ထိုနှစ်များမှာ မြတ်နိုးဖွေရှာ

Part 36

Unicode

ယွီရှီက ခပ်သုတ်သုတ် ထွက်သွားတော့သည်။ ကျုံးဝမ်မှာ ယွီရှီ ထွက်သွားသည်ကိုကြည့်ရင်း ရယ်ချင်စိတ်ကို အောင့်ထားရသည်။

ကောင်းပြီလေ။ ဆယ်ရက်တစ်ကြိမ်က... နွားကျောင်းသားနဲ့ ရက်ကန်းသမ ဒဏ္ဍာရီ ထက်စာရင်တော့ နည်းနည်းပိုကောင်းပါသေးတယ်။

ကျုံးဝမ်လည်း ခပ်ဖြည်းဖြည်းပြန်လာခဲ့သည်။ နေရာသို့ပြန်ရောက်သော် ရွှမ်ကျင်းတို့မှာ အခြားနေရာသို့ရွှေ့ရန် ဖိတ်ကြားခံရပြီးဖြစ်သည်။ ကျုံးဝမ်သည် သူတို့ကို သေချာဂရုတစိုက်ဖြင့် ရှောင်ရှားခဲ့ပြီးနောက် ထိုလူတို့ကို ထပ်မတွေ့ရတော့ပေ။

ရွှမ်ကျင်းက သူ့ဆီက ဘာလိုချင်နေတာလဲ။

ကျုံးဝမ်သည် လင်စစ် သူ့ကိုပေးလိုက်သော စက္ကူလုံးလေးကိုကိုင်ရင်း ဆောက်တည်ရာမရဖြစ်နေသည်။ တတိယမင်းသားသေဆုံးပြီး သုံးပတ်မြောက်တွင် လင်စစ်ကို သူအခေါ်လွှတ်ခဲ့သည်။ သို့သော် နှစ်ရက်ကြာသွားသည့်တိုင် လင်စစ်မှာ ပေါ်မလာခဲ့။ ကျုံးဝမ်သည်လည်း မြို့တော်ရှိ သူ့လူတို့ကို စေလွှတ်ကာ တိတ်တဆိတ်စုံစမ်းခိုင်းခဲ့သည်။ အချက်အလက်များ ရမလာခင် လင်စစ် သူ့ထံလာခဲ့သည်။

ခါတိုင်းကဲ့သို့ပင် လင်စစ်သည် အိမ်တော်ကို ညအချိန်မှ ဝင်လာသည်။ သူ့ပုံစံမှာ ထူးထူးခြားခြားမရှိလှသဖြင့် ကျုံးဝမ်စိတ်အေးရသည်။ သူတို့နှစ်ဦးသည် အတွင်းဆောင်သို့ ဝင်လာကြပြီး ကျုံးဝမ်က လင်စစ်အတွက် လက်ဖက်ရည်တစ်ခွက် ငှဲ့ပေးလိုက်သည်။

လင်စစ်က ထိုခွက်ကို လက်နှစ်ဖက်ဖြင့် မြန်မြန်ယူလိုက်သည်။ ထို့နောက် ခွက်ကိုပြန်ချလိုက်ပြီး လက်ဟန်ပြသည်။ "ကျွန်တော် အရင်တစ်ခေါက်လာတုန်းက သေချာခြေစမဖျောက်နိုင်လိုက်လို့ စတုတ္ထမင်းသား သိသွားတယ်"

ကျုံးဝမ်၏မျက်နှာရှိ ခံစားချက်တို့ပြောင်းသွားရသည်။ သူဘာမှမပြောနိုင်ခင် လင်စစ်က လျင်လျင်မြန်မြန် လက်ဟန်ပြသည်။ "သခင်လေးက မင်းသားငယ်ယွီရဲ့အကြောင်းတွေကို ကွယ်ဝှက်ထားဖို့ ပြောခဲ့တယ်မလား။ ကျွန်တော့်မှာ ရွေးစရာမရှိဘဲ ပဉ္စမမင်းသားဆီက သတင်းတွေကို သခင်လေးက ပိတ်ထားတယ်လို့ ပြောလိုက်ရတယ်။ သခင်လေးကို သတင်းလာနှိုက်ပေမဲ့ မရခဲ့ဘူး။ ဒါကြောင့်မို့ ဒီလိုလာပြီး မင်းသားငယ်ယွီအကြောင်း လာရှာတာက အလဟဿဖြစ်သွားတယ်ပေါ့"