صلوا علي من جلس علي ركبتيه يواسي طفلا مات عصفوره
################################
#صبرًا_فَكُلَ_مُرٍ_سيمُر ❤
غالبًا مفيش قِصه وصلتني الا وكان ليها قِصه معايا 😃
القِصه دي عندي وقرأتها م فتره ويا عيني صاحبتها كانت قربت تفقد الامل ف اني انزلها 🙈 بس انا بحس ان وقت نزول القِصص ماليش دخل فيه تمامًا ، لانها بتكون رساله م ربنا ف توقيت معين لشخص او اشخاص معينه ...
بس #نداء خاص مني للبنت اللي بعتتلي قبل كدا مسج انها بتدعي ربنا بدعاء معين لمدة 6 سنين ولسه ربنا لم يستجب دعائها ، انا قولتلك ان في قصه ليكِ لاني كنت مندهشه انك بعتيلي المسج ف نفس التوقيت اللي صاحبة قِصتنا بعتتهالي فيه !!
اصبري يا جميله وانتظري فرج وعوض الله ، وسيدهش قلبك بعظيم كرمه وعطائه ❤
كفايه رغي بقى واسيبكم للقِصه التانيه انهارده ع التوالي وعدوا الجمايل 😂 وكالعااااده #هاشتاج باقي القصص 👇🙈
#قصص_واقعيه_لهدير_ابراهيم ♡
**********************
بدايةً انا كنت بنت عاديه جدااا ، اتربيت ف بيت الأب حافظ للقرآن بس ولا مره علقلي ع لبسي ، كان الكل شايفني بنت صغيره علشان كنت آخر العنقود ، بالتالي مهما البس او اعمل كان عادي اصلي #صغيره ....
وكبرت الصغيره وبقيت بالبس لبس سئ جدا وباردو مفيش حد اعترض ووقف ف وشي غير اختي الكبيره !!
اختي اللهم بارك كانت م اول الناس اللي لبست النقاب ف بلدنا ، بس مش قادره اقولك كنت بكرهها ازاي !!
كنت بكره كلامها وان كل حاجه عندها حرام وحلال ، وانا طبعا عاوزه امشي بدماغي انا لا ليا علاقه بالحلال ولا بالحرام ،
عاوزه اقولك ان يمكن كانت اكتر فئه بكرهها ف حياتي هما المنتقبات والملتحيين ، كبرت ع كره للدين واي حاجه متعلقه بيه ، لدرجة اني والعياذ بالله كنت بكره اني اسمع القرآن !!
تخيلي ان حتى ف رمضان وصل بقلبي التجبر اني اسمع #اغاني ف نهار وليل رمضان بدون اي احساس بالذنب !!
ربنا كان بيبعتلي رسايل بس انا كان السواد مغطي قلبي تماما ، لدرجة ان حصلتلي حادثه كبيره جدا وفي ناس حصلها اصابات صعبه وانا خرجت م كل دا سليمه تماما بدون حتى خدش واحد ، ورغم اني شوفت الموت قدام عنيا الا اني متعظتش باردو ...
واستمرت حياتي ع نفس النمط بدون اي تغيير ،
بس كنت بشوف صحباتي بيكلموا #شباب وانا كان نفسي جدا اني اسمع كلمة حب واحده !!
كنت بتمنى اني احب واتحب ، تخيلي حتى اني لما كنت بدعي ربنا بكدا كنت بقول انه حرام حلال مش فارق المهم يدخل حد ف حياتي وبس ، المهم اكون زي اصحابي مهما كان !!
كانت اختي دايمًا تقولي خليكِ نقيه علشان اللي يدخل حياتك يكون اول حب ، بيبقى طعمه احلى لأنه ف الحلال ،
لكن انا كنت عاوزه اقلد اصحابي حتى لو تقليد اعمى .... !
وانا في وسط كل دا ربنا اراد انه يأدبني وكانت البدايه ...
كنت ف ايام الامتحانات وغششت واحده صاحبتي والمراقب شافنا ، ولأنها كانت عملت مشكله الماده اللي قبلها اتاخدت بذنبها واتعلم ع ورقنا وانطردنا م اللجنه وسط بهدله وسب وشتم م المراقبين ، احساس رهيب حسيته بالاهانه لدرجة اني مقدرتش اذاكر لتاني ماده وشيلتها هي كمان ،
طبعا خبيت ع والدي لان العقاب كان هيبقى رهيب ، خاصة ان معروف عني دايمًا اني متفوقه ف الدراسه ،
وبدأت اذاكر اني اعوض اللي حصل ف الامتحانات ، ف الوقت دا مكانش فيه حد خالص جانبي والكل اتخلى عن مساندتي ، حسيت ف الوقت دا اوي معنى الابتلاء ، حسيت ان ماليش غير ربنا ، بدأت اقرب منه واستشعرت حب ربنا بجد .. كان احساس رائع جدا والتزمت وبعدت عن كل ما يغضب الله ...
