صلوا علي من جلس علي ركبتيه يواسي طفلا مات عصفوره
#################################
القِصه بقى بقى بقى 😍
#إنَّ_عِوض_الله_إذا_حلّ_أنساكَ_ما_فقدت 💔
قِصتنا انهارده جزء م احداثها يكاد لا يخلو منها بيت او عماره او شارع او حي ....
اسيبكم مع احداثها ، اللي قصيت منها احداث كتير لانها حقيقي تتكتب #روايه وباردو لسه طويله 😂 ،
المهم القِصه بقى 👇😉
وكالعاااااده #هاشتاج باااقي قصصنا 👇
#قصص_واقعيه_لهدير_ابراهيم ♡
***************
انا البنت الكبيره لأسره مكونه من جده واب وام وأختين وأخين ،
اسره متوسطة الحال اجتماعيًا ودينيًا ....
كنت تلميذه متفوقه جدا دراسيًا ، مُطيعه لاهلي وفـ حالي دايمًا ..
كبرت وانا اكبر طموحي هو دخول كلية #الطب وكان بيداعب خيالي بين الحين والآخر حلم #الزواج ،
بس لأني البنت الكبيره كانت كل جهود اهلي اني اجتهد لحد م اوصل لحلمهم ان تكون بنتهم #دكتوره كعادة معظم الأسر المصريه ..
مرحلة ثانوي كلها كانت ضغط كبير جدا والحمد لله ربنا كلل كل المجهود دا بالتفوق المبهر وفعلا دخلت كلية الطب ... !
كلية الطب بتكون غاية الجميع م وهما اطفال لوقت م فعلا يدخلوا كلية الطب ، اللي داخلها علشان اهله او علشان هي كلية قمه وبس ع كدا مجرد م بيدخلها بيكرهها وبيكره نفسه وبيلعن الثانويه العامه كلها ،
انا في البدايه كنت تايهه جدا ، اولا مفيش معايا صُحبه ، ثانيا ولا مره فكرت ايه الخطوه اللي بعد دخول كلية الطب !؟
حسيت بفراغ رهيب خاصة مع ثقل المواد بالنسبه للثانويه ، واكتشفت ان الثانويه م هي الا ضغط وبس لكن موادها حقيقي دلع بالنسبه للي شوفناه في طب ..
مجرد م انتهت زهوة دخول كلية الطب دخلت ف مرحلة اكتئاب فتره لاني فعلا مش عارفه احدد لنفسي اي هدف تاني ،
بس بعد فتره ومع بداية تعرفي ببنات واصدقاء اختلف الحال للافضل شويه ،
ومن خوفي اني اعيد سنه بقيت اذاكر كتير واضاعف مجهودي ، وكدا او كدا كنت منعزله عن الناس م فترة ثانوي ،
اخواتي البنات الاتنين دخلوا تجاره انجليزي والولاد واحد هندسه والتاني طب بيطري ،
كنا بالترتيب انا وبعدي ولد وبعدين البنتين وولد اخير ..
اختي الأولى بمجرد م دخلت اولى جامعه بدأ يتقدملها عرسان ،
والدي كان بيرفض تماما علشان هي لسه صغيره كمان علشان الكبيره بتاعته اللي هي انا لسه قاعده جانبه ،،
عدت سنه وكمان سنه ، الاولى بقت ف 3 والصغيره فـ اولى وبدأ يتقدم عرسان للبنتين الاتنين ،
ووالدي يرفض لنفس السببين بس كنت بحس م نظراتهم ان انا السبب الرئيسي للرفض ،
وبمجرد م وصلت اختي للترم الاول رابعه كُليه ، وافق والدي تحت ضغط ويأس خطوبة اختي ودي كانت البدايه ..
اول اخت اتخطبت ، سنه واتجوزت كان الولد اللي بعدي خطب هو كمان ..
كل دا وانا متقدمليش ولا حد .. ولا حد حرفيا .. !
كانوا اهلي دايما يرددوا ان انا اللي دافنه نفسي بين الكتب ،
ع الرغم ان انا اللي حققت حلمهم ف اخواتي البنات ،
لكن اكتشفت بعد كدا ان جواز البنت اهم عند معظم الاهل اكتر بكتيييير م انها تدخل طب او تتعلم م الاساس ،
حسيت فجأه بإن العالم كله م حواليا بيتحرك وانا الوحيده اللي واقفه مكاني ..
عاوزه اقولك ان وصل الحال ان كل اخواتي تزوجوا وبقى عندهم اطفال ، حياتهم كلهم اتغيرت وبتتحرك دايما وانا لسه واقفه مكاني ،
كنت حاسه ان مهما وصلت لمرحله علميه متقدمه الا ان كان اتمكن مني هاجس اني ممكن اعيش واموت وانا لوحدي !!
