ထိုနှစ်များမှာ မြတ်နိုးဖွေရှာ

Part 57

Unicode

ကျုံးဝမ်သည် စာဖတ်ခန်းရှေ့တွင် တစ်နာရီခန့် ရပ်နေခဲ့သည်။ အစေခံတို့မှာ အနီးမှဖြတ်သွားတိုင်း သူ့အား အံ့အားတကြီး ကြည့်ကြည့်သွားကြသည်။ သူ မျက်နှာကို ပွတ်လိုက်သည်။ သီးသန့်နေရန်အတွက် သူထွက်လာခဲ့သည်။

ယခုအချိန်တွင် သူ စာဖတ်ခန်းထဲသို့ အလောတကြီးဝင်လျက် ရှင်းပြခဲ့လျှင် ယွီရှီ မည်သို့တုံ့ပြန်မည်ကို သူသိချင်မိသည်။ သူစုံစမ်းခဲ့ရသမျှ ယွီရှီ၏နောက်ကြောင်းများကို အကုန်ဖွင့်ဟခဲ့လျှင်။

ကျုံးဝမ်မှာ စိတ်လိုက်မာန်ပါ လုပ်လိုက်ချင်သော်ငြား ကိုယ့်စိတ်ကို ပြန်ဖိသိပ်ထားမိပြန်သည်။

သူ ဤသို့မလုပ်ခင် ယွီရှီထံမှ မျက်နှာသာပေးခံရအောင် ဦးဆုံးဆောင်ရွက်ရမည်မှာ သေချာသည်။

ကျုံးဝမ် သူ့နောက်ကြောင်းကို သိနေခဲ့လျှင်ပင် နှင်ထုတ်ရလောက်အောင် ဒေါသထွက်သည်အထိ မဖြစ်ဖို့လိုသည်။ ဆန့်ကျင်ဘက်အနေနှင့် ထိုလျှို့ဝှက်အကြောင်းအရာများကို ဖြေရှင်းပြပြီး နေထိုင်ရန် ခွင့်ပြုကာ အကြံပေးတစ်ယောက်ဖြစ်လာအောင် ခွင့်ပြုပေလိမ့်မည်။

ကျုံးဝမ်သည် ဤကိစ္စနှင့်ပတ်သက်၍ တကယ့်ကိုပင် မြူမှုန်စာမျှ ယုံကြည်ချက်ရှိမနေပေ။

မည်သို့ပင်ဆိုဆို သူသည် မင်းသားနင်အိမ်တော်မှဖြစ်သည်။ ယခုအချိန်တွင် ရွှမ်ရွေ့သည်လည်း ထီးနန်းအတွက် ပြိုင်ဆိုင်မည့် အခြေအနေတွင်ရှိသည်။ ကျုံးဝမ်အား ရွှမ်ရွေ့က သူလျှိုလုပ်ရန် လွှတ်လိုက်သည်ဟု ယွီရှီ တွေးနေလေမလား။

ယခုအချိန်တွင်မူ အကောင်းဆုံးနည်းလမ်းမှာ...

ကျုံးဝမ် ရွေရွတ်လိုက်သည်။ "ငါ့ကိုတစ်ကြိမ်လုပ်ဖို့ သူ့ကိုခွင့်ပေးလိုက်မယ်"

တစ်ကြိမ်သာ။ ထို့နောက်တွင်မူ ယွီရှီအား တစ်သက်တာ လှည့်စားနိုင်ပြီဟု ကျုံးဝမ်ထံတွင် ယုံကြည်ချက်ရှိလာပေမည်။

သူ့စကားလုံးများသည် ဆေးလာပို့သော အစေခံမိန်းကလေးအား ကတုန်ကယင် ဖြစ်သွားသည်အထိ ကြောက်လန့်သွားစေသည်။ ကျုံးဝမ်က ဆေးခွက်အား ကူညီကိုင်ပေးလိုက်သည်။ "မင်း ဘာလို့အရမ်းကြောက်နေတာလဲ။ ငါမကိုက်စားပါဘူး"