عاهرة الامام(كاملة ❤️)

163

🚫🖤 عـــاهــرة الإمـــــام 🖤🚫

✏ ســــارة & بـــخــتــة ✏

الــحــلــقــة الــثــالــثــة و الــثــمـانــون :

فتحتت باب غرفت اختها نصفها الثاني و دخلت .. لقات يماها واقفة قدام السرير فاليز مفتوحة قدامها و في يدها روب تشم فيها و دموعها يحرقو على خدها .. مسحت الدمعة لي طاحت من عينها و قربت لفتيحة حطت يدها على كتفها ..
بختة : ماما ...
طلعت فتيحة راسها من تريكو طبقتو و حطتو فلافاليز بلا متشوف في بختة ..
فتيحة : انعم ..
بختة تنهدت : لاه حتخبي قشها ؟؟
فتيحة بصوت فيه بكا : نتبرع بصوالحها كاين بزاف يسحقوه مش لاقيين بواش يسترو جسمهم ..
بختة جبدتها من يدها قعظتها على السرير و قعدت جنبها مدورة بكامل جسمها و يدها الثانية على خد فتيحة ..
بختة : ماما راكي مليحة ؟
فتيحة : كيفاش تحبيني نكون مليحة كبدتي راحت بنت كرشي الوحيدة داتها الموت و غطاها التراب .. بنتي ماتت مقنوطة ماتت و الحرقة في قلبها و خلات وراها ملايكة .. كيفاش حتكبر و كيفاش حتعيش بلا ام و كيفاش حنعيش انا بلا بنتي .. اااه ياربي ارفع روحي عندك منيش قادرة نزيد بلا ليها ااه ياربي ااه .
جملة "بنت كرشي الوحيدة" قاستها حست حاجة في قلبها تكسرت اما عندها الحق عايدة بنت كرشها الوحيدة و هي بنت سلفتها و صحبتها صح رباتها و كبرتها اما تبقا مش امها لحقانية .. نفضا افكارها و طلعت يديها في زوج مسحت دموع فتيحة ..
بختة : لالا ماما متقوليش هك ربي يطول في عمرك و يخليك تاج على رواسنا .. بكلامك هذا اكي تعترضي على حكم ربي سبحانو .. ماما الموت حق و لاحقتنا في صغرنا ولا في كبرنا في صحتنا ولا في مرضنا نقدرو نموتو في اي لحظة و في اي حالة عايدة سبقتنا للدار الآخرة و حنا لاحقينها .. لاحقينها للبلاصة لي ندومو فيها .. لبلاصة لي نعيشو فيها الى مالا نهاية نكونو ديما فرحانين و مرتاحين مكاش هم و مكاش حزن و مكاش ألم و جروح غير السعادة .. ادعيلنا اماما ادعيلنا نكونو من اهل الجنة يارب و المؤمنين اجمعين و مسحي الافكار هذوك من راسك وساويس الشيطان اماما .. (وقفت و عاونتها توقف معاها) ايا نوضي توضاي و صلي ترتاحي و تخفاف روحك .
مخلاتهلش ترد دخلتخا للدوش و خرجت تكمل وش طانت تدير فتيحة .. شويا و صونا تيليفون .. مشات رفدتو كان تع ماماها و نوميرو بلا اسم مردتش و كملت لي في يدها اما المتصل مصر يقفل شوي و يعاود يعيط .. نفخت و رفدت ..
بختة : ألو وي شكون معاااي ؟

الــحــلــقــة الـثـالـثـة و الـثـمـانـون الـــبــــارت الــثــانــــي :

