجه خالص !؟
بدأ يتكلم بهدوء وعاتبني ع اني بعد المشكله قطعت كل حاجه ممكن توصله ليا ، وانه لما نزلوا اجازه حاول يعرف عني اي معلومات معرفش وكل اجازه كان بيحاول يوصلي لوقت م عرف اني اشتغلت ووصله بعدها اخبار اني هتجوز ، لومته ع انه صدق ، قالي وليه مصدقش وانتِ قعدتي سنيييين ولا حتى فكرتي تبعتي لأختي رساله واحده بس ، واختفيتي وكأنك اتبخرتي ومنعتي عني اي حاجه ممكن تطمني بيها قلبي ، كان لازم اصدق انك نسيتيني خاصة ان مكانش في بينا اي كلام وكلها كانت مجرد نظرات بسيطه واحساس بإن الطرف التاني متعلق بيا ...
قولتله بس انت كنت هتتجوز .. قالي سني 34 واللي بحبها وعيشت عمري كله اتمناها من ربنا سابتني وزن امي فوق كل دا ، ثم معرفتي بإنك هتيجي تحضري دي قتلتني وحسيت وقتها اني حتى تفكيري في التراجع ولا ليه لازمه لاني كنت بالنسبالك م الاساس ولا حاجه لحد م حصل اللي حصل ، ولما لقيتك رفضاني زاد غضبي اكتر وحسيت ان دعواتي وسنين انتظاري ليكِ كلها راحت ع الفاضي وبس ...
عارفه كنت بسمع ومش مصدقه كل اللي بيتقال 😳 يعني انا ربنا حفظ قلبه ليا زي محفظ قلبي ليه طول السنين دي معقول 😳
لااااا اللي مش معقول اكتر ان ربنا دبر كل دا وان كرامتي وسمعتي تتردلي في يوم زي دا وع مرأي ومسمع من كل اهلي وقرايبي اللي باركوا ع فضيحتي من سنين .. معقووول كرمك دا يارب !!!!
فضلت ابكي وابكي وهو مش فاهم ببكي ليه ، وبيحاول يطمني ولقيته بيقولي لو انتِ مرتبطه بشخص تاني انا هبوظلك حياتك عرفيني واطلقك :(
قولتله لو نطقت بالكلمه دي تاني هقتلك 😠
لقيته بيقولي ياما 😳 انتِ اتحولتي كدا ليه !!!؟
وضحكنا وقالي ان قلبه ولا مره بطل يحبني وان لسانه ولا مره بطل يطلبني من ربنا .. وان رغم غضبه منه بسبب سوء الفهم اللي حصل الا ان اول حاجه عملها لما ركبنا العربيه ربطلي حزام الامان ورغم كدا لما وقف فجأه ايده تلقائي ثبتتني في مكاني اكتر خوفًا عليا اصطدم بتابلوه العربيه !!!
وبدأت انا كمان في وسط كل مشاعر الحب دي احكيله عن السنين اللي فاتت بكل احداثها وكل واحد فينا وصله احساس التاني ، وان ربنا كان بيرعى الحب دا وينميه لحد م يكون في #حلاله واصبحت قصتنا بدل م كانت هتبقى قصه عاديه اصبحت قصه م الف ليله وليله لانها كانت في معية الله 😍
وفهمت حكمت ربنا م كل اللي مرينا بيه ، وان كل واحد فينا نضج واصبح بعقليه مختلفه تماما قادره تواجه المجتمع وتخلفه وقبلهم عمتي اللي حتى الآن مش قادره تتعامل معايا بطريقه طبيعيه الا ان يوم م شيلت اسم حبيبي اصبح قلبي خالي م اي حقد ع اي حد وبقيت مستعده اني اسامح اي حد ايًا كان اللي عمله فيا ...
وتخيلي ان طلع كلام البنت اللي كانت في الشغل صح وصاب تماما وكان هو مفتاح الحل لمشكلتي وهو #حسن_الظن_في_الله ،
تخيلي اني اروح كتب كتاب حبيبي بقلب مكسور الا ان الحبيب الأكبر أبى الا ويخرجني بقلب كل خدش فيه اتداوى واعطاني فوق فوق م كنت احلم واتخيل واتمنى ....
وحياتي بفضل الله دلوقتي عايشاها ولا كأن كان في لحظة حزن ابدا مرت ع قلبي وعايشين حرفيًا بمقولة " ان عِوض الله اذا حل انساك ما فقدت " ❤
ومَن عليا بعظيم كرمه بثلاث قطع م زوجي قلبي بيكبروا قدامنا بحب واحنا متبتين في بعض وفيهم وبنحاول سوا عوض كل السنين اللي فاتتنا ♥ ويكفيني ان مجرد بس اني المح طيفه في اي مكان بحس بالأمان والراحه ❤
وبس 😉 وجزاكِ الله كل خير يا دودو ع قِصصك اللي شجعتني ابعتلك انا كمان قِصتي وحبيت اساهم معاكِ بالثواب دا لعلها تكون #رسالة_اطمئنان لحد في وقتها ❤
*************************************
نصييييييبك هيصيبك والله لو الدنيا كلها اتشقلبت علشان تبعد عنك حاجه انت هتموت عليها وربك مقدرهالك هتشوفها يعني هتشوفها ...
حسن الظن بالله مش كلام نظري ولا مجرد مخدر يا جماعه ... وقت م هتقتنعوا بيها تمام الاقتناع واليقين ربنا هيسخرلكوا الدنيا كلها تحت رجليكم ...
وبالنسبه للاهل او الجيران اللي م بيصدقوا يطلعوا كلام ع بنات الناس ف حسبي الله وكفى وهتتردلكم اكيد واقرب مما تتخيلوا ،
ولكل أم خِفي الهم والحمل عنك وعن بنتك شويه وارضوا بقضاء الله وان الزواج رزق وان الرزاق هو الله ♥
هفضل اكررها تاني وتالت ورابع وعاشر ياشباب يا بنات لسه قدامنا وبإيدينا نغير احداث #روايتنا للأفضل بحسن الظن واليقين 😉
وثقه في الله يومًا ما #هدير_ابراهيم هي كمان هتكتب قصتها هنا وبكره افكركم ✋ حسن ظن ويقين بقى 👌😉
رزقني الله واياكم من نستشعر بوجوده الحب والامان والاطمئنان وراحة القلب والبال ♥
#احبكم_في_الله ❤
صلوا علي حبيب الله