صلوا علي من جلس علي ركبتيه يواسي طفلا مات عصفوره
#################################
قصة انهارده #وتحققت_أحلامي 😍
مش تنسوا هاشتاج باقي القصص 👇
#قصص_واقعيه_لهدير_ابراهيم !!
في البدايه قصة انهارده لسه مبعوتالي انهارده
الغريبه اني بقالي كذا يوم بفتح وانا مستنيه حاجه ايه هي معرفش بس كنت متأكده ان في حاجه جايه
مكنتش هفتح انهارده وفتحت #قدراً وشوفتها 😍
قصه جيالي ولغيري في #وقتها وكل شخص بياخد منها المناسب لحالته
المهم بقى بعيدا عن الرغي دا اسيبكم مع القصه 👇👇
**************************
مش عارفه ابدأ معاكي بإيه بس بجد يا هدير هقولك بحبك في الله وربنا يرزقك انتِ وكل اللي زيك لانكم بتدوا للناس الأمل في وقت الكل بيردد فيه ان امل اصلا #انتحرت 🙂
بصي علشان مطولش عليكي هقولك اولاً انا وصلتلك ازاي
انا عندك ع الفيس من امبارح الساعه 7 بالظبط مساءً .. ايوه لسه عرفاكي من امبارح بس وبعتلك حكايتي انهارده عادي 🙂
انا عرفتك من قصه كان حد مشيرها ليكي اسمها #180_درجه ....
اتشديت اني ادخل اتكلم معاكي وابعتلك #قصتي تنزليها يمكن تدي امل لغيري زي م قصص قبلي اديتني امل .....
مبدئياً اسمي .... عندي دلوقتي 43 سنه مهندسه وافتخر بعد م كنت بقول واعتذر ..!!
ليه كنت بقول واعتذر !؟
دا بسبب المجتمع الجميل بتاعنا اللي كله تعليقات ع اي بنت يعرف انها في كلية هندسه ، وكأن البنات دي من عالم تاني او كأن كلية الهندسه دي #حكر ع #الرجال ...
مجرد م البنت تدخل هندسه تبدأ تسمع تعليقات سخيفه جدا ، ومش بس الايام دي لا وعلى ايامي كمان ع افتراض فرق السن ..
دخولي كلية الهندسه بالاضافه لعدم امتلاكي لجمال الشكل اضاف لحياتي تعقيدات ومشاكل كتير ،ع الرغم ان يطلق عليا من الناس اني شخصيه اجتماعيه ، معرفش بصراحه كنت بعوض دا فيها او انا فعلا امتلك للروح الاجتماعيه !؟
كان يطلق عليا بالمسمى الحالي #دحيحة الدفعه ، ف كان اللي حواليا شايفيني يا مصلحه ويتاخد مني ورق ، يا واحده مجرد همها الكليه ولا بتدور ع انها بنت - مش عارفه مال حب المذاكره بفرض اني #اظهر اني بنت -
دا غير اني كنت في اسره غير معترفه بخروج البنت ب #ميك_اب او غيره ،
بس النظريه دي اتغيرت بمجرد م بنات العيله بدأوا يتجوزوا وانا لسه محلك سر ..
وقتها بس أمي بنفسها اللي كانت بتاخدني تشتريلي اللبس والميك اب وتتخانق معايا لو نزلت في يوم من غيره ، وتقولي شكلك يسد النفس .. شكلك وحش .. بشكلك دل عمرك م هتتجوزي و ... و ... و .... كلااااام كتيييير يوجع القلب خاصةً انه صادر عن اكتر شخص في العالم المفروض يديني الحنان والقوه ...
بعد م كان كل اهتمام اهلي في ثانوي بالكليه انتقل بعدها الاهتمام كله لمرحلة #البحث_عن_عريس والندم كل الندم ع كلية الهندسه اللي من وجهة نظرهم السبب في قلة او ندرة عروض #الزواج ليا ....
مرت سنين الكليه كامله بكل م كانت فيه ، واتنقلت لمرحلة البحث عن #وظيفه ..