لسان الناس في مجتمعنا مبيرحمش حد ، وللأسف القريب بيوجع قبل الغريب ...
هل في حد فكر قبل كدا في معاناة البنت اللي اتأخر سن زواجها ؟
هل فكروا في وجع قلبها والشحتفه اللي بتكون فيها مجرد م تشوف فستان عروسه او بيبي صغير !؟
حلم الفستان الابيض وحلم الامومه اللي بيبدأوا تقل فرصتهم كل م بيزيد م عمر البنت سنه ؟
الناس بتستنى ذكرى عيد ميلادهم الا البنات دي بتتمنى م ربنا كل لحظه ان عيد ميلادها الجاي تكون مرتبطه وحصل تغيير في حياتها ؟
#وجع انك تحضري فرح وكل الانظار تكون عليكِ منها انظار #شفقه ومنها #شماته والاتنين بيوجعوا 💔
#وجع ان الناس بتحسسك انك عامله جريمه ، وكأن تأخير الزواج بإيدك مش بإيد ربنا ..
#وجع انك تلمسي طفل لسه مولود ويكون نفسك تلمسيه وتشمي ريحته وبيكون في عنيكِ دموع بتخافي دايما انها تخونك وتنزل قدام الناس ..
#وجع ان في وفاة والدك الناس بدل م تعزيكِ تلاقيهم بيهمسوا من وراكِ انه اكيد مات بحسرته ع بنته اللي عدت سن ال 35 م غير جواز ..
#وجع انك تشوفي حسرة امك عليكِ وترديدها ليكِ كل شويه انها خايفه لو لا قدر الله حصلها حاجه انك هتعيشي لوحدك وممكن ولو موتي مفيش حد هيحس بيكِ ولا هيعرف اصلا انك موتي ..
#وجع انك تحضري افراح اصحاب دفعتك كلهم ، وافراح بنات عيلتك خاصة افراح الأصغر منك في السن واصغر م اخواتك كمان ..
عارفه انا مره كنا بنجهز شقة بنت عمي اللي هي الفرق بيني وبينها حوالي 15 سنه ، واسمعها بتضحك مع باقي قرايبي وبتقول انها سابتني احضر معاهم تجهيز الشقه اهو افرح شويه ، ودا كان ردا ع سؤالهم : ليه عزمتيها مش خايفه م عنيها تحسدك !؟
وهي ترد دي غلبانه اهو نفرحها شويه يمكن متشوفش ياعيني بيت عروسه تاني ، بما انها كانت آخر بنت في العيله والباقي اصغر كتير ..
سمعت كلامهم ومش قصدي ابدا التصنت ، دخلت عليهم وانا عنيا فيها دموع مكتومه وحسيتهم اني سمعت كلامهم وكان رد فعلهم لا مبالاه ..
اصحابي واخواتي وبنات العمات والاعمام والخالات والاخوال كله اتجوز وانا لسه مكاني ..
لدرجة ان امي بدأت تسمع للناس ان اكيد معمولي #عمل ، ولفت بيا عند شيوخ مره ودجالين مرات تانيه .. ولا حياة لمن تنادي ..
بدأ بعدها بفتره عند سن ال 36 يتقدم ناس عن طريق القرايب او المعارف ، وكل اللي كان بيتقدم اللي منهم مستواهم العلمي ضعيف جدا ، مش هقولك علشان دكتوره برفض ، بس انتِ مستحيل تتخيلي انك تعيشي مع شخص مستوى تفكيركم نفسه مختلف تمام الاختلاف ،
والنوع التاني مطلق منهم بدون اطفال ومنهم بأطفال ،
النوع التالت أرمل وكبير في السن ..
ولما كنت برفض كأي بنت م حقها الرفض او القبول كان الرد واحد م الكل : هو انتِ لاقيه اصلا !؟
وبالمناسبه مفيش ولا شخص منهم دخل البيت ، الكل كان بيبقى كلام م بره ..
وياااااااه ع كمية الوجع اللي كان بينهش ف القلب لما مثلا تدخلي ع اخواتك البنات وهما بيتكلموا وتلاقيهم بطلوا كلام ،
ف تقوليلهم يكملوا ف ردهم يكون : لا دي حاجات مش هتفهميها اوي ...
او مثلا يكون في مشكله عند اختك الصغيره وتيجي تنصحيها ترد عليكِ انك آخر واحده تنصحي ... !
مش هقول اخواتي كانوا بيقصدوا يجرحوا فيا بكلامهم ،
ممكن انا اللي حساسيتي كانت زياده شويه ، بس صدقيني وجع ومعاناه ميحسش بيها الا اللي مرت بنفس ظروفي ،،
عاوزه اقولك اني اتخصصت في طب الاطفال لعل دا يريح قلبي ،
بس صدقيني كنت كل م اتعلق بطفل عندي ف المستشفى كنت بتمناله جدا ربنا يشفيه ، بس كان بيبقى نفسي جدا اشوفه كتير ...
