صلوا علي من ياتي يوم القيامه ويقول..امتي..امتي
################################
#وهو_على_جمعهم_إذا_يشاء_قدير !!
#قصص_واقعيه_لهدير_ابراهيم
من البدايه كدا 😃 الغرض من #قصة انهارده هو اننا نشووووف نتيجة حسن الظن في الله بتكون ازاي !!
وكمان للناس اللي عماله تردد ولأن الحلال تأخر وهكذا ،،
إليكم قصتي :)
انا بنت كنت الحمد لله بحاول التزم مع ربنا وبحسن من أخلاقي علشان ربنا يرزقني بالشخص اللي زيي
اللي هو من الآخر عاوزه اكون طيبه لأن " الطيبون للطيبات "
اتقدملي ناس كتير من وقت م دخلت #الكليه وكنت دايما برفض ، مش لاقيه خالص المناسب ليا ،
لحد م فعلاً لقيته واتقدملي 😍
في ناس بتقول مفيش حاجه اسمها حب من #اول_نظره
بس انا بقولهم ان فعلا في حب ومن اول نظره وفيها فعلا القلب بيدق جامد ، دي حقيقه والله ،،
قلبي دق للشخص دا من وقت #الرؤيه_الشرعيه واتمنيت فعلا يكون #نصيبي ،،
لكن للأسف كان في هجوم فظيع من أهلي عليه بسبب ظروفه #الماديه ،
اللي هو زي اي اهل عاوزين حد لبنتهم يعيشها في مستوى عالي وبس مش فارق معاهم اد ولا اخلاق ولا .. ولا ..
المهم اني صممت عليه ، وفعلا اتخطبنا ،،
الخطوبه مكملتش 4 شهور وانفصلنا بسبب ضغط اهلي عليه :(
عاوزه اقولك اني كنت منهاره وفضلت اعاااافر اننا نكمل بس بصراحه اهلي اهانوه واهانوا اهله كمان ، ف خلاص مفيش مفر
وانفصلنا !!
الأهم بقى انا كان عندي 22 سنه وقتها ،،
عدت الأيام واتخطبت وهو كنت عرفت انه خطب وسافر دوله عربيه ،،
طبعاً خطوبتي كانت من غير رغبتي بس بصراحه كانت #عند فيه لما عرفت انه خطب وانا كنت دايماً بحاول اعرف اخباره ،،
كنت فاكره انه اتعلق بيا زي م انا اتعلقت بيه ،
لكن بعد خطوبته اتأكدت اني مكنتش فارقه معاه ف اتخطبت ،،
بس تعرفي لما اتخطبت كنت بحس اني حد مش كويس ، حد خااين ،،
طبعا خاين لأنه لسه في قلبي :(
في كل سجده وكل مره ارفع ايدي بالدعاء كنت بدعي يكون من نصيبي او ربنا يخرج حبه من قلبي ،،
ولما لقيت اني خلاص فعلا مش قادره استمر في خطوبتي نهيتها ،،
ع فكره الخطوبه دي كانت عاجبه اهلي علشان #الماديات ، قابلت مشاكل مع اهلي بس خلاص الحب اللي في قلبي اتمكن منه كله ،،
وفعلا نهيت الخطوبه ، وفضلت عايشه ارفض كل حد يتقدم لدرجة ان طلع عليا طبعا من الناس سمعه مش كويسه ،
اللي هو انتي عارفه لسان الناس مبيرحمش ،
بس والله م اعرف ازااااي كان عندي حسن ظن في ربنا ان هو يا إما هيكرمني بالشخص دا يا إما هيكرمني بواحد خيراً منه ،
خاصةً ان دا اكيد اتجوز ،،
اصلي نسيت اقولك ان بعد سفره بفتره غيروا مكان سكنهم ، ومعرفتش بعدها اوصل لأي معلومات عنه ف اتأكدت انه اتجوز :(
ف دعيت ربنا بالخير ليه وانه يعوضني افضل منه لو استحق :(
وصلت لحد سن 34 من غير جواز ، كل اخواتي بلا استثناء اتجوزوا وخلفوا وانا لا ،
كانت والدتي اللي بتزعل عليا ،
ف كنت بكثف الدعاء اكتر ،
وفي يوم عرفت ان جايلي عريس جديد ، انا كالعاده عملت استخاره قبل اصلا م اعرف عنه حاجه واندهشت من النتيجه
ايه دا انا ليه مرتاحه اوي كدا !!؟؟
وافقت اني اعمل #رؤيه_شرعيه
وكانت مفاجإتي اللي عمري م توقعتها !!
لقيت الشخص اللي اسمه لحد انهارده مش بيفارق دعائي !!
