صلوا علي الحبيب المصطفي
##############################
#الزوجه_المجنونه_رزق ❤
قِصه صغنونه ع غير العاده لانها ع لسان #الزوج ، وبحس ان الرجاله عندها خير الكلام م قل ودل 🙃
اوعووووا تنسوا #هاشتاج باقي القصص
#قصص_واقعيه_لهدير_ابراهيم ♡
********************
الشخص المجنون اكتر شخص سعيد ومرتاح في الدنيا وفي نفس الوقت اكتر شخص حزين ومكتئب ...
#الجنون مرض والمريض بيه مش بيتعاقب ع اي حاجه ممكن يعملها ، علشان كدا الناس بتحسده لدرجة انهم بيقولوا ان المجانين في نعيم ..
كذلك الشخص اللي بيعمل كل حاجه واي حاجه تخطر ع باله ومش بيلتزم بعادات المجتمع وعاهاته ،
الناس بتكون شيفاه مكبر دماغه ع الاخر ف اكيد مفيش حد سعيد ومبسوط اده ...
والحقيقه ان كل دا غلط ، اولا الشخص المريض بالجنون اللي هو ذهاب العقل بيتعامل في جميع المجتمعات بطريقه غير آدميه ،
كذلك الشخص المرح واللي بيتصف بالجنون لمجرد انه بيعمل الحاجه اللي بيحبها في اي وقت ، هو في نظر المجتمع شخص مختل عقليًا ومجنون وبيتحسد ع انه مش فارق معاه حاجه ،
وبالرغم م كدا مفيش حد بيلاحظ ان دا بيكون اكتر شخص حزين جدا م جواه ، يكفي انه بيتحسد ع حاجه اصلا م ابسط حقوقه وهي انه يكون #سعيد ... !
ليه بكتب المقدمه دي كلها !؟
بكتبها علشان اوضح للناس وانا منهم ان #المجنون دا هو اسعد شخص في الدنيا فعلا بس ع شرط وهو انه يلاقي اللي #يفهمه ...
انا شاب عادي مريت بمراحل التعليم المختلفه واول م وصلت لمرحلة الارتباط كانت العروسه موجوده وهي #بنت_عمي ، ولأني كنت عارفها او ظنيت اني اعرفها كويس ف كنت رافضها تمامًا ،
كان رفضي لسبب واحد بس وهو اني كنت شايفها شخصيه #مجنونه جدا ،
كانت كل معلوماتي عن الجنون ، هي انها شخصيه مش مسؤله ، متقدرش تتحمل مسؤلية بيت واسره واطفال ، كمان شخصيه مستهتره و انانيه ..
وبسبب تقاليد عيلتي كنت متأكد ان مفيش سبيل اني اخلع م الجوازه دي ،
هي كانت ساكنه في محافظه تانيه ، وكل حكمي عليها كان مبني ع الكلام اللي كنت بسمعه م والدتي وهي بتكلم والدتها ، حتى هما نفسهم كانوا بيطلقوا عليها انها #مجنونه ..
لما كانت بتيجي زياره عندنا مع اهلها كنت بتأكد انها مجنونه لمجرد انها ع طول مبتسمه وبتضحك – تقريبا انا اللي كنت شخص متخلف – ...
المهم ان تمت الخطوبه ولأن دا قرار متاخد م زمان ف كانت كل حاجه شبه جاهزه وفي اقل من 6 شهور كنا في بيت واحد ، وطول الست شهور كنت بتحجج بالشغل وبُعد المسافه والسفر ، ف كانت زياراتي ليها قليله تكاد تكون معدومه ...
وتم الزواج اللي هو كان #مجنون زيها بالظبط وشوفت جنانها الحقيقي م اول يوم ✋
اولا الفرح مكانش مختلط ودي عاده مش متعودين عليها ، ولا كان في حد عندنا سمع جملة فرح اسلامي دي قبل كدا ..
الغريبه بقى انها عملت دا بكل سهوله ومش بس اقنعت العيله كلها بالفكره دي ، دا اصبح شئ طبيعي في عيلتنا الفرح ع الطريقه الاسلاميه وهو انه غير مختلط وممنوع فيه اي موسيقى ..
حضرتها كان كل م حد يقولها دي ليلة العمر وازاي في بنت مش نفسها تفرح في اليوم دا ،
هي كانت بتستدرجهم لنقطه معينه في دماغها
كانت بتسألهم : الحلال والحرام معروفين صح ؟
الكل يرد : انه طبعا صح بس ايه دخل الحلال والحرام في حاجه ربنا حللها ، والفرحه مش حرام ..
كانت تسألهم : الاغاني حرام !