اخواتي كانوا بيكشفوا ع اطفالهم عند اي دكتور تاني غيري ،
انا نفسي لو كانوا عرضوا عليا اكشف عليهم كنت هرفض لاني اخاف م خوفي عليهم اشخصهم غلط قلبي مش بيطاوعني اشوف حد فيهم بيتألم ،،
بس هما كانوا بيرفضوا خوفًا مني ع اطفالهم .. ولا مره قالوها صراحةً بس كنت بحسها منهم جدا ،
مع ان يعلم ربنا ان كل طفل م اطفال اخواتي ليه مكانه كبيره جدااا في قلبي ....
بصي هي حياتي كانت عباره عن معاناه وخوف ووجع وقلق ، كل تفكيري كان ف الجواز ، نفسي حقيقي اني اتجوز واكون اسره ويكون عندي اطفال ..
ودي ابسط احلامي ك بنت .. نفسي احس ان زيي زي اي بنت طبيعيه والناش نفسها تشوفني طبيعيه ...
بداية التغيير اللي حصل في حياتي كان مع نقلي مستشفى تانيه غير اللي كنت فيها ،
قابلت فيها ممكن اقول عليها شبه ملاك ماشي ع الارض .. بنت سبحان الله ع نقاء وطيبة قلبها وروحها الحلوه ...
كانت اكبر مني بسنتين ومتزوجه ومعاها اطفال الا انها كانت بروح طفله ...
هي اللي بدأت معايت كلام م البدايه وفضلنا نتقرب لبعض لوقت م اصبحت هي المتنفس الوحيد اللي في حياتي والشخص اللي بحكيله كل حاجه عني وممكن ابكي قدامها م غير م اخاف انها تفهم دموعي غلط او تتعامل معايا بشفقه ...
هي اول شخص يطمن قلبي خاصة لما قالتلي ان الزواج #رزق ونصيب ومكتوبلي عند ربنا م قبل م اتولد .. واني لو حتى ف الهند نصيبي كدا او كدا هيجيلي ..
علمتني حُسن الظن بالله .. علمتني اليقين بإن ربنا اقداره كلها #خير ولعل تأخير الزواج خير كبير ولربنا حكمه ف تأخيره ...
ف البدايه كنت بسمع كلامها بتشكك شويه بس مع الوقت بدأ كل كلامها يتوغل في اعماق اعماق قلبي ...
كان اجمل وقت في يومي بدون مبالغه هو الوقت اللي بقضيه معاها ف المستشفى ووسط الاطفال ...
كانت بتاخد رأيي في كل حاجه لاطفالها لدرجة كنا بننزل نشتري ليهم اللبس سوا .. وكانت تضحك وتقولي اتعبي معايا دلوقتي هتعب معاكي انا بكره 😉 كنت بقولها ياارب بجد ...
صديقتي علمتني احلم واتخيل .. لا الحلم ولا الخيال م المحرمات ..
بدأت اتخيل يا ترى هيكون شكل زوجي المستقبلي ايه !؟ والاسئله المعتاده هيكون عندي اطفال اد ايه ؟ لدرجة اني فكرت في اساميهم وشكل شقتي ،
ووصل بيا الحال اني تخيلت الشقه نفسها هتكون ازاي واخترت كمان الوان كل سم فيها 😃
صديقتي كانت دايما تقولي الاحلام مش بفلوس ولا عليها رقابه ،
وكل م ظنيتي خير رب العالمين هيرزقك بخير اكبر منه ...
كلامها كان بينزل بردًا وسلامًا ع قلبي ، بدأت احب حياتي وقلبي يتعلق ب ربنا ويحسن الظن فيه ، وكل م كان الشيطان يدخل لقلبي كنت بجري ع صاحبتي وهي بدورها بتوجهني اني اروح اصلي واحكي لرب العباد .. هو وحده اعلم بحال قلبي وبإيده خلاصه ..
كانت دايما تقولي ربنا لو قال لاعلى جبل ف العالم يتساوى بالأرض هيتساوى بيها ف لمح البصر .. ولو قال للارض كلها تتقلب بكل الكائنات اللي عليها هيحصل باردو ف لمح البصر ،،
ربنا اللي بيقول للشئ كن فيكون تفتكري انه غير قادر ع انه يداوي قلبك ويستجيب لدعائك ويفرج قربك !؟
ربنا بعتها ليا بعد 36 سنه تخبط ووجع قلب م كل اللي حواليا ،
بس هي قالتلي كان ممكن وجع القلب دا ميدخلش قلبي لو انت م البدايه قلبي كان متعلق ب حب ربي وبس ....
