ထိုနှစ်များမှာ မြတ်နိုးဖွေရှာ

Part 54

Unicode

လင်စစ်ထွက်သွားသည်ကိုကြည့်လျက် ကျုံးဝမ် သက်ပြင်းချမိသည်။

လင်စစ်တစ်ယောက် ခြေရာဖျောက်သွားပြီးနောက်တွင် ရွှမ်ကျင်းမှာ မြို့တော်တစ်ခုလုံးကို မြေလှန်၍ အိမ်တော်တိုင်းတွင် လင်စစ်အား ပြောင်ပြောင်ထင်းထင်း ရှာဖွေခဲ့သည်။ လင်စစ်ကိုပြန်ဖမ်းယူ၍ ခေါ်သွားမည်ဟုပင် ကြုံးဝါးထားသေးသည်။ ဤနောက်ကွယ်တွင် မရှင်းလင်းသော ခံစားချက်များမရှိနိုင်ဟု ကျုံးဝမ်မထင်။ သူသက်ပြင်းချမိသည်။ တစ်ယောက်ယောက်အား တွယ်ကပ်နေရသော ခံစားချက်ကို လင်စစ်တစ်ယောက် သေချာပေါက် နားလည်နိုင်မည်မဟုတ်ပေ။

ဤသည်မှာ... ဗိုက်ပြည့်နေသော လူတစ်ယောက်က ဗိုက်ဆာနေသောလူ၏ ဆာလောင်မှုကို နားမလည်နိုင်သကဲ့သို့ပင်။

ဤတစ်နေ့အတွင်းတွင် ကျုံးဝမ်မှာ အပျော်ကြီးပျော်ရလျက် အဝမ်းနည်းကြီး ဝမ်းနည်းခဲ့ရသည်။ လင်စစ်ကို ပြန်လွှတ်ပြီးနောက်တွင် အဝတ်များကို တင်းတင်းဆွဲလျက် ခုတင်ပေါ်တွင် သူလှဲလိုက်သည်။ ကနဦးတွင် အနည်းငယ် အနားယူရန်သာ ရည်ရွယ်ထားသော်ငြား မျက်လုံးပိတ်လိုက်သည်နှင့် သူအိပ်ပျော်သွားတော့သည်။

ကျုံးဝမ် အေးအေးချမ်းချမ်း မအိပ်ခဲ့ရ။ အိပ်တစ်ဝက်၊နိုးတစ်ဝက်ဖြစ်လျက် အိပ်မက်စမက်လေတော့သည်။

နန်းတော်တွင် ရွှမ်ရွေ့၏စာဖတ်ဖော် ဖြစ်ခဲ့စဉ်ကအကြောင်းကို သူမြင်မက်နေသည်။ ထိုအချိန်က သူနှင့်ရွှမ်ရွေ့ကြားတွင် နားလည်မှုလွဲခြင်းများ မရှိခဲ့သေး။ နေ့စဉ်နေ့တိုင်း သူတို့နှစ်ဦးမှာ နေရာတိုင်းသို့ အတူသွားလာခဲ့ကြသည်။ ရွှမ်ရွေ့မှာ သူ့နောက်သို့ အမြဲတစ်ကောက်ကောက် လိုက်နေခဲ့သည်။ အခြားသူများနှင့်ရှိလျှင် သူ့အား နာမည်တပ်ခေါ်သော်လည်း အခြားသူများ မရှိလျှင် ကျုံးဝမ်အား 'အစ်ကိုတော်'ဟု ခေါ်လေ့ရှိသည်။

သူ၏အခြားအိပ်မက်မှာ မင်းသားနင်၏ သစ္စာဖောက်သည့် အမှုအကြောင်းဖြစ်သည်။ သူသည် ထောင်ထဲတွင် ပိတ်လှောင်ခံရလျက် နေ့စဉ်အစစ်ဆေးခံခဲ့ရသည်။

တစ်ဖန် ယွီရှီ၏ကယ်ဆယ်မှုကိုခံရပြီး အရံခြံဝန်းထဲသို့ ရောက်သွားချိန်ကို အိပ်မက်မက်ပြန်သည်။ ဖျားဟန်ဆောင်လျက် သူငယ်စဉ်ကတည်းက ကုသပေးခဲ့သော တော်ဝင်သမားတော်ကြီးကို ပင့်ဖိတ်နိုင်ခဲ့စဉ်ကဖြစ်သည်။