صلوا علي من جلس علي ركبتيه يواسي طفلا مات عصفوره
###############################
#احببتُ_أزهريه ...
#هاشتاج باقي القصص 👇
#قصص_واقعيه_لهدير_ابراهيم ♡♡
*****************
انا كنت شاب عادي جدا ، وكبرت ف بيت اخره ف العباده الصلاه والصيام وبس ،
بس كانت أمي – ربنا يباركلي فيها – بتشدد عليا انا واخويا في موضوع الارتباط بالبنات ، ودا لأن عندنا اخوات بنات ، واللي هنعمله ف بنات الناس هيترد لينا ف اخواتنا ...
لما دخلت الكليه كنت خلاص كبرت ع كدا ، ف كنت كل م افكر اكلم بنت افتكر اخواتي البنات وكلام أمي ف ابعد عن الفكره دي ، الطبيعي ان اصحابي كانوا شايفني شخص غريب جدا او فيا #عيب ، لان وعلى حسب كلامهم مفيش شاب مبيكلمش بنات ...
عدت فترة الكليه ع خير ، وبعدها الجيش ، خلصت وبدأت اشتغل ولما استقريت بدأت أمي تزن في موضوع الجواز والاستقرار ،
وبعد مُحايلات وافقت ، واتحدد يوم للزياره ....
وفي اليوم دا اكتشفت اني رايح معرفش حاجات كتير عن البنت ، كل اللي عرفته م والدتي انها بنت ناس ومحترمه ومتربيه ، واكيد بنت بالمواصفات دي مفيش حد يقدر يرفضها ،
بس اللي انا عرفته صدمني ...
هي مش بس طلعت #منتقبه لا دي كمان طلعت #أزهريه ... !
وقت م اتقدمت لزوجتي كان الأزهر لسه ليه #هيبه ، ومجرد ذكر اسمه بس يحسسك ان اللي قدامك دا شخص تحس ان ليه رهبه ومكانه كبيره ،
الأغرب بقى هو اني عرفت من أخوها الصغير، كنت بقوله اني نبسوط م الزياره دي ومبسوط اني اتعرفت عليه ، لقيته ميل عليا وبيقولي انت ايه بس اللي وقعك ف #أزهريه شكلك غلبان \
قولتله مين ازهريه ؟ ازهرية ايه !؟
ولما عرفت انها خريجة ازهر والصدمه بانت ع وشي ، لقيته بيقولي حافظ #ألفية_ابن_مالك طيب !؟
قولتله : ألفية مين ؟ وابن مالك مين اصلا !؟
لقيته بيقولي : ربنا معاك يابني وتطلع منها سليم يارب ، وبالمناسبه دي اسمها #رؤيه مش زياره ، انت مش رايح زياره لواحد ف السجن ، مع ان بيني وبينك السجن ارحم م اللي انت هتشوفه ع ايد اختي بعد شويه 😂
قولتله : اخر حاجه اعرفها ان الرؤيه دي مرتبطه برؤية هلال رمضان مثلاً ، هو ممكن يكون اسمها رؤيه علشان مرتبطه بالقمر ف كدا بيمدحوا البنات مثلا !؟
قالي : هزر شويه م نفسك دقايق وهتدخل التاريخ 😂
هو انا مش فاهم هو كان بيضحك ع ايه بصراحه ، وايه سر انشكاحه وفرحته ف اللي هيحصلي !؟
كانوا كلهم خلاص ف الوقت دا المفروض هيسيبونا نقعد لوحدنا ، وانا قاعد ولا كأني ف امتحان او انترڤيو لشغل ، والأسئله كلها بالإيطالي مثلا وانا معرفش عنه حرف حتى ..
المشكله ان احنا الاتنين فضلنا قاعدين ساكتين فتره ، وانا كل تفكيري انها اكيد بتتكلم لغه عربيه فصحى ومش زينا خالص ، ف كونت عني فكرة اني شخص عامي جاهل ...