وكالعاده اهلي كانوا شايفين ان البنت مكانها #بيت_جوزها حتى لو مهندسه او دكتوره ودي كلها مجرد شكليات ومظاهر قدام الناس ، اللي هو بنتي جابت مجموع كذا دا بنتي دخلت كلية كذا لا اكثر ولا اقل واشياء من هذا القبيل مجرد مظاهر لا اكثر ولا اقل ..
وطبعاً طبعاً بعد تخرجي وبدون فرصة جواز اهلي بنفسهم اللي بدأوا البحث ليا عن #وظيفه تحت مبدأ ونظرية - علشان تتشافي -
كذلك حضور الافراح من باب لفت الانظار ليا لعلي اطلع بأي حاجه بمعنى ادق #شقط_عريس !!
كل دا وانا بين اهلي من كلمة دا لكلمة دا ، تايها بين الكل ،
وللأسف لا عارفه ارضي دا ولا دا ولا عارفه ارضي نفسي ،،
اكتشفت اني وسط الدوامه دي كلها نسيت نفسي ، نسيت اني بشر ، نسيت ان ليا حياه #واحده بس ، والحياه دي لقيت نفسي مش انا اللي بمشيها واني مجرد آله بتتحرك تحت توجيهات محدده ولهدف معين ...
بدأت اتمرد وللأسف كان الوقت الى حد ما متأخر ،،
بدأن اتمرد بعد م عديت سن ال 30 اكتشفت ان 30 سنه من حياتي ضاعت وانا كل همي واملي وتفكيري كله هو #الجواز وبس ،
اكتشفت اني مهما عملت لاهلي مأخدتش منهم غير وجع القلب والشماته والألم والحزن و....
مش هقول اني بطلت افكر في الجواز بس ع الاقل بدأت اهتم بحياتي انا ،
بدأت ادور على نفسي واحاول ابدأ معاها من جديد ،،
كنت وقتها بشتغل في مكان كارهاه بس كنت فيه بسبب رغبة اهلي ،
وكانت اول خطوه لتغييري هي اني اسيب شغلي وربنا قدرلي اكون في مكان افضل مع ناس مريحه نفسياً اكتر ،
ناس ولا بتسألني سنك كام ولا يا عيني انتي عديتي ال 30 ولسه آنسه ولا .. ولا ..
مكان اغلب اللي فيه مهتم بشغله وحياته وبس بدون تدخل في حياة غيره
وان #قلة النسبه دي حاليا للأسف بس ع الأقل ربنا بعت في طريقي الناس دي وفي الوقت دا بالذات ...
كونت صداقات مع بنات اكتشفت انهم #اكبر مني على الرغم ان شكلهم #صغير ،
كمان طموحهم مش جواز وبس اووو بمعنى ادق كل حاجه بتيجي في وقتها بتكون #افضل ...
