ထိုနှစ်များမှာ မြတ်နိုးဖွေရှာ

Part 3

မင်းကြီးသည် မင်းသားနင်၏ အိမ်တော်နေရာကို သိမ်းယူခဲ့သည်။ ထိုနေရာကို ပြန်လည်ပြင်ဆင်ပြီးနောက်တွင်မူ ပဉ္စမမင်းသားရွှမ်ချုံ၏ အိမ်တော်ဖြစ်လာခဲ့သည်။ မင်းသားနင်၏ ယခင်အိမ်တော်ရှေ့မှ ဖြတ်သွားချိန်တွင် ကျုံးဝမ် လိုက်ကာကို မတင်လိုက်မိသည်။

ယခုနန်းစံနေသော မင်းကြီးနန်းတက်စတွင် အနည်းဆုံးတော့ သူ၏ညီတော်ကို ပထမအဆင့်မင်းသားအဖြစ် ချီးမြှောက်၍ ကိုယ်ပိုင်အိမ်တော်လည်း ပေးအပ်ခဲ့ကာ ရက်ရက်ရောရောပင် ဆက်ဆံခဲ့သည်။ ထို့ပြင် ဖခင်တစ်ယောက်ကဲ့သို့ပင် မင်းမျိုးမင်းနွယ်အထက်တန်းလွှာမှ မိန်းမပျိုလေးများကိုလည်း မင်းကြီးကိုယ်တော်တိုင် ရွေးချယ်ပေးခဲ့သည်။

ထိုစဉ်က မင်းသားနင်မိခင်၏ မိသားစုဖြစ်သော ကျုံးမိသားစုသည် ပြစ်မှုကို ကျူးလွန်ပြီး ဖြစ်သည်။ ကျုံးမိသားစုတွင် သမီးများစွာရှိ၍ သားအနည်းငယ်မျှသာ ရှိသည်။ သူတို့အနေဖြင့် မောင်းမဆောင်အတွက် ကိုယ်လုပ်တော်နှစ်ပါးကို မွေးထုတ်ပေးနိုင်ခဲ့သည်။ မည်သို့ပင်ဖြစ်စေ သားယောက်ျားလေး အရေအတွက်မှာမူ နည်းပါးလျက်ပင် ရှိသေးသည်။ အားကိုးမှီခိုနိုင်မည့် သူများမှာလည်း မိသားစု၏ ပြစ်မှုတွင် ပါဝင်ငြိစွန်းခဲ့ကြသည်။ သူတို့မိသားစုတွင် ကျန်ရှိသည့် တစ်ဦးတည်းသော သားယောက်ျားလေးမှာ အမျိုးနီးစပ်ထဲမှဖြစ်ပြီး အလွန်ငယ်သေးသည်။ ထို့ကြောင့် ပြစ်မှုတွင် ပါဝင်မှုမှ ပွတ်ကာသီကာ ကင်းလွတ်ခဲ့သည်။ နောက်ပိုင်းတွင် မင်းသားနင်သည် ထိုကလေးကို သူ၏အိမ်တော်သို့ ခေါ်ယူကာ သားအဖြစ် သတ်မှတ်ခဲ့သည်။ ထိုသို့ပြုမူလိုက်ခြင်းဖြင့် နန်းတွင်းအကဲဖြတ်များကို နှုတ်ပိတ်စေခဲ့သည်။

မင်းသားနင်၏ ကာကွယ်မှုအောက်တွင် ကျုံးဝမ်သည် သာမန်လူတစ်ယောက်ကဲ့သို့ပင် ကြီးပြင်းခဲ့ရသည်။

မင်းသားနင်ထံမှ ကောင်းချီးအဖြာဖြာကို ရရှိပြီးနောက်တွင် မင်းသားနင်၏ ကျဆုံးချိန်ရောက်ရှိလာပြီး ကျုံးဝမ်သည်လည်း ရွှမ်ရွေ့ကို ကာကွယ်ရန် ကျရှုံးလုနီးပါးဖြစ်ခဲ့သည်။ ထိုသို့သောအခြေအနေတွင် သူ့အနေဖြင့် သူကြီးပြင်းခဲ့ရာနေရာကို မည့်သည့်မျက်နှာဖြင့် ဆက်ကြည့်ရမည်နည်း။ သက်ပြင်းကြီးတစ်ခု ရှိုက်ထုတ်လိုက်ပြီးနောက်တွင် သူက လိုက်ကာကို ပြန်ချလိုက်တော့သည်။