ولا مره قالتلي بطلي تفكري ف الجواز علشان يجيلك ، بالعكس كانت بتشجعني دايما اني ادعي بالزوج الصالح والذريه الصالحه ،
بس في نفس الوقت آخد بالي من شغلي واقوي علاقتي بربنا اكتر ، لان علاقتي بيه هي اللي هتجنب قلبي اي وجع او حزن ....
في المرحله دي كان اصغر واحد ف اخواتي هيخطب ،
مش هكدب عليكِ انا كنت والله بكون فرحانه ومن قلبي لكل اخواتي بس نغزة القلب اللي كانت بتيجي م فتره للتانيه ووسوسة الشيطان ان ليه هما يفرحوا وانا لا .. هما فيهم ايه زايد عني !؟
ومع ذلك كنت برجع واقول لا دول اخواتي ولازم افرحلهم ..
ولادة كل طفل م ولادهم كنت بتخيل معاها لحظة ولادة اطفالي ،
كنت بنزوي في مكان في اوضتي وابكي ،، كنت بنام كل ليله ودموعي مغرقه مخدتي .. وقلبي فيه ما فيه ...
بس سبحانك ربي جات خطوبة اخويا وكأنها كانت اختبار م ربنا ليا هل فعلا اتغيرت ولا لا ...
وكان بالفعل اختبار حقيقي واللي بالمناسبه بفضل الله عديت منه بطريقه ولا كنت اتخيلها ...
الكل كان مستغرب حالتي وفرحتي .. انا فعلا كانت فرحتي م قلبي ، مش بس علشان فرحة اخويا ،
لا علشان كمان واخيرا لقيت نفسي .. لقيت فرحة قلبي ورضاه والامان والونس بقرب ربي ...
كانت الليله دي مختلفه عندي بالنسبه لاي ليله عدت عليا م كل الافراح اللي حضرتها ..
الليله دي بكيت فيها م قلبي بكاء يمكن اكتر م اي ليله تانيه بكيت فيها ، بس المره دي كان بكاء فيه رااااااااحه رهيبه وطمأنه لقلبي ان القرب م ربنا هو بس الكفيل بسعادة قلبي وراحته ....
مش هطول عليكم ونخرج م الكآبه دي بقى للفرح والفرج والسعاده 😍
طفل صغير حضر للمستشفى مع #والده وللأسف مع حالته كان لازم يتحجز ، كان طفل عنده خفة دم رهيبة لدرجة كل الدكاتره كانوا بيتخانقوا ع مين هيتولى حالته ومتابعته ، وحتى وقت فراغنا كنا بنروح نقعد معاه خاصة بعد م عرفنا ان والدته لسه والده وكانت ولادتها صعبه ،،
عرفنا باردو ان والده دكتور بس في مستشفى تانيه لكن ولان المستشفى بتاعتنا كانت في تخصص الاطفال افضل ف الولد كان عندنا ...
الولد كان سنه وقتها حوالي 9 سنين .. وبعد م قرب يمر اول اسبوع ع وجوده معانا ف المستشفى طلب مني مره طلب غريب نسبة للظروف اللي هو فيها ، وهو اني اراجعله ع حفظ القرآن لانه خايف يطول ف المستشفى اكتر م كدا ويسبقه اصدقائه ...
صاحبتي دخلت ع طلبه وفضلت تردد بسم الله.. الله اكبر .. اللهم بارك ،
واثنت عليه وع حرصه ع متابعة حفظ القرآن ، وبما انها اللهم بارك عليها هي كمان حافظه كتير م كتاب ربي طلبت منه تتابع معاه واهو هما الاتنين يراجعوا سوا ،
وبصتلي وقالتلي مش عاوزه تشاركينا ف الثواب والمتعه دي 😉
فكرت للحظه ازاي وانا ف سني دا كل علاقتي بالقرآن هي القرآن اللي في الصلاه واحيانا ف رمضان ... !
اتحرجت جدا ان حتى الطفل اكيد حافظ اكتر مني ، ف قولتلهم خليكوا انتوا راجعوا لبعض وانا هشوف حد يبدأ معايا من الفاتحه 😂 واخدناها بضحك وعدت ...
بعدها بيومين كان وقت الشيفت بتاعي بالليل ودخلت عند الولد اطمن عليه كان #والده عنده ، بصيت عليه بسرعه وكنت خارجه لقيته بيقولي استني انا وفرتلك حد يتابع معاكِ حفظك للقرآن م الفاتحه ها م الفاتحه 😉
رجعت م على الباب وسألته وانا كلي احراج م والده : مين !؟
قالي #خالو وهنا انا عملت كدا 😮مش علشان قال خالو ،
لا علشان النظره المصاحبه لكلمة خالو وابتسامه واسعه م الشخص اللي قاعد جانبه ...