ايوه هو الشخص نفسه اللي كنت مخطوبه ليه ،،
ايوه ربنا رزقني بيه حلالي بعد 12 سه تقريباً 😍
لساني وقف اصلا ومقدرتش حتى اغض بصري عنه ، ووالله وصلت اني فصلت اغمض عنيا وافتحها اللي هو انت يا عم انت حلم ولا علم !!؟
انت حقيقي ولا خياااال !!؟
هو استغرب اني مكنتش متوقعه ان هو لان المفروض يعني اي واحده بتسأل ع اسم وشغل وصفات الشخص المتقدم كدا يعني ،
بس انا من بعده بطلت اسأل اصلاً ..
المهم بقى مش عارفه اوصفلكوا احساسي كان ازاي ، انتوا اكيد حسين بيا في اللحظه دي ☺
علشان مش اطول عليكوا ،،
واحد زيه شغال بقاله 11 سنه تقريبا في دوله عربيه اكيد بقى مادياً كويس ،
يعني عريس لقطه بالنسبه لاهلي وانا كمان كان سني زي م بيقولوا عليا بقيت #عانس 😃
أهلي طبعاً وافقوا واقسم بالله ولا مره عامل والدي او حد من اهلي معامله وحشه ، ولا قالهم حاجه ع انهم رفضوه قبل كدا ووافقوا دلوقتي علشان الفلوس بس !!
كان شخص فعلا لا مش زي م اتمنيته افضل كتيييير مما اتمنيته ، كنت شيفاه كتير بجد عليا ،،
ناس في ظروفنا وواحده في سني اكيد كتبنا الكتاب ع طول ،
وانا اهلي زي معظم البيوت المصريه كانوا بيجهزوا فيا من زمان في حاجات البيت وكدا ،،
اخدنا مده طويله واتجوزنا ،،
فترة كتب الكتاب والخطوبه كانت اجمل ايام عمري بجد ف مبالك ببعد الزواج ☺
كان شخص ونعم الزوج بجد ، كان دايماً ومازال طبعا ولله الحمد يتقي الله فيا ،،
طيب تفتكري كرم ربنا معايا وقف لحد هنا وبس !!؟
اهلي ومعظم قرايبي بعد م عديت ال 30 كانوا دايما يقولوا عليا بقيت #ارض_بور
من الآخر فرصتي في #الإنجاب ضاعت ..
المفاجأه بقى اللي محدش توقعها ابدا ان ربنا اكرمني وبقيت #حامل بس لا مش دي المكافأه
ربك ادهشني بإني طلعت حامل في #توأم 😍
والله وقتها نزلت سجدة انا وزوجي قدام الدكتوره سجدة شكر ☺
كرم ربنا ودهشته لسه مغرقنا لحد انهارده ،،
نسيت تاني اقولك ان زوجي كانوا اهله اللي خطبوله بما انه خلاص سافر واستقر ومن غير موافقته ولما رجع نهى خطوبته ،
وكان هو كمان بيدعي ربنا ليا ،
بس لا مش انه يتجوزني ،
كان بيدعيلي ان ربنا يكرمني بزوج يتقى الله فيا ، لأن شايفني من وجهة نظره هو 😃
اني استحق حد قريب من ربنا ،،
ربنا استجاب لدعواتنا اللي هي بالخير والأفضل ،
وان كل واحد فينا كان عنده حسن ظن كبير في ربه :)
انا حاليا قولي 37 سنه وبفضل الله متزوجه ومعايا #الولد و #البنت ،
واعرف ناس اتجوزت قبلي بكتييير منهم انفصلوا ومنهم ربنا مرزقهمش اطفال ومنهم ومنهم ،،
***********
اللي فوق دا مش خيال ،،
دي قصه حصلت مع ناس كتير ع فكره ، وفي قصص كمان تفوق القصه دي بمراااحل ،
يا جماعه انتوا بتتعاملوا مع #الخااااااالق ،
تفتكروا كل دا صعب ع اللي خلقك !!؟؟
يا بنات ويا شباب السر هنا و #السحر كله في جمله واحده بس
#حسن_الظن_في_الخالق وبس ،
الزواج رزق زي أي رزق هيجي هيجي لو مكتوبلنا في الدنيا ،
ف ليه نستعجله ؟؟
لو قلبكوا متعلق بحد ، ادعوا دعوه واحده
" اللهم ان كان خيراً لي وانا خيراً له اجعله حلالي ،
وان كان شراً لي او انا شراً له ابعدني عنه واخرج حبه من قلبي "
لو انتوا لبعض ربنا هيجمعكوا اكيد ،،
#دُمتم_بألف_خير :)
################################
صلوا علي حبيب الله