صلوا علي من جلس علي ركبتيه يواسي طفلا مات عصفوره
###############################
#أكبر_أطفالي_زوجتي ❤
من أمتع القِصص اللي جاتلي واغربهم حرفيًا ،
اغربهم لان اول مره تجيلي قِصه من وجهة نظر الزوجين 🙂 كل مره كانت الزوجه هي اللي بتحكي ، المره دي مختلفه ودا الجمال ،
ولأن كلام كل منهم حسيته قصه متكامله ف قررت انزلهم كـ قصتين مش قصه واحده ،
فكرت انزلهم ف بوست واحد بس لقيت نفسي كدا بحذف كتيييير جدا م التفاصيل ، فـ قررت نبدأ انهارده مع القصه م وجهة نظر الزوج بما اننا كل مره الزوجه ، ونخلي القصه م وجهة نظرها هي بكره بإذن الله ❤
ودلوقتي اسيبكم مع احداث قصتنا بسسسسس اوعوا تنسوا وكالعاده #هاشتاج باقي القصص 👇👇
#قصص_واقعيه_لهدير_ابراهيم ♡♡
************************
حواء خُلقت من ضلع آدم ، فتخيلي رجلاً بدون ضلع هل سيكون شكله سويًا !؟
المرأه هي من تُكمل الرجل وهو بدونها غير مكتمل ، يكفي أنه بزواجه بها يكتمل نصف دينه ..
اتولدت في أسره ملتزمه ، كنت الفرد الوحيد الغير ملتزم ،
كنت بصلي وبصوم حتى اني ختمت القرآن زي باقي اخواتي وطبعًا والدي ووالدتي بفضل الله ،
لكن مين قال ان اللي بيصلي وبيصوم وحافظ للقرآن ملتزم !؟
الصلاه والصوم #فرض ، وفي بيتي حفظ القرآن #واجب لابد م تنفيذه ،
مش بس الناس كانت بتتعجب ان انا الفرد الوحيد في بيتي الغير ملتزم ، انا نفسي كنت بتعجب ، ليه انا مش زيهم !؟
ع الرغم ان والدي مش قاسي وابدا م اجبرنا ع فعل شئ ، حتى حفظ القرآن كان رغبه مني ، مش عارف حفظته وكملت للآخر لحد م ختمته ليه !؟ ممكن علشان اكون زي اخواتي ، أو السبب الأكبر ان ربنا اراد ليا ختمه لحكمه عرفتها بعد كدا .. !!
مقدرش اوصف نفسي ف الفتره دي ابدًا اني م حملة القرآن ، كنت مُدرك تمامًا ان حامل القرآن دا دمه فيه كرات دم حمراء وبيضاء وقرآن ، ملهاش معنى تاني ،
القرآن بيجري في دمه ، وحياته كلها قرآن ، ينطقه بقلبه قبل لسانه ، يتدبر ويتعمق في معانيه ،
دا حامل القرآن ....
كنت ومازلت أعشق أمي ، مكانتش عندي رغبه ابدًا في الزواج من فتاه ملتزمه ،
كنت عاوز اهرب م أي حاجه تذكرني بواجباتي اتجاه ديني ، الشيطان كان دايمًا يصورلي ان الالتزام مسؤليه كبيره لا استحق ان احملها ..
لكني كنت ادعو دائمًا الزواج #بفتاه تحمل قلب أمي ، قلبها وفقط هذا أقصى ما تمنيته ...
ولما آن الاوان لزواجي تركت مهمة اختيار شريكة المستقبل لأمي ، كنت أعلم ان لها نظره حكيمه ،
طبعًا كل البنات اللي رشحتها أمي كانوا #ملتزمات ومن أسره ملتزمه ،
اتقدمت فعلا ل 3 بنات ومحصلش نصيب ، البنت الرابعه كانت مختلفه تماما عنهم ، كانت هاديه جدا وخجوله ومش بتتكلم كتير ،
الرؤيه كانت بسيطه جدا بدون اي تعقيدات في الاسئله ،
كل اللي هي سألته : بصلي في المسجد ؟ حافظ او عندي نيه لحفظ القرآن ؟ هل هيكون عندي أي اعتراض انها بعد الزواج تنزل لدراسة أو تدريس العلوم الشرعيه ؟ وختمتها بإني شايف الحياه مُشاركه ولا الحمل كله ع الزوجه !؟
ردي كان بالإيجاب ع كل اللي فوق ، وآخر سؤال قولتلها اني اتعلمت من معاملة والدي لوالدتي ان الحياه كلها مشاركه ....
