قصص واقعية (لهدير ابراهيم)

ولم_أكن_بدعائك_ربِ_شقيا

صلوا على رسول الله

#ولم_أكن_بدعائك_ربِ_شقيا !!

مين فينا ممرتش عليه لحظة يأس م طول مدة الابتلاء أو صعوبته !! اعتقد اغلبنا ان مكانش كلنا..
بنفضل نواسي بعض بإننا لازم نصبر بس ف اعتقادي ان #الصبر هو حرفياً أصعب حاجه ممكن نعيشها ف حياتنا !!
🎀🎀🎀🎀🎀🎀🎀🎀
يوم السبت 12 رمضان وانا راجعه البيت بعد صلاة التراويح سواق الميكروباص ركن ع جنب قبل البنزينه واللي كانت زحمه جدا رغم ان دا تاني يوم بعد البنزين م زاد سعره
كل اللي ف العربيه بدأوا يفكروا ان اللي نازل قريب ينزل ويكمل مشي وفي وقت م الكل بيتكلم سمعنا صوت واحده ست بتقول تعالى ي #عُمر هنا ولحظة صمت بعدها لقيت الكل مركز مع ذاك العُمر اللي بيتحرك م آخر العربيه لأولها.. طفل عنده حوالي 9 سنين بس تبارك الله شدة جماله تخرس أي حد وتخليه مشدود ليه بس
ومش دا بس العامل الوحيد اللي ساعد ع الصمت لا طريقة الحوار اللي دارت بين الست دي والولد تشد
هي كانت بتقوله ايه رأيك احنا خلاص قربنا ع أول البحر ف ننزل نتمشى ولا نستنى !
ردت بنت صغيره كانت بتاكل صن بايتس انها عاوزه تنزل تتمشى شويه.. وبعدها ركزت مع الصن بايتس وسكتت.. بس كان رد الولد للست انه مش عاوز يتعبها علشان رجليها متوجعهاش وبيسألها لما ننزل هندخل م شارع البورصة ولا م الخان وعمال يحلل الشارع دا هيكون زحمه ف لا هتتعبي نحاول نمشي م دا وهكذا..
وهنا في واحده مقدرتش تكمل صمت معانا وسألتها : هو دا ابنك ؟ هما دول ولادك ؟
الست ضحكت وقالتلها: باين عليا جدتهم مش مامتهم ولا هما اصلا مش شبهي !
قالتها: لا مش قصدي بس قليل ف الزمن دا نلاقي طفل بيتعامل مع مامته ماشاء الله بالطريقه دي وبالعقل والرزانه دي دا انا حاسه اني بربي قرود في البيت..
ردت الست وقالت انهم جايين بعد شوقه وع كبر اصل انا عندي 52 سنه!
وهنا الكل بدأ يتشد اكتر وكل اللي كان مقرر ينزل وكأنه اتمسمر في مكانه
وحكت الست انها اتجوزت وهي عندها 18 سنه لكن ربنا مكتبلهاش الخلفه ع طول وان كل اللي اتجوزوا بعدها حتى لو ب وقت طويل بقى عندهم بدل الولد أربعه وهي لسه رغم ان مفيش عندها م يمنع الخلفه لا هي ولا زوجها
وهنا انا اتدخلت وسألتها: هو نفسه والد الطفلين ؟ (مقدرتش امسك لساني ونسيت ان دي مش قصة جيالي ف المسجات) 🥴
ضحكت وقالتلي تصدقي بالله انا بعد م دوخنا ولفينا 3 سنين عند الدكاتره قولت انه هيطلقني او هيقولي انه عاوز يتجوز تاني يمكن معاها يخلف ودا اللي مش بس والدته كانت بتزن عليه بيه لا دا كان كل القرايب حتى الجيران ورغم ان معنديش عيب يمنع ان انا كمان اخلف بس معروف ان ف مجتمعنا العيب دايما م الست 🤷‍♀️ بس الغريبه بقى اني سمعته مره بيكلم والدته بيقولها انه راضي بقضاء ربنا وانه يخاف يتجوز واحده تانيه ميحسش معاها اللي حاسه ناحيتي ف يرجع يندم عليا
وانا والله ي بنتي ولا كنت اعرف هو ايه دا اللي حاسه ناحيتي يخليه يتمسك بيا اوي كدا بس الأهم اني ناويت م وقتها اشيله فوق راسي وفي عنيا ولما سألته بعدين قالي انه حاسس معايا براحه وانه مشافش مني حاجه وحشه تخليه ينفصل عني.. وكأن ربنا رايد ان كل واحد فينا يصبر التاني وكأن بردو كل واحد فينا النص اللي ربنا خلقه للتاني ف عشنا سوا عمر طويل قليل اوي لو حد منا اشتكى م التاني
