صلوا علي من جلس علي ركبتيه يواسي طفلا مات عصفوره
##############################
قِصة انهارده
#جعلوني_ملكه ❤😍
كالعاده هاشتاج باقي القصص ؛
#قصص_واقعيه_لهدير_ابراهيم ❤
القصه المره دي صغيره جدا وبعتبرها #فصل في حياة صاحبتها ،، حبت انها تشاركه معانا علشان نستفاد وناخد عظه وعبره !!
#القصه 👇👇
****************************
احب أعرفك بأبعاد قصتي من بدايتها ..
أنا بنت من اسرة تعتبر محافظة جدا ،،
خروج بمواعيد .. رجوع بمواعيد .. ده لو فيه خروج اصلا!!
كانت الاجازة بالنسبالي سجن كبير لاني مبشوفش الشارع فكان #النت بالنسبة ليا المتنفس بس دي مرحلة متقدمة ف حياتي *اعدادي* لكن في صغري مكنشي فيه غير التلفزيون ..
بابا يعتبر كما يقال #ملتزم ماما كانت ست عادية جدا ..
كنت في مدرسة من اللي بيطلق عليها #اسلامية
كنت انا واخواتي دايما بنطلع الاوائل ، دايما بنتكرم ودايما معروفين ف المدرسة
الا اني بمجرد ما وصلت لتالتة ابتدائي كل ده اتغير ؛
اتعرضت لموقف شخصي جدا ، على صغر سني #دمر فيا جزء كبير من برائتي ، موقف يعلمكم ان مش عشان مدرسة اسلامية يبقي الاطفال فطرتهم سوية ،،
بابايا كان ملتزم اه ، بس التلفزيون عندنا شغال ٢٤ ساعة في الـ ٢٤ ساعة *ولحد انهاردة*
كنا بنشوف افلام يمكن الناس تقول عليها عادية ، لكن لطفلة فطرتها #انتكست غصب عنها الافلام دي مكنتش عادية ،،
تركت الصلاة وانغمست في الشهوات شهوة ورا شهوة ،،
أغاني .. افلام .. مسلسلات ، وعشت ف احلام اليقظة والخيالات ،،
#بالمناسبة طول عمري ما سمعت ولا أغنية ، الا لما واحدة قريبتنا اكبر مني سامحها الله عرفتني الطريق ده :)
اهملت دراستي ، او مكنشي عندي ما يكفي من التركيز ليها ،،
لحد ما وصلت ستة ابتدائي ولبست *الطرحة* مش الحجاب ، لأن ده مسموش حجاب اساسا ،،
لبسته عشان #بلغت وعشان حبيت شكله وعشان بابا وماما عايزين كدة وعشان اخواتي محجبات فانا لازم ابقي زيهم ،،
ولاني كنت زي المخدة في البيت ، ماليش رأي ولو ليا رأي غالبا #بيحقر فكنت بحتفظ بيه لنفسي ،،
ولاني كنت لسة شايفة نفسي صغيرة فكنت اقلعه البسه عادي
لحد ما بطلت اقلعه بس اللي هو مكنشي حجاب اساسا فيا فرحتي يعني 😂😂
نسيت أقول اني على الرغم من اني ضايعة مكنتش بكلم ولاد ، وقريبتنا اللي عرفتني طريق الاغاني كانت بتعمل كدة وكنت من اشد المعارضين ليها وكنت بنهاها عشان #عيب *وبس مكنتش بدخل من ناحية الدين اساسا* ولاني بنهاها كان لازم توقعني ف نفس غلطها عشان محدش يبقي احسن من حد ،،
في اولى اعدادي النت دخل بيتنا
وبدأت مرحلة جديدة من الشهوات ، وف تالتة اعدادي قريبتنا اللي عرفتي طريق الاغاني هي اللي عرفتني طريق الشباب ، مش هخوض كتير في تفاصيلها بس ادعولها ،،
هي اتعرفت على شاب بس سنة صغير ، فقالتله يجي يتعرف عليا
وكنت بتعامل عادي ، ما انا بنت عادية
وطول عمري الولاد بيكرهوني لسبب مجهول لحد أنهاردة 😂😅