من ضمن الصداقات دي قربت اكتر من #بنت_منتقبه ،
صراحةً في البدايه كنت بتجنب الاختلاط بيها شويه بس بعد كدا حياتي كلها اتغيرت بسبب مره واحده شاء القدر نرجع من الشغل مع بعض واتكلمنا وقتها كتير ،،
فرحت جدا باليوم دا لانه كان سبب في تغيير حياتي تماماً ،،
بدأت اخد بالي من آخر حاجه كانت ممكن تخطر ع بالي وهي
#علاقتي_بربنا !؟
كنت اول مره افكر في علاقتي بربنا ،
اول مره اتسأل السؤال دا
ايه احوالك مع الله !؟
ايه اخبار قلبك مع الله !؟
كان ممكن اخد الكلام وقتها ع انها واحده من الناس اللي #بتخنقنا بإسم الدين وانها شايفه حياتي كلها غلط وحرام ،،
بس انا مفكرتش في كل دا خاالص ،
السؤال نفسه لجمني ... تاني
ايه احوالك مع ربنا !؟
ايييييييييه !!؟؟
فضلت اسأل نفسي كتير ، دايما كنت بعلق عدم جوازي وعدم راحتي وعدم احساسي بإني بنت #طبيعيه هي #شكلي و #كلية_الهندسه !؟
طيب وربنا !؟
طيب واخباري مع ربنا !؟
اكتشفت اني مفيش في حياتي حاجه اسمها #صلاه مش حتى بصلي مره اه ومره لا
لاااا دا مفيش #ركعه اصلا
دا مفيش حتى احساس #بالذنب او تأنيب ضمير مر عليا قبل كدا
#الألعن ان مفيش اهل دوروا واهتموا بعلاقتي بربنا وصلاتي والتزامي بفروض ربي قبل اهتمامهم بشكلي ومظهري والبحث عن عريس وغيرها ،،
30 سنه في عمري من غير صلاه حرفياً ، ولا تقولي حتى رمضان او غيره
نسيت اقولك معلومه مهمه جدا وهي اني مع كل دا كنت #غير_محجبه ،
يعني اهوووووو يا بناااااات مش كل اللي #بشعرهم مفيش زيهم ، انا كنت بمثل الجانب البشع منهم 🙂
يمكن اكون شووويه قدرت اوضح الحياه اللي كنت فيها انا واهلي يمكن والدي هو بس اللي كان بيصلي لكن ولا مره قال لحد منا عن الصلاه او اي حاجه في الدين ...
المهم من الوقت دا اصبحت البنت دي هي اقرب شخص ليا ،،
قربت منها اكتر وبدأت اتعلم ازاي اقرب ،،
كنت في الوقت دا زي الغريق اللي م صدق ولقى قشايه يتمسك بيها ...
اهلي وخاصةًوالدتي اعترضت تماما ع اول قرار اخدته وكان بالتأكيد #الحجاب ،،
هددتني بإنها غير راضيه عني ، واني عندي #عقوق ،،
وان الحجاب هيخلي شاكلي #بشع اكتر م انا ،،
دخلت في صراعات نفسيه كتيييير ،،
استمرت المشاكل والصراعات مع اهلي ل 5 سنين ووصلت ل سن 35 سنه ومازلت آنسه :)
بس كنت اتعلمت في الفتره دي حاجات ولاكنت اقدر اوصلها في حياتي كلها ...
واكيد موضوع الزواج كان في بالي ،
بس كنت اتغيرت في طريقة التفكير ،
كانت صاحبتي دايما تقولي وقت م تشغلي حياتك بأي حاجه تانيه وتخلي الزواج امر #ثانوي بدل م هو حاجه واقفه عليه حياتك كلها ،
وقتها بس هيدق بابك وفي الاول وفي الاخر دا #نصيب ....
اقولك ع حاجه يا هدير ؛
انا كنت عامله #فولدر ليا فيه تصميمات لكل شبر في #شقتي وعشت اتخيل نفسي وانا ليا حياه واسره واطفال
#اطفال يا هدير .. اطفال بيندهوني ب #ماما 😭😭😭😭
كنت خايفه اوووي اللحظه دي متجيش واتحرم من الكلمه دي 😭😭😭
لما كنت بحكي لصاحبتي واعيط مكانتش بتقولي دي #اوهام واخرجي منها
بالعكس كانت بتشجعني اكتر اني افكر في حياه اسريه اكونها وترضي ربنا
شجعتني بأجمل جمله سمعتها في حياتي وهي - إن حتى النيه بنؤجر عليها يعني حتى لو ربنا لم يرزقني الزواج او الاطفال في الدنيا ف مجرد التفكير في حياه ترضي الله هؤجر عليها ، وإن ربنا عند حسن ظن عبده - ف لازم اتمسك بالأمل وحسن الظن واليقين بقدرة الله ...
من بعد الجمله دي وانا بقيت اتعلم اكتر ، وافكر وافكر واتخيل ...
اتخيل حياتي وزوجي وبيتي واطفالي ....
حسيت براحه رهيييبه بمجرد القرب والتسليم لربنا في كل شئ ..