وهو راجل يعرف ربنا وبيتقى الله بأمانه لدرجة ان لما سلايفي اللي هما مراتات اخواته وكمان اخواته البنات ووالدته كانوا بيضايقوني وبيسموا بدني بالكلام قرر نسيب شقتنا الواسعه الملك ونقعد في شقه ايجار وعلشان زي م قولتلك بيتقي الله ف خدنا شقه قريبه م والدته بحيث يقدر يروح يطمن عليها اي وقت ومحدش يقول اني خدته منهم...
العشرينات م عمري خلصت ودخلت ف التلاتينات وانا الأمل بدأ م جوايا يضعف ويقل اني ممكن في يوم ابقى أم 💔
عملت كل حاجه ممكن تخطر ع بالك اكبر دكاتره في كل مكان وروحنا شيوخ وروحنا دجالين وبردو روحت صدقات وطلعنا سور معينه م القرآن او ادعيه وقرينا وبردو مفيش فايده وخلاص سن التلاتينات بيخلص وداخله ع الأربعينات ومعاها اليأس بيتمكن مني وم قلبي وكلام الناس بينهش فيا لدرجة اني بقيت اخاف احتك بالناس وقليل لو نزلت الشارع
ودخلت خلاص الأربعين ومعاها كل الأسباب انقطعت وقلبي استسلم للخوف والضعف اكتر وبأمانة ربنا لولا وجود جوزي من كتر اللي سمعته م الناس كان زماني موت نفسي بسبب الحاله النفسيه اللي كنت بدخل فيها..
كنت اصلي واعاتب ربنا في السجود واقوله اشمعنى انا..وارجع بسرعه استغفره واقوله انا بس نفسي أكون أم نفسي اشيل طفل واضمه لحضني ويكون ابني انا مش ابن واحده تانيه مجرد م اجي المسه تجري بسرعه تاخده والناس تخبي ولادها مني ع اساس عنيا وحشه وهحسدهم 💔 والله والله كنت بدعي ربنا اني مش عاوزه اموت وانا لوحدي واخاف حد منا انا او جوزي نموت ف التاني يفضل لوحده واحنا خلاص بنكبر في العمر..
كل رمضان كنت بنزل اصلي التراويح في المسجد ولما كنت اسأل واحده م جيراني او قرايبي لو هتنزل تصلي تروح رميالي جملة " م هو انتِ معندكيش لا عيل ولا تيل بقى وفاضيه" !!
بطلت اسأل وبطلت اكلم حد انزل مع جوزي وارجع معاه وكنت كل م ايأس م تكرار الدعاء واقول مش هدعي اول م راسي تلمس الارض الدعاء قلبي بيردده قبل لساني ولما كنت اسمع ان الدنيا بتمطر اجري اقف في الشباك وادعي.. الساعه اللي قبل الفطار ف رمضان كنا نقعد انا وجوزي والله كانت عنيه بتدمع ع عياطي ونقعد ندعي ويفضل يقولي متخافيش والله ربنا ليه حسابات تانيه غير البشر..
لحد م جه رمضان معين كنا لسه اول ليلة تراويح وبعد صلاة العشاء قولت بكل هدوء للناس اللي معاها اطفال يحاولوا ياخدوا بالهم م صوتهم وحركتهم وان دا ميرضيش ربنا ويقعدوا بيهم ف البيت او يسيبوهم لحد لأن الولاد اللي كان بيصرخ واللي يعيط واللي يجروا قدامنا ف قولت اكيد الناس هتأيد كلامي بس للأسف سمعت منهم كلام صعب جدا منه ان ايه تسيبهم مع حد دا هو علشان معندكيش عيال ف متعرفيش قيمة الضنا ؟
انا م الهجوم عليا كنت مصدومه ولساني منطقش حرف ومش قادره استوعب اللي بيحصل
نزلت م المسجد م غير م اصلي سُنة العشاء حتى ورجعت البيت قعدت ع سجادة الصلاه مش بصلي انا كل اللي بعمله اني عماله ادعي ربنا واعيط
جوزي رجع لقاني بالمنظر دا جري عليا وقعد يقولي احتسبي كل دا عند ربنا وفضل يطبطب عليا ويقرا قرآن لحد م نمت
قررت بعدها مش هنزل اصلي في المسجد وجوزي بقى كل يوم يتحايل عليا وانه تغيير بس جو بدل م تقعدي ف البيت لوحدك وانا ابدًا
لحد يوم 28 رمضان قالي رمضان خلاص بيودع ومين يعيش للجاي تعالي ننزل وانا هروح معاكِ مسجد تاني .. قعد يحايل فيا شويه لحد م وافقت وروحنا فعلا مسجد بره المنطقه بتاعتنا
صلينا العشاء والسُنه وبدأنا ف التراويح عادي جدا لحد م وصلنا للركعه رقم 7 واول م الشيخ قال بسم الله الرحمن الرحيم كهيعص كنت هقع م طولي
دي سورة #مريم اللي كنت كل م ايأس اقرأها واعيط علشان فيها معجزتين حمل
دعاء سيدنا زكريا وحمل زوجته العاقر بعد كبرهم في السن وكمان معجزة حمل ستنا مريم
