عاهرة الامام(كاملة ❤️)

189

⁦♥️⁩عـــــاهــــــرة الامــــام⁦♥️⁩
⁦✒️⁩بـــــقــــلـــــم:بـــــخـــــتــــــة&ســـــــارة⁦✒️⁩
⁦♨️⁩ الحــــلــــقـــــة 122 ♨

حبست طاكسي قدام بناية كبيرة .. هبطت بختة منها و طلعت راسها للبناية قرات لبلاكا لي معلقة فوق الباب "دار المسنين لولاية ***" .. ابتسامة رقيقة ارتسمت على شفايها و دخلت .. مشات ديراكت لمكتب المديرة طبطبت و دخلت كي سمعت الاذن ..
المديرة/حياة وقفت و الضحكة على وجهها : ااه بختة ! مرحبا بيك بنتي وشراكي ؟
مشات ليها بختة سلمت عليها : اهلا خالتي .. لباس حمدلله و نتي وشراكي ؟
حياة : الحمدلله يسقسي عليك الخير .. اتفضلي بنتي اقعدي ..
قعظت بختة قدامها و قعدت حياة ..
بختة : وشراكي دايرة مع الخدمة ؟
حياة ضحكت : كيفما خليتيني نحاولو نوقفو و نخلو كلش ماشي بخير اكي عارفا لعجايز و مشاكلهم لي ميخلاصوش .
بختة هبطت راسها : مساكن .. 💔
حياة : شحال مزورتيناش توحشناك ابنتي وين غابرة هذا ..
بختة تنهدت : مع الدار اخالتي ليامات هذو انا و منيش لاقيا روحي غير ريحت شوي قلت نجي نشوفكم و نقعد معاهم شوي .
حياة : خير ماعملتي ..
فتحت بختة صاكها و جبدت ظرف حطتو قدامها ..
بختة : اهلاو فيهم خالتي .
حياة تبسمت و حطت الظرف فلقجر : جزاكي الله خيرا و جعلها في ميزان حسناتك .. بلا متوصي متهليين فيهم مليح .
بختة وقفت : مالا نمشي نشوفهم .
حياة وقفت معاها : ايه راهم ملمومين فلجاردان ايا نهبطو مع بعض مام انا كنت حنمشي نشوف كشما خاصهم .
هبطو مع بعض و خرجو للجاردان لقا لعجايز لي قاعدة على العشب وحدها تخمم في حالها و لي دايرين جمعة قسرة مع بعض يحكيو يفوتو الوقت كل وحدة و شغلها ..
بختة : مسالخير عليييييكم .
مشات ليهم تسلم عليهم وحدة وحدة و تسقسي على خبارهم و هوما يحكولها فرحانين بشوفتها .. تعرفهم وحدة وحدة و يعرفوها كامل .. و المديرة واقفة بعيد مربعة يديها تتفرج بإبتسامة .. وقفت بختة و خزرت لعجوزة كانت قاعدة على الكرسي حجري بعسد عليهم وحدها .. تلفتت للمديرة سقساتها بعينيها وشبيها ..
حياة : هذي جات عندها سمانة متحكي مترد قاعدة وحدها جابدة روحها لي يقربلها تعيط عليه و تحاوزو .. عيينا فيها تاكل والو تشرب غير الماء و الدوا و كل ليلة تطيحلنا بسك مريضة و متاكلش ..
بقات ثواني تخزرلها مبعيد حست الدمعة في عينها .. باينا مرا مهمومة و تعبانة من الدنيا .. عندها اكثرمن 10سنين تجي هنا شافت عجايز بأنواع مختلفة و سمعت حكايات قد شعر راسها اما هذي بدات حاسة بحاجة غريبة جيهتها .. عينيها تحسهم مؤلوفين و فيهم حاجة خاصة ..

