صلوا علي من جلس علي ركبتيه يواسي طفلا مات عصفوره
###############################
قصتنا انهارده 👇👇
#هل_ترانا_نلتقي !!
كالعاده الهاشتاج بتاعنا
#قصص_واقعيه_لهدير_ابراهيم ❤
في البدايه عاوزه اشكر بجد البنات اللي اقترحوا عليا فكرة #الهاشتاج ، لأن آخر قصتين نزلتهم وقصة انهارده كمان اصحاب القصص وصلولي عن طريقه
ف بجد جزاكن الله كل خير ❤❤
نبدأ بقى قصتنا 👇
***************************
بدايةً انا عرفتك عن طريق الهاشتاج اللي بيسبق كل قصه بتنزليها ،
مترددتش ولا لحظه اني ابعتلك القصه دي تنزليها لأسباب كتيييير وأهم سبب فيها ( ودا انا هأجله شويه كالعاده علشان محرقش الأحداث ، خلونا نمشيها سوا واحده واحده افضل )
التفاصيل ومن البدايه انا من اسره عاديه جدا مادياً واجتماعياً وكمان #دينياً ،
يعني اللي هو في كل حاجه عادي عايشين زي اغلب الناس ،،
احنا بنتين #توأم وكنا توأم #متماثل ،
مش بس متماثل في الشكل ، لا في اغلب الحاجات ، ماعدا حاجتين اتنين بس ...
انا كنت البنت الصغيره اللي اتولدت بعد الكبيره بدقايق ،،
كان الكل بيعاملنا ع اني انا الصغيره واختي هي الكبيره ع الرغم من الفرق بينا مجرد #دقايق ،،
يمكن بسبب كدا اصبحت لأختي زي #ظلها كنت بعمل كل حاجه واي حاجه هي بتعملها حتى الجامعه كنت عاوزه ادخل نفس جامعتها ،
تعلقي بأختي مكانش ليه مثيل ،،
يمكن السبب الراجح اننا توأم ،
وعلى الرغم اننا كنا نفس الشكل بالظبط الا ان كل الناس كانت بسهوله جدا بتقدر تفرق ما بينا ،
ودا ببساطه عن طريق اختلاف #الطباع بتاعتنا ،
اختي كانت مثال للبنت الهاديه الرزينه ،
وانا كنت مثال للبنت الشقيه العفريته 🙂
في الغالب اي اسره بتتمنى وبتفضل البنات الهاديه ، الا اسرتي انا ، كانوا بيقلقوا جدا من هدوء اختي ،
كانوا شايفينها واخده الدنيا بطريقه اكبر من سنها ،
كان نفسهم تعيش سنها زي م بنقول ،
خاصةً لما بدأت تلتزم دينياً ، وبالأخص يوم م قررت تلبس #النقاب ووقتها كنا لسه يادوب داخلين ثانوي !!
دا كان بدون مبالغه يوم كااارثي لأهلي وليا انا كمان ،،
تغير اختي الملحوظ بدأ اكتر بعد #سن_البلوغ ،
بدأت تقول كلام غريب عنا ، وبدأ كلامها يشتمل كلمتين أول مره يتواجدوا في قاموس حياتنا
كلمتي #الحلال و #الحرام !!
العادي اننا اتربينا زي اغلب الاسر م بتربي بناتها ع كلمة #عيب وميصحش وكدا غلط ،،
لكن حلال وحرام دي جديده علينا ،،
تعرفي كان رد فعل اهلي انهم قالولها ان الكلام دا ليه ناسه ،
كان رد اختي عليهم ع اساس اننا مش مسلمين !؟
والدي لما لقى الحوار بينهم وصل لحاره سد ، امتنع عن الكلام معاها ،،
وقال يمكن تغيير من التغيرات اللي بتحصل لأي بنت او ولد في المرحله دي وظروف وهتعدي ،،
ماما كانت دايماً تقولي اتكلمي مع اختك براحه وحاولي تخليها تقلع اللي هي لبساه دا ،
الناس بدأت تتكلم وبتسأل وفاكرين انها انضمت #لجماعه من اياهم !!