مهتمتش برأي لا اهلي ولا عيلتي ولا جيراني ولا جيران الجيران ،،
بدأ يتولد عندي شغف تاني وهو ازاي ارضي ربنا واسعى لرضاه هو وبس !!؟؟
داخله ع 37 ومفيش ادنى بشاير لزواج بس مكمله باردو
بسمع كلمة #عانس مش هتتجوز ولو اتجوزت اصلا يا هتتجوز #ارمل يا #مطلق يا زوجة تانيه ،،
ولوووو حصل باردو ف نسبة انها تكون #ام تكاد تكون #انعدمت ومع ذلك كملت
كملت وكلي حسن ظن بالله ،
كنت بقع اوقات بس كانت صاحبتي دايما تشجعني #بقصص تقرأها هنا او تسمعها من هنا ،
كانت دايما تفكرني بحسن الظن و #الإلحاح في اي دعوه شرط تكون في الخير ،،
وعلى الرغم انها كانت #تزوجت وكونت اسره الا اني ولا مره حسيت ناحيتها بغيره ،
ع عكس اللي كنت بحسه قبل كدا ،
اكتشفت ان احساسي بالغيره كان سببه اهلي ،
اللي تقريبا بسببهم قاطعت معظم صحابي وقرايبي اللي ربنا اكرمهم وتزوجوا قبلي ،،
المهم بقى يا ستي علشان انا رغيت كتير اوي 🙂
ربنا قدرلي في يوم ارجع من الشغل بدري ، كنت راجعه تعبانه ومضايقه جدااا
والاقي #خالي عندنا ،
كان بيعرض ع امي انها تسافر معاه #عُمره ،
انا سمعتها من هنا واستغربت ازاااي لحد دلوقتي مفكرتش مره اعمل عمره وانا قدرتي الماديه الشخصيه تسمحلي بكدا ،،
ومصدقت لقيت محرم ليا ومسكت فيها ،
وربنا قدرلي اسافر للعمره 😍😍
بصي هو انا كان احساسي زي اي حد رايح يعمل عمره وكدا والله بقى هشوف الكعبه واقف كدا قدامها ،
بس كل دا راح بمجرد م وقع نظري عليها ،،
دموووووووووع ورهبه ودمووووووع وخووووووف واطمئان ودمووووووع ورهبه ودمووووووع واماااااان
احاسيس مختلفه ومتلخبطه بس اللي استقر في قلبي هو الامان والراحه في الدموع ...
اول دعوه دعيتها بصراحه كانت الزوج الصالح
كانت الاسره
كانت الاطفال
كانت الامان
دعيت ودعيت ودعيت وألحيييييييت ...
تفتكري ربك ممكن يخذل عبد اتاه في بيته مستسلم ومجرد من اي شئ وكل شئ
تفتكري ممكن يخذله
حاشاه سبحانه ...
اتقرت فاتحتي واحنا في الطياره راجعين مصر 😍😂
دا كان ازاي هحاول احكي باختصار ..
شاب عنده 38 سنه كان مع والدته وخالته واخته الصغيره بيعملوا عمره زينا ،
اخته الصغيره دي اللي هي كانت وقتها 23 سنه اتعرفت عليها في الحرام واكتشفت انهم معانا في نفس الفندق ،
وان هي كان نفسها تدخل هندسه ومن هنا بدأ الكلام ...
اتعرفنا ع بعض اكتر شويه شويه بدأت اعرف مرات خالو عليها واتعرفنا ع والدتها وخالتها شويه وخالو اتعرف ع اخوها واللي ربطتهم صداقه قويه في مده بسيطه ودا كان باردو بسبب قرب مجالتهم من بعض خالو صيدلي وهو طبيب بشري 🙂
شويه وبقينا نروح في اي مكان كلنا سوا ونرجع سوا ..
شويه والشاب دا يكلم خالو واحنا راجعين خلاص مصر ويطلب ايدي ويطلب زياره لأهلي ..