الكل كان بيقف وميعرفش يرد ، واللي كان بيرد كان يقول دي ليله في العمر
ف كان ردها جاهز وهو ان لو في حد مننا او كلما موتنا في اليوم دا هيكون مصيرنا ايه !؟
انا عيلتي مكانتش #متدينه ، علشان كدا استغربت جدااا انهم وافقوها بالعكس دا كله كان بيخاف انه يسمع اغاني او يعمل حاجه الا لما يسألوها الاول دا حلال ولا حرام ، عملتلهم #هسهس اقسم بالله 😂
ولاني كنت مبين ان ولا فارق معايا حاجه ، ف مقولتش رأيي ، وكنت بشوف كل دا واضحك انها فعلا #مجنونه وبتعمل اللي في دماغها ، بس مقدرش انكر ان من جوايا كنت مبسوووط جدا انها ع غير م توقعتها انها هتكون زي البنت اللي همها في فرحها مش بس تقلع الحجاب ، لا دي بتقلع كل حاجه معاه ومنها اهم حاجه وهي حيائها ،
كنت ناوي قبل م اعرف فكرت ونظام الفرح اللي هي عاوزاه ، اني اقلب اليوم دا ع دماغها وكنت بخطط اني اعمل مشكله ع شكل الفستان او قلع الحجاب وكنت هضايقها بالكلام بإن مش انا بس اول واحد شوفت شعرها ولا جزء م جسمها لا دي الناس كلها ،
ولو عدت م الاتنين دول كنت همسك ف اي تجاوزات في الفرح زي #رقصها مثلا اي حاجه المهم اني اوجعها بالكلام ،
كرهي ليها ولفكرة اني وانا راجل كدا اتغصب ع جوازه مش عايزها كانت واجعه كرامتي اوي ، ونسيت ان مش م الرجوله اني اخطط لوجع قلب بنت ، ودي مكانتش اي بنت دي كانت م دمي !!
بس سبحان الله الآيه اتقلبت تمامًا وزادت في نظري جدا ، ودي كانت اول حجر يتهدم م السور اللي كنت بنيته بيني وبينها ،
بنت عمي كانت عايشه في #القاهره ، ف زي م كان قدامها فرصه للانفتاح كان قدامها فرصه اكبر لانها تحضر دروس في مساجد ،
ووقتها كانت اصلا فكرة انه يكون في مسجد للنساء في قريتنا مكانتش منتشره ،
علشان كدا كان ظني فيها دايمًا انها بنت منفتحه لانها ببساطه #مجنونه
ونسيت اسأل نفسي هو ايه الجنان الوحش اللي شوفته فيها ؟
حكمت عليها انها مستهتره ومتقدرش تتحمل مسؤلية بيت وانها انانيه لمجرد انها بتعمل المستحيل علشان تسعد نفسها وتوصل لاي حاجه هي بتحبها ،
طيب ايه الانانيه في كدا !!!!؟
من يوم فرحنا وحتى يومنا هذا بشهد بجد ان مفيش يوم عدا علينا م غير #جنانها ، حتى وهي تعبانه جنانها منتشر حوالينا بشكل غريب ..
دايمًا يُقال متخافش م الهبله ، خاف م خلفتها ..
وبما ان الهبل والجنان ولاد عم ف ينطبق ع المجنونه نفس المثل بس ممكان يُضاف عليه وخاف م جوزها كمان ، لانها حرفيًا تحسيها مرض وبينتشر 😂
بس صدقيني احلى #مرض ممكن يجي للإنسان في حياته ..
حياتنا كلها عايشنها بصفه واحده بس وهي #الجنان ،
ودي كانت تكمله لمبدأ هي كانت عايشه بيه وهو ؛
اي حاجه في الدنيا ممكن تبسطها او تسعد قلبها هتعملها طااالما لا بتإذي ولا بتضر حد ولا هي حاجه حرام ...
يوم فرحنا لقيتها بتقولي انا مش هعيط واقولك واديني عند ماما علشان انا بنت كبيره وعاقله ، بس هطلب منك طلب واحد بس
قولتلها ايه هو !؟
قالتلي : فكرني كل شويه ان انا بنت كبيره وعاقله وبااااس يا ستي ودي اتفتحت في العياط ،
انا مقدرتش امسك نفسي م منظرها ولا عارف اضحك ولا عارف اهديها ،
ف قولتلها وانا قلبي بيتقطع في نفس الوقت ع منظرها ولومت نفسي اني كنت شايفها بنت مش كويسه ومجنونه ، قولتلها : انتِ نسيتي ولا ايه انتِ بنت كبيره وعاقله ،
بصتلي وهي بتتشحتف وقالتلي هو في اكل ايه !؟ انا وصيت ماما تعملي مكرونه بشاميل ... !
قولتلها مكرونه وبشاميل ، دا انتِ مش مجنونه دا الجنان نفسه اتبرى منك 😂
وسابتني والله وراحت تاكل عادي جدا ، ونسيت تماما جو الدراما اللي هي كانت فتحاه م شويه ...