سألتها لو في أي سؤال تاني عاوزه تعرف اجابته ؟ قالتلي انها اكتفت بالاسئله واجابتها ، ولو عندي انا اي سؤال اقوله ، بس انا كنت عارف عنها معلومات كتير ، منها انها ملتزمه ع عكس اهلها ، وانها اختارت النقاب بإرادتها من صغرها ، واجمل مافي اهلها ان كل فرد ليه مساحه من الحريه طالما مش هيضر غيره ، فـ مفيش حد عندها كان بيعترض ع اي حاجه تخص التزامها ،
قولتها : بنات كتير اكيد بتحسدك ع حياتك دي ..
سألتني : ليه !؟ قولتلها : لأن معظم البنات مجرد تفكيرها في لبس النقاب بتقابل هجوم كتير م الاهل حتى مع الاهل الملتزمين ، لكن انتِ اهلك مش ملتزمين بالرغم من كدا سايبينك بحريتك تماما ..
قالتلي : بيتهيألك انها سهله ، بالعكس صعوبتها ف ان مفيش حد بيناقشني فيها ، ولا حد بيشجعني ، كتير بكون محتاجه اخرج اللي جوايا لحد يفهمني ، لكن مفيش حد م اللي حواليا قدر او حاول حتى يفهمني او يسمعني ، كنت بترعب كل م اقرأ عن فترات الفتور او #الانتكاسه ، كنت بخاف جدا ان الفتره دي تمر عليا وانا مفيش حد جانبي ياخد بإيدي فـ اضيع وابعد اكتر عن طريق ربنا ...
كلمها هزني من جوا ، لاني بفضل ان ربنا رزقني بأهل زي اهلي فـ انا ع الاقل لسه في طريقي ليه ، ولما بقع بسمع كلام يشجعني ويقويني ويرجعني ، لما كنت بقول لاهلي اني مش ملتزم ، كانت والدتي بترد عليا وتقولي ان مفيش حد يقدر يقول عن نفسه ملتزم لاننا بشر لازم هنقع و هنغلط ، المهم ان يكون في قلوبنا اللي يقومنا ويرجعنا لطريق الحق ، علشان كدا ربتنا ع الدين الحق ....
المهم ان الرؤيه عدت ، وعملت استخاره والموضوع تم بسرعه جدا ، واكتر حاجه كانت مريحه قلبي ان أمي كانت مبسوطه بيها جدا ..
بعد الخطوبه بشهر ونص بالظبط كتبنا الكتاب ،
بس في معلومه ان خلال الشهر ونص دول شوفتها تقريبا 3 مرات بس غير مرة الرؤيه ، وفي كل مره كان بيبقى الروتين اني بروح بمسك الموب فـ ايدي ومركز فيه هو ، وهي لما لاحظت م اول مره اني مش بتكلم خالص ومشغول بالموب بقت تدخل هي كمان وفي ايديها #كتاب ، كنت مستغرب جدا انها عااادي جدا بالنسبالها اني مش مديها اي اهتمام لا دا هي كمان عملت نفس الحركه وولا شغلت بالها ، قولت تمام جدا اكيد هي كدا م النوع المُسالم اللي ولا ليه في اي حاجه ، وكدا حياتنا هتكون تمام وهعمل اللي انا عايزه براحتي ، كمان مش بيتسمعلها أي صوت ..
