عاهرة الامام(كاملة ❤️)

171

⁦♥️⁩عـــــاهــــــرة الامــــــام⁦♥️⁩
⁦✒️⁩بـــــقــــلـــــم:بـــــخـــــتــــــة&ســـــــارة⁦✒️⁩
⁦♨️⁩الحــــلــــقـــــة91♨️⁩

#ميدو_يحكي

دخلت لغرفتي مرتاح و فرحان كي قبلو والديا .. اول مرة نحس روحي درت حاجة صحيحة و فرحان بيها ولا خلينا نقولو اول مرة حسيت بالسعادة الحقيقية .. حاس بلي حياتي لي كانت في الخارج كامل وهم تافه فات عليا .. تكسلت على السرير نتفكر في حبيبتي لقديمة كيفاش كانو ياماتنا و حياتنا حتى لقيت روحي نقارن فيها بفرح .. فرق واسع و واضح بيناتهم خلاني نتمسك بقراري اكثر .. و مالقري توو مزالت حاجة داخلي تقولي بلي غلطت و بلي منيش قادر نعيش ذوك لحوايج لجايين .. حاجة تقولي بلي مش حنتحمل و نتقبل حالتها .. استغفرت و مسحت هذوك الافكار من راءي كي تفكرت بلي مام انا غلطت في حياتي و غلطتي اكبر من غلطتها انا زنيت مش خطرة و مش زوج و بإرادتي الحرة اما هي مش بيدها و مش بإرادتها كلها عملت حيوان بشري .. نطلب حاجة وحدة و لي هي الثباث و الصبر .. خايف نغلط و ندير جاست فجائي خارج عن ارادتي و نعطي رد فعل في ذيك اللحظة .. خرجني من افكاري صوت الباب يندق .. سڤمت قعدتي و عطيتهم الاذن .. طلت عليا ختي غي براسها كي لقاتني قاعد دخلت و قفلت الباب وراها .. استغربت شوي جيتها و هدوءها و بالاكثر نظراتها ليا نفسهم تع صالون متبدلوش يحيروني و يخلوني تخمم في الف حاجة .. قعدت جنبي و حممت ..
هي : وشراك ميدو ؟ راك مليح ؟
ضحكت و انا حاير : اوو من وقتاش تسقسي عليا هك و من وقتاش تقعدي هادية و تدقي الباب منين جبتي ڤع هاذ لعقالة !
هي حركت كتافها : والو غير حبيت نسقسي عليك و نحكي معاك شوي كأي اخ و اخت .
حطيت يدي على جبينها نقيس في حرارتها : لالا مكيش مليحة .. و معندكش سخانة بديت نتخلع عليك .
هبطت راسها شويا و رجعت طلعتو و انا نستنا وش حتقول صح قلقتني عليها ..
هي : ميدو حنحكي معاك بصراحة منيش عارفة اذا جيتي هنا صحيحة ولا غلطت منعرف اما منقدرش نسكت لازم تعرف ..
طلعت حاجبي : وش كاين ؟ كش واحد قلقك ؟ وشصرا احكي خلعتيني ..
هي : ميدو تحب فرح ؟
ضحكت و دورت بعيد عليها .. منعرف لاه حشمت مالقري هي اكثر انسان مقرب ليا و تعرف كامل حكاياتي حتى حبيبتي كنت نحكيلها عليها و نعبرلها على حبنا بلا حشمة .. هي الوحيدة لي وقفت وراي نصحتني اولا منبعد شجعتني و محبتش نخسر علاقتي مع هذيك .. اما هاذ السؤال بيني و بين روحي مقدرتش نسقسيه ولا نحب نعرف جوابي كيفاش حابتني نجاوبها دوك ! .. مشفتش وجهها .. مشديتش يدها .. ممسيتاش .. مشفتش مفاتنها .. مقربتلهاش و مشميتش ريحتها و معنقتهاش ....... اما حبيتها .. كيفاش ؟ منيش عارف .. كنت حاسب الحب لمسات و همسات و نظرات .. و دوك عرفت بلي الانسان يقدر يحب و قلبو يتعلق بإنسان غي من صوتو .. من تصرفاتو .. من صفاتو .. من مواقفو البسيطة معاه .. الحب ميحتاجش حاسة اللمس و النظر الحب مواقف و فقط ...
تبسمت و تلفتتلها خزرت لعينيها ديراكت : وي نحبها .
شفتها توترت اكثر و دخلت بعضها كأنها تحاول تخير الكلمات المناسبة و تركب الجمل .. خليتها على راحتها وقت حتى حكات وحدها ..
هي : كي حكيت مع خوها وش قالك ؟ يعني مقالكش حاجة بيزار ؟
فكرة وحدة جات لبالي من كلامها اما منيش متأكد ولا خلينا نقولو منيش حاب نتأكد ..
انا : كاين حاجة لازم يقولها ؟ تعرفي حاجة على فرح ؟؟
حمحمت و حركت راسها : نعرف حاجة و منيش متأكدة منها علاهذي منيش حابة نخبرك و نخرب علاقتكم في نفس الوقت منيش حباتك تنخدع فيها و تندم ..
حركت راسي و ملامحي تبدلو للجدية : احكي لي عندك متخافيش و اعرفي حاجة مهما تقولي مش حنتأثر و مش حتخرب علاقتنا و حتى اذا صرات الزواج مكتوب متحسيش بالذنب عادي .