فتقدروا تقولوا ما صدقت لاقيت حد من الجنس الاخر يقولي السلام عليكم حتى
قعدنا نتكلم فترة لحد ما كتبلي على صفحتي *سيحلي يعني* إنه بيحبني ،،
انا طبعا مردتش عليه ، كنت من نوع البنات التقيلة قوي قوي قوي ، ولو عمل ايه مقلش مش عشان #حرام ،مسألة برستيچ
بس منكرش طبعا ان مشاعري #اتحركت
وأتأكدت من ده لما سابني عشان قريبتي بتعرف تتكلم أحسن مني ،،
أبطل أنا حوار الشباب والتفت لدراستي ، ابدا كملت ،،
كان ليا صاحبة ، ما شاء الله حجاب ايه والتزام ايه *من وجهة نظري ساعتها طبعا* كانت عارفة بحوار الشاب ده ، مفيش مرة قالتلي غلط ، ولما سبته *في ٢ ثانوي* واعجبت بواحد تاني قالتلي عايزة تشوفه عشان تقيمه 😑
الفترة دي كنت بقول فيها " أنا مينفعش أقعد قلبي فاضي ، لازم يبقي فيه حد " وكنت متخيلة ان الحد ده لازم يكون ولد ،،
زي ما قلتلك أنا من البنات التقيلة قوي ، والولد كان من نوع كل البنات بتحبك كل البنات حلوين ، ولأني تقيلة فحب يصطادني ، نظرات كلمات تلميحات ، مقالشي شيء صريح لحسن يتدبس ما هو قديم في اللعبة ، بس عرف يعلقني *نظرية شوق ولا تدوق* 🙂
جيت في سنة تالتة ثانوي الترم التاني قررت إني زهقت من حياتي
أنا لازم أتغير ، بطلت بناطيل
بس كانت نيتي إني أبين للولد ده إني أحسن من كل البنات اللي بتجري وراك
لحد اخر مرة شفته فيها جاني هاجس قالي متتعبيش نفسك خلاص ،،
لحد ما اخدنا فترة الراحة االي قبل الامتحانات فمكنتش بنزل خالص ، تقدري تقولي اختي الكبيرة استغلت الفرصة وادتني كتاب بيتكلم عن النقاب *كانت منتقبة قبلي بسنة*
نسيت أقولك إن اول ولد عرفته قال لأختي دي تقولي أنه عايزني البس النقاب وانا كنت بقول : ابدا عمري ما البسه !!
المهم اقتنعت ان النقاب #فرض ، ومش شطارة مني ده انا كنت تقريبا مبصليش ، بس خدت قرار إني هلبس النقاب ، اول يوم ف الجامعة عشان على حسب فكري القاصر الحق استمتع بحياتي شوية ، كأني رايحة استشهد مثلا 😂😂
رحت قلت لأمي اني عايزة البس النقاب قالتلي استني اما تقضي شهر ولا اتنين ف الكلية
قلت ف نفسي اه استني افرجهم عليا شوية يحفظوا شكلي وبعدين البسه صح ،،
المهم كنا قبل العيد وكان بابا ساب الشغل ، وكنا داخلين على كلية ، وكمان نقاب يعني مش هلحق اظبط لبسي كله ، لكن قلت مش مشكلة ان الله اقعد بطقم واحد
نزلت جبت لبس وفصلت خمارات لف *ايشي بيج على موف على اخضر* ما انا مكنتش اعرف النقاب شكله ايه وقلت هلبسه على لبسي اللي عندي وخلاص ومجبتش نقابات معاه عشان ماما
ونزلت بعدها فصلت نقابات لوحدها عشان ماما متعرفش ،،
وقعدت قبل الامتحانات وفي الامتحانات و طول الاجازة ادخل اوضتي اجرب النقاب وارجع ، ادخل وارجع ، لحد ما اتقفشت 😂😂
وطبعا ماما قالتلي يعني هوانا قلتلك لا ومش عارف ايه !؟
يذكر ان المرحلة دي هي أهم مرحلة ف حياتي لأني قبلها كنت زي م قولت قبل كدا زي المخدة ، لا بحس ولا باخد قرار بنفسي ،،
لحد ما جت سنة اولى كلية ولبسته ، مكنشي ينفع نقول عليه نقاب بردو !!
