قصص واقعية (لهدير ابراهيم)

إلف_النعمة

صلو علي رسول الله

#إلف_النعمة !!

هاشتاج باقي القِصص 👇
#قصص_واقعيه_لهدير_ابراهيم 💌
🎀🎀🎀🎀🎀🎀🎀🎀🎀
م شهرين بالظبط ولا كان يخطر ع بالي اني ممكن ابعتلك قِصتي ولا كنت شايفاها قِصة اصلا ممكن تفرق أو تأثر ف حياة حد.. بس رمضان اللي فات حصل موقف قلب حياتي تماماً وبسببه اهو جيت بنفسي احكيلك القِصة بس مش زي م كان ممكن يخطر ع بالي ف يوم وهتفهمي لما احكيلك اكتر...

انا بنت عاديه جدا فوق م تتصوري.. عادية ف الشكل.. ف التعامل ف التعليم ف كل حاجه يعني ولا كنت شاغله بالي ف الدراسة بإني ادخل كليه معينه ولا اي حاجة.. وحتى لما اتخطبت كان عادي بردو اللي هو مفيش عندي صفات معينه للشخص اللي عاوزه ارتبط بيه اللي هو عاوز اتجوز لمجرد الجواز وبس ف بمجرد م أهلي وافقوا وافقت عادي خالص.. ورغم اني كرهته كره لا تتخيليه طول فترة الخطوبه الا ان دا ممنعش اهلي انهم يكملوا لحد م اتكتب كتابي وسبحانك ي ربي الجوزاه اتفركشت ع سبب تافه جدا قبل الفرح بأيام بسيطة...
كنت مبسوطة اني اخيرا خلصت ف مفرقش معايا كلام الناس ولا قلق اهلي م اني بقيت بحمل لقب مطلقة قبل فرحي بأيام وسمعت كل الكلام المقرف اللي بيتقال ع البنت سواء هي كويسه او لا..
كنت انا اول واحده ف اصحابي تتخطب ومع ذلك م بعد طلاقي كل اللي حواليا اتخطبوا واتجوزوا وخلفوا وانا م وقت طلاقي مفيش حد دخل بيتي نهائي.. كانوا بيترفضوا م بره لان كلهم تقريبا كان سبق ليهم الزواج وعندهم اطفال ومنهم اللي كان عاوزني زوجه تانيه.. بس والدي كان بيرفض...

كنت بسمع كلام زي السم م اصحابي اللي هما المفروض مقربين ليا.. بس كنت بقول عادي وبردد زي ناس كتير م بيرددوا ان اللي بيرموا دبش دول مفيش اطيب م قلبهم بس الكلام كان بدأ يزيد عن حده ف بدأت شويه بشويه اتجنبهم بس مجرد م واحده منهم تكلمني ارجع اتكلم معاها طبيعي زي الاول ولا كأنها هانتني قبل كدا ولا اي حاجه خالص منهم واحده كانت بتشتغل ف صيدلية قريبه م بيتي.. كنت بنزل كل يوم آخد منها بنتها اللي لسه عندها شهور تقعد عندي بدل م تتمرمط مع صاحبتي ف الصيدلية خاصة ان جوزها نفسه رافض انها تقعد م الشغل بحجة ان المصاريف والحمل تقيل عليه وعادي مش فارق معاه بنته وولا والدته ولا والدتها بيساعدوا معاها ف كانت الطفله تصعب عليا وبقيت اخدها عندي وانزلهالها اخر اليوم..
وفي مره كنت واقفه معاها ف الصيدلية لقيت الدكتور صاحب الصيدلية هناك ومعاه واحد كمان.. وقفت اتكلمت معاها شويه لقيت الشخص التاني دا خارج ف قال سلام عليكم.. هي ردت قالت وعليكم السلام يا دكتور بسام.. ف انا قولتلها هو داااا بقى دكتور بسام اللي انتِ بتتكلمي عليه ع طول وان مفيش ف جماله و..و...و..الخ
بس تصدقي طلع عندك حق.. وهو بقى لسه مخطبش ولا اتجوز ولا ايه؟
انا كل دا بهزر بس لقيتها بصتلي بطريقه وحشه جدا وقالتلي عينك والراجل ي حبيبتي ومتفكريش ولا تحلمي اصلا.. قولتلها ليه يعني ان شاء الله😏
قالتلي: لانه ابن ناس أوي وعمره م يبص لاشكالك..