لحد المره اللي كانت قبل #العقد لقيتها بتقولي ان في حاجه مهمه جدا عاوزه تتكلم معايا فيها لانها حاسه انها #بتخدعني ،
انا سمعت الكلمه دي وسبت الموب م ايدي وركزت كل اهتمامي عليها علشان اسمع اللي هتقوله ، وبحاول امنع نفسي م التفكير بسوء ظن ،
لقيتها اخدت نفس عميق ، قولت استر يارب الموضوع شاكله فيه مصيبه كبيره ،
لقيت سيادتها بتقولي : انا مش هاديه !!!؟؟
( صوت صرصور الحقل )
ولما مكانش فيه اي رد فعل لا مني ولا منها ، لقيتها بتكمل : انا خايفه تكون واخد عني فكرة ان انا شخص هادي جدا ، انا عكس كدا تماما ، انا وقت م تلاقيني هاديه اعرف ان انا يا تعبانه ، يا مش طايقه الشخص اللي قدامي ، يا قاعده مع حد اكبر مني ، يا مع شخص مش من محارمي ، لكن غير كدا انا شخص بيتحرك كتير جدا ومش بقعد هاديه ...
في عز دهشتي قولتلها في حاجه تانيه !؟ قالتلي : ايوه
قولت ها الكوارث جايه ، لقيتها بتقولي : انا #رغايه وجدا ، ولو لقيتني ساكته اعرف ان انا يا تعبانه ، يا مش طايقه الشخص اللي قدامي ، يا قاعده مع حد اكبر مني ، يا مع شخص مش من محارمي ، لكن غير كدا بحب اتكلم كتير جدا ...
قولتلها في حاجه تانيه 😕 قالتلي : اه
قولت خييييير ، قالتلي : انا بحب الضحك جدا ، بحس ان الضحك دا حياه لوحده ، ووقت م تلاقيني مش بضحك
هنا كملت انا وقولتلها اعرف ان انتِ يا تعبانه ، يا مش طايقه الشخص اللي قدامك ، يا قاعده مع حد اكبر منك ، يا مع شخص مش من محارمك /
واقسم بالله م كنت عارف اتغاظ منها واجز ع سناني م الغيظ ولا اضحك خاصة انها كانت بتتكلم بجديه رهيبه ...
سألت لو في حاجه لسه سيادتها حاسه انها #خدعاني فيها ،
قالتلي : م اظنش بس فكرني يوم العقد ، اقولك ع حاجه ، دا في حالة انك وافقت ع العقد بعد الكلام دا ....
مكانش عندي اي كلام ارد بيه ، وبعد كلامها معرفتش خالص اني اركز ف الموب ، وهي بكل بساطه مسكت الكتاب بتاعها تاني ،
ولما لقيت مفيش امل اني اركز ف الموب ، سألتها بتقرأ كتاب ايه !؟
قالتلي اسم الكتاب ، قولتلها بتاع كذا ، قالتلي ايوه انت قرأته !؟
قولتلها ايوه ، قالتلي ان في حاجه فيه مش قادره تفهمها ،
لقيت نفس بكل تلقائيه بتناقش معاها في الكتاب ، والنقاش جابنا لكتب تانيه غيره وهكذا لحد المعاد اللي بمشي فيه وحسيت ان الوقت عدا بسرعه جدا عكس الايام التانيه ...
واستنيت يوم العقد بفارغ الصبر علشان اعرف اييييه اللي هي عاوزه تقوله ف اليوم دا ، لان الموضوع دا شغل تفكيري لدرجه رهيبه ،
ويوم العقد سألتها : ها ايه الحاجه اللي قولتي هتقولي عليها !؟
قالتلي : هتعلمني بلايستيشن !!
( صوت صرصور الحقل مره تانيه )
اللي هيجنني انها كانت بتتكلم جد ومفيش اي علامات تدل انها بتهزر ...
قولتلها اعلمك امتى ؟ م تخلي حد م اخواتك يعلمك ، وبعدين عاوزه تتعلميه ليه اصلاً واشمعنى اللعبه دي بالتحديد !؟ ولا يكون ظنك ان بكدا هقعد جانبك ف البيت ومش هخرج مع اصحابي بما ان حجتك جاهزه اني هلعب معاكِ وكدا !؟
قالتلي : اولا هتعلمني طول فترة العقد ، ثانيًا عمري م هحرمك من انك تقعد مع اصحابك طالما انت شايف انهم صُحبه صالحه مش هتقضوا الوقت ف حاجه فيها معصيه ، ثالثًا بقى عاوزه اتعلم اللعبه دي بالتحديد ليه فهو لان التعلم عامة بيحتاج وقت ومجهود مش بس م اللي بيتعلم لا كمان اللي بيعلم ،
واللعبه دي بالذات محتاجه صبر ، وبيكون فيها شد وجذب وبيبان منها الشخص دا عصبي او لا ، بإختصار هعرف منها حاجات كتير م شخصيتك ...
