قصص واقعية (لهدير ابراهيم)

ابتلاءه تأديب و رحمة

#ابتلاءه تأديب و رحمة

#قصص واقعيه لهدير_ابراهيم 💌

بسم الله نبدأ قصة جديدة كلها حسن ظن ويقين وجبر ❤

حوالينا نعم كتير جدا ربنا بفضله وكرمه أنعم بيها علينا بس احنا مبنحسش بيها ف بيبتلينا علشان نبدأ نفوق لنفسنا ونعيد حساباتنا معاه..

🌸🌸🌸🌸

 هحكيلكوا قصتي انا كنت بنت مرفهه جدااا ربنا رزقني بمال وجمال وحسب ونسب وتعليم عالي..وبدل م احمده واشكره ع فضله كان الكبر بيزيد اكتر في قلبي..

من أول م بدأ يتقدملي العرسان وانا بتشرط وبتأمر وبتنطط ع كل الناس واطلع فيهم كل عيوب الدنيا وشايفه اني مستحيل ابص اصلا لحد اقل مني في المستوى الاجتماعي والمادي والتعليم..

ربنا متخلاش عني رغم غطرستي وبعتلي شاب ربنا يحفظه أدب وجمال وأخلاق وفعلا ابن ناس وكمان طبيب زيي..

كنت دايما بردد اني لازم اتجوز دكتور علشان ولادي يكونوا أذكياء زينا ويطلعوا دكاتره هما كمان وانهم لازم يكونوا عباقره وكنت بقول ولادي مستحيل يبقوا زي أي حد وهنا بقى وكأن ربنا قالي استوب وكفاية عليك اوي لحد كدا وخدي الابتلاء دا لأنك رايحه في طريق أخرته وحشه جدا

ابتلاني في أعز حاجة وأغلى أمنية لكل بنت وهي إني بعد 5 شهور ومفيش حمل.. ومفيش عندي لا انا ولا زوجي أي مشكله نهائي بس بردو محصلش حمل.. شهور وسنه اتنين بيمروا ومغيش أي جديد!

اتهد بقى واتعظ وارجع لربنا وادعي؟ محصلش!.

بقيت اتمرد ع ربنا واتطاول في الدعاء وان ليه عملت فيا كدا واشمعنى انا

كنت بسمع امهات بتشتم ولادها واللي تدعي عليهم وتقولهم كان يوم اسود يوم م شوفتكوا

كنت بقعد في الارض اعيط واقوله ليه تدي دول وتحرمني أنا دا انا هموت ع ظفر طفل صغير...

ونسيت او تناسيت انه حرفيا كان مديني كل نعيم الدنيا وانا اللي مكنتش حاسة بيه..

تخيلي انا طبيبة وزوجي طبيب وعجزنا قدام قدرة ربنا لا نفعني تعليمنا العالي ولا فلوسنا اللي ملهاش اول م آخر..

ولما فشل الطب بدأت والله العظيم الجأ للدجالين وغيرهم..بقى اي حد يقول ع حاجه اجري بسرعه اعملها ولما يأست خااالص افتكرت باب الرزاق الكريم وللأسف كان دا آخر باب أقف قدامه

بس الموضوع مكانش سهل بردو

هدير أنا عمري ما صليت في حياتي ولا اتوضيت متخيلة؟!

والدي بيصلي لكن والدتي ولا مره شوفتها بتصلي ومفيش حد عودنا بالتالي كبرت انا واخواتي واحنا منعرفش عن الدين بتاعنا غير اسمه وبس..

الموضوع كان شاق وصعب جدا عليا!.

المهم اني كنت بقول انه اهو صلاة وصليت

دعاء ودعيت

صدقات وطلعت

قرآن وقرأت

مداومة ع قراءة وسماع سورة البقرة وعملت

ليه بقى مفيش استجابة بردو ؟!!!

وكان تعليم وتأديب ربنا ليا لما سمعتها قدراً من ست بسيطة في الشارع إن ربنا بيرزق اللي بيقعد ع بابه ويخبط ويقوله ماليش غيرك يرزقني ويجبرني

كلماته بسيطه جدا بس دخلت قلبي زلزلته وكأنه كان كاتب ع قلبي الهدايه في الوقت دا.. روحت قعدت ع الارض جانب الست الغلبانه اللي انا كنت ببصلها م برج عالي زمان وشيفاها اقل م مستوايا وبقرف منهم

قعدت جانبها ع الارض وقولتلها م انا روحتله وردني.. الست ولا استغربت قعدتي جانبها فجأة ولا أي حاجه بالعكس لقيتها مكملة وقالتلي مستحيل يردك من ع بابه وانتِ مكسوره وشاورت ع قلبي وقالتلي طول ما دا متأكد إنه هيجيب مرادك!!

رجعت بيتي وبكل هدوء اتوضيت وصليت وقفت ع سجادة الصلاة وبدأت في قراءة القرآن وانا هاديه جدا واول ما جبيني لمس الأرض قولتله عرفت غلطي خلاص يارب واتعلمت الدرس

اتعلمت ان انت بتعلمني وبتربيني ع غطرستي وتكبري على الناس

عارفه انك غضبان عليا جدا بس انا خلاص مش هسيب بابك لحد ما تعفو عني وتسامحني وبدأت في البكا..