نجحت بفضل الله وقربي منه بيزيد اكتر واكتر ، وهنا كان وقت اول اختبار ليا م ربنا واللي للأسف فشلت فيه تماما وكان بداية كسره اكبر ف حياتي وسببه كان
تعرفي ع شاب هو ف الأصل قريبي ، بدأنا نقرب م بعض وظنيت ان اللي بينا حُب وان الحب دا كفيل انه يخليه يقرب م ربنا ،
كنت بوهم نفسي طبعا او الشيطان كان دخلي م المنفذ دا وهو اني هقدر معاه نقرب م ربنا ونلتزم ونسيت تمامًا ان علاقتي بيه كلها حرااام ولأن مفيش متعه ف حرام ، اتبدل الحال تماما واكتشفت حقيقة وكذب الشخص دا واني كنت مغفله وانه ولا قرب م ربنا ولا اي شي بالعكس اكتشفت ان حياته كلها كانت مخدرات وبنات ومعاصي ..
تخيلي كنت عايشه ف الوهم دا ع مدار ثلاث سنوات ،
وياريتها جات ع كدا وبس ، اهلي عرفوا بعلاقتي بيه واتبهدلت واتمنعت م الخروج ... سبته خالص بس بعد م كنت اتدمرت نفسيًا ...
بعده مريت بفترة #انتكاسه اكبر ف حياتي ..
رجعت ابشع مما كنت ، لبس اسوأ واتعرفت ع شاب تاني بس دا بقى كان #قذر بمعنى الكلمه .. بدون دخول ف تفاصيل كتير بس وصل انه كان عاوز يكلمني مكالمات قذره بداعي الحُب ،
انا كنت ساذجه جدا ، كنت فاكره ان بدخول شخص جديد ف حياتي هنسى الشخص القديم اللي اكتشفت انه برغم كل اللي كان فيه ف هو #حافظ عليا وعمرهةم تجاوز حدوده معايا ...
طبعا الشخص القذر دا سابني ، بس كنت خلاص اتدمرت حرفيًا واتدمرت حياتي بمعنى الكلمه ،
كنت دايمًا حزينه ، بعيط كتييييير حياتي شبه واقفه .. كنت بسأل نفسي دايمًا انا ايه اللي وصلني لكدا انا كنت بدأت خلاص اكون بنت #عفيفه ، بس ايه حصل ولوثني كدا !!!!؟
بدأت ادعي ع الشخص القذر دا ، وسبحان الله جات اجابة الدعاء بسرعه جدا وحصل للشخص دا حادثه كبيره جدا وربنا خلص منه حقي وحق كل بنت ضحك عليها بإسم الحب .... !!
مريت بفتره م حياتي صعبه جدا لدرجة اني بدأت احس ان ربنا مش بيحبني ، بس بفضل الله جالي الرد سريع ورساله منه انه موجود ومش ناسيني ...
سبحان ربي قدرًا لقيت بنت مشغله خُطبه لـ د.حازم شومان وكانت بداية رجوعي للمره التانيه لربنا ....
الخُطبه دي كانت البدايه ، حركت فيا احساس كنت بدأت انساه ، ربنا بعتلي الرساله اللي بعدها تاني يوم ع طول
كنت ف الكليه رايحه احضر محاضرتي اتفاجئت ببنت #مختمره ترميلي كُتيب وبتقولي خدي يمكن ربنا يهديكِ !!!
انزعجت جدا منها ومن طريقتها معايا لكني اخدته وكان جايلي ف توقيت مناسب جدا غيرلي مفاهيم كتير ف حياتي والاهم انه غيرلي نظرتي عن #النقاب !!
الكُتيب كان اسمه #للبنات_وبس لـ د.مصطفى زايد ...
كان اول تغيير ف حياتي هو لبسي ، بفضل الله لبست #ملحفه ، وبدأت حياتي تتغير وبدأت اقرب م اختي الملتزمه اللي اصبحت اقرب اهل بيتي لقلبي ...
لوقت م نويت البس #النقاب ، واجااارك الله م اللي حصلي بعد القرار دا ، حقيقي لو كنت خرجت م بيتي #عاريه مكنتش هسمع كلام زي اللي سمعته وقت خروجي بالنقاب !!