الحقيقه انا عمري م اتعاملت مع حد خريج ازهر خالص ، او حد متدين .. ف كون اني اتقدم لبنت خربجة ازهر ومتدينه دي انا كنت شايفها حاجه ولا كنت اتخيل تحصلي ...
المهم بعد سكوت طويل هي اللي بدأت كلام وسألتني انا خريج ايه ، وعندي كام سنه وكدا
هي بتسأل وانا بقول اكيد بعد شويه هتسأل بقى ف ابن مالك اللي اخوها قالي عليه ، وشاغل بالي كله منظري قدامها وان بسألها مين ابن مالك دا 😶
بس الغريب ان هي مسألتش وكل الأسئله كانت عن الالتزام بالصلاه وايه التربيه اللي هربيها لأولادي فيما بعد ...
رديت عليها ان بيتي الحمد لله م اول م كبرنا واحنا مش متدينين اوي ، بس الصلاه في بيتنا اساسي ، واللي هو اساسيات الدين بنعملها وكدا ...
سألتني لو عندي حاجه حابب اسئلهالها !؟
فكرت ف نفسي ان هو كدا خلاص هي خلصت !؟ اكيد هي سألت كدا علشان تكون عملت اللي عليها واسمنا قعدنا مع بعض واتكلمنا ، واكيد هي كانت مقرره م البدايه انها مش موافقه ... معرفش دا اللي خطر ع بالي ...
ف قولتلها ان لا مفيش عندي اسئله ، وشويه ومشيت انا ووالدتي ،
واول م نزلنا م العماره وسألتني ايه رأيك شكلها بنت كويسه و .. و.. و...
قولتلها : هو انا عملتلك حاجه وحشه ف حياتي يا أمي !؟
قالتلي بسرعه : لا طبعًا يا بني ليه بتقول كدا !؟
قولتلها : اخرتها توديني لواحده ازهريه ، دي اتعامل معاها ازاي ، دي محتاجه كتالوج ، دي ممكن لو نزلت عند البقال بشورت فوق الركبه تخرجني م الاسلام !!! كمان معروف ان الناس المتدينه دي بتبقى معقده ف نفسها كدا ، وهتمشي ورايا بالمسطره والعصايه !!
قالتلي : ولو كنت قولتلك انها ازهريه يعني كنت هتعمل ايه ، هترفض تروح !؟ هي عيبه انها ف ازهر !؟ ومش كل البنات معقده ، ملهاش علاقه انها ف ازهر ..
قولتلها : لا مش عيبه ، بس ع الاقل كمان كنت قعدت اذاكر ف الدين شويه ، دا انا شويه وكنت هموت م كتر م ضربات قلبي كانت سريعه ، قلبي كان هيقف م الخوف ، وكنت عمال اعرق واحنا ف عز الشتا اصلاً ..
أمي كل اللي كان طالع عليها انها تضحك وبس ، مش فاهم انا ايه سر ضحكهم دا والله ...
قالتلي : ليه هي عفريت !؟ البنت الشهاده لله اخلاق وجمال ومتربيه ومحترمه ..
قولتلها هي فعلا كل دا بس لا انا مش موافق ...
قالتلي هات سبب مقنع غير انها ازهريه ، لو قولت لحد كدا الناس هتضحك عليك .. انت مش مرتحلها طيب !؟
قولتلها : الشهاده لله مشوفتش منها حاجه وحشه خالص ، واسئلتهل كانت ف الحونين ، ودي حاجه تُحسبلها اكيد حست اني معنديش معلومات كتير ف الدين ف محبتش تحرجني ...
أمي قالتلي : شاكلك حبتها ولا ايه !؟
انهم الستات يا ساده ، أمي بكلمها ف ايه وهي تقولي شاكلك حبتها اولع ف نفسي ولا اشد ف شعري ف الشارع الناس يقولوا الراجل اتجنن !!
اتفقنا ف النهايه اني هصلي استخاره وهستنى اشوف م الوسيط ، لو الرد كان منها مع اني متأكد انها هترفض ف خلاص ، بس لو العكس ف ربنا يستر ...
