قصص واقعية (لهدير ابراهيم)

قبل فوات الاوان

خلاص فكرتوا واخدتوا قراركم دوري اني اقولكم انا عملت ايه !!
الإنسان لما بيرجع لفطرته ويسيبها هي اللي تتحكم فيه بتلاقيه تلقائي وفي ازماته بيلجأ لربنا حتى لو كان بعيد طول حياته عنه .. ودا اللي عملته مش بتفكير مني لكن لقيت رجليا بتاخدني لمسجد ما ودي كانت اول مره ادخل مسجد !!
صليت من غير وضوء حتى، ودخلت وقفت زي م الناس واقفه وكنت بعمل نفس الحركات زيهم، انا مش عارف اقول ايه ولا ادعي حتى بإيه، بس لما خلصنا صلاة قعدت شويه لقيت شخص وقاعد حواليه مجموعه وبيتكلموا، ولقيت في مكان قريب مني قاعد الشيخ اللي كان بيصلي بالناس.. قربت منه وانا متردد وسألته، سألني سؤالين قبل م يرد عليا الاول كان في بينك وبينها اطفال !؟ قولتله لا رغم اننا متزوجين من سنه ونص  ، السؤال التاني هل بتحبها، جاوبته انه برده لا.. ف قالي خلاص طالما مفيش لا اطفال ولا حب م بينكم يبقى تسريح بإحسان وطلقها !!
سابني ومشي وانا فضلت قاعد مكاني شويه وانا خلاص قررت انفصل عنها زي م الشيخ قالي، وفي لحظه لقيت واحد بيقول عندك سؤال رديت عليه بسرعة وباستغراب : ايوه عندي.. الشخص دا بصلي وكان هو نفس الشيخ اللي قاعد حواليه ناس بيتكلموا، لقيته بصلي وضحك وقالي تعالي اقعد جانبي .. قربت منه وقولتله نفس اللي قولته للشيخ التاني، بس دا رده عقدلي الدنيا اكتر !!
قالي انه ميقدرش يقولي انفصل عن زوجتك ولا يقدر يقولي كمل معاها لان هو مش مُلم بتفاصيل حياتي، وان مهما كان ف هو سمع من رأيي أنا ونظرتي للموضوع، بس سألني : هل شوفت من زوجتك اي حاجه تزعلك او تضايقك !؟ هل تمردت عليك قبل كدا او تطاولت عليك!؟ هل لما اتأخر امر الانجاب فتره قالت ان العيب منك مثلا!؟ والاهم من كل دا هل انت حاولت تجرب تعيش معاها الحياه اللي انت بتتمنى تعيشها وهي رفضت ولا محاولتش اصلا وقررت انها نمطية زيك وبس !! الموضوع مش سهل ولا هين لان بقرارك ممكن تظلم شخص معاك .. واقترح عليا اعمل صلاة استخارة وطبعًا انا كنت وضحتله علاقتي بربنا كامله ف قالي انه هيعلمني اصليها ازي، شرحهالي وكرر عليا الدعاء بتاعها اكتر م عشر مرات لحد م حفظته ف قالي طالما حفظته قوم صليها دلوقتي ...
سكت شويه وبعدين سألني انت متوضي !؟ قولته بصراحه لا !!
الراجل اتعامل معايا بطريقه راقيه جدا ولقيته قالي تعالى معايا دخلنا مكان الوضوء وقالي زي م بعمل اعمل انت كمان بالظبط، هو استنتج اني معرفش الوضوء او مش هتقنه، لكن الحقيقه اني ولا مره اتوضيت في حياتي ودي كانت المره الأولى !!
عملت زي م هو عمل بالظبط ورجعنا المسجد قالي هتقف في الصلاه تقول في الاول كذا وتعمل كذا، وبدأ يعلمني وكأنه بيعلم طفل صغير لكن حقيقي كان ليه طولة بال رهيبه ...
خلصت صلاة زي م هو علمني ، وقالي اواظب عليها لايام لوقت م الاقي نفسي مرتاح لامر م الاتنين او هلاقي ربنا فاتحلي باب فيهم وميسره وقافلي الباب التاني.. ولما سألته طيب ممكن معرفش باردو او مفهمش اللي بيحصل معايا واتلغبط اكتر، ف طلب مني لو حصل حاجه او حسيت حاجه معينه هو بيكون في المسجد اوقات كذا وكذا اروحله واقوله ونشوف ايه اللي هيحصل، المهم انه وصاني اواظب ع الصلاة نفسها بجانب صلاة الاستخاره وعلمني كل صلاه منهم كام ركعه وكيفية صلاتهم .. مستغربه امري !؟ اللي جاي اغرب ..