عقلي مكانش مستوعب ان الشيخ مكملش السوره اللي كانت ف الركعات اللي فاتت وكمل الركعتين ال 7 وال 8 بمريم سامعه الآيات ودعاء سيدنا زكريا " هب لي من لدنك وليا" واعيط بحُرقه
واول م الشيخ سلم سألت اللي جانبي هو الشيخ مش بيمشي بترتيب السور قالتلي لا الشيخ بيمشي بختمة رمضان وبترتيب المصحف
استغربت وقلبي كان بيدق جامد ولسه مش مستوعبه خلصنا الركعتين وجينا عند ركعة الوتر والدعاء وهنا مستحملتش وقعدت ع الارض الشيخ دعا بإن ربنا يرزق كل مشتاق الخلف الصالح والذريه الصالحه ب 3 أدعيه مختلفه !
سلمنا م الصلاه واللي حواليا مش فاهمين مالي ولا سبب بكائي ولما رجعت سألت تاني هو الشيخ غير حاجه ف الدعاء بتاع كل ليله قالوا اه شويه.. والناس كانت بتتعامل عادي ولا كأن حد فرق معاه سورة مريم ولا التغيير اللي ف الدعاء
هنا ولأول مره ف حياتي حسيت ان ربنا بيكلمني أنا
مكنتش مصدقه نفسي وفضلت اسجد ف الارض واقوله اخيرا يارب رسالة منك ليا ولقلبي اخيرا يارب كلمتني ورديت عليا
نزلت لجوزي اجري ع السلم لقيته هو كمان عنيه باين عليها انه كان بيبكي.. فضل ماسك إيدي واحنا راجعين ويطبطب بالراحه عليها ومفتحناش كلام خالص ف اي حاجه طول الايام اللي بعدها وبقيت م اصدق الاذان يأذن واجري واقول انا جايه اكلمك اهو يارب...
تالت يوم العيد جات البشاره وعرفنا اني حامل ودي كانت اول مره اشوف جوزي بيبكي بالطريقه دي
دا اول م عرف بالحمل سجد ع الأرض وفضل يبكي ويقول يا م انت كريم يارب مخيبتش ظننا ولا رديت دعانا ولا كسرت قلبنا وجبرت خاطرنا يارب..
قعد يبكي وكأنه كان محوش البُكا السنين اللي فاتت دي كلها...
وشوفوا بقى ربنا لما بيعطي عطاءه ملوش آخر عرفنا قبل م عُمر يكمل سنتين اني حامل تاني والناس بقت تضرب اسداس في اخماس
واتمنيت اجيب بنت وبعدين قولت هو انا كنت طايله لا يارب اللي تجيبه كله انا راضيه بيه وبعدين رجعت قولت اللي استجاب دعاكِ وجبر خاطرك بعد 25 سنه دعاء قادر يجبر خاطرك ويستجيب دلوقتي وقد كان والحمد لله جات البنت وبقوا هما عكازي انا وجوزي وكأن ربنا وضع فيهم حنان وحب الدنيا كلها لينا وكأنهم بيعوضونا ع كل الأيام الصعبة اللي شوفناها م غيرهم وحضنهم بيمحي اي اثر للوجع والحمد لله مفيش حد شافهم الا واتمنى خَلَف زيهم ❤
🎀🎀🎀🎀🎀🎀
هنا انتهى الكلام وف نصه اصلا السواق كان رجع العربيه وحرفيا اتخض لان الناس كلها ف صوت واحد قالوله استنى استنى انزل مش دلوقتي الراجل كان هيقطع الخلف م الخضه 😂
وحتى لما وصلنا أول البحر المفروض كان نص العربيه نازل والسواق نزل علشان يحمل ناس جديده الناس فضلت قاعده لحد م هي كملت ونزلت وقفت ف الشارع وممشيتش غير لما السواق كان شويه وهيشتمنا وهو مش فاهم اي حاجه..
ودي كانت م اجمل المواقف اللي قابلتها ف حياتي..
واول م نزلت م العربيه رنيت ع #نور صاحبتي لان قبلها بليلة وبعد صلاة التراويح بردو كنت بتكلم معاها ع ان اغلب الناس بتتكلم ع حبها لسورة يوسف الا انا بحبها اكيد بس لسورة مريم وخاصة استجابة دعاء سيدنا زكريا ليه مكانه خاصة ف قلبي
لأن الأسباب حرفيا كلها اتقطعت وهو وزوجته كبروا جدا ف السن وكمان زوجته عندها عقم
ف مفيش أي سبب نهائي يخلي حد عنده امل الا ان ربنا ضربلنا بيه ابسط مثال ل إن #الدعاء حقيقي قادر يغير القدر وان مستحيل حد يشقى مع الدعاء وحسن الظن بالله مهما مرينا ب ابتلاءت واوشك قلبنا ع اليأس الدعاء دايما بيكون هو #طوق_النجاه 💙

#حكاوي_هدير
#هدير_ابراهيم