عاوزه اقولك بقى ان الكلام فعلا كان طالع بغل وضيق بس انا مكانش ليا رد فعل غير اني قولتلها ع اساس اني بنت ايه يعني؟ وقولت يارب لو ليا نصيب فيه هاته وعرفها اني بنت ناس بردو
حاولت افك الجو وشويه ومشيت(ولو هتلومي عليا في تصرفي احب اقولك ان دا كان رد فعلي مع اي حد بيحصل معاه تصرف بيضايقني مش عارفه دا تسامح مني ولا دي سلبيه)..
وتاني يوم كالعاده نزلت ف نفس المعاد اخد منها البنت بس بعد 3 ايام لقيتها بترن عليا وبتقولي متعديش عليا ف الصيدليه تاني ولما سألتها ليه قالتلي كدا وخلاص وقفلت ف وشي حاولت ارن تاني مردتش.. فضلت اسأل اصحابنا هي مالها مفيش حد يعرف نزلت الصيدليه وانا هتجنن وعماله اسأل نفسي هو انا عملت ايه بس للأسف اول م شافتني اتكلمت بإسلوب سئ جدا ومفهمتش منها حاجه بس قولت يمكن متخانقه مع جوزها ف بتطلعه عليا ومش مشكله هسيبها كذا يوم وابقى اكلمها تاني.. بس ع اخر الاسبوع كنت فهمت سبب قلبانها عليا !!

متفهميش بقى ليه وازاي وايه اللي حصل بس دكتور بسام دا اتقدملي طبعا اهلي كانوا طايرين بيه ومش مصدقين اصلا الأعجب بقى واللي بسببه ببعتلك قِصتي دلوقتي اني مشوفتش خالص ان ياااه بقى ربنا كريم وفرجها عليا واني المفروض احمد واشكر.. لا خالص ولا اي حاجه الامور مشيت طبيعي جدا وكانت فترة خطوبه صغيره جدا لان كل حاجتي جاهزة...
اتجوزنا وبمعاشرتي ليه اكتر عرفت ليه كانت صاحبتي دايما مبهوره بيه ودايما تتكلم عنه وطلع فعلا ابن ناس ومتربي واهله نفسهم كويسين فوق الوصف...
ربنا كرمني وحملت ع طول بس كان حملي صعب جدا ف هو كان ع طول بيساعدني ف ترتيب الشقة وكان هو اللي يقف يغسل الاطباق وينشر الغسيل وولا مره حسسني انه بيعمل جمايل مثلا لا خالص كان بيتصرف وكأن دي طبيعته ومكانش بيعرف يعمل أكل ف كان يقولي اقعدي بس ع الكرسي معايا ف المطبخ وقوليلي احط ايه ع ايه وبس..
ووالدته ربنا يكرمها كانت ع طول تبعتلي اكل مع حد او معاه او تيجي بنفسها وتقولي لا اجي عادي ولا تاكلوش اكل بايت وانتِ حامل يعني اتنين في بعض لازم تتعذوا كويس..
انا والدتي معملتش معايا اللي حماتي عملته ولا حتى نصه والله.. جوزي دا بقى شاف مني ايام صعبه جدا وكان يفضل يدادي ويحايل واتحمل كتير جدا وشاف مني كتير ولا عمره اشتكى بالعكس كان بيصد اهلي ف الكلام لما يقولوا عليا بتدلع..
ورغم كا دا كنت بتكلم عليه وع اللي بيعمله قدام اصحابي وكأنه حاجه عاديه جدا وبردو لا كنت بحمد ولا بشكر وولا حتى كان عندي احساس بقيمة النعمه اللي ربنا رزقني بيها م غير حول مني ولا قوه..
هو حذرني قبل كدا م اصحابي خاصة صاحبتي بتاعت الصيدليه وحكالي انه كان سألها عني بعد المره اللي شافني فيها وهي صدته وقالتله كلام سئ واني مطلقه وبلا بلا بلا ولولا الدكتور الله يباركله صاحب الصيدليه اللي هو ف نفس الوقت صاحبه قاله متسألش بنت ع بنت زيها حتى لو هما اصحاب سهل الشيطان يدخل بينهم...
انا للأسف مكنتش بسمع كلامه ومكمله ف معرفتي ب اصحابي اللي مكنتش اعرف ان هو معاه كل الحق وان في ناس بقى ف قلوبهم مرض اسمه الغيره والحقد ناتجين عن حسد...