زوجتي يا ساده كانت نقطه ضعفها #بطنها ، كانت ومازالت ليها جمله ع لسانها دايمًا الا وهي – تولع اي حاجه المهم #كرشي الجميل الصغنن يكون مبسوط –
نفسي الاقي اللي قال اقرب طريق لقلب الراجل معدته ، دا لو شاف مراتي هيغير المقوله دي تمامًا
دايمًا تقول – إسعد كرشي تجدني اينما تطلب وتحب – 😂😂
كانت مطلقه الدنيا بالتلاته ، ولما انا كنت بقولها كدا كانت بتقولي ان الناس مكشلتهم انهم بيجروا ورا الدنيا وشايفين فيها سعادتهم ، وهي بتقطع نفسهم جري لحد م يموتوا ف لا هما وصلولها ولا سعدوا قلبهم ،
بس لو طنشوها هي اللي هتجري وراهم ..
ودا بالظبط اللي هي كانت ومازالت باردو بتعمله ..... !
لما كان حد يقولي اني مرتاح مع مراتي وعادي ازعلها وديتها اجيبلها اي حاجه ليها علاقه بالأكل وبكدا اكون صالحتها بأقل حاجه وشايفين ان علشان كدا مفيش مابينا مشاكل ...
بس صدقيني ع العكس تماما ، انا قولتلك قبل كدا ان عيلتي مش متدينه او كانت ، وكانت دا لأني اكتشفت ان زوجتي كانت م الناس اللي ربنا اكرمها بحفظ القرآن كامل ،
وبعد زواجنا اتحججت بإن عندها وقت فراغ كبير ، وانها هتبدأ تحفظ اطفال العيله القرآن علشان كمان هي مش تنساه ،
بدأت بالأطفال وصولا لأمهاتهم ،
وبدأ يكون في غيره في قلب كل راجل ، ودي كانت لعبتها وخطتها م الاول انها تحفظ اكبر قدر م اللي حواليها للقرآن ونجحت خطتها فعلا ،
هو انا مقدرش اقول في دي حاجه اكتر م ان الشخص اللي بيكون كل همه ونيته انه يقرب من ربنا ويقرب كل اللي حواليه م ربنا ، مستحيل ربنا هيسيبه بالعكس ربنا كان بيكرمها جداااا ....
تعرفي اننا اتأخرنا ف الإنجاب 5 سنين اقسملك بالله انهم عدوا علينا بسرعه جدا ، وخلال السنين دي مفيش حد ابدا سأل ع تأخير الخلفه ،
كنا بناخد بالأسباب ونروح للدكاتره ، بس كنا متيقنين ان لو حتى في مشكله ف ربنا هو الوحيد اللي بإيده يكرمنا وقد كان ...
الجميل في المجنونه اللي معايا ان اول م عرفت بخبر حملها اول حاجه خطرت ع بالها ان ربنا تأخيره دايمًا خير وكام الخير هنا ان تقريبًا في الخمس سنين كان معظم الاطفال وامهاتهم منهم اللي ختم القرآن ومنهم اللي كان قرب يختمه ،
كانت شايفه ان حكمة ربنا في التأخير في الدنيا هو انه كان بيوسع وبيزيد من اعمالها وحسناتها للآخره اللي هي كانت دايمًا قدام عنيها وبتسعى ليها ...
زوجتي مفيش حد م الاهل او الجيران مش بيحبها ، واكتر حاجه بيعشقوها فيها جنانها ،
يوم العيد مش بس الاطفال اللي بتسعى انها تسعدهم فيه لا والكبار كمان ، لدرجة الكل بيفضل يخمن كل مره هي هتعمل ايه المره دي ، وكل مره بتبهر الكل بحاجه جديده ،
ودايما تردد ان ايه في الدنيا اسعد م ان الانسان يشوف بسمة اللي قدامه وياااا سلام لو كان هو سبب البسمه دي ....
في كلام كتير جدا نفسي اقوله بجد بس عارف اني مش هقدر اوفيها حقها ،
بس قررن ابعتلك لانها متبعاكِ وبتحب #قصصك جداا وبتستناها دايمًا ف حبيت افاجئها بإن قِصة المره دي هي #قصتها ♥
ربي يديم جنانها ووجودها في حياتي ♥
***********************
ربنا ابدًا م بيبتلي حد بشئ الا وليه حكمه في كدا ،
تأخير الزواج او الانجاب او اي شئ بيتأخر اكيد التأخير دا خير ..
مفيش انسان حياته #تخلو م المشاكل .. بس في ناس قربها م ربنا وروحها الحلوه بتعدي معاها كل حاجه ..
بالنسبه للناس #المجنونه ف انتوا صدقًا يعني رزق في حياتنا ❤
اتجوزوا يا جماعه ... شكرًا ✋
#احبكم_في_الله ♡♡
###############################
صلوا علي حبيب الله