انا ايوه كنت ماشيه ورا اختي في كل حاجه لكن الا دا ،،
مستحيل انسى طريقة كلامنا يوم م رجعت البيت وهي لابسه النقاب ،،
لما بقينا لوحدنا في اوضتنا ، قولتلها انتي اه كنتي بتصلي وبتحضري دروس دينيه اللي متأكده انها سبب في اللي وصلتيله دا ، بس مكنتش اتوقع توصلي لمرحلة النقاب خاصة وانتي لسه صغيره !!
هي الناس اللي بتعملكوا غسيل مخ دول معندهمش قلب !؟ ولا حتى عندهم نظر !؟
هما مش واخدين بالهم من سنك ،دا انتي لسه بتقولي يا هااادي ومنقوله من مرحلة الاعدادي !؟
انتي نفسك ربنا اداكي عقل ازاي تسيبي حد يوصلك للمرحله دي ،
المفروض تعيشي حياتك ، وتستمتعي بيها وتعيشي سنك ،،
ويا حبيبتي الدين يسر ،
وربنا ميرضاش ابداً بالتخلف اللي انتي عملتيه دا واللي وصلتيله دا ،،
وعند الجمله دي قالتلي اسكت علشان متماداش في كلامي اكتر من كدا وان سكوتها عن كلامي مش معناه انه صح ،
بالعكس بس هي اتعلمت انها تسكت لما تلاقي حد بيتكلم ومتقاطعهوش لحد م ينتهي من كلامه خالص حتى لو كلامه غلط ، وانه لما يخلص تبدأ تتكلم وتقول وجهة نظرها ..
وهنا قولتلها طبعاً هتقوليلي انك اتعلمتي دا من الدرس اللي بتحضريها ،
ضحكت وقالتلي إن الكلام دا تربوياً صح ، ودا اللي المفروض نتربى عليه اصلا بعيدا عن اي شئ ،
وان الناس اللي بتحضرلهم الدروس مفيش حد منهم ممكن يفرض ع غيره حاجه ،
هما ببساطه بيحاولوا يفهمونا دينا ،
اللي هو فعلا دين يسر ،بس دين يسر ع اللي يعرفه كويس ،،
وانها مضرتش حد بلبسها للنقاب او حضورها للدروس او غيره ،،
وانها مقتنعه تماما بقرارها ، ولما قولتلها هتندمي بعدين وواثقه انك هتخلعيه قريب لما تملي وتزهقي وتتخنقي منه هبقى افكرك يومها ،،
ضحكت كالعاده وقالتلي اللهم ثبات ، وقالتلي ربنا يهديكي للنقاب ووقتها بس هتعرفي سر تمسكي بيه ،
قولتلها بس هو مش فرض !؟ وفيه اختلافات كتير عليه ،
ولا بقى الناس اللي في الدروس دي علموكوا انه فرض !؟
قالتلي : بصي زي م قولتلك الناس دي جزاهم الله عنا كل خير بيقولوا النقطه دي مثلا حرام او حلال ومفيش اختلاف عليها ،
والنقط اللي في خلاف عليها بيعرفونا كل حاجه عنها
قولتلها : يعني انتي مقتنعه انه مش فرض صح !؟
قالتلي : لا انا مقتنعه تماما انه فرض ،
هو ايوه اختلفوا ع انه فرض او لا بس حتى اللي قالوا انه مش فرض رجعوا وضحوا انه فرض في زمن #الفتن ،
بصي حواليكي وانتي تعرفي ان كل حاجه حوالينا بتثبت اننا فعلا في زمن الفتن ،
كمان انا خلاص اخدت مبدأ جديد لحياتي وهو الحاجه اللي فيها اختلاف طالما هتقربني لربنا ايه المشكله اني معملهاش ،،
كمان افرضي الناس التانيه دي كانت غلط وطلع انه فرض هقابل ربنا يوم القيامه و #حُجتي ايه ، وهو اهو بعتلي اللي يرشدني ويدلني !؟
ولما انا لقيت الحوار مع اختي مش جايب نتيجه قررت اعمل زي م بابا وماما قالوا نسيبها فتره تهدى ولوحدها هتتغير تاني ...
