ထိုနှစ်များမှာ မြတ်နိုးဖွေရှာ

Part 71

Unicode

ကျုံးဝမ် နေခဲ့ချင်မှတော့ အချို့အရာများကို သိထားသင့်ပေသည်။ အနှေးနှင့်အမြန် သူသိသွားမည်သာဖြစ်သည်။

ယွီရှီသည် ချောက်ကမ်းပါးစွန်းတွင် ရပ်နေရသကဲ့သို့၊ ပါးလွှာသော ရေခဲပြင်ပေါ်တွင် လမ်းလျှောက်နေရသကဲ့သို့ လတော်တော်ကြာ ခံစားနေခဲ့ရသည်။ သူသည် ကျုံးဝမ် အတွင်းသတင်းများ သိသွားမည်ကို အမြဲမပြတ် စိုးရိမ်နေခဲ့သည်။ သို့သော် ယခုရက်ပိုင်းများတွင် မင်းသားယွီသည် ယွီရှီ၏နောက်ကြောင်းနှင့် ပတ်သက်၍ ပြဿနာဖန်တီးချင်နေသည်။ သူ ကျုံးဝမ်ကို သတင်းအမှောင်ချထား၍ မရတော့။

ကျုံးဝမ် မှန်ပေသည်။ သူကိုယ်တိုင်ပြောလျှင် ပိုလေးနက်ပေလိမ့်မည်။

ယွီရှီသည် အတိတ်မှဖြစ်ရပ်များကို အေးဆေးစွာ ရှင်းရှင်းလင်းလင်း ပြောပြရန် အတတ်နိုင်ဆုံး ကြိုးစားပြီးနောက်တွင် ကျုံးဝမ်တစ်ယောက်မှာတော့ အတွေးများနေခဲ့တော့သည်။ သူ မည်သည့်စကားကိုမှ မဆိုခဲ့။

ယွီရှီသည် အယူခံကာ ရှင်းပြချင်သော်လည်း ဘာပြောရမည်ကိုတော့ဖြင့်မသိ။

သူ မည်သူ့ကို မုန်းသင့်သလဲဆိုသည်ကို ယခုချိန်ထိ မသိသေးသကဲ့သို့ပင် ယွီရှီသည် ကျုံးဝမ်ကို မည်သို့ရှင်းပြရမည်ကိုလည်း မသိ။

သူ့မွေးမိဘများနှင့် ကျွေးမိဘများသည် လူသတ်မှုကို ဇာတ်လမ်းဆင်ခဲ့သည်။ သူတို့၏သား သူသည် မည်မျှဖြူစင်နိုင်မည်နည်း။

ယခင်က မင်းသားနင်သာ ချောချောမွေ့မွေ့ နန်းတက်နိုင်ခဲ့လျှင် ကျုံးမိသားစု၏ မိသားစုဝင်တစ်ယောက်အနေနှင့် ကျုံးဝမ်သည် သေချာပေါက်ကို လုံလုံခြုံခြုံဖြင့် အန္တရာယ်ကင်းစွာ ကြီးပြင်းလာမည်မှာမလွဲပေ။ ငယ်ရွယ်နုပျိုစဉ်မှာ နန်းတွင်းစာမေးပွဲများ အောင်နိုင်ပြီး စစ်သူကြီး သို့မဟုတ် အမတ်ချုပ်ကြီးအဖြစ်သို့ ကြီးပြင်းရောက်ရှိလာပေမည်။ မည်သို့များ ဤအခြေအနေသို့ ကျဆင်းသွားအံ့။

ယွီရှီကိုယ်တိုင်သည် အဟုတ်အမှန် အပြစ်ကင်းသည်လား။

လွန်ခဲ့သည့်နှစ်များအတွင်း ယွီရှီရရှိခဲ့သော ချမ်းသာကောင်းမွန်သည့် နေ့ရက်များသည် ကျုံးဝမ်နှင့် အမှန်တကယ် မသက်ဆိုင်ချေဘူးလား။