صلوا علي من جلس علي ركبتيه يواسي طفلا مات عصفوره
################################
#سندريلا_والأمير 😍❤
كالعاده هاشتاج باقي القصص 👇
#قصص_واقعيه_لهدير_ابراهيم 👌
وزي م اتعودنا القصه دي من رسايل الفيس ،،
ونبدأ في القصه ع طول ( اختصرت منها كتييير ف مفيش حد يقول انها طويله جدا تمام 🙈)
القصه 👇👇
********************************
كل واحد فينا لو دور في حياته هيلاقي في كل خطوه #رحمه من ربنا بس احنا اللي عاميين عنها او بنتعامى ،، حتى في الابتلاءات بنقعد نندب حظنا جانبها وننسى ان لربنا حكمه في كل حاجه بتحصل في حياتنا ، مع اننا لو اخدنا بالنا م الاول هنرتاح وهنسلم مصيرنا لله واحنا راضيين جدا ،، بس مين يدرك كدا !؟
ببساطه حياتي لفتره معينه من الوقت كانت عباره عن ابتلاءات متلاحقه ،،
من وقت م جيت ع الدنيا وانا شاهده ع خناقات يوميه بين أهلي ،، الغريبه ان برغم كل الخلافات والمشاكل دي ماما كانت دايما بتكون #حامل ،،
انا #كنت الكبيره ، وكنت دي لان كل اخواتي كانوا #بيتوفوا وهما صغيرين اكتر واحد طول فيهم اتوفى وعمره 3 سنين ودا يمكن اكتر واحد اثر فيا لانه الوحيد اللي كان بدأ يتكلم والوحيد اللي نطق اسمي الله يرحمهم جميعاً :)
صراحة مش عارفه اسباب وفاتهم زي م انا مش عارفه باردو ازاي جُم ع وش الدنيا ،،
بس اكيد لربنا حكمه :)
بعد وفاة اخر اخ ليا اهلي واخيراً #انفصلوا ،، ووالدي سابني لأمي لانه ع حد قوله مكانش عاوز حاجه ليها علاقه بأمي وانها صفحه سوده واتمحت من حياته ،،
ع اساس اني مش من دمه !؟
عشت انا وامي عند جدتي ومكملناش سنه ونص وكانت أمي حصلت آخر اخ ليا وتوفاها الله :) وعكس م اي حد ممكن يتوقع انا كنت مبسوطه لأمي جدا لاني كنت شايفه انها ارتاحت من كل اللي عاشت فيه ،، وكنت بقول يا بخت اخواتي هما بيتربوا دلوقتي مع ماما في الجنه بعيد عن بابا وقسوته وجبروته ،،
#ملحوظه امي طول السنه ونص دي كانت بتتعالج #نفسياً نتيجه للآثار اللي والدي سابها جواها مش بس ع جسمها من اثار الضرب ،،
وللأسف مفيش حد من عيلة أمي كان بيقف معاها ولا خال ولا خاله وجدي كان متوفي وجدتي مريضه ،،
كملت السنتين وكانت جدتي حصلت أمي ،، وتوااالت الابتلاءات عليا اكتر ،
فضلت اتنقل من بيت لبيت والكل كارهني ، مفيش بيت دخلته الا وأهله وصلولي احساس اني غير مرغوب فيا ،،
وبعد البهدله والتنقلات الكتير رجعت مجبره لبيت والدي ،،
مش انا اللي كنت مجبره ع الوضع دا اكتر م والدي هو اللي كان مُجبر عليه ،،
هو كان اتجوز بعد والدتي ولما رجعتله كانت زوجته معاها طفله ( اختي من والدي ) وفي بنت وولد كمان من زواج سابق ليها ،،
انا كنت في المرحله دي في #اعدادي ،، يقال اني كنت بنت متفوقه جدا برغم كل المشاكل اللي في حياتي بس كانت دراستي ع جانب من كل دا ،،