كنت بسمع كلمات بشعه تسمم الاذن والقلب ومعظم المنتقبات ليومنا هذا بيسمعوها ومنها ( ايه كيس الزباله اللي انتِ لبساه دا –عفريته – هو دا اللي هيدخلك الجنه 😏 ..... الخ )
كلام صعب ومنفر جداااا وتعبني نفسيًا وكان آخرهم كلمة خالي لما قالي : اييييه القرف اللي انتِ لبساه دا اخلعيه خلي الجمال يبان !!
قولتله : انا لو حصل حرق في وشي مثلا دا اللي هيخليني البسه !؟
قالي : لما تتحرقي ابقي البسيه :(
قولتله : انا لبساه حب لله واقتداء بأمهات المؤمنين ..
رده وجعني اكتر وعايرني بعلاقتي بقريبي وكلام دمرني نفسيًا لدرجة ان كلامه وصلني لاحساس اني مستاهلش اكون م البنات العفيفه ، وانهارت م البكاء ، وصدر قرار والدي اني #اقلع النقاب ، ودا كان الاختبار التاني م ربنا ليا ، واللي فشلت فيه للمره التانيه ع التوالي وخلعت النقاب :(
دخلت ف انتكاسه اكبر وحاله نفسيه ابشع واكتئاب رهيب ،
لدرجة كنت كل م اشوف اي منتقبه اهرب منها ، مش عاوزه افتكر انها افضل مني عند الله ...
كنت بردد لنفسي ليه انا هونت عليه كدا وسابني انتكس :(
حسيت بمدى فداحة اللي عملته بخلعي للنقاب ، لكن خلاص كان فات الاوان والكل رفض اني البسه تاني ، واولهم اختي المنتقبه ، اللي اتهمتني بإني اسأت للنقاب بخلعي ليه بكل بساطه وعدم التمسك بيه ، وانا فعلا كنت هوائيه وبرجع بسرعه ومش بثبت بمجرد م امر بإختبار م ربنا :(
كلمت اختي تاني اترجاها ترجعلي النقاب لانه كان هديه منها ، لكنها رفضت بشده لاني محافظتش عليه ..
بدأت ابكي بشده وألح عليها واوعدها اني ابدا م هخلعه تاني ابدا واني ندمت واتعلمت الدرس وان ربنا مطلع ع اللي ف قلبي ..
قالتلي جمله ابدًا م انساها ، قالتلي : اصدقي الله يصدقك !!!
رددت جوايا اني يارب صادقه .. انت عالم بحالي وحال قلبي ومطلع ع اللي جوايا :(
كنت مستعده خلاص اني اوجه اي حد بس ألبس النقاب تاني واللي كان معجزني هو ان ف الوقت دا مكانش معايا فلوس تكفي اني اشتري نقاب ...
بدأت ابكي بحرقه اكبر وحسيت بالنعمه اللي كانت ف ايدي وببساطه ضيعتها ، وتاني دعيت ربنا دعيت ودعيت ودعيت ف بعتلي رسالته التالته وكانت
بنت ف السكن الجامعي قربت مني تسألني عن سبب بكائي ، وبمجرد م عرفت السبب لقيتها بدون تردد فتحت دولابها وخرجتلي منه #نقاب واديتهولي ،
رفضت بشده .. بس هي الحت عليا لانها نفسها تاخد ثواب ان بنت ترتدي رداء العفه بسببها ...
وقتها بس حسيت اني اسعد انسانه ف الدنيا .. حسيت حرفيًا اني ملكه ،
يمكن لاني اول مره لبسته مكنتش حسين لسه بقيمته ، بس بعد الفقد عرفت قيمته كويس جدا ، وحبه تمكن م قلبي واصبحت مهووسه بيه ، وابتدا الطريق الصح للإلتزام ..
وكان الاختبار التالت كالعاده م ربنا 😃
قريبي اللي كنت بحبه بدأ يرجع تاني ويحاول انه يوصلي بكل الطرق !!
مش قادره اقولك انا كنت اد ايه ف صراع نفسي كنت خايفه جدا ، بس بفضل الله المره دي كانت غير كل مره وقدرت افكر واتعقل واختار صح ع الرغم من حبي ليه ...
علاقتي بالشخص التاني كنت طلعت منها بإني عرفت قيمة اني اكون #غاليه ، وقررت اني مش ههين نفسي تاني واخترت الله وقُربه ...
كان كل هدفي اني ارتبط بشخص #متدين يُعين قلبي ع الطاعه ،
قلبي اللي كان خلاص اشتكى م فترات البُعد عن الله ومتعطش لكل م يأتي ليُقربني منه ...
بعد النقاب تقدم لخطبتي الكثير ع الرغم ان قبل النقاب متقدمش لخطبتي الا شخص واحد تقريبا ، وحسيت انها رساله طمأنه م ربنا ليا ...