لحد رمضان اللي فات كنت انا واصحابي بنفضل كتير نتفق هنتجمع كلنا امتى وكل م نتفق ع يوم يحصل حاجه ومننزلش لحد م اتفقنا نتقابل بعد صلاة التراويح وياريتنا م كنا اتفقنا وياريتني لا كلمتهم ولا شوفتهم!!

اتفقت مع جوزي ف قالي تمام انا هقعد مع اصحابي وانتِ براحتك مع اصحابك ووقت م تخلصي رنيلي بس وهعدي عليكي..
اتقابلت معاهم فعلا وكان كل اللي فات بنتكلم في جروب شات واتساب واول مره نتقابل م فتره كبيره..
ف كالعاده كانوا بيشتكوا م ازواجهم وانا كعادتي بتكلم عن تعامله معايا وخوفه عليا لدرجة انه لو في الشغل ورن اكتر م مرتين ومردتش ي بيكلم حد م جيراني ي بيرجع بسرعه م الشغل يطمن عليا لاني زي م قولتلك حملي متعب وكتير كان بيحصلي اغماء..
ف واحده صاحبتي قالتلي مش بناخد منك غير كلام واستحاله يبقى في راجل ف الدنيا ربنا خلقه ع وجه الارض بيعمل كل اللي بتحكي فيه دا.. ولما قعدت احلف واحده تانيه قالتلي طيب يلا اثبتي وكانت فكرتهم اني ارن عليه واقوله اني تعبانه ومقولش حتى انه ييجي وواثقه انه هيجي بسرعه.. ف واحده قالت لا لو سمع صوتك ممكن يحس انك مش تعبانه ولا حاجه احنا واحده منا تكلمه م عندك وتقوله انك اغمى عليكي ف انا قولتلها اه ماشي تمام وبصي قوليله هي اغمى عليها ومش عارفين مالها وشكلها #بتسقط!!
متسألنيش ازاي قولت حاجه بشعه زي دي ولا ازاي طاوعتهم اصلا..
عملنا كدا فعلا وي حبيبي اتخض جدا وفضل يكلم صاحبتي ويقولها طيب في مستشفى قريبه منكوا روحوا هاتوا دكتور او اتصرفوا وبقى يصرخ وقالها خليكي معايا ع الخط لحد م اوصلكوا
وانا صاحبتي فاتحه الاسبيكر وكله كاتم نفسه انه يضحك وشويه والخط قطع
استنينا انه ييجي مجاش قعدوا يتريقوا شويه ف برن عليه مش بيرد فضلت ارن لحد م حد رد وقال ان صاحب الموبايل دا عمل #حادثة بالعربية !!