كنت بلاقي نفسي في #القراءه جدا ،، سبب حبي فيها كان #أمي مش عارفه وراثه ولا لا 🙂 بس انا كنت بستغرب أمي جدا لان حياتها كانت كلها في الكتب ،، والدي يتخانق معاها وينزل او ينام كنت الاقيها تلجأ للكتب ،،
كنت لما بسألها ازاي قادره بعد كل دا انها تمسك كتاب وتقرأ كانت دايما تقولي جمله فهمتها كويس بعدين وهي ( انها اكتشفت ان الكتاب كان هو الصديق الوفي ليها اللي ابدا م بيسيبها ويمشي او يغدر بيها والاخ اللي مش بيبخل عليها بمعلومات والاب اللي بيراعيها والام اللي بتطبطب عليها وتداوي كل جروحها )
كبرت وكلي شغف للقراءه واي كتاب ممكن يقع تحت ايدي كان لازم اقرأه ،،
نرجع بقى لبيت والدي من تاني والحياه مع #زوجة_الأب ونرجع للابتلاءات من تاني 🙂
بصي هو المفهوم اللي متاخد عن زوجة الاب وعلاقتها بأبناء زوجها من شغل في المطبخ ونوم ع الارض وبهدله وشحططه وضرب واهانه ... الخ تسميحلي اقولك انه صحيح 100% وعلى درجات وانا للاسف كنت في الدرجه الاسوء ،،
بس تعرفي كل اللي فات دا ولا فرق معايا كتير لان في السنتين اللي عشتهم مع أمي وجدتي كنت انا اللي براعيهم لانهم كانوا اتنين مرضى ،، وكانت حياتي بين الادويه وترتيب الشقه والاكل اللي كان عادة بيتحرق ، بس كان بيتاكل عادي نظراً لإن مفيش حد مهتم بنوع الاكل وجودته ،،
بس الامر اختلف مع زوجة والدي ، كان كل حاجه تتحرق او تتكسر قدامها ما يماثلها بالظبط ،،
حرقت حاجه اتحرق زيها ،، كسرت حاجه عضمي كله يتكسر وراها ،،
وباااردو كل دا كان هين شويه بالنسبه للي حصل بعد كدا وهو اني بعد مخلصت الإعداديه اتفاجئت بقرار والدي اني اسيب المدرسه واخرج من التعليم نهائي !!
القرار دا كان صدمه رهيبه عليا خاصة وانا كنت محققه #مركز ع مستوى محافظتي ،
ودي كانت مكافئة والدي ليا برعاية حرمه المصون !!
ونظرًا لعشقي للقراءه زي م قولت اكيد كنت قرأت عن قصة #سندريلا ومرات بباها ،، وكنت بشبه نفسي بيها وعايشه ع امل اني اشوف الأمير واهو عندي اختين اي نعم واحده منهم شقيقه من الاب بس باردو القصه فيها مني اهي ،،
بس اللي حصل اني في اللحظه دي حسيت ان كل احلامي #اتقتلت ،، ماهو بالعقل يعني مفيش امير هياخد بنت معاها شهادة اعداديه بس 🙂 خاصة ان مستوى والدي المادي يعتبر كويس جدا ، والناس اللي بنتعامل معاها مستواهم المادي والاجتماعي والتعليمي عالي جدا ، ف كدا فرصة الزواج نفسها طارت مش بس الأمير :)
وبقيت عايشه مستنيه ألحق أمي واخواتي وبس ،،
وأصبحت خدامه رسمي في بيت والدي ،،
بس للحق مش خدامه اوي يعني لان الخدامه بتشتغل وبنهاية كل شهر بتاخد مرتب ،،
انا كنت باخد ضرب واهانه وبس ،،
ميراثي اللي اخدته من أمي كانت الكتب بتاعتها ، وبصراحه كان ميراث لو تعلمون عظيم !!