بصراحه كنت مندهش م كلامها ورأيها جدا وان دماغها جابتها للتفكير دا ، بس قولتلها ان اي لعبه الكل غصب عنه بيتعصب ، ف دا مش دليل قوي ع العصبيه ..
قالتلي بس بيبان جدا درجة عصبيته وتحمله انه يكون عنده طولة بال ع اللي قدامه ، او ع العكس وبيفقد الصبر وطولة البال بسرعه ..
كالعاده مكانش في عندي كلام ارد بيه ،
ووقت العقد كنت عاوز اقول لباباها بنت مجنونه يا حاج وشاكلي #لبست فيها خلاص ، وحسيت اني مش بتعامل مع حد سهل ، وان كل اللي ظنيته فيها طلع عكسه تماما ، ولاستغرابي دي كانت اكتر حاجه شدتني ليها جدا ،،
عاوز اقولك ان فترة العَقد كانت م لحظات كتيييير جميله وسعيده مرت علينا سوا ،
هي فعلا طلعت مش هاديه تمااااااما ، رغايه لدرجة انها ممكن تنام وهي بتتكلم وتصحى تكمل كلام عاادي جدا ،
امتع لحظاتنا وقت لعب البلايستيشن اللي هي وبعد 9 سنين جواز ولا مره كسبت فيه ومازال عندها امل في يوم انها تكسب ومفقدتش الامل لحد انهارده ، دا بإستثناء انها هرياني ضرب ، وكل م اهددها اني عادي ممكن امد ايدي انا كمان ، تقولي هصعب عليك
اقولها وانا مش بصعب عليكِ تضحك وتكمل ضرب فـ انا اكمل الضحك 😂
عاوز اقولك انها فوق كل دا م الحاجات الغريبه اللي عملتها فيا ، انها في يوم الفرح وبعد هدت حيل طول اليوم بمجرد م دخلنا الشقه لقيتها وقفت ع كرسي ،
قولت هتعمل ايه المجنونه دي 😳
لقيتها بتُلقي خُطبه ، اه والله العظيم ، لقيتها محضره خُطبه وحفظتها وبتتكلم بكل ثقه وبتقولي يا عبـدُ الله
قولتلها انا احمد عبد الله مين ،
قالتلي كلنا عباد الله يا أخي
قولتلها يوم م تقوليلي حاجه غير اسمي تقوليلي أخي ويوم فرحنا 😳
قالتلي اسمع وانصت يا عبد الله ، قولتلها كملي ياختي كملي ..
قالت : كيف بدأ الخلقُ !؟
قولتلها وحياة أمي م اعرف ولو عاوز اعرف مش هيبقى يوم فرحي ،
قالتلي يا عبد الله ، قولتلها هاسمع ياختي وانصت ،
قالتلي : الحلف بغير الله حرام اولا ولو ع سبيل الدعابه ،
ثانيا ربنا قال وما خلقت الإنس والجن إلا لإيه !؟ قولتلها هو انتِ عملالي اختبار ف حفظ القرآن !؟
قالتلي رد ع اد السؤال ، قولتلها تعالي خوديلك قلمين احسن ،
قالتلي تمام خلينا واقفين كدا ،
قولتلها وع ايه ، ليعبدون يا حبيبتي ، ليعبدون ..
لقيتها اتكسفت وقالتلي : اول مره تقولي كلمة حبيبتي 😊
قولتلها دي كلمه عابره بنقولها عادي ف الكلام لاي حد
قلبت وشها وقالتلي : يعني انا مش حبيبتك 😮 وحد مين اللي بتقولها يا حبيبتي 😑
قولتلها انا عارفه انه يوم مش هيعدي ، خلصتي الخطبه ،
اول م نطقت كلمة الخطبه لقيتها اتعدلت ف وقفتها واتنحنحت وكملت بقى
ومما جاء في تلك الخُطبه ، ان الحياه مشاركه ودا احنا متفقين عليه ، وان لازم بيتنا يكون بيت مبني ع اساس الموده والرحمه بينا وبعض وكمان مع اولادنا ، وانه يكون بيت يفخر به الرسول امام الملائكه ، واننا نتعاهد ان لو في حد منا وقع التاني يسنده ويساعده ، وان مفيش كلمه هتتقال بينا هتخرج ، حتى لاقرب الناس لينا ..... الى آخره
وفي عز تأثري بكلامها لقيتها نزلت م على الكرسي وبتقولي يلا !!