بختة : ألو وي شكوون معااي ؟
_لاه تردي على نوميرو متعرفيهش ؟
بختة : عيطت 50آبيل حرقت تيليفون قريب ينطق و يقولك ارحمني  و تقولي لاه تردي ؟ و ديجا واحد يعيط وش يستنا زعما ! باينا يعيط بش يردو عليه و يعرفو شكون و وش يسحق .....
_هههههه متبدلتيش مزلتي كي تتقلقي تهدري بزاف و متسكتيش هههه .
بختة : شكووون نتا امخلوووق ؟؟
_معرفتينيش بختة !! نسيتي صوتي !
انسان واحد جا لبالها من كلامو .. بقات لحظات جامدة بسيف قدرت تحرك يدعا لي يرجف تقفل التيليفون و تحطو بعيد .. تحركت خطوتين حتى سمعت صوت ميساج مفاتوش ثانيتين و زاد ميساج وراه .. كانت حتكمل طريقها مقدرتش الفضول تملكها .. تلفتت للتيليفون بقات تتفرج فيه شويا مترددة اذا تشوف ولا تتناسا .. فللخر قررت تفتحو في نفس الوقت تمسحو من تيليفون امها .. رفدت تيليفون قريب يطيخ من يديها لي يرجفو .. فتحت لميساج و بدات تقرا ..
ميساج 1 : دوك كونفيرميت بلي صح نسيتيني مكنتش متوقع يجي نهار و تنساي صوتي ولا صورتي .. سامحيني كي وليت و عاودت فتحت الجرح مي تصدقي بلي توحشتك و بزااف .
ميساج 2 : صح انا انسان متزوج و لي راني ندير فيه خيانة و عارف بلي اكره حاجة عندك هي الخيانة اما متتقلقيش يامات و نفريها .
بقات تقرا و تعاود فلي ميساج سورتو الجملة الاخيرة مفهمتش وش يقصد كيفاش حيفريها زعما ؟ يطلق مرتو و يولي ليها ولا .... يهز مرتو و يولي منين جا .. مسحت لي ميساج و حطت تيليفون قررت صايي اذا الاحتمال الاول موحال تقبل بسك لي كذب و خدع خطرة يعاودها 1000خطرة و الدليل خيانتو لمرتو مام ميساج صغير يعتبر خيانة و مكاش مرا تقبل راجلها يحكي مع حبيبتو لقديمة معناها مش بش يتوب على الخطأ و مش بش يتبدل .. و اذا كان الاحتمال الثاني فحتنساه كيفما نساتو مقبل و تضمد جروحها كيف قبل محاش تسمح لروحتي تأثر عليها ولا تهزها و تتعبها هو قرر يروح و يكمل حياتو الله يسهل عليه متبقاش تبكي موراه تتعب روحها و تطيح صحتها ...
دورت عينيها في غرفت عايدة و تنهدت من قلبها .. خرجت و مشات لغرفة يماها فتحتها شافتها قاعدة على سريرها السبحة في يدها تسبح .. قفلت لباب و قربتلها تكسلت على السرير و حطت راسها في حجر فتيحة ..
بختة : امي ..
فتيحة حطت يدها على شعر بنتها تمسح عليه : انعم بنيتي .
قفلت عينيها عاجبتها قعدتها و وش افضل من حضن الام و حنانها مام متكونش امها الحقيقية و مش هي لي ولدتها اما تبقا لي رباتها و تعبت عليها و كبرتها و عطاتها من حنانها و دفاها ..
بختة : مقلقتكم قعدتي هنا !
فتيحة شهقت : وش هاذ لهدرا بختة من وقتاش تقولي هك ؟ هذي دار باباك كيفاش حتقلقنا و علاه اصلا نتقلقو من بنتنا ؟
بختة تبسمت و قعدت : مش قصدي لي فهمتي .. قصدي كي متزوجتش و قاعدة في دار بابا .
فتيحة : يابنتي الزواج مكتوب ربي هذوك لي يضحكو و يقطعو فلي متزوجتش جاهلين متديريش على كلام الناس مزالكي صغيرة و الدنيا طويلة قدامك .. و مام متتزوجيش اكي في دار باباك معززة مكرمة تاكلي و ترقدي و تعيشي بمالو مش بمال الناس لي يهدرو فيك مالا متسمعيلهمش و متديريش عليهم .
بختة رجعت لرقدتها و جبدت يد فتيحة حطتها على شعرها : زعما كون يجي واحد منحبوش يخطبني و انا مشي قابلة تجبروني نتزوجو بش منبقاش بايرة ؟
فتيحة : باينا لالا لي ترتاحيلو و لي تحبيه بنتي نوقفو وراك عليه حاجة مكيش قابلتها منجبروكش عليها .
قفلت عينيها و سكتت و فتيحة رجعت تسبح .. فات الوقت و هوما على قعدتهم قبل يتفتح الباب و يدخل باباها ..