كنت بحاول اخلص طلبات زوجة والدي بسرعه واجررري ع الكتاب ،،
وكنت بنسى معاه الدنيا كلها ،، وقتها بس فهمت كلام امي عن الكتب ،، وعشقتها بقدر عشق امي لها ويمكن اكتر ،،
ولكن طبعا دوام الحال من المحال ،، وكانت الكارثه وهي اني في يوم وكالعاده رايحه لكتبي وكلي اشتياق ليها وشاغل تفكيري الكتاب اللي كان لسه مخلصتش قراءته واذ بي اتفاجأ بالكتب كلها مش موجوده !؟
قلبت عليها الدنيا مفيش اي حاجه خااالص ،،
ولما كنت بدور زي المجنونه في كل البيت عنها عرفت من اختي ( بنت مرات والدي ) اللي كانت بالمناسبه طيبه معايا جدا هي واخوها غير اختي ( من والدي) واللي عرفت انها هي السبب في ان مرات بابا تاخد الكتب كلها ( لحد انهارده معرفش مصيرهم كان ايه )
اينعم كنت كل ليله قبل م انام لازم ابكي ،، بس كان مجرد احساسي ان في كتاب هقرأه تاني يوم كان بيغير احساسي تماما وبنام دمعتي ع خدي اه بس مستنيه بكره ييجي ،
لحد اليوم دا بكيت بكاء عمري م بكيته ولا في وفاة اخواتي ولا جدتي ولا أمي ولا حتى خروجي من التعليم ،،
فضلت ابكي واصرخ ،، وكان رد فعل مرات بابا هو الضرب ، ولما والدي رجع من شغله وشاف زوجته بتضربني كان رد فعله انه بعدها عني وكمل ضرب هو ( اللي هو ارتاحي يا حبيبتي شويه وانا اكمل مكانك ) 😒
اصبحت حياتي فاضيه وبلا معنى ولا هدف ولا اي شغف ،،
لحد م في يوم لقيت اخواتي ( الولد والبنت اولاد زوجة والدي ) داخلين عليا ومعاهم 3 كتب فاكره عددهم واسمائهم ومحتفظه بيهم للنهارده ❤
اللي عرفته انهم جمعوا هما واصحابهم مبلغ واشترولي بيه الكتب ،،
اصحابهم كانوا يعرفوني لاني انا اللي كنت بذاكرلهم من قبل م اخرج م التعليم وحتى بعد م خرجت ،،
كنت باخد كتب اخواتي ( اولاد زوجة والدي ) وكنت بقرأهم واللي افهمه اوضحهولهم وهما كذلك اللي يعرفوه م المدرسه يعرفهولي ،،
طبعا كل دا بدون علم زوجة والدي اللي كانت حياتها اغلبها برا البيت ( النادي والصحاب والشوبينج وما الى ذلك )
كنت بحاول ادور ع اي شغل بس هنا والدي كان بيفتكر اني #بنته وزوجته كانت بتخاف ع برستيجها قدام الناس لو حد شافني يعرفهم ،،
مرت ايام وشهور وسنين وانا ع حالي وابدا م اتأقلمت عليه برغم محاولاتي اللي كان دايما مصيرها الفشل ،، وكان اعتمادي كله ع الكتب اللي اخواتي واصحابهم بيدوهالي في السر ،،
لحد م في يوم قدرًا كنت بذاكر لاخواتي واصحابهم وعرفت ان واحده منهم كانت في #مسابقة_قرآن وهتروح تستلم جايزتها ،
اللي شدني هي الجايزه لانها كانت مبلغ مالي كويس واللي عرفته ان كل م عدد الاجزاء زاد زاد المبلغ المدفوع ،،
المسابقه دي بتتعمل مره كل سنه ،،
ومن وقتها اصبح هدفي اني احفظ اكبر قدر م القرآن علشان ادخل المسابقه واخد الفلوس اللي بيها هقدر اشتري الكتب م اول وجديد ،،
( للوقت دا مكانش في اي حاجه في حياتي ليها علاقه بالدين نهائي ،، لو في حد كان سألني انتِ ديانتك ايه مكنتش هعرف ارد ،
الاحتفالات عندنا عادي طول السنه اعياد مسيحيين تلاقي اعياد مسلمين تلاقي ،، لكن شعائر معينه لمناسبه خاصه لا معرفش ،،
يمكن افتكر اني كنت بدرس دين اسلامي في المدرسه بس اكيد نسيت كل حاجه تتعلق بيه بما ان وزارة التعليم نفسها مهمشه الدين في الدراسه انا ههتم بيه !!؟ )
الوقت دا كان المفروض اني اكون داخله تانيه كليه بحسب ترتيب سنوات الدراسه ،،
