ထိုနှစ်များမှာ မြတ်နိုးဖွေရှာ

Part 51

Unicode

ထိုအခိုက်ဝယ် 'ဂရုစိုက်မခံခဲ့ရ'သည်မှာ နှစ်များစွာကြာပြီဖြစ်သော ကျုံးဝမ်၏မျက်လုံးတို့သည် ရုတ်တရက် ပြူးကျယ်သွားရတော့သည်။

ယခင်က အလိုလိုက် အကြိုက်ဆောင်ခံရခြင်းကို သူလည်း ခံစားခဲ့ရဖူးပါသည်။ မင်းသားနင်နှင့် ကြင်ယာတော်နင်တို့ သက်ရှိထင်ရှားရှိစဉ်တွင် ပထမအဆင့်မင်းသားအိမ်တော်မှ သခင်လေးတစ်ယောက်ပမာ ဆက်ခံသူနှင့်တန်းတူ တန်ဖိုးထားခံရလျက် ရိုသေလေးစားမှုများ ရရှိခဲ့သည်။

မင်းသားနင်သည် သိမ်မွေ့သော လူတစ်ဦးဖြစ်ပြီး သူ့အားမေတ္တာများပေးခဲ့သည်။ ကျုံးဝမ်အပေါ် စည်းကမ်းတင်းကြပ်သော ဖခင်တစ်ဦးမဟုတ်ခဲ့။ ကျုံးဝမ်နှင့်လင်စစ်တို့ မည်မျှပင် ဆိုးသွမ်းနေနေ၊ စိတ်တိုခြင်းအလျဉ်းမရှိခဲ့ပေ။ ကြင်ယာတော်နင်သည်လည်း ကျုံးဝမ်၏ လိုအင်ဆန္ဒမှန်သမျှတို့ကို ဖြည့်ဆည်းပေးကာ သူ၏သားဦးတစ်ယောက်ကဲ့သို့ပင် ဆက်ဆံခဲ့သည်။

သို့သော် ဤအမှတ်တရတို့သည် ဝေဝါးလျက် ကျန်ခဲ့လေပြီ။ သူပြန်တွေးမိလေတိုင်း အသေးစိတ်ကို ရေရေရာရာမမှတ်မိတော့။ လွန်ခဲ့သည့်ဘဝမှ မှတ်ဉာဏ်များကဲ့သို့ပင်။

မင်းသားနင် လူ့လောကမှ ထွက်သွားကတည်းက သူ့ကိုရည်ညွှန်းပြလျှင် 'အဖေ'ဟူ၍ ကျုံးဝမ်ထပ်မသုံးခဲ့တော့။

ဤလမ်းကို သူကိုယ်တိုင် ရွေးလျှောက်ခဲ့သည်။ မင်းသားအိမ်တော် ကံဆိုးမိုးမှောင် ကျခဲ့ချိန်ကတည်းက ကျုံးဝမ် သူ့ကိုယ်သူ မချစ်ချင်တော့။

အရာအားလုံးတွင် မရင်းနှီးမှုများကို အာရုံခံစားနေရသည်။ နှစ်ပေါင်းများစွာ ဒုက္ခခံစားခဲ့ရပြီးနောက်တွင် တယုတယ ဂရုစိုက်ခံရသည်ဟူသော ခံစားချက်ကို သူမေ့သွားခဲ့လေပြီ။ ယခုကဲ့သို့ ရုတ်တရက်ကြီး ပက်ပင်းခံစားလိုက်ရချိန်တွင် သူ့ရင်ထဲ၌ ဆောက်တည်ရာမရ ဖြစ်နေမိသည်။

ယွီရှီ၏အမြင်တွင်မူ သူ့နှလုံးသားထဲသို့ ဓားတစ်ချောင်းစိုက်သွင်းလိုက်သည့်နှယ်။

စိတ်မတင်းထားနိုင်စွာ ကျုံးဝမ်က ယွီရှီကို လှမ်းကြည့်လိုက်သည်။ သူလျှပ်တစ်ပြက် ပြောလိုက်မိသည်။ "မင်းကြီးက အရူးမဟုတ်ဘူး။ မင်း ငါ့အမှုကို အတင်းဝန်ခံလိုက်ရင် မင်း... မင်းအပြစ်ပေးမခံရဘူးလား။ ဒါမှမဟုတ် မင်း မင်းကြီးကို တစ်ခုခုများ ကတိပေးခဲ့ရသေးလား"