عاهرة الامام(كاملة ❤️)

39

♥ الــحــلــقــة الــعــشــرون تتمة 02 ♥

عايدة : مااامااا يااامااا ويراكي ؟

دخلت للكوزينة قابلتها بختة تطيب لغذا و لكيثمان في وذنها شنفت و مشات ليها جبدت لكيثمان بعنف ..

عايدة : انا نعيط صوتي تقطع و نتي في عالم ثاني مع كاظم الساهر تاعك عايشا الحب على آخر عمرك .

بختة خزرت فيها و رجعت لكيثمان محطتوش في وذنها و كانت جبدتو عايدة بعنف اكبر حتى تقطع في يدها ...

بختة : عااايدة قطعتييه وشبييك ؟
عايدة : على كيثمان يدير عشرالاف كليتيني مشحاحة .. ويراهي ماما ؟
بختة : راحت عند خالتي صورية .
عايدة : و متعرفيش تقوليلي راحت مقبيل و انا نعيط ! مفيكش فايدة حقربي كون تزوجتي كيما نتاجاتك كون راكي بولادك في دارك هفف وش راني نقول لوحدة بايرة الله يحفظلي راجلي و داري هذا وش نقول ...

صونا تيليفونها شافت شكون و طلعت راسها بختها : راني رايحا محمد لحق كي تجي ماما قوليلها جا راااجلي مقدرتش نستناها ايا بااي .

خرجت و خلاتها تخزر لبلاصتها الفارغة و ألف فكرة في راسها .. كلام اختها الصغيرة صحيح نتاجاتها راهم بثلاث اولاد و اكثر و هي قاعدة شوكة في حلوقهم عار عليهم لجيران و لافامي كامل يحكو عليها و كلمة بايرة ولات اسمها الثاني .. اما الله غالب الزواج مكتوب مش هي خيرت تبقا في دار باباها مكتوبها مجاهاش .. كيفاش تفهم المجتمع المعاق ذهنيا بلي الزواج مكتوب مهيش عاهرة و جامي دارت حاجة تهبط راس باباها .. مفيهاش عيب و مهيش عاقر لحكاية كلها مكتوب و هذوك اشاعات خرجو عليها .. صح هي مقراتش حبست في سيام و تخطبت ابري حبست اما مش لأنو جاهلة ولا خانت خطيبها و كشفها حتى هذو اشاعات و لحكاية انهم متفاهموش و صراو مشاكل بيناتهم كأي كوبل تفارقو مكتبش بيناتهم المكتوب .. اختها اصغر منها ب6سنين تزوجت عندها عامين و هانية مع راجلها صك معندهاش اولاد اما بإرادتها هي لي حبت و بنات خالاتها اصغر منها متزوجات جاراتها تزوجو .. غير هي بقات بااااايرة ...
زيرت على يدها عاضة على شفايفها ... تحب تسكت الناس تحب تعيط و تكذب الاشاعات تحب تمشي عندهم لي حكاو عليها واحد واحد و تفهمهم وضعها اما هاذ الشي موحال عقولهم مقفولة ميفهموش و يبقاو اصابع الاتهام عليها مجتمعنا يعتبرو الزواج حاجة اجبارية مهمة للطفلة لي تقفل 24سنة مشي متزوجة تتسمى بايرة و تسمع كلام على الطالعة و النازلة يكرهوها في حياتها و في روحها و ياسواد زهرها هذيك لي تكمل 30سنة بلا زواج مسكينة تتنبذ و تتكره و يخرجو عليها اشاعات استغفر الله ... و تولي حكاية الكل تولي علك في فمام النساء لي عقولهم فارغة و للاسف مجتمعنا مليان هاذ النوع من النساء .. و الضربة ولاو رجال عندهم نفس النظرية و نفس التخمام اذا متزوجتش بنتو و بداو يحكو عليها يكرهها و يشوفها علة و عار عليه و يزوجها اول واحد يطبطب بابهم مهما كان كبير صغير عندو مشاكل متدين كافر المهم تتزوج و متهبطلوش راسو فلارض ...