استنينا اسبوع بالظبط زي م كنا متفقين مع والدها واستنينا الرد اللي كان غير متوقع اطلاااااقًا وهو ان الأزهريه #وافقت عليا 😳
وانا كنت صليت استخاره خلاص ف قولت آخد الخطوه واتوكل ع الله ربنا يستر ،
ولما قولت لأمي اني قلقان ، قالتلي ان البنت متتعيبش ولو رفضتها م غير سبب مقنع كدا بتبطر ، وربنا هيعاقبني وانه دا حرام ...
قولتلها : اهلااااااااا هي خلطت عليكِ م اولها وحلال وحرام ، بركاتها ست الشيخه ..
المهم اننا روحنا مره كمان بس والدي كان معايا علشان الاتفاقات وكدا ، طبعًا هي دخلت بالنقاب .. استنى ان دي تنزله ابدا ، قولت يمكن مكسوفه م الوالد ولا حاجه ، اخوها اول م شوفته بإستثناء انه بيتعبلي اعصابي بس قولت هو اللي هينجدني ..
اول م دخل لقيته قعد جانبي كالعاده
احنا الاتنين اتكلمنا تقريبا ف وقت واحد
هو كان بيقول : انا مش عارف انت عملتلها ايه !؟ ازاي هي وافقت عليك ، دا انت كدا يابني عااالمي
انا م التوتر قولتله : اختك ناويه تقلع امتى !؟
وبعدين حسيت بإني بعك ، ف قولتله قصدي النقاب يعني والله م قصدي حاجه ..
ودا كل اللي عليه بيضحك وخلاص ، اني افهم منه حاجه او افهم بس هو بيضحك ليه ولاااا اعرف ..
كل اللي قاله اني نكته ، وان الايام الجايه هتبقى مشوقه وكلها اثاره ،
حسسني انه فاتح روتانا سينما باين ....
شويه وهما خرجوا يكملوا كلام بره وسابونا لوحدنا تاني ، ف قولت اكيد هتنزل النقاب ، خاصةً ان م توتري المره الأولي معرفتش اشوفها كويس ..
استنى تنزله ودي ابدا .. طب تتكلم .. ولاااا هي هنا اصلا
اتنحنحت وقولتلها هو انتِ مش حرانه !؟
وعرفت وقتها ان اخوها يقصد بإني نكته هي اني #غبي
في حر في عز الشتا 😐
بس بصراحه حسيت انها ضحكت .. قولت يا فرج الله ،
وقولتلها انتِ بتضحكي عادي زينا !؟
قالتلي : نعم !؟
قولتلها : قصدي زي البنات يعني !؟
حسيت اني بعك للمره المليون ، ومعرفتش انطق ب ولا كلمه ..
قالتلي : انت قصدك اني انزل النقاب !؟
قولتلها : بالظبط اصل قولت انك نسيتي تنزليه
قالتلي : لا منستش ، بس مش انت خلاص وافقت ؟
قولتلها بسرعه : اه طبعا وملهاش علاقه بالشكل ، بس قصدي انه ممكن يكون مضايقك ف تنزليه
قالتلي : لا م طالما انت وافقت خلاص كدا
قولتلها : مين اللي خلاص خلاص ايه ؟
قالتلي : خلاص لا يجوز تشوف وشي الا بعد العقد
قولتلها عقد مين !؟
هنا هي فضلت هي تضحك جامد ، وانا كنت ف نص هدومي جامد ..
طبعا هو كان واضح ليها جدا اني فعلا مش فاهم كلامها ، وكل واحد فينا كان حاسس وكأن التاني جاي م كوكب آخر مثلا ..