انا كنت عاوزه اقوله خالو مين يا حبيبي 😮 هو دا خالك !؟
ف قولتله خالك ازاي يعني !؟
رد عليا الشخص دا مع ابتسامه مكتومه واضحه جدا ع وجهه ،
ايوه خاله اومال كنتِ فكراني ايه باباه مثلا 😃
قولتله بس هو ولا مره قالك يا خالو .. قالي وباردو ولا مره قالي يا بابا 😉
ومع نظراتهم لبعض حسيت وكأن في بينهم مُخطط سري ...
حسيت بإني بتخنق وانهم بيلعبوا وبيستخفوا بيا .. قولتلهم عامة شكرا انا لقيت حد احفظ معاه ، وسيبت الاوضه وخرجت ،
مش عارفه تحديدا ايه اللي ضايقني ، بس ممكن لاني افتكرت نظرات الشخص دا ليا وكنت بحس فيها اهتمام كنت بكذبه لانه شخص متزوج وعنده اطفال ،
وفجأه طلع لا .. بس لا ازاي م يمكن باردو يكون متزوج وعنده اطفال ،
قولت لنفسي افوق م المراهقه واحلام اليقظه دي شويه ،
عدت الليله ع خير ، وتاني يوم بعد تأكدي ان الولد لوحده دخلت اطمن عليه واعاتبه ع اللي حصل واتأكد منه ، هل هما كانوا قاصدين فعلا اني اخد الفكره دي انه بباه او لا .. ولو اه .. كان ايه مبررهم لكدا ؟
سألته وعرفت منه كل حاجه كانت بتحصل طول الاسبوع وانا نايمه ع وداني زي م يقال 😃
ممكن نرجع سوا مع بعض فلاش باك للي حصل طول الاسبوع دا ..
انا كنت احيانا كتير خاصة ايام السهر لو في طفل المرافق بتاعه مش موجود او في ظروف كنت بقعد انا معاه طول الليل واتكلم معاه لو بيبي صغنن ،
مع الولد دا والايام اللي كان فيها بيبات لوحده كنت بدخل اطمن عليه وهو نايم وكنت بتكلم معاه كتيييير وكأني فعلا بكلمه لكن هو كان بيبقى نايم او دا اللي كنت فاكراه لان حضرته طلع سمع كل حاجه قولتها ..
وانا متوصاش بصراحه كنت تقريبا قولتله حياتي كلها م اولها لاخرها ، طبعا هو بيفكرني بكلامي وبيضحك وانا عاوزه اعاتبه ان دا اسمه تجسس ع الغير وكان لازم ينبهني انه صاحي ،
سألته بحذر : اوعى تكون قولت لخالك اي حاجه سمعتها مني 😮
قالي لا متقلقيش هو واقع اصلا م تاني مره شافك فيها 😂
قولتله : نعم 😮 مش فاهمه حاجه ..
قالي : م انتِ هربتي امبارح وكأنك شوفتي عفريت والراجل قال يسيبك تاخدي نفسك م المفاجأه الأولى قبل م يقولك المفاجأه التانيه 😉
قولتله وانا ضربات قلبي بتزيد وبحاول بكل جهد اتكلم بلا مبالاه وثبات : مفاجأة ايه ؟
قالي : لا دي هتعرفيها منه بقى 😉😉
رد فعلي بقى كان اغبى رد فعل ممكن تتوقعيه وهو ؛
اني خدت اجازه م شغلي 3 ايام ، انا طبعا توقعت انه ممكن تكون المفاجأه دي هي انه هيعرض عليا الجواز مثلا ، وهتكلم بكل صدق واقولك ان انا م كتر سعادتي بإن ممكن تكون دي فعلا المفاجأه ع اد م خوفت جدااااا مش عارفه من ايه ،
ممكن يكون الشيطان اتمكن مني مش عارفه بالظبط ايه اللي حصل ،
بس النفس البشريه ف الغالب بتكون كدا .. بتتمني الحاجه وتفضلي تحلمي بيها ومجرد م تحسي ان حلمك بدأ يتحقق بتبعدي وتخافي ،،
صديقتي قلقت عليا وكلمتني تطمن عليا ، كنت متردده وخايفه احكي او اعمل موضوع م لا موضوع اصلا ، بس ف النهايه حكيتلها ، ولشدة صدمتي كان رد فعلها ان معايا حق ف رد فعلي بس كفايه عليا يوم واحد بس اخد فيه نفسي وافكر كويس لو الشخص دا فعلا ف نيته يتقدملي هعمل ايه وهوافق عليه او لا ،
قالتلي نصًا : توقعي الخير وبس لسه مش عارفين ايه المفاجأه م يمكن تطلع انه هيساعدك فعلا انه يوصلك لحد يساعدك ع حفظ القرآن ويمكن ويمكن ويمكن ، بس هقولك ان لعل الشخص دا لو خير ليكِ من دعوه صادقه منك لربك يبدل الاقدار كلها والشخص دا فعلا يطلب الزواج منك ، خاصةً وانه اللهم بارك طبيب م الواضح انه شخص ملتزم بما ان الولد قالك ان هو اللي هيساعدك تحفظي القرآن ،كمان م كلام الولد وشدة تعلقه بيه واضح انه ع المستوى الشخصي حد كويس وحنين جدا الاطفال بتقدر تحدد شخصية الناس اكبر مننا ، دا باستثاء اننا شبه عاشرناه لمدة اسبوع ومفيش ولا ملاحظه سيئه عليه ، باستثناء طبعا الفصل اللي هما عملوه فيكِ ..