ومرت اولى ثانوي كلها ع الحال دا ودخلنا في تانيه ثانوي وخلاص بقينا في اجازه تانيه ثانوي واختي حضورها للدروس بيزيد ، وتمسكها بالنقاب بيزيد ، لدرجة انها لبست غطاء ع عينها ( بيشه ) كمان تحت مسمى انها #ملفته !؟
اختى كانت بتزيد في كل دا مش بتقل ،،
كنا نتفرج ع التليفزيون ونحضر الافراح ونروح السينما وغيره وغيره ،
وهي دايما كانت تعتذر وتدعيلنا بالهدايه ،
كانت اصعب الاوقات عليا لما نكون سوا في البيت وقت الصلاه خاصةًصلاة الفجر ،،
كانت تصحيني بالعافيه اصلي ..
مع اني احيانا بكون صاحيه اصلا بس يا بكون متابعه فيلم يا بسمع اغاني يا بعمل اي حاجه المهم مكانش بيبقى في دماغي ان في صلاة فجر قربت ،
واحيانا كنت ادخل انام قبل الفجر بدقايق والمحزن اني ولا مره حسيت بتأنيب الضمير او وجع القلب ع فوات الصلاه !؟
بدأت علاقتنا يظهر فيها تطورات وبُعد اكتر خاصةً بعد اختيارها لصحاب معينيين طبعاً شبههاا في اللبس والتدين ،
انا اللي بدأت ابعد ع الرغم انها فضلت معايا زي م هي بالظبط اختي الجميله الهاديه الطيبه الحنينه العاقله الرزينه ،،
استمر الحال ع كدا فتره لحد م في يوم دخلت عليها وكانت كالعاده بتسمع قرآن ، صرخت في وشها وقولتلها انتي شايفه ان انتي كدا عايشه !؟
حياتك كلها مذاكره ودروس وقرآن وبس ،
دي مش حياه ابدا ،
ربنا خلقنا علشان نستمتع بكل حاجه خلقها مش نفضل نقول دا حلال ودا حرام ،
ونعقد نفسنا وحياتنا ونسمح لناس جاهله بإنها تتحكم في حياتنا !؟
ربنا مقالش ان حياتنا كلها تبقى قرآن وبس ،
ربنا مفالش المزيكا حرام ،
والا ليه الدكاتره النفسيين بيشجعوا المرضى بتوعهم انهم يسمعوا مزيكا هاديه ، وانها بتخرج من اي مود وحش ممكن يدخلوا فيه !؟
ردت بكل بساطه وبابتسامه عاديه كعادتها : إن المعازف من الشيطان وان دا حديث صحيح مش ضعيف ،
كمان الموسيقى ايوه احيانا بتخلي الانسان يدخل في حالة هدوء وسكينه بس بتكون نسبيه ،
لوقت معين يعني ، وبعدها بيرجع تاني زي الاول ويمكن وجع القلب بيزيد اكتر ،
لكن القرآن الراحه معاه ابديه مش مجرد وقت وبس ،
القرآن بيلمس قلوبنا وبيفضل فيها وبيطمنها دا ربنا بيقول " ألا بذكر الله تطمئن القلوب "
مش بسماع الافلام والمسلسلات والموسيقى !؟
وانا بفضل الله عايشه حياه هاديه ومطمئنه ليه ادور ع غيرها !؟
قولتلها ان الحياه مينفعش تمشي ع خط واحد والا هنمل منها ونتعب !؟
قالتلي وانا مقولتش ان حياة اي انسان ممكن تمشي ع خط واحد ،علشان كدا في حاجه اسمها ابتلاءات لازم كلنا نمر بيها ،،
كمان في رسايل من ربنا بتتبعتلنا كل دقيقه لازم ناخد بالنا منها ونتمسك بيها لآخر لحظه ،يمكن تكون في الرساله دي طوق وطريق النجاه !؟
ولا فرق معايا كلمه من كلامها وروحت علشان اقفل القرآن وشغلت اغنيه وقولتلها حاولي تسمعيها وتشوفي جمالها علشان تحكمي صح ،
وقتها ولاول مره اختي تتكلم معايا بصوت عالي ،
وقالتي مهما وصل بينا النقاش والاختلاف اوعي في يوم تقفلي القرآن علشان تشغلي بعده اغاني ابداً
انا اتصدمت من طريقتها معايا ، وقولتلها ان مفيش حد ابدا راضي عن حياتها دي وانها تعبانا كلنا معاها وانها كدا عندها عقوق بأهلها ،
ردت عليا بإن ربنا وحده الأعلم بيها وان الاهم رضا ربنا ..