كنت شايف ان ازاي هتكون بينا حياه زوجيه ، دا انا اللي هتكسف منها اصلا 😂
سألتها هي ليه وافقت عليا وهي عارفه ان انا غيره تماما ، واكيد هي كان نفسها ف واحد ابن مالك ف نفسه كدا – واستخدمت اسم ابن مالك لاني حسيت انه حد مهم اوي م كلام اخوها – 😂
دهشتي بقى كانت ف انه واخد فكره غلط تماما عنها او عن اي بنت متدينه ، وان البنت عامةً اقصى أمانيها هو زوج #يتقي الله فيها وبس ،
ولما سألتها ايه اللي خلاها توافق عليا !؟
قالتلي ع اخر حاجه ممكن اتوقعها ، وهو كانت حركه تلقائيه بعملها دايما وعملتها عادي قدامها ولا اخدت بالي انها اخدت بالها
الحركه دي كانت اول م دخلنا وانا كنت بساعد امي تقعد وبتلقائيه بوست ايديها ....
ف قولتلها دي حركه تلقائيه ع فكره ، قالتلي الحركه اللي انت مستهين بيها دي ، عرفتها حاجات كتير م شخصيتي ،
طبعا استغربت بس تمام يعني هي أدرى بقى ...
الخطوبه كانت اسبوعين وبعدها كان العقد اللي انا عرفت انه كتب الكتاب 😃
العقد دا بقى كل اللي حصل بعده كان حاجه تانيه تماما...
مطلعش اخوها بس اللي دايما يضحك دا طلعتي هي يمكن اكتر منه كمان ...
وواضح ان انا فعلاً اللي كنت واخد فكره غلط تمامًا مش بس عن الازهريات لا وكمان عن المنتقبات والمتدينيين عامةً ...
زوجتي يا ساده هي واخوها لما بيقعدوا مع بعض الجيران وجيران الجيران ممكن يسمعوا صوت ضحكهم ، كنت مستغرب جدا ازاي بتضحك وتهزر بالطريقه دي وفي نفس الوقت مجرد م تنزل الشارع او تكون في حضرة شخص غريب غير محارمها بتتحول وبتكون شخص تاني مختلف تمامًا ،
الناس وانا منهم بيشوفوا ان دا تعقد وتخلف بس طلع دا الصح جدا ، وبالعكس اللي بيشوف كدا هو اللي متخلف ، متخلف لان دا اللي الدين بينص عليه ،الناس دي مش جايبه حاجه م بيتها ..
الأجمل ان فكرة انهم بيكونوا عاوزين واحد زي ابن تيميه دي مش صحيحه ،
هما اقصى طموحهم زوج يتقي الله فيهم وبس ، ودي صعبه جداااا ع الناس اللي معندهاش دين اة معلوماتها عن الدين بسيطه ...
زوجتي بسببها اتنقلت نقله مختلفه تماما ، حياتي اصبح ليها معنى وهدف ، يكفي اني كل يوم الصبح بصحى وانا عندي هدف بسعى لتحقيقه ، مش هدف دنيوي بس لا هدف للآخره كمان ....
صدقيني لو قولتلك ان بيتنا بالظبط تحسيه مستشفى العباسيه 😂
لا والأطفال طالعين لمامتهم وخالهم تماما ولله الحمد 😂
غيروا فكرتكوا عن بنات الأزهر يا جماعه او المتدينين عامةً لأنكوا هتتصدموا انكوا بتتعاملوا مع ناس مختلفه تمامًا ...
وبفضل الله عايش حياه ولا كنت احلم بيها بفضل وجود #الأزهريه دي ف حياتي،
الازهريه اللي مقدرش انكر ابدًا فضلها عليا ولا ع تغيير حياتي ، بحس كتير انها مش بس بتربي اطفالنا لا دي بتربيني انا كمان ودا شئ لو تعلمون عظيم ❤
نسيت اقولكم اني مش بس حفظت ع ايديها القرآن لا وألفية ابن مالك كمان بما ان الراجل دا اتبهدل معانا تمامًا 😂
وكالعاده ربنا يحفظهالي ويحفظلنا ولادنا ♡♡
***********************
حبوا الجواز وغيروا فكرتكم عنه
حبوا الازهريات والمنتقبات والمتدينين وغيروا فكرتكم عنهم ❤❤
#دُمتم_في_اسعد_حال
#احبكم_في_الله ♡
##############################
صلوا علي من جلس علي ركبتيه يواسي طفلا مات عصفوره