ربنا اداني نعم كتيييير لدرجه لا تتخيليها انا حياتي حرفيا كانت عباره عن نعم م ربنا كنت كل م اقع ف حاجه يخرجني منها برحمته ولطفه وكان كريم معايا فوق الوصف ولاني لا عمري شكرت ولا حمدت كان لازم واقفه ورادع ليا وبدأت الاقلام تنزل ع وشي تفوقني ع شكل ابتلاءات وحياتي اخدت منحنى تاني خالص!!

جوزي في غيبوبه م رمضان اللي فات لسه مفاقش.. اجهضت جنيني
ف في لحظة وبكذبه بسيطه لمجرد اني ارضي غرور بنات الغيره عمتهم وبجهل وغباء مني ضيعت اغلى اتنين ف حياتي زوجي وجنيني 💔
لما بشوف والدته وهي عماله تحضن وتصبر فيا ببقى عاوز اصرخ واقولها انا مجرمه انا السبب في كل اللي حصل دا انا اللي مستحقش اني اعيش اصلا..

انا كنت م زمان ي مبصليش ي بصلي متقطع بس طول م جوزي في البيت اتعودت معاه ع الصلاه بس مكنتش لسه اتعلقت بيها كانت زي الروتين
لحد م كل دا حصل بقيت اتمنى ان اليوم كله يكون صلاه واسجد واتذلل لربنا يردلي جوزي م تاني واني خلاص اتعلمت الدرس..
انا لما واحده قريبتي عملتلي منشن عندك قبل كدا وقالتلي اللي في القصه دا شبه جوزك ازاي في تصرفاته قرأت الكومنتات بلا مبالاه وقولت كل دي بنات منبهرة بشويه حاجات عبيطه ممكن اي راجل يعملها..مكنتش اعرف ان انا اللي عندي عمى قلب وبصيره لدرجة ملاحظتش الجوهرة والكنز اللي ربنا رزقني بيه...
عارفه اني شخصيه مش كويسه ومستاهلش ضفره حتى.. وهتحمل اي كلام يتقال وحش عني بس بالله عليكي ي هدير نزليها عندك انا عارفه ان قصصك اخرها فرح كلها وجبر ودي كلها استفزاز وحزن ونكد بس بالله عليكي تنزليها وتخلي كل اللي عندك يدعي لجوزي يفتح عينه م تاني ويشفيه ويعافيه وانا يارب اتعلمت وراضيه ب ابتلائي في جنيني بس جوزي يرجع م تاني ياارب وبعتذر لو طولت...
🎀🎀🎀🎀🎀🎀🎀🎀🎀🎀
آسفه لو المرادي النهايه فيها نكد رغم اني متأكده ان ربنا ان شاء الله هيجبرها ويشفي زوجها لان الغرض م الابتلاء اتحقق خلاص وهي اتعلمت الدرس
بس لعل القصة النهارده فيها عبره وعظة لكل شخص فينا ان مهما كنت شايف حياتك بائسة بقى او حتى عادية ف لا انت ربنا اكييييد مديك نعم كتييير ف الحق احمد واشكر قبل م تُبتلى رغم انك اصلا كدا مبتلى بعمى القلب والبصيرة...
حوالينا نعم كتير وادعيه كتير بتستجاب لكن للاسف معظمنا بيقف عند دعاء معين لسه اوان استجابته مآنش ويفضل يدبدب ف الارض برجليه ويقول انه خلاص يأس وان دعاءه مش هيُستجاب وان ربنا مش بيحبه...الخ لحد م اليأس م رحمة ربنا يتملك م قلبه ولحد م الشيطان يعمي عينه عن كل نعم ربنا اللي حواليه..

وبطلوا بقى تحكوا اللي بيحصل في بيوتكوا لحد قريب او غريب العين نفسها بتحسد صاحبها 🤦‍♀️

ومهما كانت حياتنا فيها ايه ف ربنا يستحق الحمد والشكر لآخر نفس في حياتنا...

#حكاوي_هدير
#هدير_ابراهيم