قولتلها : يلا ايه !؟ قالتلي : دورك انت كمان
قولتلها انا كمان هعمل ايه اخطب !؟ قالتلي : لا
قولتلها انا بقول باردو يعني اخطب ايه بس
قالتلي : لا اسمها هتلقي خُطبه ، بلاش اسمع منك كلمة اخطب دي ابدا ، احنا متفقين مفيش اي كلمه تدخل بيتنا ليها علاقه بالتعدد 😕
كنت هشد ف شعري وفي نفس الوقت ميت ع نفسي م الضحك ، ووقفت ع الكرسي قولتلها اسمعي وانصتي يا أمة الله انا بحبك وبحمد ربنا انه رزقني بمجنونه زيك والسلام عليكم ورحمة الله
ونزلت م ع الكرسي وابتديت حياتي مع المجنونه اللي غيرت كل حياتي تماما .. للأفضل بفضل الله ❤
لاحظت م كل القصص اللي بتنزليها ان معظمها البنت بتتكلم عن شريك حياتها ، اظن اني اول شخص يتكلم عن شريكة حياته ، ف استغل الفرصه واوضح ان زي م كل بنت ليها احلام في شريك حياتها ، مفيش راجل معندهوش احلام وخيالات مع شريكة حياته اللي بيحلم يقضي معاها طول عمره وتشيل اسمه ويكون منها اطفاله ...
انا كل اللي اتمنيته بنت في قلب أمي ، ف ربنا رزقني باللي فيها مش بس قلب أمي ، لا طيبتها وحنيتها وتفهمها واحتوائها ليا ،
زي م الست بتدور ع الاهتمام والاحتواء الراجل كمان بيكون محتاجه جدا ،
زوجتي زي كتير يعرفوا ان كل رجل بداخله طفل صغير ، لكن زوجتي تفوقت ف انها قدرت توصل للطفل اللي جوايا وتتعامل معاه ، كنت بحب كل م اقولها انتِ نسخه من أمي ، تقولي مفيش حد ابدا هيكون زي الأم ، أمك في مكان كبير خاص بيها ميقدرش حد يقرب م المكان دا ،
ف كنت برد وبقولها وان هي كمان ف مكان كبير خاص بيها ومستحيل حد ياخد ولو جزء بسيط م المكان دا ....
كنت بساعدها في كل حاجه سواء ف البيت .. نشتري طلبات البيت سوا .. الاهتمام بالاطفال ومذاكرتهم ولعبهم ... وطبعًا قراءة القرآن سوا
هي مخصصه وقت للورد كان بينا احنا الاتنين ومع ولادة كل طفل م اطفالنا التلاته كنا بنزيد فرد ،
ودلوقتي احنا بفضل الله 5 اشخاص بنقعد كلنا بعد الفجر نقرأ ورد القرآن ، ونراجع لبعض القرآن وكل واحد يتولى مسؤلية ابن يراجعله حفظه من القرآن ،
ع وقت الضحى بنكون خلصنا الورد قراءه وحفظ ونصلي الضحى واذكار الصباح ، ونستعد للفطار ..
وانا باخد الاطفال للمدرسه والروضه ، وهي بتدخل ترتاح شويه وتنام لوقت قبل م نرجع تحضر الغدا ، يكون الاطفال رجعوا وانا بعدهم بشويه ،
بتكون مسؤليتي انا واكبر اطفالي وهو ولد بالمناسبه ، اننا نحضر السُفره والأكل عليها ، وبعد الغدا مهمتنا اننا نشطب المطبخ ونرجعه كما كان ،
مع تخصيص يوم الجمعه ليا يا نخرج نتغدى بره ، يا انا اللي مسؤول عن تجهيز الاكل ونتبادل الادوار ...وهكذا
وبفضل الله ثم زوجتي بيتنا كله حب ودفا وأمان ...