وفضلت تضحك كتيى وعلى ضحكها ضحكت انا كمان ،
كملت كلامها وقالتلي : الشيطان عارف ان دا مدخلك ف هيحاول يقلل م حسن ظنك ف الله ، وكل اللي عليكِ انك تدخلي تتوضي وتصلي وتدعي وزي الشاطره تصحي الصبح ترجعي المستشفى وانت هحللك موضوع الاجازه دا ...
قفلت معاها ونفذت كل كلمه قالتها بالحرف .. صليت ودعيت ودعيت ودعيت واتمنيت وقولت يارب ان كل دا ليس عليك بعزيز ..
واني فعلا محتاجه يارب لأنيس ف الدنيا وولد صالح يذكرني بعد مماتي ...
تاني يوم الصبح رايحه المستشفى بقدم رجل واخر التانيه ، وبردد ع لساني م اول م خرجت م بيتي استغفر الله لعل بذكر الله يطمئن قلبي ...
دخلت المستشفى وحاولت كتير اتجنب اسأل عن حالة الولد ، بس في ممرضه معانا كانت عارفه اني مهتمه بحالته قالتلي ان الولد سأل عني كتير وكان رافض اي حد م الدكاتره يتعامل معاه غيري ،
دخلتله وانا مرغمه وبدعي يكون خاله مش موجود وانا كنت عارفه ان دا مش الوقت اللي بيحضر فيه ف كنت رايحه وانا مطمنه ،
ولما دخلت لقيته فعلا لوحده ، بصلي بعتاب
تخيلوا نظرة العتاب م طفل بتكون ازاي ؟
حسيت بنغزه جامده ف قلبي م نظرته بس طبعا وكالعاده طلع بيضحك عليا 😐
وبدأ بضحك ويقولي مكنتش اعرف ان دي هتكون ردة فعلك دا انا خالي كان شويه وهيضربني وافتكر انك طفشتي بسببي ،
وبدأت اضحك كالعاده ع ضحكه هو كمان لحد م لقيت شخص بيقولي الحمد لله طلعتي بتعرفي تضحكي مش تكشري وتجري بس او تهربي 😃
كنت خايفه ابص ورايا لاني عارفه صاحب الصوت وفضلت واقفه زي م انا متحركتش سم واحد ،
لقيته وقف قدامي بس بعيد شويه واللي كان هيجنني وانا واقفه ف الموقف دا ان هو وابن اخته يبصوا لبعض ويضحكوا ،
كنت عاوزه امسكهم هما الاتنين اضربهم ف بعض ،
وكالعاده خرجت وسبتهم ، وسمعت وانا ماشيه وهو بيقوله كالعاده هربت وسمعت صوت ضحكهم او تهيأ لي اني سمعته ...
شويه ولقيت رئيس القسم بتاعي اللي هو كان بجد وطول فترة وجودي ف المستشفى كان بيتعامل معانا م اصغر عامله لاكبر دكتوره اننا ولاده ،
لقيته بيقولي د. &&&& سألني عنك ، وانا بصراحه اشادت ف اخلاقك وبدأ الدكتور يحكيلي الحديث اللي دار بينهم عني واللي اكتشفت انه سأله عليا م بداية م الولد اتحجز ف المستشفى ،
وان سبب اختياره الاساسي للمستشفى بتاعتنا هو معرفته برئيس قسم الاطفال اللي هو رئيسي اللي هو معاه ال c.v بتاعي اصلا ،
وشكرلي ف اخلاقه هو كمان وانه يعرف والده واسرته كويس ولقيته بيقولي انه استأذنه ياخد عنوان بيتي بس هو فضل يستأذني الاول ،
حسيت ف اللحظه دي بالظبط ان الدنيا كلها بتلف بيا ، ومكنتش لاقيه اي رد اقوله لقيت صاحبتي جايه بتقول للدكتور السكوت علامة الرضا يا دكتور 😉 قالي مبروك مقدما يا دكتوره وسابني ومشي ....