وبعدها حاولت تعتذرلي عن طريقتها معايا في الكلام وان انا اللي استفزتها ،
بس انا صممت اني مغلطش وان فعلا افضل حاجه هو زي م بابا قال اني اقاطعها ،
يوم عدى وتاني يوم كمان وهي مازالت بتحاول تصالحني وتقولي اني بس ميكونش في قلبي منها اي خصام علشان حرام وحرام اكتر يزيد عن 3 ايام ، وانا ولا هنا بالعكس قولت ابالغ في ردي اكتر يمكن دا يأثر فيها وتتغير ،
ومكونتش ابدا اتخيل اللي هيحصل !!
في اليوم التالت لخصامي ليها كان عندنا درس كالعاده اننا بنبدأ دروس في اجازة الصيف ،
المهم اننا كان عندنا عاده عمرنا م غيرناها مهما حصل وهي اننا نروح الدرس ونرجع سوا ،
وانا في اليوم دا قررت اني اعاقبها اكتر بإني هغير معاد مجموعتي وهروح في وقت تاني ،
هي قالتلي يارب م يكون ليه علاقه بخصامك ليا وتااااااااني ياارب م يكون في قلبك اصلا خصام من ناحيتي وابتسمت ابتسامتها المعتاده بس المره دي كانت مختلفه !!
مختلفه لانها كانت اخر مره اشوف اختي او ابتسامتها !؟
جالنا اتصال ان اختي عملت #حادثه واتنقلت المستشفى !!
ولأننا كنا الصبح وبابا كان في شغله ماما اتصلت بيه يسبقنا ع المستشفى ويطمنا ع م نحصّله ،
نزلنا بسرعه انا وامي وطول الطريق بكذب احساسي اللي كان مسيطر عليا ،
بقول بكذبه لاني كنت متأكده انه احساس صادق ،
وصلنا المستشفى واتأكدت من احساسي ، وعرفت بوفاة اختي !!
مش عارفه في حد ممكن من اللي هيقرأ الكلام دا ليه توأم ولا لا او اتعامل مع توأم ،
لو دا حصل ف هو اكتر واحد هيحس احساسي في التوقيت دا ،،
احساسي ان مش اختي اللي ماتت لا دي #روحي اللي ماتت ،،
#توأمي اللي فضلت معايا 9 شهور في #رحم واحد ،
#توأمي اللي من واحنا اطفال صغيره وانا ماشيه وراها زي #ظلها في كل حاجه بتعملها ،
#توأمي اللي عمرها في مره م زعلتني ولا سمحت لحد ابدا انه يزعلني ،
#توأمي اللي اتوفت وهي متخيله اني زعلانه منها ومخصماها ،
عقلي كان رافض يتخيل ان اختي توأمتي اللي لما كانت واحده مننا بتتعب كانت التانيه تتعب معاها حتى لو عزلونا عن بعض ،
كنا عايشين بروح واحده بس في جسمين ، وحتى الجسمين كانوا متشابهين في كل حاجه ،
#توأمي اللي لحظة وفاتها حسيت كأن روحي خرجت مني وقلبي وقف تماما ،،
#توأمي اللي كانت دايما تقولي مش احنا توأم في الدنيا وانتي بتسمعي كلامي دايماً !؟
اسمعي كلامي في الدين كمان علشان نكون توأم في الاخره وتعالي نعمل المستحيل علشان ندخل نكون توأم في #الجنه 😍😍
#توأمي اللي فات على وفاتها 5 سنين و6 شهور و3 ايام ..
#توأمي اللي متأكده انها دلوقتي في اعلى مكان في الجنه زي م كانت بتدعي وبتتمنى 😭😭
دخلت بعد حادثة اختي في حاله نفسيه صعبه جدا لمدة شهر ،،
كنت رافضه اتكلم او اخرج او اتعامل مع اي حد ،،
كنت بفضل قاعده في اوضتنا مجهزه لبسها ع سريرها و بكلمها كأنها قدامي ،
قلبي رفض تماماً فكرة عدم وجودها او انها مش راجعه تاني ،،
كنت بندم كل دقيقه ع اني منزلتش معاها ،
ع الاقل كان زماني مت معاها ، وارتحت من كل اللي انا فيه 😭
وفي يوم كنت نايمه وصحيت ع صوت الفجر ولأول مره اصلي الفجر من غير م اسمع صوت اختي وهي بتصحيني 😭
لأول مره ارجع من الوضوء والاقي الركن بتاعها فاضي وهي مش فيه لا بتقرأ قرآن ولا بتصلي !!
