قصص واقعية (لهدير ابراهيم)

لم يخلقنا ليعذبنا

وقد كان الإبتلاء في #الطاعات و #الصحة و #الرزق في نفس الوقت ومكنش ليا لوحدي كان لأسرتي كلها !!!!

الموضوع بدء من شهر 8 سافرنا اسكندريه و اما رجعت تعبت جالي #ميكروب في معدتي اسبوعين مش عارفه اكل او انام طول الليل صاحيه من الوجع والكل نايم نفسي انام مش عارفه ،
مش عارفه انزل من البيت وكان عندي محاضرات لمادتين همتحنهم اخر الشهر و مكنتش بقدر أصلي وانا واقفه وجالي جفاف في معدتي المهم الاسبوعين عدوا الحمدلله وكنت بقول انها اصعب فترة في حياتي مكنتش اعرف ان اللي جاي اصعب ..انا بقالي سنتين مباكلش بليل شاء ربنا في يوم ان آكل بليل من بره علشان اتعب ، جاتلي #الحمى_المالطية وتعبت من تاني يوم بالظبط قبل امتحاناتي بأسبوعين
أعراض الحمى دي بتظهر على فترات وكل مرة الأعراض بتزيد بعرض بجديد تقريبا كل يوم كنت بروح لدكتور غير التاني ومحدش عارف عندي ايه وكل دكتور بتشخيص شكل ،
شويه تعب في المعدة وشويه ضغط وشويه ضغط نفسي وشويه ضغط الامتحانات وانا حرفيا بموت محدش حاسس انا بحس بإيه او بيجرالي ايه غير المولى سبحانه وتعالى حتى الدكاترة يوم تعبت في الفجر ونزلت للدكتور قعد يقولي إنتي بتدلعي وانا درحة حرارتي 40 من العشاء للفجر وقعدت فترة الكل شايف انه تعب #نفسي بدأت أفكر في #الموت كتير بشكل صعب وكل دقيقه حاسه اني هموت وفعلا كنت بحس روحي بتتسحب مني كنت بخاف انام ليجيلي التعب وانا نايمه فأموت هما كل ده شايفين انه تعب نفسي واني بركز في كل حاجه بتحصل ميعرفوش انا بحس بإيه لحد ما وصلت ل الليڤيل اللي هقابل فيه الوحش المرحلة الأخيرة من الاعراض بقيت بتجيلي الاعراض كلها توتر و قلق و ضربات قلبي سريعه بشكل ميتوصفش الوجع اللي بيكون في جسمي مبيخلينيش استحمل حد يلمسني
معدتي بتتقطع حرفيا مفاصل جسمي وعضمي وجع طول الوقت وسخونيه مبتنزلش خالص ومفيش مجهود لو شيلت كوبايه لحد المطبخ بنام طول اليوم وطبيعي مفيش تركيز ولا طاقه للمذاكرة وكنت دخلت السنه الجديدة ولا ميدتيرم دخلته وحليت مبعرفش اذاكر أصلا وانا في كلية عملية محتاجه مذاكرة طول الوقت والامتحان اللي بذاكرله بتعب في اللجنه واسيب الورقه واخرج وامتحانات اتعب الصبح جامد مقدرش انزل من البيت وقررت اني مش هكمل امتحانات الترم اصل الترم كله ضاع مني بس ربنا شاء إني أكمل الإمتحانات للأخر 
الفترة دي كلها كانت اربع شهور معرفش فيهم انا عندي إيه لحد شهر 12 الحمد لله ربنا شاء ان التعب اللي عندي يتعرف هو ايه مش هنسى اليوم ده لإن فعلا أخر طاقه فيا استنفذت في اليوم ده من الفجر للعشاء السخونية مبتنزلش متغطية بحاجات كتير اوي وهموت من البرد مش قادرة اقف او ادوس على رجلي وكان في نسبة صديد وجعها ظهر في اليوم ده كنت مفكرة اليوم ده مش هيعدي غير وانا ميته لكن ضاقت فلما استحكمت حلقاتها فرجت وكنت أظنها لا تفرج !!