حسيت انها مؤامره كونيه عليا وان الكل عارف وانا اخر من يعلم خاصة اني مع كل خطوه ليا ف المستشفى كنت بلاقي الممرضات خاصة اللي بيتابعوا حالة الولد بيبتسموا اول م يشوفوني ويقولولي ربنا يسعدك يا دكتوره ، حتى الممرضات التانيين نظرا لان مستشفانا ولله الحمد الخبر بينتشر فيها انتشار رهيب 😂
سألت صديقتي : انتِ كنتِ عارفه !؟ قالتلي كنت حاسه خاصة من نظراته ليكِ وقت م كنتِ بتشرحيله حالة الولد ، كان باين جدا انها نظرات مختلفه عن نظراته لاي طبيبه تانيه بتكون متواجده معانا ..
سألتها : ليه مش نبهتيني!؟ قالتلي : خوفت اوهمك واعلقك بسراب ودعيت من قلبي واتمنيت ربنا يعوضك فعلا بيه او بشخص زيه ، ولما الولد سألني مره وانتِ مش موجوده انتِ مرتبطه او لا قولتله لا وحسيت مع سؤاله انها بداية الفرج ... بس حبيت ان الكلام كله تعرفيه بعد م تحصل خطوه جاده فعلا م د.&&&& ، والحمد لله خد الخطوه بسرعه قبل م يحصلي حاجه 😂
في الواقع مقدرش اوصفلك احساسي ف اللحظه دي هل كانت فرحه او خوف !؟
فرحه ان الشخص دا محتمل كبير يكون زوجي ويبدأ حلمي يتحقق ، وخوف ان ميحصلش نصيب واكون علقت نفسي وقلبي ع الفاضي ،وكالعاده بوحت لصديقتي بما في قلبي وكعادتها دائما ذكرتني بحسن الظن بربي ....
بعد شويه لقيت رئيس القسم جايلي تاني كنت عاوزه اقوله كتير كدا ان هو اللي يجي لحد عندي مرتين 😂 ولا الشخص دا غير رأيه ولا دي مجرد تهيآت ولا ايه 😐
لقيته بيبلغني ان الشخص دا عاوز رقم اي حد م اهلي او احدد انا معاد وابلغه لدكتوري وهو بدوره يبلغه ليه ،
ودا بالظبط اللي حصل واتحدد المعاد .. وتمت الرؤيه الشرعيه ودخلت الفرحه مش بس بيتي لا وقلبي ومن قبله قلب أمي ❤
يوم الرؤيه دا لوحده كان حوار تاني خالص خاصة مع اكتشافي المصدر الرئيسي لخفة دم الولد الصغير وهو خاله 😑
واللي بفضل خفة دمه وروحه المرحه اليوم دا اعتبره م اسعد ايام حياتي ، مع ايامي اللي جات بعد كدا كلها واللي كانت كلها بقربه ،
واللي حقيقي مهما بيكبر في السن روحه المرحه بتزيد معاه ❤
طبعا وبفضل الله تم الزواج ع خير واخيرا اتعرفت ع والدة الولد وعرفت ان والده بره مصر ، واللي بسبب سفره ربنا هيأ كل الاسباب والمواقف المضحكه اللي حصلت ف الوقت دا ...
كنت قربت ع سن الاربعين ايوه وزوجي كان بالظبط 41 سنه ، لكن ربنا مخيبش ظني ولا حتى اختبرني وم اول شهر زواج كنت ف انتظار قطعه مني حلمت بيها طول سنين عمري 😍 وحقيقي مش عارفه اوصلك كنت عامله ازاي طول فترة ال 9 شهور حمل وانا ف انتظار لمسه منه 😍 ويوم ولادتي لإبني وبكائي وبكاء وزجي ع بكائي وتصدقي لو قولتلك ان رغم اني طبيبة اطفال الا اني كنت مش عارفه اتعامل مع طفلي ازاي لدرجة كنت خايفه المسه كنت حاسه ان ممكن اخنقه ف حضني مش شدة لهفتي ليه 😍 زوجي طمني وقربه مني ويااااا الله ع اول م شميت ريحته اخدته ف حضني وحسيت وقتها ان انا وهو هنفضل روح واحده حتى بعد م خرج م رحمي للدنيا وحسيت وكأنه بيدوب في حضني ❤
ربنا بعظيم رحمته من عليا بكرمه ومنحني سعاده مقدرش ابدا اوصفها لدرجة اني كنت بسأل زوجي دايما لو كرمه ورحمته في الدنيا بالشكل دا يا ترى ف الاخره بجد هتكون ازاااي 😍😍
وبفضل الله عايشين اهو في تبات ونبات وربنا اكرمنا بولد بس بنحمد ربنا ونشكر فضله ، دا غير ابني البكري اللي مرضه كان سبب في كل اللي حصل فوق دا ....