وقتها بس اقتنعت ان
اختي فعلا ماتت 😭😭
وقعت ع الارض في مكان صلاتها بالظبط وفضلت ابكي 😭😭😭
كانت تقريبا دي اول مره ابكي فيها بعد وفاتها ،،
دخلت في الصلاه وبدأت اطول في السجود وادعي ربنا انه ياخدني علشان اشوفها واني مش متخيله حياتي من غيرها ،،
فضلت ابكي في الصلاه لحد م تعبت ونمت ع سجادة الصلاه ،
ولاول مره بعد وفاتها احلم بيها 😭
كانت جميله جدا زي الملاك وكانت بتضحك نفس الابتسامه الجميله بتاعتها واللي كانت اخر حاجه شوفتها منها قبل م تتوفى 😍😭
قعدت جانبي وقالتلي انها مبسوطه جدا ، وان كل حاجه دعت بيها واتمنتها لقت زيها واكتر بكتييير ،
وقامت علشان تمشي فضلت اعيط واقولها خديني ومش تسيبيني تاني وانا والله م هعمل حاجه تزعلك ابدا ، وهسمع كلامك في كل حاجه ،
ضحكت وقالتلي انها هتزورني كل مره بعد صلاة الفجر ،،
ومن وقتها للنهارده بفضل الله ولا مره فوتت صلاة فجر ،
وولا مره روحي وتوأمتي خالفت وعدها ليا :)
من اليوم دا وانا حياتي اتغيرت تماما ،
رفضت انزل من البيت غير بلبس اختي كاااامل واوله #النقاب ..
بدأت التزم بكل حاجه كانت اختي بتعملها وكان اولها صلاة الفجر والنقاب اللي جابوا بعدهم كل طاعه هي كانت بتعملها ،،
اهلي كانوا متخيلين انها حاله نفسيه وهتروح لحالها بعد وقت ، زي بالظبط م كانوا بيقولوا ع فترة التزام اختي ..
بس اللي هما مش متخيلينه ان بسبب تصميمي اني اشوف اختي بصلاة الفجر ، وتمسكي بالنقاب قلبي بعدها حس بكل احساس كانت اختي بتحسه ،
واخيرا عرفت سبب تمسكها بكل دا ،
واللي هو كان نفس تمسكي بيهم لحد انهارده ،،
وعرفت ان دي كانت رساله من ربنا ليا واللي كانت لازم اتمسك بيها وارضى بإنها جات ع هيئة #ابتلاء ، ودا بسبب رفضي لكل الرسايل اللي كانت قبل كدا ...
مش هطول عليكم اكتر من كدا ،
وربنا يهدينا جميعاً ،،
#ملحوظه من أهم الاسباب اللي خلاها تبعتلي القصه اننا ( ندعي لأختها وجميع أموات المسلمين بالرحمه وربنا يلحقنا بهم ع خير ) ❤
**************************
لكل شخص ربنا هيقدرله يقرأ القصه دي امسك فيها جامد جدااا ع انها #رساله ليك من ربنا ،،
وبلاش نستنى الابتلاءات ومين ضامن اصلاً #عمره !؟
ومستحييييل قلب يدخله #حب ربنا ويدخل معاه حب حاجه في #معصيته ابدا !!
#ملحوووووظه لما حكيت لصاحبتي اللي هي اول واحده بحكيلها كل القصص مجرد م بتوصلي ومن قبل م اكتب منها حرف
قالتلي ان في بنت اختها باردو وفاتها بمرض الكانسر ، كانت سبب في التزامها كان اسمها #نور ..
ربنا يرحمهم جميعاً ويلحقنا بهم ع خير ❤
وأفضل ختام " وكفى بالموت واعظاً " ✋
رزقنا الله واياكم #الهدايه و #التوبه و #الثبات_ع_الحق و
#حسن_الخاتمه
#بحبكم_في_الله ❤❤
###############################
صلوا علي الحبيب المصطفي