من اليوم دا وانا بدأت أتغير من جوايا جدا ومكنتش ومن كتر م انا بقيت مركزه مع ربنا بس مأخدتش بالي ان كل اللي حواليا بدأ يلاحظ تغييري لحد م في مره بعد الصلاة وانا لسه قاعده ع السجادة لقيت زوجي قعد جانبي وباس راسي ومسح دموعي

 وقالي: يوم م اختارتك الناس حواليا بقوا يضربوا كف ع كف انك ملقتش غير المتكبره المغروره دي خاصة اني بشهادة الناس شخص بفضل الله متواضع وطيب بس انا كنت حاسس وكأن ربنا هو اللي بيشدني ليكِ.. ابتلاء الكريم رحمه وكفاية ان بيتنا بدأ ينور وتزيد بركته بصوت القرآن اللي مش بيتقطع ووقفت ودموعك في الصلاة..

كلامه ريح قلبي جدا وطمنه وبدأت من بعدها اقرأ في الدين وعن الدعاء واستجابته لحد ما قرأت عن اليقين وحسن الظن

عاوزه بردو اوصلك اني علشان اوصل لليقين دا في دعائي مكانش سهل ابدا بس كنت بقوله يارب انا خدت أعلى الشهادات وكنت فاكره نفسي ذكية الاذكياء وجيت عند حاجه بسيطه جدا عندك ووقفت

ف يارب استجيبلي ووفقني لسر الدعاء والاستجابة..

ربنا رباني يا هدير مش في سنه ولا اتنين ولا خمسه دول 14 سنه ونص

اتجوزت وانا 22 سنه واخيرا رضا عني ورزقني بحتة مني ومن جوزي وانا قربت ع ال 37 سنة متخيلة!!

وقت ما بدأت تظهر عليا أعراض الحمل مكنتش مصدقة وحتى لما فترة الطمس اتقطعت توقعت انها أزمة منتصف العمر ومخطرش ع بالي خالص انه بجد استجاب

بصي بصراحه أنا كنت بتمنى أوي من جوايا إن انقطاعها والدوخه وباقي الاعراض يكونوا حمل حقيقي بس كنت خايفه أوي أعشم قلبي خاصة واني كنت خلاص بدأت او اقنعت نفسي اني تعايشت مع فكرة ان ربنا مش هيرزقني طفل

رغم اني ولا مره انقطعت عن الدعاء بس كان زوجي ربنا يحفظهولي يارب يذكرني بإن الحمد لله كنا فين وبقينا فين وان كرم ربنا ولطفه ورحمته محوطانا م كل جانب..

ويا فرحة قلبي اللي كان بيرفرف في السما لما زوجي أصر إني لازم اروح للدكتور ورغم خوفي فضلت استغفر واصلي ع الرسول لحد ما الدكتورة قالت كلمة #مبروك

زوجي سجد ع الارض والله العظيم وقام خدني في حضنه وبكى

متخيلة انا قربت ع الاربعين وزوجي تخطى عمره الأربعين وجايلنا أول طفل!

كل اللي حوالينا كانوا بيتعاملوا ع انه #عيد من أول بواب العماره واسرته واهلي والجيران وكل اللي يعرفنا..

كنت في الشهر التالت لما عرفت الخبر

جوزي كان يفضل يقولي بصي اطلبي نجمه من السما وانا اجبهالك لحد عندك بس متتحركيش

ولأول مره أحس بفرحة زوجي الحقيقة وكان شبه الأطفال في فرحتهم..ومأخدتش بالي خالص ان طول السنين اللي فاتت كان هو في ضهري ومسنوده عليه رغم ان هو كان في أمس الحاجه هو كمان لحد يسنده ويواسيه ويصبره..

رزقنا الرزاق الكريم ب اول اطفالنا #كريم واللي جالنا ومعاه الكرم كله ومفاتش شهور غير ولقيت نفسي للمرة التانيه ع التوالي حامل!!

الكل كان بيضحك ويقول هي ماسورة واتفتحت ولا ايه واللي يقول م كنتِ تجبيهم م اول مره توأم وخلاص

كنت بقولهم دا أنا أحب حاجه ع عيني هو #وجع_الحمل ومستعده اتحمل عمري الباقي كله بعد م اتحرمت منه..

وهلت علينا #منة_الله ونور بيتنا ب كريم ومنة الله..

تعرفي اني كنت بقعد جول الليل ابص لولادي وألمس كل جزء منهم وابكي واقول لزوجي بص بص ايديهم نونو خالص ازاي بص صوابعهم وجمالها.. بص رجليهم..بص عنيهم..بص مناخيرهم..بص شفايفهم

وكأن أول مره اشوف أو ألمس أطفال في حياتي..

اتحول بيتنا من هدوء وسكون لدوشة..

 لدرجة انهم لما كانوا يقعدوا هاديين كنت اقولهم لا يلا قوموا املوا البيت كله دوشه

ولحد الآن بفضل الله بيتنا بقى كله دوشه وفرح وسعادة بفضل الرزاق الكريم واتعلمت الدرس كويس وعرفت انه كان بيحبني من الاول ف رزقني كل حاجه بس علشان بيحبني اكتر ابتلاني علشان يرشدني للطريق الصحيح فاللهم لك الحمد والفضل والمنه❤

🌸🌸🌸🌸🌸🌸🌸🌸🌸🌸🌸🌸🌸🌸

حاشاه الرحمن الرحيم يكون خلقنا علشان يعذبنا

الامر ومافيه ان ابتلاءه تربية وتأديب وإصلاح لقلوبنا ونفوسنا من كل كِبر أو شر... ودايما بيكون في ابتلاءه رحمة ❤

#حكاوي_هدير

#هدير_ابراهيم