سافرت معاه السعوديه وبعد شهرين تقريبا اتنقل شغله ل #مكه.. فضلت افتكر وعد والدي بإننا هنروح نعمل حج سوا بعد تخرجي وقبل وفاته وقت م كان ف المستشفى لما كان بيهزر وبيقولي ان شكلي هروح مع زوجي مش معاه..
مكانش يخطر ع باله ولا ع بالي ابدا ان دا الزوج اللي هكون معاه !
علاقتي بربنا كانت اتأثرت جدا ف الفتره دي وزي م قولتلك دا كان اول اختبار حقيقي ليا م ربنا وانا سقطت وفشلت فشل ذريع ف الاختبار دا..
مجرد م نقلنا مكه قولت لعلها فرصه اني احاول ارجع احسن علاقتي بربنا م تاني تزامن مع دا معرفتي بخبر #حملي.. قررت اني هبدأ اتأقلم ع وضعي الحالي الا ان جوايا كان غضب وعدم رضا لا تتخيليه..
حاولت حاولت فعلا ادور ع اي رحمه لربنا ف التغيير اللي حصل ف حياتي بس مكنتش لاقيه خرم ابره حتى يدخلي منه اي رحمه !
قعدت معاه في مكه 6 سنين ملمحتش فيهم حتى ضل #الكعبة !!
ست سنين اجهضت فيهم 3 مرات.. ست سنين م الاهانه وعدم الاحترام والضرب !
اجهضت أول مره وانا حامل ف الشهر التالت م ضربه فيا.. كان بيضربني بكل غل وغضب ونقص..
قفل عليا ومكنتش بشوف الشارع ممكن بالشهور.. منعني م القراءه تماما كان بيتعصب كل م يلاقي ف ايدي كتاب ويفتكر اني بتعالى عليه.. كان ابسط تصرف او كلمه مني بيحسسه بالنقص وكان بيفسر دا بإن انا اللي متعمده احسسه ب دا !
حاولت كتير ارضى بالامر الواقع واقرب منه واقوله اني فعليا ماليش غيره ف الدنيا واحاول احنن قلبه عليا الا ان عقدة النقص اللي جواه كانت متمكنه منه وحسيت كأنه بيطلع عليا كل السنين اللي اترفض فيها م والدي واتأكدت م انه شخص مريض وغير سوي نفسيا انه استنى كل السنين دي لحد م يتمكن مني ويهيني ويعذبني !
اول مره ضربني فيها كان لسبب تافه جدا مسكني م شعري ورماني ف الارض ونزل فيا ضرب برجليه ف ضهري وبطني وصدري لدرجة انه حط رجليه ع رقبتي..
في كل مره كان بيضربني كنت بغمض عيني وفي وسط الألم كنت بتمنى م ربنا اني أموت بس كنت بدرك بعدها ان الموت ف حد ذاته رحمه ليا وانا الرحمه خلاص اختفت م حياتي !!
كنت بكره اني اسمع صوت مفتاحه ف الباب.. كانت بطني بتفضل توجعني كل م ابص للساعه والاقي ان معاد رجوعه قرب.. كان ع ابسط سبب بيضربني بالقلم ع وشي..
كل م كنت اشتكي لاهلي مكانوش بيصدقوني اصلا وازاي الملاك البرئ الطاهر اللي قدامهم دا يكون بيعرف يضرب ولا يشتم !
كان مربي لحيته والكل واخد فكره عنه انه ملازم للكعبه وع طول يعمل حج وعمره.. هو فعلا كان بيعمل حج او عمره بس دا وقت م حد يبقى جاي م قرايبنا م مصر يتقمص وقتها دور الواعظ والمرشد السياحي ليهم رغم اني ولا مره لمحته بيصلي ف البيت وولا مره فكر اننا نروح نعمل حج او عمره سوا او حتى سمحلي اني اروح لوحدي! المهم ان صورته هو قدام الناس تكون كويسه وان الناس ترجع مصر وهما واخدين عنه فكره مختلفه تماما عن حقيقته.. علشان كدا الكل كان شايفني مجنونه او مريضه لما بشتكي منه والكل بيكذبني..
