"ခရေလမ်း" (Completed)

Part 27

ခရေလမ်း အပိုင်း၂၇

(Unicode)

"ဟေး!"

မိတ္ထီလာ တက္ကသိုလ်၏ ဘောလုံးကွင်းထဲမှ လူအုပ်ကြီး၏အသံသည် တစ်ကျောင်းလုံးကို လွမ်းခြုံသွားလေသည်။

"ဘာလုပ်နေတာလဲ...ကန်လေကန်လေဟာ"

မိန်းကလေးအချို့သည်လည်း ဘောလုံးပွဲဆို သေလောက်အောင်မုန်းပေမည့် ကျောင်းဘောလုံးပွဲဆိုလျှင်တော့ အာပေါက်မတက် အော်ဟစ်ကာ အားပေးတတ်ကျသေးသည်။
မေဂျာချစ်သော စိတ် ကျောင်းကိုချစ်သောစိတ်ကလေးတွေက အရမ်းလှပလွန်းသော်လည်း သူတို့အနားသွားလိုက်လျှင် ဆူညံလွန်းလှသည်မှာ ဧကန်မလွဲပေ။

"ဟဲ့ အဲ့ဒါလူကိုချတာဟဲ့...ဟဲ့ဟိုဒိုင်ဗိုက်ပူပူလူကြီးမမြင်ဘူးလား"

ဗိုက်ပူပူနှင့် ကွင်းလယ်ဒိုင်ကတော့ မိအိမ့်ပြောသည်ကို ကြားနိုင်စွမ်းမရှိ ကွင်းအတွင်းတွင် အရှေ့အနောက်ပြေးလွှား‌နေသော လူငယ်ဘောလုံးသမားတွေ၏နောက်သို့လိုက်ရလွန်း၍ မောဟိုက်လို့နေလေသည်။ အမှန်တကယ်ဆို မပြေးနိုင်သော လူအား ကွင်းလယ်ဒိုင်မလုပ်ခိုင်းသင့်ဟု ဘုန်းတစ်ယောက်တွေးနေမိသည်။

ဘေးနားမှ သူတို့ကဲ့သို့ သူတို့၏ E majorကို အားပေးနေကျသော အဖွဲ့သည် ကွင်း၏တစ်ဖက်တွင်နေရာယူ၍ တစ်ဖက်က Botany major အဖွဲ့ကလည်း သူတို့၏ ဘောလုံးသမားများကို သောင်းသောင်းဖျဖျအားပေးနေကျသည်။

အခု E majorဘက်တွင် မေဂျာကလူတွေသာမက အခြားမေဂျာမှ ကောင်မလေးတွေလည်းအားပေးနေကျသည်။

အကြောင်းကား

"တေဇ မောင်လေးရေ ကန်ထားနော် အား!"

အမွှာနှစ်ကောင်သည် ကွင်းထဲတွင် နေရာယူထားသောကြောင့် သူတို့၏မျက်စိကို အစာကျွေးရန်သာဖြစ်လိမ့်မည်။

တေဇဇော်အား အားပေးသော နောက်တစ်ယောက်ရှိနေပါသေးသည်။ ထိုသူကတော့ ရေခဲစိမ်ရေဘူးကို ဖြစ်ညှစ်ကာ ဆုပ်ကိုင်ထားသော တေဇဇော်၏ကောင်လေးပင်။

"ငါပြန်တော့မယ်"

"ပြန်တော့မလို့လားဇေယျာ...ပွဲပြီးတော့မှာပါ"