وكنت لسة بكلم شباب بحجة #الثورية والملوخية 😕
قعدت سنتين على الحال ده ، والمظاهرات واحتماليات الاعتقال و..و..و..و حاجات كتير بلاش اقولها عشان منتحبسش 😂😂 ،
المهم اني بمجرد ما بعدت عن الاجواء دي وبدأت الاقي صحبة #صالحة سواء من النت او من ارض الواقع ،،
كانت دي بدايتي في البحث عن النقاب
جددت ايماني بيه ، قريت عنه ، عن شكله هيئته عن امهات المؤمنين وآثار كتير عن الصحابة ، لحد ما لبسته اقرب ما يكون للصح ودي كانت فاتحة الخير ليا ، بدأت اقرأ واسمع دروس واكتب على الفيس اللي فهمته ،،
اتصاحبت على بنت احسبها على خير كانت سبب في إني اتعرف لفئات كتير مع اني وقتها كنت اقل من أن اذكر بالخير ولكن ده كان دافع ليا إني ابقى احسن ، حفيت ورا اهلي ولسة بحفى عشان انزل معهد ادرس علم شرعي ولكن الرفض كان قاطع ، ولكن يسرلي الله الدراسة عن طريق الانترنت ،،
فيه نقطة مهمة حابة احكيها #نقابي له #الفضل فيها ، نقابي كان السبب في إن #زوجي يعجب بيا أصلا 😍😍
اتعرف عليا عن طريق واحدة قريبته وحكتله عني وعن نقابي وكلامي ،
اعجب باللي هي حكته جيه يتقدم بس سبقه حد !!
بعدين يشاء الله اني لا اتفق مع الحد ده واهله والموضوع مكتملش ،
#واتقدملي
ولصدمتي ، أنا في اول سنة نقاب كنت بعدي من قدام مكان مليان ملتحين اشكال والالوان ، وكنت متأثرة جدا برواية الرجل ذو اللحية السوداء ، وكنت دايما ادعي بالزوج الصالح الملتزم الملتحي اللي من المكان ده ، مش معقول ربنا يرزقني بامنيتي كلها بحاذفيرها واكتر كمان ، ده انا يا رب عايزاه طويل وانا اساسا مبانش من الارض ، وطلع طويل 😂😂 وقيسوا على ذلك دينه والتزامه حنيته واحتوائه ليا ولمشاكلي ،،
شخص #ضحى علشاني وعلشان سعادتي كتييير ومازال #بيضحي ،،
شخص كل امله في الحياه إسعاده واني اكون جانبه وبس ❤❤
وكل ده حرفياً كرامة #للنقاب اللي بيه حياتي كلها اتغيرت تماماً ❤🌸
#الخُلاصة من حدوتي دي كلها
يا #أمهات ، خلوا بالكم من بناتكم
مش هتقدروا تاخدوا بالكم من عدد كبير متخلفوش كتير
انا كنت اصغر بنت ، اللي بتغني في كورال المدرسة وتطلع حفلات ، بس فين الدين اللي كان لازم يتزرع فيا من صغري !؟
الصحبة .. الصحبة .. الصحبة .. ما استطعتم ، الفضل لله ثم للصحبة اللي حاوطتني وخلتني أحسن من زمان بمراحل ،،
قلبك لو فاضي ، امليه بالله مش بشاب ،
الزوج الصالح المصلح هيجيلك لما تعلقي قلبك بالله ،،
النقاب عمره ما كام #عائق للزواج اطلاقا ، عمر ما الطاعة دي تمنع الرزق بس #اصدقي_النية !!