لكن للأسف كانوا المتدينين نفسهم هما اللي بيرفضوني بسبب وظيفتي لأنها للأسف سُمعتها ف مجتمعنا الى حد ما سيئه وناس بتشوفها للأسف انها مهنه غير اخلاقيه ... وظيفتي هي #ممرضه !!!
وبحكم اني عايشه في #ارياف ف نظرة الناس للبنت اللي مثلا بتفضل ف شغلها للصبح احيانا بتكون مهينه وبيرفضوها ...
بس صدقيني لو هعترف بحاجه ف هي ان حُب قريبي كان مازال متمكن م قلبي !!
سبع سنين !! تركته سبع سنين ي هدير ، طوال السبع سنين كنت بتعذب ، كل يوم ادخل ع بروفايل الشخص دا وكان الشيطان بيحاول يوسوسلي اني ابعتله رساله ، لكني كنت بتذكر دايما اني تركته لله وان م ترك شيئا لله عوضه الله خيرًا منه ، ف كنت بستعيذ بالله م الشيطان وارجع عن تفكيري خاصةً بعد م عرفت ان قريبي #خطب !!!
عارفه كانت دعوتي ف كل سجده هي – اللهم ارزقني زوج صالح تقي نقي يكون ذكره مرفوع ف السماء والأرض واكون قُرة عينه ويكون هو قرة عيني وقلبي .. اللهم ارزقني زوجًا يكون متعطر بماء وضوءه .. اللهم ارزقني بزوج ممن ترضاه م الرجال عندك –
تكاد لا تكون سجده ليا الا ودعيت الدعاء دا !!!
وكان وقت الاختبار الرابع وهو رجوع الشخص اللي بحبه بعد م فسخ خطبته ، وع الرغم م ان حبه مازال متمكن م قلبي الا انه اترفض م اهلي وكنت انا اول اللي رفضوه لاني خلاص مش عاوزه غير شخص #متدين ، خايف ابعد تاني عن نعيم القرب م ربنا !!!
ولأن ربك اعلم بحال قلوبنا وارحم بالطفل م امه كانن بداية الفرج ، واعطاني الله من عظيم فضله وكرمه وكافئ قلبي بعد كل اللي مر بيه .. بعتلي م تمناه قلبي لمدة #عشر سنوات !!!!
رجع تاني حبيبي اتقدملي بس رجع وسبحان من غير حاله .. اطلق اللحيه وبفضل الله اتغير تماما 😍
مكانش بيصلي اصبح لا يترك فرض الا ويصليه ف المسجد ، بعد عن السجاير وعن كل معاصيه السابقه واختلف تماما ....
تمت الخطبه وانا بعيش اجمل حلم ف حياتي ،
وكان اختبار ربنا ليا بس المره دي نجحت بفضل الله ف الاختبار وصممت ع اني انفذ كل حرف ف ضوابط الخطبه ..
عملتله بلوك ع الفيس وع الموبايل وهو كمان ، واستمرينا ع الحال دا لحد م بفض الله #عقدنا 😍 وفرحنا ف العيد الجاي بإذن الله ♥
مش قادره اوصفلك بجد طعم #الحلال عامل ازاي 😍 فعلا احساس ممتع جدااا ، يكفي احساس انك بترضي ربنا ومش بتستخبي م اهلك ولا م الناس ....
ربنا مش بس رزقني بالزوج الصالح ، لا دا رزقني بالصالح اللي تمناه قلبي لمدة عشر سنين وبفضل الله عايشه حاليا احلى حياه معاه 😍
فاللهم بارك لنا وبارك علينا واجمع بيننا في الخير♥
***********************
ناس كتير بتبعتلي مسجات انها قريبه م ربنا بس مفيش استجابه للدعاء ف بيبدأوا ينتكسوا ويبعدوا ،
او ناس تانيه بمجرد م بتقرب م ربنا بيحصلها مواقف وابتلاءات اصعب ف للأسف الشيطان بيتمكن منهم انهم يبعدوا تاني ، ف بينتكسوا باردو !!
اللي بيبحث عن طريق الله وبيجده بيدافع بإستماته انه يظل فيه ، ومستحيل حد يتذوق لذة القرب منه ويبعد ابدًا ...
مهما طالت مدة الابتلاء اوعوا تملوا م الدعاء او طرق الباب لأنه يومًا ما بالتأكيد سوف يُفتح من شدة الطرق عليه ...
خليكوا دايمًا بجوار الله وحده فقط القادر انه يرسم حياتنا للأجمل ويمحي م قلوبنا كل م مر بها م وجع او ألم .... !
اصدقوا الله يصدقكم ويسعد دائمًا وابدًا قلوبكم .. ❤
#احبكم_في_الله ❤♡❤
#################################
صلوا علي حبيب الله