أول سنه كانت صعبه عليا جدا في الحفظ خاصة اني اتغريت في قدرتي القويه ع الحفظ والتركيز ونسيت تماما ان دا مش اي كتاب ولا فيه اي كلام دا كتاب وكلام رب العالمين ،،
حطيت هدف لنفسي اني ادخل اول سنه ب 5 اجزاء وكنت كل م اضعف اجيب الورقه اللي كاتبه فيها مبلغ الجايزه وتحته مكتوب عدد واسماء الكتب اللي ناويه اشتريها ، ف كانت بتزيد همتي ،،
بدأت احفظ بالتلقين لأن كان شرط اساسي #التجويد ،، ساعدني اخواتي ( اكيد الولد والبنت مش اختي من والدي ) ساعدوني كتير وكانوا بيسمعولي وبيشجعوني رغم ان قربهم مني كان بيسببلهم عقاب من مرات والدي واللي كانت بتعرف اخباري واخبارهم من اختي ( من والدي للأسف ) وبدأنا ناخد حذرنا منها طول مدة وجودها في البيت ،،
(معلش احداث ومواقف كتير مقطوعه بس علشان مطولش عليكم ) 🙈
واليوم اللي كنت مستنياه اخيرا روحت المسابقه من ورا والدي وزوجته طبعاً ،،
وفعلا حققت المركز الأول واخدت المكافأه وبدأت همتي تزيد اكتر اني السنه اللي بعدها لازم ادخل بعدد اجزاء اكتر ،،
عارفه الغريبه هنا في ايه !؟
اني مكنتش #بصلي ولا حتى محجبه ،،
هصلي ازاي او البس الحجاب وانا مفيش مره صادف اني شوفت في بيتنا #سجادة_صلاه ، مرات والدي واختي ( بنتها ) واختي من والدي غير محجبات وتقريبا كل الوسط اللي بنتعامل معاه ،،
كنت بالبس الحجاب بس يوم في السنه وهو يوم المسابقه ،، ( ومكانش فارق معايا لبسه لاني معرفش عنه حاجه بس هو كان غير مسموح بعدم دخولي المسجد وانا غير محجبه ،، وقتها كان عادي مجرد قماشه هحطها ع شعري وعبايه صديقة اختي جابتهالي نظراً لعدم امتلاكي لفلوس اشتري بيها حاجه )
المفروض وقتها اني اتغير بحفظ القرآن او ع الاقل احاول افهم ديانتي ،، بس لا كان اخر همي هو معرفة اي حاجه بدين شايفه ان ملهوش اي دور في حياتي ( طبعاً كنت غلط جدا )
استمرت حياتي ع كدا ازود عدد الاجزاء ع اد م اقدر وادخل المسابقه واشتري بالفلوس الكتب ( واها الكتب بس لان اخواتي مكانوش بيجيبوا حاجه الا ويجيبولي معاهم من وهما صغيرين ومصروفهم بسيط لوقت م كبروا وبصراحه اكتر لوقتنا هذا 🙂 برغم اختلاف الظروف كليةً )
المهم كنت مستمره في حفظ القرآن ودخول المسابقات لوقت م وصلت لهدفي وللجايزه الكبرى وحفظت القرآن بالكامل ( بصراحة كانت جايزتي في الوقت دا وبتفكيري هي العائد المادي مش حفظ القرآن )
وحانت لحظة المسابقه ولأني داخله بالقرآن كامل دخلت #لجنه اعلى ،،
كان فيها اكتر من شيخ بيسألوني ،، وبعد م كنت داخله وواثقه من تحقيق هدفي ،،
بسبب شيخ منهم كنت حاسه انه بيصعب عليا الاسئله جدا ترتيبي للاسف نزل واخدت مبلغ اقل م اللي كنت بسعى ليه ،،
الكل كان مستغرب ازااااي انا محققتش المركز الاول زي كل سنه !؟
الشيخ اللي كان سبب في نزول مركزي كان جديد وعرفت انه كان لسه نازل مصر قريب ع حظي انا في السنه دي ،،
وعلى الرغم انه كان عايش في دوله اوروبيه بس كان اتقانه للقرآن رهيييب ،،
الشيوخ في المسابقه كل سنه كنت انا المتسابقه المفضله عندهم ودا كان راجع ع حسب كلامهم لإتقاني الحفظ والنطق بالتجويد ،، بس اللي حصل اني بسبب الشيخ دا فضلت ادخل المسابقه 3 سنين بدون م احقق الهدف بتاعي وكنت بدأت ايأس تماما اللي هو مش عارفه في ايه وطلعلي منين الشيخ دا وليه التعنت اللي عنده دا ( احيانا كنت بشك ان زوجة والدي عرفت موضوع المسابقه والشيخ دا يعرفها ) ،،