♨ الـــحـــلـــقــــة 122 بـــــارت 02 ♨

مشات ليها بلا متحس لقات روحها قدامها ..
بختة : مسالخير جدة .
طلعت لعجوزة راسها خزرت فيها بهدوء و بختة تبسمتلها هادية للخر حتى عيطت باعلى صوتها : وش تسحقي ؟
تهزت على عياطها المفاجأ و حطت يدها على قلبها ..
بختة : بسم الرحمان الرحيم ..
لعجوزة : شايفا جن وقيل احترمي شيباتي كي محترمتيش قعدتي .. لبارح جيتي عندي تعيطي و تطلقي فجنونك عليا و ليوم راجعة تكملي على مابيا ؟؟
بختة تبسمتلها تطمنها : لالا جدة منيش تع لبارح انا بختة هذا وين جيت .
لعجوزة : و تكذبي ثان !! امشي من قدااامي متشوفكش عيني امشي لا ننتفك نقطعلك الزوج شعرات لي في راسك امشييي .
بختة : ياجدة يهديك ربي انا بختة .
سكتت لعجوزة تدقق فيها و رجعت حكات : شكوون بختة ؟ معرفتكش ..
بختة تبسمت : مام انا منعرفكش ..
رفدت لعجوزة لعصا و دورتو جيهة بختة : مزااالكي تكذبي علياااا ؟
بختة نقزت هاربة بعيد شوي منين متلحقلهاش : ياااجدة استهدي بالله منيش تع لبارح حقربي اقسم بالله ..
لعجوزة هبطت لعصا و رجعتو قدامها : بختة بنت سعدية المهبوولة ني عرفتك ابنت المهبولة و نتي لاعبتها متعرفينيش .
تبسمت بختة بإرتياح و مشات قعدت جنبها : لالا انا ....
لعجوزة : وشراكي ابنتي وشراهي يماك و خاوتك ؟
طلعت راسها لقات حياة واقفة بعيد شويا عليهم كي شافت فيها حركتلها عينيها تع سايريها برك ..
بختة : لباس الحمدلله نسقسيو عليك اجدة راكي مليحة ؟ مرتاحة و صحتك مليحة ؟
تنهدت لعجوزة : و كيفاش حابتني نكون مليحة ابنتي و انا قاعدة هنا بعيدة على ولادي و حفادي .. رماوني ولادي بين اربع حيوط بلا ميشوفو وراهم غير بش يرضيو نساهم الله يغفرلهم ..
سكتت بختة ملقاتش وش تقول سورتو كي شافت الدموع في عيون لعجوزة ..
لعجوزة : والله و ربي لي عالم ماكنت نلحقلهم ولا نقيسهم ربي شاهد عليا كنت نحبهم كي بناتي لي سمحو فيا و نحبلهم الخير .. نقعد في بيتي بعيدة عليهم نشرب دواي وحدي و ناكل غير شوي بش منثقلش عليهم هذا و بدراهمي عايشين بيهم يصرفو و ياكلو .. رماوني من دار لدار وحدة مقبلتني بيناتهم و وحدة مشافتني يماها يعاملوني مش مليح يسبوني و يخرجو فيا للعيب و انا ساكتة و شادة في ربي و متحملة معاهم المهم نقعد مع ولادي و احفادي حتى لنهار نسمع فيهم يقولو بلي رح يجيبوني هنا .. بناتي سكتو وحدة محبت تديني عندها خايفين رجالهم ميقبلونيش و ولادي قبلو كل همهم راحة نساهم .. يابنتي صدقيني والله منلحقلهم لا بلساني لا بيدي يديرو فلغلطة قدامي و انا ساكتة منتحرك و منقول لالا مش هك غير بش ميحسونيش ثقيلة .. ولادي لي ربيتهم و كبرتهم سمحو فيا خلاوني وراهم و مشاو مسقساو عليا مطلو يشوفو خباري .. اللقمة متفوت من حلقي بلا بيهم يابنتي كبدتي راهي محروقة عليهم انا لي تعبت معاهم فللخر رماوني و نساوني ..