روحت لدكتور تاني وعملت تحاليل وعرف التشخيص وابتديت العلاج اللي مدته شهر ونص غير ال 4 شهور اللي فاتوا العلاج كان بيكفيني لمدة اسبوع بس فلازم اشتريه الاسبوع اللي بعده وكان غالي او في الفترة دي كان بالنسبالي غالي لسبب هذكره بعدين ..
كل ماكنت بتعب والتعب يزيد كنت بدعي ربنا يجعله تكفير لذنوبي ورفعه لدرجاتي كنت بكلم ربنا واقوله اللهم لك الحمد انا راضيه واكتر من كده بكتير والله راضية وفعلا كنت راضية وكل مرة كنت بفتكرها النهايه واني هموت من كتر التعب اللي بحس بيه مكنتش بقدر اصلي وانا واقفه وحتى وانا بصلي وانا قاعده كنت بتعب جدا وضعيه النوم كانت بتكون اقل تعب من أي وضعية تانيه كان نفسي بس يكون عندي طاقه عشان أقدر أصلي وانا واقفه الحمى من اشد اعراضها انها بتدمر النفسية وبتعمل قلق وتوتر وخصوصا بليل فمكنتش بعرف أنام ومكنش عندي نفس اعمل اي حاجه مكنتش عاوزة أصلي حتى بس مسبتش فرض والفجر كنت بقوم ربنا يعلم كنت بكون عامله ازاي كنت بعيط وانا بصلي مش قادرة اقعد محتاجة أنام وكنت بصلي القيام اما كنت بلاقي نفسي مش قادرة اقوم بأي طاعه كنت بفكر نفسي (والذين جاهدوا فينا لنهدينهم سبلنا )
  في نفس فترة تعبي دي أختي تعبت وبردوا مكناش عارفين عندها ايه وبعدين اتشخص تعبها على انه مرض #الذئبة_الحمراء واما عملنا التحاليل أكدت التشخيص طبعا كنا مدمرين نفسيا لان المرض ده بيدمر الكبد والقلب والعضم وفوق كل ده ملوش علاج قعدنا شهر في الموال ده لحد الحمدلله ربنا أراد ان كل ده يتغير والتحاليل اما نعيدها ميكونش عندها المرض ده طلع #روماتويد الحمدلله ارحم من الذئبة وإن كان مزمن بردوا ونفس فترة تعبي وتعبها يريد الله سبحانه وتعالى إن الاختبار يزيد وأبي يسيب شغله لكي أن تتخيلي كل ده مع بعض  وحتى اللي بتتسندي عليه يضعف هو كمان  ربنا كان بيعرفني إن هو #السند وهو سبحانه اللي سخرلي والدي سند ليا.. يوم ما ساب شغله كان كل اللي في بيتنا عشرة الأف جنية كنا اول الشهر قبل الشهر ما يخلص بخمس ايام كان بيتنا فيه أقل من ألفين جنية وكل اللي اتصرف كان علاجات و دكاترة وتحاليل بس كرم ربنا بينا فاق كل شئ بعد اسبوع ربنا رزق ابي بشغل اشتغل فيه شهر واحد كان متعب بشكل رهيب بس ربنا كرمه اخر الشهر بمكافأه كويسه الحمدلله بس بردوا راحت للعلاجات والحمدلله ربنا رزق أبي بشغل تاني هو تعب بردوا بس الحمدلله أقل تعب من التاني الحمدلله بس تقريبا مش بنشوفه وهو اللي كان بيذاكر لأخويا وطبعا مبقاش بيذاكرله وكنا عاملين حسابنا انه خلاص مش هيعدي الترم ده 
لو اتكلمت عن نفسية أمي وأبي في الفترة دي صدقيني مش هعرف أوصف اي حاجه
أمي شايفه بناتها الاتنين تعبانين ومش قادرة تعملهم حاجه ولا حتى عارفه هما عندهم ايه و ابنها خلاص هى عارفه انه مش هينجح او بمعني اصح الترم ضاع على اولادها كلهم !!
والدي خسر شغله اللي بقاله فيه ٢٥ سنة وفي نفس الوقت بيفكر اما الفلوس تخلص هكمل العلاجات والإلتزامات اللي عليا منين ومش عارف احنا عندنا ايه
كل ده من شهر 8 لحد م بدأ يظهر #فرج ربنا ...