كانت حياة كل اللي حواليا بتتغير الا حياتي انا ماشيه ع نفس الوتيره ،،
كان بس بيزيد عليها كرهي للشيخ الجديد كل سنه ،،
وفي سنه آخر م يأست وكنت مقرره اني خلاص مش هدخل مسابقه تاني ع الاقل تبع المكان دا ،،
في نهاية يوم المسابقه اللي باردو محققتش فيها المركز الاول لقيت ورقه مع جايزتي اللي اخدتها مكتوب فيها ،،
( وقت م تعطي القرآن حقه اولاً وقتها هتاخدي حقك في المركز اللي بتتمنيه مش بس في الدنيا لا في الجنه كمان لأنك وقتها هتستحقي تحملي لقب انك من #اهل_القرآن )
التوقيع : اكتر انسان بتكرهيه حتى وقتنا هذا
( طبعا خمنت خلاص انه الشيخ الجديد ) 😒
قرأت الورقه دي 100 مره ومكانتش فاهمه قصده خالص كل تفكيري كان في كرهي ليه فعلا وكأني وجهت كل الكره اللي موجود جوايا للشيخ وضيفته لقائمة والدي وزوجته ،،
وصل سني 27 سنه كانت الحياه اتغيرت كتيييير في بيتي اخواتي البنات تزوجوا ( اكيد حسيت بوجع رهيب خاصةً وانا اكبرهم ، بس كنت تقريبا اتبرمجت ع اني كائن نزل الارض لمهمه معينه وهي اني اشتغل عند زوجة والدي واتهان واتذل لاخر نفس في حياتي ،، ف قررت اشغل نفسي بالقراءه ومنها حصنت نفسي ضد التعلق بفكرة الزواج كليةً ،، بس بصراحه اكيد كنت بكذب ع نفسي بس انا بالظبط زي اللي كذب الكذبه وصدقها ونسيت عمداً فكرة انتظار #الأمير )
والدي اصيب بمرض اصبح بيه مبيتحركش خالص ولا حتى بيتكلم ،، ( مش حابه اقول عقاب ربنا )
زوجة والدي سنها كبر الى حد ما بس كانت حياتها بتزيد سوء وسهر وخروج ،،
اختي من والدي تزوجت وسافرت بره مصر ( والوقت دا م اكتر الاوقات سعاده في حياتي ،، لانها خرجت منها بتسلطها عليا وكرهها وغيرتها الواضحه مني )
اختي ( بنت مرات والدي ) تزوجت وبعد شهور من زواجها لبست #الحجاب وحياتها اتغيرت وابتدت حياتي تتغير معاها ،،
خاصةً وان اخويا (اخوها ) لما دخل الكليه اتعرف ع #صُحبه_صالحه غيرت حياته ( كان اول مره مصطلح زي دا يدخل حياتنا ومكانش اخر مصطلح ديني بصراحه )
وبتغيير حياتهم اتغيرت حياتي انا كمان ،،
بدأت بالصلاه وتعلمها ( كنت نسيت اركانها اللي اتعلمتها من ماما او المدرسه لانها مكانش ليها جزء طول حياتي )
لبست الحجاب وكان بفضل الله حجاب صحيح ،، ودا بفضل ربنا ثم اخواتي ( اختي وزوجها م جهه واخويا من جهه تانيه )
زوج اختي كان شخص متدين جدا ومن اسره طيبه ومتدينه ،، وكانت اختي فعلا تستحق دا ،،
بدأت اقرأ في تعاليم الاسلام والعقيده ،، واكتشفت ان مكانش عندي ولا كتاب عن الاسلام ( انا تقريباً قرأت في جميع المجالات الا ما يخص الدين زي م قولت كان مهمش في حياتي جدا ومش ليه اي مكان فيها ،، للوقت دا واتقلبت كتبي اغلبها في الاتجاه الديني ،، واللي بالتأكيد التعمق فيه اكتر بيغير حياتي وكل تفكيري اكتر واكتر )
مرت سنتي ال 27 وبدخولي سن ال 28 كان وقت المسابقه ولاول سنه تحصل من يوم م بدأت احفظ القرآن مقدمتش في المسابقه دي ،،
لاني ببساطه بقربي من ربنا وقرائتي في تعاليم ديني وربط كل دا بالقرآن افتكرت الجمله بتاعة الشيخ ،، وفهمت وقتها قصده وعرفت اني غير أهل لحمل اللقب ،،
مقدمتش في المسابقه وفضلت فتره بمر بحالة يأس في ان ربنا ممكن يتقبل مني حفظ القرآن ،،
