ကျုပ်က ပါရမီရှင် (Chapter 201-400)

Chapter 280

စာစဉ် 19 Chapter 280 ပြောင်းပြန်ဖြစ်သွားသော သမိုင်းအမြင်များ

လူတိုင်း စိတ်အားထက်သန်စွာ နားထောင်နေကြသည်။ ထိုအခိုက်တွင် ယင်းက သမိုင်းမဟုတ်ဘဲ အလွန် စိတ်ဝင်စားစရာကောင်းသော ဇာတ်လမ်း တစ်ပုဒ်ဟု ခံစားမိနေ၏။

အတိတ်တုန်းကလိုဆိုလျင် တစ်ယောက်ယောက်က သူတို့ကို သမိုင်းနှင့် ပတ်သက်သည့် အကြောင်းအရာ ပြောလာသည်နှင့် များသောအားဖြင့် သူတို့ ပျင်းရိထိုင်းမှိုင်းလာတတ်သည်။ သို့သော် ရဲ့လင်းချန်က ပြောလာသောအခါ သမိုင်းက ဝတ္ထုများထက် ပို၍ စိတ်ဝင်စားစရာ ကောင်းနေပြီး သူတို့အား နားထောင်ချင်စိတ် ဖြစ်ပေါ်လာစေသည်။

ရဲ့လင်းချန်၏ အသံက ဆက်လက် ထွက်ပေါ်နေ၏။

[ကျိုးယွီက ချောမောတဲ့ကျိုး ဖြစ်လာတယ်ဆိုတော့ သူ့ရုပ်ရည်က သာမန်ထက် ကျော်လွန်တယ်ဆိုတာ သေချာတယ်၊ မိန်းမလှလေးတွေက သူရဲကောင်းတွေကို မြတ်နိုးတယ်ဆိုတဲ့ စကားလိုပေါ့၊ မိန်းမလှလေးတွေ အမျှော်လင့်ဆုံးလူက လူငယ် သူရဲကောင်းလေးတွေပဲ၊ ချောမောတဲ့ကျိုးသည် လူငယ် သူရဲကောင်းဆိုတဲ့ နေရာကို ကွတ်တိ ဝင်နေတာပေါ့၊ အဲ့ဒါကြောင့် သူ့ကို သဘောကျတဲ့ မိန်းကလေး ပရိသတ်တွေက မရေတွက်နိုင်အောင်ပဲ၊ ပြီးတော့ ကျန်းတုန်က အလှဆုံး မိန်းကလေးဖြစ်တဲ့ ချောင်းကုန်းရဲ့ သမီး ရှောင်ချောင်းနဲ့ လက်ထပ်နိုင်ခဲ့တယ် ဆိုတာကို ကျွန်တော်တို့ အားလုံး အသိပဲလေ]

ရှောင်ချောင်းအကြောင်း ပြောနေစဉ်မှာပင် ရဲ့လင်းချန်က သူမအသွင်အပြင်ကို ထပ်မံ၍ ချီးမွမ်းလိုက်သည်။

[အဲ့ဒါကြောင့် အဲ့လို အခြေအနေမှာ မင်းတို့ကိုယ်မင်းတို့ စိတ်ကူးယဉ်ကြည့်လိုက်ပါ]

ရဲ့လင်းချန်က ရွှတ်နောက်နောက် ပြုံးလေသည်။

[မင်းက ချောမောတဲ့ အသက်နှစ်ဆယ်ကျော်အရွယ် ကျိုးယွီဆိုပါတော့၊ မင်းက အစိုးရ အရှာရှိလည်း ဖြစ်တယ်၊ ပြီးတော့ ပြိုင်စံရှား မိန်းမလှလေးကိုလည်း ဇနီးအဖြစ် လက်ထပ်ယူထားတယ်၊ ရုပ်ရည်၊ အလုပ်အကိုင်နဲ့ အချစ်ရေး အားလုံးက အဆင်ပြေနေပြီဆိုရင် မင်းက အခြားသူတွေကို မနာလိုဖြစ်ဦးမှာလား]