كملت قراءة ما تيسر من القرآن وتبسمت....وقفت وهيا شادة المصحف غير وقفت عاودت طابست هزت الصلاية لي كانت فوقها وهيا تحس براحة....غير كيما ولات نجس بيها....يكذب عليك لي يقول نقرا القرآن ونصلي ومنحسش راحة تحس هموم الدنيا كامل من كتافك طاحو....غير كملت سڨمت حيجابها الواسع لي رجعت تلبسو في الدار وسڨمت الخيمار ودخلت شوي شعر كان يبان....وجها بيض بلا نقطة مكياج بصح فيه نور عليه....نور الايمان الفتاة التي تتوضئ 5 مرات لا تحتاج مواد تجميل....غير كملت هبطت لتحت....غير وصلت دخلت ديركت للكوزينة...
أميمة:السلام عليكم ورحمه الله وبركاته....باش نعاونك ايما....
شافت فيها وتبسمت....أميمة جديدة العالم كامل عجباتو ماشي غير ياسمينة كامل حبوها....خصوصا مين تزوج فؤاد وخرج بمرتو وحدو...وزيد فرح تزوجت بقاو غير هوما وحدهم....والحق يقال انو أميمة رفدتهم بالحق....كانت ليهم البنت لي تزوجت وخلاتهم....
ياسمينة:الله يرضى عليك ابنتي....بصح راكي تشوفي مانيش كبيرة بزاااف يعني عادي نقدر اني نخدم وراكي تشوفي اني وجدت كلش....
راحت سلمت على راسها....وهزت يديها وسلمت عليهم....
أميمة:ربي يخليك ايما تاج فوق راسنا أن شاء الله.... ياسمينة:إن شاء الله.... أميمة:وينو عمي و سيف مجاوش ليوم مع الوقت.... ياسمينة:ايه مراحش يجو قالولي مراحش يجو ونسيت.... أميمة:واش كاين غير الخير.... ياسمينة:والله معارفة قالو خدمة.... أميمة:ربي يعونهم....
كملو يفطرو في جو ضحك وحب وڨصرة غير كملو راحت ياسمينة تتكسل شوي...واميمة خملت كلش وغسلت الماعن ومسحت الكوزينة ورتبت الحالة شوي وطلعت لشومبرتها....كان تيليفون مري وقدامو تيليفون....تفكرت روحها بكري كيفاش كانت تجري لتيليفون وتسمح في كلش علجالو....لدرجة المصحف غير مرات ترفدو....تبسمت بانكسار من حياتها كيفاش كانت وكيفاش كانت في طريق الخطأ تمشي وهيا فرحانة....هزت المصحف وبدات تقرا بخشوع حتى لقات دموع في عينيها يطيحو....دموع من قوة الراحة والاحساس لي حست بيه...غير كملت حطت المصحف وجات خارجة حتى لفت انتباها صوت التيليفون...في لول كنت راح تتجاهلو بصح راحت ليه تشوف وياريتها ماشافت قرات ميساج خلا شواربها يرجعو بيوضة من الخوف...بلعت ريقها بالسيف لي حساتو كي الموس جرحها....