وهنا كان دور اخويا اقوى لانه فهمني وقتها حسن الظن بالله وان ربنا بيحبني ، وفهمت ان علشان كدا بالرغم من هدفي #الحقير في حفظ القرآن والغايه منه الا ان ربنا أكرمني بحفظه ،، وقررت اني اتمسك بجايزة ربنا وكرمه دا
قررت ادخل المسابقه السنه اللي بعدها واثبت لنفسي قبل اي حد تاني اني #أهل لحفظ القرآن ،،
السنه دي اللي كنت هتم فيها ال 29 كانت افضل سنين حياتي ال 29 ،،
بدأت اعيش حرفياً حياة اهل القرآن ،،بدأت احس ولاول مره بالسعاده والراحه وانا بقرأ او بسمع القرآن ،،
بدأت ابكي وقت قراءته او سماعه بعد م كان همي وهدفي كله انتهي م جزء مقابل المال وبس ،،
بدأت اعيش حياه مختلفه بالصلاه والحجاب وقراءة القرآن وسماع الدروس الدينيه اللي عرفتها من اخواتي ،،
حياتي انا واخواتي اتغيرت تماما ،، كانوا معايا في اصعب اوقات حياتي وعاشوا معايا اجمل ايام فيها ،، ( والدي بمرضه وزوجته بحياتها اللي كلها جري ورا الشهوات وغياب اختي من والدي ساعدنا اكتر خاصةً بوجود اخويا جانبي ووجود اختي في نفس المنطقه السكنيه اللي انا عايشه فيها )
حياتي في السنه دي اتغيرت بمجرد دخول الدين فيها ،، اصبحت مؤمنه بفكرة ان لربنا حكمه في كل اللي حصل في حياتي واكيد هيعوضني عن كل دا سواء في الدنيا او في الجنه ،، الجنه اللي اصبحت هدفي غايتي ،،
هدفي اللي لو كنت اعرفه م البدايه لكانت حياتي اختلفت تماما ،،
دخلت المسابقه وكنت تميت ال 29 ،،
دخلت المسابقه وانا متغيره في كل حاجه ،،حتى حجابي كان مختلف ،،
دخلت وانا هدفي باردو المركز الاول بس المره دي مكانش الغايه عندي المال كان كل املي وهدفي اني اثبت للشيخ ولنفسي قبله اني اتغيرت ،،
بعد المسابقه ب 10 ايام بالظبط وبعد م اتفاجئت بخالي اللي كنت نسيت شاكله اصلا في البيت ،،
وبيبلغني ان في عريس متقدملي ، وانه هيحضر بعد ساعتين تقريباً !!
ولان والدي زي م شرحت حالته فوق ف كان وجود خالي مناسب ،، وقولت اكيد العريس دا تبع خالي !!
بالمناسبه دي مكانتش اول مره يتقدم فيها شخص بس ولا واحد م اللي اتقدموا شوفته 😂 والفضل يرجع لزوجة والدي طبعا ،،حد لاقي خدامه ببلاش 😉
مكنتش لسه عرفت نتيجة المسابقه لان اعلانها اتأخر ،،
بس عرفت في نفس اليوم دا اني بفضل الله حصلت ع المركز الاول ( اكيد توقعتوا دا 😉)
بس اللي مش ممكن حد يتوقعه اني المسابقه في السنه اللي بعدها وانا عمري 30 كنت بقدم وانا #متزوجه 🙂 وها قد حانت لحظة ظهور #الأمير 😂
أميري كان #شيخي ايووون هو بعينه ( الشيخ الجديد) اللي طلع عيني كل السنين دي ( بس انا طبعا طلعته عليه في الخطوبه اللي مكملتش شهور اصلا 😂)
#التفاصيل بقى اللي كنت مخبياها 😉
مذكرتش ان الشيخ دا ما هو الا #شاب مهندس مقيم زي م قولت في دوله اوروبيه ،،
اللي عرفته انه بينزل مصر قليل جدا لان تقريبا العيله وعيلة العيله كلها بره مصر ،،
وعلى قدري كان نازل مصر وقت المسابقه واللي عرفته ان والده كان من المساهمين في جوايز المسابقه ،، وهو في اليوم دا حضر لاول مره واول م عرفوا انه ابن المساهم الرئيسي في المسابقه اصروا يكمل اليوم وينضم للشيوخ نظراً لأنه اللهم بارك (خاتم كتاب الله )
وهكذا لعب القدر دور في حياتي استمر لاكتر من 5 سنين ،،
تتنيحتي يوم م شوفته في صالون بيتنا كان ناقصها صوره وتكمل 😂😂
وها قد حانت اللحظات السعيده بعد كل المعاناه اللي عيشتها وعيشتكم فيها معايا 🙈