انتِ متخيله ان كل دا يحصل في ايام ،
متخيله ترتيب الاقدار ،،
متخيله ان اليوم اللي رجعت فيه البيت مضايقه جداا بسبب تعبي واني خرجت بدري كان سبب لكل حاجه حلوه حصلت في حياتي دلوقتي :)
تمت #الرؤيه ع خير الحمد لله ،،
وشهور وكنت متزوجه وعندي بيت وزوج ومل ما كنت اتمناه بفضل الله 😍
مرت سنتين بدون #انجاب وع الرغم من كدا كانوا من اسعد سنتين مرت عليا في حياتي بجد ،،
ربنا رزقني بشخص يكاد يكون قطعه من الجنه ،
ربنا رزقني بحنانه واحترامه واهتمامه وكل شئ افتقدته مع اهلي ،
والاهم ولا مره اتكلم ولا لمح ان تأخر سني السبب في تأخر الانجاب ،،،
كنت بحمد ربنا في اليوم الف مره وكنت دايما اردد اللهم لا اعتراض ع حكمك ابدا ،،،
ودخلت خلاص في ال 40 وكل اللي حواليا متيقن تماما ان مستحيل يحصل حمل ،،
وكنت دايما المح في نظرات بعض الناس من عيلتي اللي هو اتجوزتي اه بس باردو هتفضلي ناقصه 😏
اللي هو مش مكفيكي اتجوزتي في السن دا وكمان دكتوووور - مع احترام لاي مهنه تانيه بالتأكيد -
بس اللي هو يعني مين كان هيبصلك !؟
ورغم كل دا سلمت امري لله ، وفكرت مره اني اطلع اعمل #عمره تاني وادعي يمكن تحصل #المعجزه
لكن كان لزوجي رأي تاني خاالص
عرض عليا فكرة اننا نساعد اتنين غيرنا يطلعوا عمره ،
من باب اننا روحنا قبل كدا ، ومن باب انها صدقه لله ، ومن باب ادخال سرور ع قلب مسلم ،
ومن باب السعي لرضا الله وتيسيير الحال ...
وفعلا عملنا كدا
وفعلاًحصلت المعجزه 😍
وانا حاليا بكلمك وانا عندي اجمل حاجه حصلتلي في حياتي بعد زوجي وهي #ابني اللي هيتم انهارده #سنه ، ويشاء القدر اعرف صفحتك امبارح وصممت اني احتفل بأول ذكرى ميلاد ليه معاكي ومع كل الناس اللي هتقرأ كلامي دا دلوقتي ❤
كل عام وانتم جميعاً الى الله اقرب ،
عيشت 30 سنه بعيد وقربت في اقل من نصهم ورزقني بفرحه اضعاف اضعاف عمري
وكل حاجه كانت بالنسبالي كانت من خيالي بحسن الظن اصبحت #واقعي ❤
ودعواتكم دايماً 🙂
ربنا يسعدكم جميعاً❤❤
****************************
القصه لسه جايه انهارده وصممت انزلها انهارده ف بعتذر لو كانت ناقصه شويه ..
وآخر حاجه معنديش تعليق اكتر من
- قرب من ربنا هتلاقي الدنيا كلها اقسم بالله تحت رجليك ..
- الجواز والاطفال وخلافهم اقسم بالله #رزق وقدر وكله مكتوب عند رب العالمين
- الاهالي والعيله والجيران وجيران الجيران الرحمه شويه واتقوا الله فينا
- واخيراً عسى ان تكرهوا شيئاً وهو خير لكم وعسى ان تحبوا شيئاً وهو شر لكم ...
ربنا يرزقكم جميعاً سعادة وراحة القرب منه
ودُمتم جميعاً ع حسن الظن واليقين طاعته ادوم
اوعوا تنسوا ابدا #الكريم حين يُعطي يُدهشنا بكرمه وعطاؤه ...
ها يا شباب ناويين تتأخروا اكتر من كدا ع طريق الله ولا !؟
#احبك_ربي
#بحبكم_في_الله ❤❤
################################
صلوا علي الحبيب المصطفي