علاقتي بربنا كانت عباره عن اني بصلي الفروض واوقات كتير كنت بقطع وببعد عن الصلاه وحتى لما بصلي مكنتش بدعي نهائي ولا قلبي كان بيبقى حاضر فيها..
مع الاجهاض التاني بسبب ضربه فيا بردو..بدأت افكر جديًا في الانتحار بس كنت اضعف م يكون لاني اخد خطوه زي دي..كنت بفضل اسأل ربنا هو انت بتكرهني ليه ؟ ليه بتعمل فيا كل دا ؟ امتى هفوق م كل العذاب دا ؟ وايه اللي حصل مني اصلا بسببه يحصل فيا كل دا ؟!!!
اسئله كتير م غير اي رد ولا اجابه.. عذاب وضرب واهانه وبس
كنت كل م ارجع مصر اجازه اوري والدتي اثار الضرب ع جسمي يمكن تفتكر اني بنتها وقلبها يحن او يرق..الا انها كانت ي تكذبني ي تقولي اكيد انتِ السبب وان ضرب الراجل لمراته تقويم وم الدين.. مهما كنت اجادل معاها مكانش بيبقى في نتيجة واخويا ضربني بالقلم مجرد م قولت اني عاوزه اطلق !
كنت كل مره برجع م الاجازه كارهه نفسي وحياتي اكتر.. ووصل بيا الجنون اني عملت استخاره في اني انتحر متخيله !!
اكتشفت بعدها بيومين اني حامل للمره التالته..بصراحه مكنتش فاهمه هو دا نتيجة الاستخاره ؟ طيب دا معناه اني اكمل ولا اني انتحر !!
قررت اني اكمل واشوف لو حصل اجهاض تالت يبقى دا معناه اني انتحر..
ورغم الضرب والاهانه الا ان الجنين فضل صامد معايا المرادي.. شوفت فيه بادرة أمل
بدأت احط ايدي ع بطني وافضل اتكلم معاه دايما واحكيله..ولما عرفت انه ولد بدأت انام اصحى اتخيل انه هيبقى سندي ف الحياه وبدأ الامل يرجع م تاني لقلبي لحد م حصلت الصدمه وحصل اجهاض وانا في الشهر السابع..
هو مكانش اجهاض هو للاسف ضربني كالعاده بس المرادي كانت اشد.. ضربني لمجرد انه كان هيجيب اصحابه البيت كالعاده وانا اعتذرتله اني مش قادره وتعبانه ف يجيب اكل م بره وهو راجع..موتني م الضرب نزل عليا دم ودخلوني ولاده مبكره بس طفلي كان مات في بطني💔
اول مرتين ف الاجهاض محسيتش فيهم بكل الحزن اللي حسيته ف قلبي المرادي..
دفنت حته مني واللي كنت فاكره انه هيبقى سندي وانه جاي ومعاه فرحتي.. كل دا راح ف ثانيه بسبب شخص أناني مستهتر قلبه عباره عن حجر!
طول فترة حملي الاخير كنت رجعت اقرب م ربنا تاني وادعيله اني اشوف طغلي..مكنتش اعرف اني هشوف طفلي بس وهو جسد م غير روح.. ضميته ليا ومنزلش مني ولو دمعه واحده وكأن كل الدموع ف عيني اتحجرت.. وكأن عيني عرفت انها مهما بكت مش هيكون بمقدار وجع قلبي وقهره عليه..
رجعت البيت جثه عباره عن جسد م غير روح.. وكأن روحي فارقت مع جنيني💔
YOU ARE READING
قصص واقعية (لهدير ابراهيم)
Spiritual^-^ صلوا علي حبيب الله^-^ قصص واقعيه بسرد الاشخاص الحقيقين لهذي القصه اكيد كتير وهو داخل يقراء عارف من هدير وايه هي قصصها قصص منها من يبهرنا ومنها من يجعلنا نحمد الله ومنها من تشعرنا بالسعاده والامل جميهم اشخاص تعلقو بالله لينعمو ^-^صلوا علي حبي...
رحمة ربنا !!
Start from the beginning
