ထာ၀ရနဂါး တန်ခိုးရှင် ( လုမင် ) (Ch 1 - 985 ) Book 1

441 - 445

ထာဝရနဂါးတန်ခိုးရှင် ( လုမင် )
မူရင်း စာရေးဆရာ - Mu Tong Ting Zhu
ဘာသာပြန်သူ      - ထာဝရ
အပိုင်း ( 441 ) စွမ်းရည်နှင့် တာအိုသန္ဓေ အရိပ်အမြွက်ကြားမှ ယှဉ်ပြိုင်ပွဲ

အခြားသူများလည်း စိတ်လှုပ်ရှားစွာ ဆွေးနွေးရင်း အလျှိုလျှို ထွက်ခွာသွားခဲ့ကြသည်။

"ဟားဟား...။ လုမင်က အတော်တုံးအတာပဲ.. သူက ချိုင်ကုံကို ဒီလိုနည်းနဲ့ ရန်စဝံ့တယ်..။ ဒီအတိုင်းဆိုရင်တော့ ငါတောင် ဘာမှလုပ်စရာမလိုတော့ဘူး..။ ချိုင်ကုံလက်ချက်နဲ့ မင်းသေရတော့မယ်"
ချိုးကန်ခုန်း လှောင်ပြောင်သရော်ဟန်ဖြင့် ရေရွတ်ပြောဆိုကာ ပြန်လှည့်ထွက်သွားသည်။

ခဏကြာသောအခါ လုမင်နှင့် ချိုင်ကုံ၏ တိုက်ပွဲခေါ်သံက အလျင်အမြန် ပျံ့နှံ့သွားခဲ့သည်။

လုမင်ကလည်း ခြံဝင်းအတွင်းသို့ ပြန်ဝင်ကာ တရားထိုင်ရင်း စိတ်အခြေအနေကို ထိန်းချုပ်လိုက်၏။

နေဝင်ပြီးနောက် နေပြန်ထွက်လာခဲ့ချေပြီ။

ရှမ်ဝေတိုက်ပွဲစင်မြင့်ကို တောင်ထိပ်တစ်ခု၌ တည်ဆောက်ထားသည်။ ၎င်းတောင်ထိပ်က ညီညာပြန့်ပြူးကာ အလွန်ကျယ်ဝန်း၏။ အလျား၊အနံ ဆယ်မိုင်ခန့်ရှိသော တိုက်ပွဲစင်မြင့်ကို ထိုနေရာတွင် တည်ဆောက်ထားပေသည်။

နာမည်အတိုင်းပင်၊ ၎င်းက ကောင်းကင်နတ်ဘုရား အစောင့်အရှောက်များ၏ တိုက်ပွဲကွင်းပြင်ပင် ဖြစ်သည်။

ရှမ်ဝေ တိုက်ပွဲစင်မြင့်ကို သံနက်ဖြင့် ပြုလုပ်ထားပြီး  မှော်သင်္ကေတများ ရေးထိုးထားသည်။ ထို့ကြောင့် အဆင့်နိမ့်ဘုရင်များ တိုက်ခိုက်လျှင်ပင် မပျက်ဆီးနိုင်အောင် ခိုင်ခံ့၏။

မနက်အစောကြီးသာ ရှိသေးသော်လည်း ရှမ်ဝေတိုက်ပွဲစင်မြင့် ပတ်ပတ်လည်တွင် လူများ ပြည့်နှက်နေခဲ့ပြီဖြစ်သည်။

အနည်းဆုံး လူတစ်သောင်းကျော်ပင် ရှိ၏။

ယခုတစ်ခေါက် ကောင်းကင်နန်ဘုရား စမ်းသပ်ပွဲကို လူခြောက်ထောင်၊ ခုနစ်ထောင်ခန့် အောင်မြင်ခဲ့ကြသည်။ ထို့ကြောင့် တံခါးပိတ် ကျင့်ကြံခြင်းနှင့် အပြင်သွားနေသူများမှလွဲ၍ ကောင်းကင်နတ်ဘုရား အစောင့်အရှောက်အများစု ရောက်သည်ဟု ဆိုနိုင်သည်။