Big Bossကြီးရဲ့ကိုယ်ထဲ ကူးပြောင်းပြီး ဗီလိန်လေးကိုအရယူမယ် {ဘာသာပြန်}

[ 4 9 ]

အေးဂျမ့်ရဲ့ မျက်နှာကလည်း အလားတူ ကောင်းနေတာ မဟုတ်ပေ။ ဒါက သူတို့တွေ ဦးညွှတ်ပြီး တောင်းပန်ဖို့ ဖိအားပေးစေခိုင်းခံရတဲ့ ပထမဆုံးအကြိမ်ပဲ။ ခက်ခဲပျာယာပြီး အောင့်သက်သက် ခံစားချက်က တကယ် သည်းမခံနိုင်စရာပဲ။

သို့ပေမဲ့လည်း သူ ရှောင်းဇီချီကို ကြင်နာသော စကားများဖြင့် နှစ်သိမ့်ပေးလိုက်ပါသေးတယ် :: "စိတ်ထဲ မထားနဲ့နော်။ ဒီထိုးနှက်မှုတွေ ပြီးသွားရင် အရာအားလုံး အဆင်ပြေသွားလိမ့်မယ်။ ခဏလောက်လေး ကိုယ်‌ယောင်ဖျောက်နေကြစို့။ နောက်ဆို အွန်လိုင်းက ဒီလူတွေ ဒီအဖြစ်အပျက်ကို မှတ်မိမှာတောင် မဟုတ်တော့ဘူး။ မင်းလည်း အရင်က ပုံမှန်အတိုင်း ပြန်ဖြစ်သွားလိမ့်မယ်။"

ရှောင်းဇီချီက မျက်မှောင်ကြုပ်လိုက်ပေမဲ့ ခေါင်းတော့ ညိတ်ပြလိုက်ပါတယ်။

အခုတော့ ဒီလိုပဲ ဆက်ဖြစ်နေရအုံးမယ်ပေါ့လေ။

သူ မပျော်ရွှင်သေးတာကို မြင်တော့ အေးဂျမ့်က တစ်ခဏလောက် စဉ်းစားကြည့်ပြီး အဲ့နောက် ရုတ်တရက် အကြံတစ်ခု ရလာခဲ့တယ် :: "အို ဟုတ်သား။ ငါ့မှာ ပလန်တစ်ခု ရပြီ...." သူ ရှောင်းဇီချီနား တိုးကပ်လာပြီး နားရွက်နားကပ်ကာ စကားတစ်ချို့ တိုးတိုးလေး ပြောလိုက်တယ်။

ရှောင်းဇီချီမျက်လုံးများက တဖြည်းဖြည်း တောက်ပလာခဲ့တယ်။ လူနှစ်ယောက် အချင်းချင်း စိုက်ကြည့်နေကြတယ်။ နောက်ထပ်စကားများ မလိုအပ်တော့ပြီ။

<<ကောင်းကင်ဘုံနဲ့ ကမ္ဘာမြေကွာဟမှု>> ဗားရှင်းအသစ်ကတော့ လျင်လျင်မြန်မြန်နဲ့ပဲ အသစ်တစ်ဖန် မွေးဖွားလာခဲ့ပြီ။ အသစ်တည်းဖြတ်ထားတဲ့ အပိုင်းများကို ထုတ်လွှင့်လိုက်ပြီ , အရင်အဟောင်းနဲ့ ယှဉ်ရင် ကောင်းကင်က တိမ်များနဲ့ မြေကြီးပေါ်က ဖုန်မှုန့်များကို နှိုင်းယှဉ်သကဲ့သို့ ဖြစ်နေလိမ့်မည်!

ကြုံရာကျပန်း လျှောက်ထည့်ထားတဲ့ အခန်းတွေမပါဘူး။ ပြသချိန်တစ်ချိန်လုံးမှာ ရှောင်းဇီချီကို ထည့်မတွက်ထားဘဲ ပြောရရင်တော့ ကြည့်ရှုသူများရဲ့ မျှော်မှန်းချက်များထက် ကျော်လွန်နေတယ်လို့တောင် ပြောနိုင်တယ်!