وكأن الله يخلف م بعد كل مصيبه بفرج كبير وسعاده وله حكمه في كل شئ وحده م يعلمها ....
كنت كل م اسأل صاحبتي ايه اللي عملته علشان ربنا يكافئني كدا !!؟ انا ولا عمري كنت احلم بزوج يجمع اللهم بارك كل الصفات دي .. وفوق كل دا ملتزم وبيخاف ربنا وبيتقي الله في شغله وبيته ومعاملته مع الناس ..
كانت تقولي : انتِ مستهونه بحسن ظنك بربنا !؟
ربنا اللي بعتلي في وسط العالم البشع والظلام اللي كنت فيه صديقها احسبها ع خير ولا ازكي ع الله احد .. صديقه اخذت بيدي لطريق الله ولم تتركني ولو للحظه وظلت بجانبي م وقت زفافي وفترات حملي متابعة صغيري ... اجمل تفاصيل حياتي شاركتني بها ، سلمتني لزوجي انسانه مختلفه كليةً عما مضى م حياتي ، واخذوا كلاهما بيدي حتى تلك الساعه ...
صديقتي التي بسببها احكي لك قصتي بسبب وجود ابنتها الكبرى ضمن قائمة اصدقائك وتحكي لها كل قِصه من قصص العجائب التي تزودين بها حسابك الالكتروني ، فأشارت علي ان احسن الظن وابعث بها لكِ لعل احدًا ما يرى نفسه بها او تكون طريق ينير له طريقه كما انارت لي صديقتي طريقي ❤
كان دايمًا زوجي لما اكون زعلانه منه ويحاول يصالحني كان يقولي : بذمتك كنتِ هتلاقي حد يصبر عليكِ كدا في حفظ القرآن ويجيبلك كل الهدايا اللي كنتِ بتاخديها مني دي ، وياريت بعد كل جزء هديه دا انتِ كنتِ ممشياها كل حزب تحفظيه تاخدي هديه وعلى م ختمتي القرآن كنت قربت افلس بسببك 😂
كنت بقوله بسرعه : والله ابدا انت اللي كنت بتجيب انا ولا مره طلبت ، كان يضحك ويقولي ماهو علشان عارف انك مش هتطلبي كنت انا اللي بجيب ،
ونضحك ونتصالح ع كدا وانسى اصلا اني كنت زعلانه منه ..
اساسا كان زعلي مجرد دلع عليه🙈
ربنا يباركلي فيه ويرزقه م واسع فضله وكرمه ❤
*********
#نصيحتي لأي حد يعرف بنت تأخرت ف الزواج رفقًا بقلبها فلا يعلم بحاله الا خالقه ...
ونصيحتي لكل من تأخر زواجها .. حبيبتي احسني الظن بخالقك وعيشي حياتك وبقلبك كامل اليقين ان ربك لم ولن يخذلك ما دُمتي بقربه ... وربي يسعد قلوبكم جميعًا ويرزقكن الزوج الصالح والذريه الصالحه والسعاده التي تدمع اعينكم م شدتها ❤
*********
مع كل قصه بتوصلني بيزيد ايماني بإن ربنا مخلقناش ابدا علشان يعذبنا وهو وحده اعلم بحال قلوبنا .. ووحده قادر ع اسعادها ❤
بختار القِصه اللي بحس انها ممكن تكون رساله لناس كتير ، مش لازم تشابه الاحداث بالنص لكن الاكيد ان في احداث بتشبهنا وبتشبه ناس نعرفها ...
مواقف واحداث كتير بنمر بيها في يومنا لعل موقف او حدث منهم يكون معاه فرج همنا وكربنا ،بس للي ياخد باله كويس ويتعلق بحبال الله ...
لكل انسان يمر بابتلاء ايًا كان ايه هو
" لا تدري لعل الله يحدث بعد ذلك امرا "
آخر حاجه اللي يملك صُحبه صالحه يمسك فيها بكل م اوتى م قوه ❤
وصُحبتي الصالحه التي تأخذ بيدي ومعهم استشعر لذة الحياة التي يملؤها ذكر وحب الله ، بارك الله لي فيكم وجمعني واياكم في الفردوس الاعلى م الجنه ❤
جُمله ذكرتها ف آخر قِصه نزلتها وهختم بيها كل قصصي بعد كدا وهي ؛
ربنا ملّكنا سر السعاده وهما الدعاء وحسن الظن ...
لسه الوقت قدامنا نغير احداث روايتنا الى الأجمل ❤
#احبكم_في_الله ♡
###############################################
صلوا علي حبيب الله