بدأ الربيع يدخل حياتي وقلبي ،، ربنا يسر الحال جدا بوقوف اخواتي في ضهري وهما سندي في الدنيا ❤❤
وقفوا معايا لحد م سيبت البيت بكل الجروح اللي فيه وبعد م اخدت عهد ع نفسي اني اتمسك باللحظات الحلوه اللي هلت ع قلبي واسعدته ،،
الشيخ الجديد اللي اصبح #زوجي ☺
لما اتقدملي عرفت انه كان عارف عني كل حاجه تقريباً من اول م شافني في المسابقه وكان واخد قرار انه يتزوجني وعرفت انه كان بيدعي ربنا كتير بكدا ع الرغم ان والدته كانت في الفتره دي شيفاله عروسه تانيه وهو كان رافضها وبسبب إلحاح والدته وانه مش حابب يضايقها نزل مصر ع غير وقت نزوله وكان وقت المسابقه 🙂
شوفتوا القدر 😉 5 سنين بيدعي يتزوجني برغم عدم معرفته بيا اصلا ،،
وحتى بعد معرفته كنت مندهشه ازاي وافق يتزوجني وانا اقل منه في التعليم ،،
وهنا كان تأثير التربيه ع الاسلام اولا ثم في بلاد الفرنجه 🙂 ثانيا عامل كبير في عدم اهتمامه ولا اهله بالنقطه دي ،،
عرفت من زوجي انه اتعلق بيا من صوتي في القرآن ( الحمد لله ربنا ملكني موهبة الصوت الجميل في القرآن ) لكن دهشتي زادت لما قالي انها ملهاش علاقه بجمال صوتي او غيره ،، وحتى الورقه اللي كتبهالي كان قصده فيها ان حياة حافظ القرآن مختلفه تمامًا عن حياة اي شخص تاني ،،
وهو لاحظ ان صوتي فيه حزن ويأس وفوقهم اني كنت بردد حاجه حفظاها وخلاص لكن مش حساها ولا حتى فاهمه معناها ،،
عرفت انه اتشد اكتر انه يعرف قصتي خاصةً بعد تعاطف الشيوخ معايا وكلامهم عني اني بدأت المسابقه ب 5 اجزاء لحد وصلت لختم القرآن بالكامل ،،
ومعرفته اني كنت بحفظ لوحدي وقبل المسابقه بفتره كنت بحضر للمكان اسمع ع الشيخ علشان اتقن التجويد ،،
هو بالتأكيد تدبير القدر في ان كل دا يحصل وان شخص ولا يعرفني يتعلق بيا وبمعرفة حياتي ،،
وفعلا سأل عني خاصة وانه طلع عارف زوج اختي (بنت زوجة والدي ) وهنا لعب القدر من تاني ،، واصبحت تفاصيل حياتي بتوصل للشخص دا ،،
سبب استمرار الموض ع دا لسنين وعدم تقارب المسافه دا انا عرفت بعدين انه كان راجع لان ( الطيبون للطيبات ) والشخص دا كان من الطيبون ( احسبه كذلك ولا ازكي ع الله احد )
دعاء الشخص دا كان سبب في تأخير فكرة الارتباط زي مكان باردو السبب في تغيير حياتي وقربي من ربنا اكتر ،،
لان الشخص دا كان بيدعي ربنا بالزوجه الصالحه ،، وبعد معرفتي اصبح يدعي ربنا بهدايتي وتهيأتي كزوجه صالحه ليه زي بالظبط م هو كان بيهيأ نفسه انه يكون زوج صالح ليا !!
اتعلمت من زوجي حاجات كتير م اول الخطوبه الشرعيه ،، لكتب الكتاب بعد فترة 3 شهور بالرغم من استعجاله علشان اسافر معاه ، بس هو كان هدفه يعودني عليه وعلى حياتي الجديده ،، وكمان للتأكيد ع معرفة حكمة ربنا وتأثير القدر في حياتنا وان اقدار ربنا كلها خير ،،
وهكذا تم الزواج وترك مصر بكل م فيها من ذكريات تعيسه كانت او سعيده ،،
واللي عرفته ان اصرار والدته ع اختيار الزوجه ليه بنفسها اتغير في نفس الوقت اللي قربت فيه من ربنا ،،
واللي اكتشفت ان #زوجي كان طول الوقت دا بيدعي دعاء واحد ( اللهم اهدي من احببت واجعل لي منها نصيب في الدنيا والفردوس )
وبفضل الله تحقق نصيب الدنيا ونسعى جاهدين لنيل نصيب الفردوس سوياً ❤
#زوجي اللي كمل مشوار اخواتي معايا بتعليمي ديني ع الوجه الصحيح ،،
اتعلمت ومازلت بتعلم منه الكتير ،،
زوجي اللي كانت كل مهمته انه يحسسني بالأمان اللي كنت مفتقداه ،،