احنا معملناش حاجه مستحيله ، كل اللي عملناه ان كل واحد كان بيحاول ع اد م يقدر انه #يتقي الله ،
وان ربنا كان بييسر كل حاجه م عنده ، مرينا زي اي اسره بمشاكل وتعسرات كتير ، لكن بفضل الله كله كان بيعدي ..
كل اللي ذكرته دا مجاش بالساهل ابدًا ، بس كان في استمتاع رهيب وسعاده كل م بنوصل لمرحله وبثبت فيها وسعاده اكبر كل م بنوصل سوا لحاجات اكتر تقربنا م ربنا ،
مشاركتي لزوجتي خلت حياتنا تكاد تخلو م المشاكل ، لاني ببساطه عارف كل حاجه بتحصل ف بيتي ، ف بقدر ظروف عدم وجود اكل او التأخير فيه ،
عارف كل حاجه عن اطفالي لاني بشارك زيها بالظبط ف تربيتهم ،
عارف كل حاجه عن زوجتي لان كل منا هو بئر اسرار التاني ..
وبالتالي مكانش فيه الحمد لله ما ينغص حياتنا خاصةً وان هدفنا الاساسي كان رضا الرحمن واتقاء الله في كل شئ ...
اجمل حاجه اني شايف اطفالي بيكبروا قدامي ، الا طفله واحده من يوم م دخلت بيتي وهي طفله صغيره مبتكبرش ابدًا والحقيقه مش عاوزها تكبر ابدا ، عاوزها تفضل بكل جنانها وشقاوتها وروحها الحلوه وعصبيتها عليا انا والاطفال كل م نعمل حاجه غلط او منسمعش الكلام وبعدها تضحك بسرعه وترجع طفله اول م اقولها اني جبت مثلا ايس كريم ف التلاجه وانا راجع م الشغل ، بتنسى كل حاجه وتسألني بطعم ايه 😂
الطفله يا ساده هي #زوجتي ، وبعد م كنت بدعي ربنا بإني م اتجوزش بنت #ملتزمه ، بقيت احمد ربنا الف مره اني كانت تكملة دعوتي انها بنت قلبها زي قلب امي ،
ونسيت ان قلبي امي كله التزام وخوف ومُراعاه لله ...
دايمًا كنت فاكر ان التعامل مع الست او اي محاوله لفهمها ، صعب جدا ،
الا اني بفضل الله عمري م حسيت صعوبه ف التعامل مع زوجتي ..
اهلي كان ليهم دور اني اتعلم ديني ، وزوجتي كان ليها دور كبير اني اطبق ديني ....
زوجتي بإختصار هي #أمي .. #زوجتي .. #حبيبتي .. #صديقي .. #طِفلَتي_المُدَلله ♡
ربنا يباركلي فيها وفي اطفالنا ❤
***********************
#الخُلاصه متسمعوش للناس اللي بتقول الزواج وحش وتعيس ..
– متسمعوش للناس اللي بتقول الزوجه المصريه نكديه ، او الذكر المصري كئيب او ... او ... او .. من الصفات المنفره ..
– متسمعوش للناس اللي بتقول الجواز بيدخل م الباب الحب بيخرج م الشباك ..
– متسمعوش للناس اللي بتقول اسوأ حاجه ف الجواز المسؤوليه والاطفال ، لان الاطفال دول ممكن يكونوا هما السبب ف دخولكم #الجنه ..
– متسمعوش للناس اللي بتجبركم توافقوا ع اشخاص مش مرتاحين ليهم لمجرد فكرة ان قطر الجواز هيعدي ، او انهم كلهم زي بعض ومش فارقه ....
= اسمعوا لكلام رب العالمين وطبقوا كلامه حياتكم مش هقول كلها هتكون سعيده ، بس اقدر اضمنلكم انها هتكون مليااانه براحة البال ♡ اصل طول م انت بتتقي الله هتشغل بالك ليه وبإيه !!
ومتنسوش اختاروا صح هتعيشوا حياتكوا كلها صح ❤
ولنا لقاء غدًا بإذن الله ونفس القِصه بس م وجهة نظر وتفكير #الزوجه 😉
#دُمتم_في_أفضل_حال
#أحبكم_فـ_الله ❤❤❤
###############################
صلوا علي حبيب الله