************************
دا يعتبر #فصل من حياة بنت ،، واسره زي معظم الاسر في الوقت الحالي للأسف ،،
الأهل للآن مش متخيلين كم الكوارث اللي بتحصل بسبب بعدهم او عدم تفهم لأبنائهم ،،
مش عارفه ليه في الغالب مش بيفوقوا غير لما الكوارث بتحصل ،، وياريتهم بيحسوا بتأنيب الضمير او المسؤليه !!
ابداً بيرموا كل الاخطاء ع ولادهم خاااصةً #البنات ،،
معظم البنات اللي بتكون فاقده الاهتمام والاحتواء من اهلها ومع غياب الدين للاسف بتلجأ لتعويض الاهتمام دا بإنها تدور ع اي حد ع اعتقاد انه هيملى الفراغ اللي في قلبها ،، ودي كارثه بجميع المقاييس ومش الكل بيخرج م المرحله دي بخير للأسف \
لحد امتى هتفضل التربيه في بلادنا المسلمه مبنيه ع #العيب وليس #الحلال و #الحرام ،،
لحد امتى هنفضل ناخد من الدين مجرد #قشور وبس !؟
ربوا اطفالكم ع الدين ،، اختارولهم البيئه الصالحه اللي تصلح لتربيتهم تربيه دينيه سويه ،،
علموهم ازاي يختاروا #الصحبه_الصالحه اللي هتعينهم ع مواجهة العالم الخارجي وياخدوا بإيديهم ، قربوا منهم وقربوهم منكم وحسسوهم بالأمان والحب ♡
صاحبة قصة انهارده بنات كتييير واخدينها #قدوه ،،
عن نفسي شخصياً بحبها جدا وبثق في كلامها وآرائها من ناحية الدين ،،
بنت اخلصت النيه والتوبه لله ، ف حفظها واستجاب لدعائها ورزقها #الزوج_الصالح وكما تمنت بل افضل بكثييييييير ،،
ربنا عوضها بيه عن قسوة وبعد وجفاف اهلها معها ،،
#ملحوظه البنت صاحبة القصه تعتبر من مشاهير الفيس بوك في الدعوه !!
ومحدش يحاول يفكر هي مين ،، لان مش دا الهدف ،،
الهدف هو اني عاوزه اوصل معلومه واحده وهي ان معظم مشاهير الفيس في الدعوه ان مكانش كلهم ،، مفيش حد فيهم اتولد متدين ،،
العامل المشترك هو ان #الهدايه من عند الله يعطيها لمن يخلص النيه ومن يستحق القرب من الخالق ❤
للي بيقرأ حالياً وحاسس نفسه بعيد عن ربنا ،،
خليك واثق ان ربنا لسه مديلك فرصه انك ترجعله وتقرب منه تاني ،،
خليكوا متأكدين ان طول م في نفس بيخرج منكم وزيه بيدخل تاني ان باب #الرحمه والرجوع لسه مفتوح اياكوا ثم اياكوا تتركوه ،، بعدين تندموا في وقت للاسف مش هيفيد فيه ابداً الندم !!
وكالعاده قربوا من ربنا تقرب منكم كل حاجه حلوه ❤
وهختم كلامي بجمله بحبها جداااا
( اذا رحل كل شئ عنك وتغلقت الابواب فإن #الله لا يرحل ومازال #الدعاء يغير مجرى الاقدار في غير عهد الانبياء ) 👌♡
اُشهد الله اني اُحِبُ تلك الفتاه و
#احبكم_في_الله ❤❤❤
################################
صلوا علي الحبيب المصطفي