زوجي اللي اصبح ليا كل شئ في حياتي وحاول بكل جهده انه يعيد #ترميم كل شئ اتكسر جوايا ،،
زوجي اللي كان بيشوف آثار الحرق ع جسمي ويخبيها عني ويخاف ان انا اللي اشوفها او افكر فيها ف افتكر حياتي وعذابي السابق ،،
زوجي اللي ربنا اكرمني بيه وعوضني بيه عن كل وجع او الم مريت بيه في حياتي ❤
ربنا عوضني عن كل الم عيشته في حياتي ،،
عوضني عن كل دمعه حزينه بدموع كلها فرح وسعاده ،،
عوضني عن الاب وحنانه ووجوده بالزوج الصالح ( احسبه ع خير ولا ازكي ع الله احد ❤)
عوضني عن الام ووجودها وطبطبتها وحضنها الدافي بوالدة زوجي ❤
عوضني بالمعلم والمرشد والمربي الفاضل والد زوجي ❤
عوضني عن إخواتي الله يرحمهم بالذريه اللي اتمنى من الله تكون صالحه ❤
وبجانب كل دا عمري م انسى انه رزقني بحب اخوات مش من دمي ،، لكنهم كانوا اقرب ليا من اختي اللي من دمي ،،
مش عاوزه اوصف زي المشهد الاخير في الفيلم وهو حالة والدي وزوجته واختي وصلت لفين اللهم لا شماته وربنا يرحم من توفى ،،
نسيت اعرفكم اني حاليا عمري 41 سنه 🙂
بفضل الله ثم الناس اللي فوق دي كملت دراستي واتعلمت بره مصر وحاليا بسعى ورا هدفي وهو اني اكون دكتوره في الجامعه بفضل الله ودا كان بالمناسبه اقل م هدفي وانا صغيره بس عوض ربنا بقى 🙂❤
املك من الذريه البنات والبنين بفضل الله ❤
عايشه حياه كلمة سعيده قليله عليها مع عيلتي ( زوجي وأولادي واخواتي حبايبي اللي علاقتنا مازالت مستمره بيني وبينهم واولادي واولادهم )❤❤
#ملحوظه انا حالياً بفضل الله في بلد اوروبيه ايوه بس بتحترم اي دين اخر ،، والمجموعات المسلمه فيها كتير اللهم بارك ف بنعيش حياه كما يجب ان تكون عليه حياة المسلمين الصحيحه ،، مجتمع بيحترم #نقابي ومش بيهينه ولا بيهين #لحية زوجي او بيرفضها بالعكس تماما ،، ودا كرم وفضل من ربنا علينا ولله الحمد ،،
واهووووو الحمد لله سندريلا تزوجت الامير اللي ربنا حفظ قلبها ليه هو وبس ،،
وعاشت معاه في تبات ونبات ورزقهم الله البنين والبنات 😍❤
*******************************
(تفاصيل كتير قصيتها ولأول مره احذف من قصه واكون متردده ومش عاوزه احذف تفصيله واحده منها ،، بس لعله خير )
#ملحوظه صاحبة القصه كان اول طلب ليها اني لما اكتب القصه موجعش قلب حد ،، هي كل هدفها انها توصل فكره معينه ومش لازم توصل بوجع القلب ،،
ف اتمنى مكونش تعبت او وجعت قلب حد ❤
العبره بقى من كل دا ان ربوا اطفالكم ع #الدين ومعرفته معرفه صحيحه لان الدين هو اللي بيحفظ قلوبنا في الزمن دا ،،
غذوا عقولهم بالقراءه اللي بتغير من حياة الأمم مش بس حياة الانسان ،،
مستحيل تقابل شخص حياته سعيده وهو بعيد عن ربنا ،، زي بالظبط م مستحييييل تقابل شخص حياته تعيسه وهو قريب من ربنا ،،
ربنا عادل ورحيم وكرييييييييييم ،،
وتأكدوا دايماً ان عوض ربنا يفوق جميع التوقعات ،،
قربوا من ربنا وخليكم ع يقين ان بعد كل عسر اكيد هييجي اليسر ،، وانه مهما طول وقت الخريف مسير الربيع هيمر ويمحي كل آثار الخريف ويُزهر في القلب الحب والسعاده 👌
مفيش حاجه ابدا اسمها #مستحيله ع رب العباد ،، واقدارها كلها كلها كلها خير بس للي يدرك دا ويوصله ،،
فاللهم ارزقنا سعاده تنسينا كل وجع مر بحياتنا ♡
#احبكم_في_الله ❤❤
###################################
صلوا علي الحبيب المصطفي