كنت مفكرة ان الفترة دي مش هتعدي بس بردوا كنت عارفه ان ربنا رحيم و رحمته وسعت كل شئ ..

الحمدلله انا بقيت كويسه وخلصت فترة علاجي ونجحت والحمدلله بتقدير واخويا نجح بردوا الحمدلله
نفسيا بقينا أحسن  الحمدلله والمبالغ اللي اتصرفت على العلاجات ربنا كرمنا بأضعافها الحمدلله
والحمدلله خرجت من الفترة دي غير الاول #اقوى في الطاعات .. في القرآن .. في القيام .. بقيت مستشعرة مراقبة الله !!
ثباتي على الفروض في فترة تعبي وصلني لطاعات تانيه مبقتش اتفرج على التلفزيون الحمدلله بقيت محافظه على السُنن
حتى تفكيري في الموت بالشكل اللي كان موقف حياتي كان ليه حكمة وأظن انه من دعوة كنت بدعيها " اللهم اجعل الدنيا آخر همي والآخرة كل همي"
التفكير بالشكل ده الحمدلله وصلني دلوقتي إن أول ما وقت الصلاة يدخل أجري أصلي عشان الموت ممكن يجيلي دلوقتي ولو أخرتها بيكون لوقت الإقامة في المسجد ...
مش عارفه لو مكنتش مريت بالفترة دي بكل حاجه فيها تفكيري حاليا كان هيبقى كده ولا لأ ...
الخلاصة إن أمرنا كله #خير حتى الإبتلاء أو الحاجه اللي بتكون ضد رغبتنا فهى خير لينا لإن الرحيم هو مدبر أمورنا ...

معرفش انتي هتنزليها ولا لأومش عارفه بعتلك اللي حصل معايا ليه بس يمكن اللي خلاني ابعتلك ان البداية كانت من صفحتك زي ما قولتلك

احتمال كبير اني معرفش افتح نت لفترة فمش هعرف نزلتيها اصلا ولا لأ بس حبيت الرساله توصلك

*****************************************
خلقنا ليعذبنا !؟ حاشاه سبحانه ....
قِصة انهارده بتقول لكل واحد فينا احمد ربنا كتيييير ع ابتلاءك لانه اكيد اكيد اقل كتييير م ابتلاء غيرك ، وفي نفس الوقت بيطمن قلوبنا بقُربه وان مهما اشتد الألم والوجع والابتلاء ف دايمًا بيكون ابتلاءه #رحمه ولما بنعرف الحكمه م الابتلاء دا بنسجدله شكر حرفيًا عليه ❤
احنا #بشر اكيد اكيد بيمر وقت ع قلوبنا بنضعف جدااا لكن بعد مرور الابتلاء ولما بيحصل فرج ربنا بحس اني عاوزه افضل ساجده بس واقوله سامحني ع سوء ادبي معاك ، انت ارحم واحن من انك تعذبنا او تبتلينا بشئ منقدرش عليه ...

#ملحوظه 1 فضلا ياريت البنت صاحبتها تبعتلي مسج او تكتب كومنت هنا انا مقيمه في الكومنتس انهارده 🙈 حاولت ادور انا بس المسجات اللهم بارك بدخل فيها بتوه .. ف بعتذر لو هتعبك وبما اني بعتلك مسج لجروب الواتساب معنى كدا انك بتفتحي نت وانك سيبتيلي كومنت في بوست جروب الواتساب 🙈

#ملحوظه 2 مش مسامحه اي حد ياخد القِصه كوبي وينسبها لنفسه او ينقص منها حرف..  اللي ياخدها كوبي تكون كدا زي م هي معنديش اي مشكله ✋

#احبكم_في_الله ❤

صلوا علي الحبيب المصطفي