عاهرة الامام(كاملة ❤️)

119

🚫🖤 عـــاهــرة الإمـــــام 🖤🚫

✏ ســــارة & بـــخــتــة ✏

الــحــلــقــة الــســـتـــون :

بختة دخلت على عايدة رافدة سنيوة فيها ماكلا و دواء .. لقاتها مغطيا كامل بغطاء ثقيل و باينا تبكي من حركة كتافها .. مشات ليها حطت السنيوة على لاطابل دونوي و جبدت لغطاء بلعقل هبطتو لقاتها حالتها حالة عينيها حمورا منفخين وجهها احمر و وسادتها مشمخة كامل .. قعدت قدامها تمسح على شعرها و هي زادت فبكاها .. خلاتها بكات شويا فىغت قلبها و عاونتها تقعد ..

بختة : حرام لي راكي تديري في روحك عايدة هو رح يتزوج و فرحان بياتو و نتي غابنة روحك عليه معرضة حياتك و حياة بنتك للخطر والله حرام .
عايدة عضت على صبعها و زيرت على روحها تحكي بصوت متقطع : عشرة 10سنين بختة مهوش عام و مهوش عامين 10سنين راحت .. معاه فوتت مراهقتي و شبابي معاه عرفت الحب و معاه دق قلبي اول مرة .. وش ذنبي اذا حبيتو و اعتبرتو كامل دنيتي ! لاه دارو فينا هك بختة لاه ؟ معندهمش قلب معندهمش رحمة فرقونا بسبب حاجة مش بيدنا حاجة من عند ربي ..
بختة الدمعة طاحتلها و من دمعة ولاو دموع : جاهلين الله يغفرلهم و يهديهم .
عايدة : قلبي راه يتقطع وجع مش نرمال منيش قادرة بختة عييت .. حاسة بالضيقة حتى النفس يوجعني .. عيطتلي يماه فرحت بختة فرحت حسبتهم عرفو غلطتهم و ناويين يردوني .. كنت مستعدة ننسا كامل وش دارو فيا و ننسا نهار هز يدو عليا و نهار جرحني و رماني قدام باب دارنا في نص الليل .. كنت مستعدة ننسا كلش و نولي و نعاودو حياة نظيفة .. اما هي وش قالتلي ؟ .. ههه راجلك خطب و قريب عرسو .. نساني و نسا عشرتنا .. نسا حبنا و ياماتنا .. نسا ضحكنا و سهراتنا .. سمح فيا بالساهل و تزوج عليا .. تزوج عليا بختة رح يجيب مرة وحدوخرا عندو الحق يمسها و يقعد معاها و يضحك معاها و يحكي معاها و يسهر معاها يعاود لي درناه مع بعض معاها هي .. هو لي قالي منقدرش نحط يدي على يد مرا غيرك .. هو نفسو لي قالي مكاش مرا فالدنيا تقدر تدي بلاصتك و هو لي قال موحال نقدر نعيش بعيد عليك .. قلبي يابختة قلبي راه راجلي .. خان العشرة و خان لكلام لي بيناتنا .. هذا قلب لحمة مهوش لعبة بختة فهموه بلي راني نتعذب و النفس ولا ثقيل عليا .. كي نخمم بلي حتدي مرا بلاصتي .. داري لي عشت فيها اجمل و اسوء ايامي حتولي هي مولاتها انا لي خيرت ديكورها و انا لي فرشتها معاه و انا لي كنت نستنا فيها توجد و نتزوجو جات هي داتها بالساهل .. شومبرتي لي شهدت على حبنا و ضحكنا و قسرتنا تولي شمبرتها تقعد على سريري و تستعمل صوالحي .. راجلي الراجل الوحيد لي دخل حياتي و خطف قلبي في عمر صغير الراجل لي عشقتو و شاركتو حياتي .. اب بنتي هه داتو و هو راح ليها و سمح فيا انا لي صبرت معاه و انا لي تحملت معاه و انا لي رفدتو وقت طاح و ملقا حد معاها انا لي وقفت معاها وقت الناس كامل دارو عليه .. ااه ياربي وشدرت فحياتي بش تصرالي كامل هك ..

عنقتها بختة و زيرت عليها يبكيو في زوج هذيك لي عاشت و تعذبت و لوخرا لي شهدت عليها ..