Unicode
တိချိုးဟယ်က တံခါးဖွင့်ပြီးနောက် ဟောပိုင်ထိုင်နေရာ ဆိုဖာသို့ ပြန်လျှောက်လာသည်။ ဟောပိုင်အတွက် ရေတစ်ခွက်ငှဲ့ပေးပြီးနောက် မေးလိုက်သည်။
" ကိုယ့်ရဲ့ အအေးဘူးထဲမှာ အဆိပ်ခတ်ထားတယ်လို့ပြောတယ်နော်.. အဲ့ဒါကို မင်းက ဘယ်လိုလုပ်သိတာလဲ .. မင်း သောက်လိုက်မိသေးလို့လား"
ဟောပိုင် ကြောင်အသွားလေ၏။ အအေးဘူးက အဖုံးပင် တစ်ခါမှ မဖွင့်ရသေး။ တိချိုးဟယ် သူ့ကို အာရုံစိုက်လာစေရန် ဆင်ခြေတစ်ခုအနေနှင့် ပြောလိုက်ခြင်းသာဖြစ်သည်။ နိုးနိုးချင်း ဟိုတယ်ကို ပြေးလာသည့်အတွက် အအေးကို ထိပင်မထိရသေး။ ထို့ကြောင့် အအေးဘူးကိုကြည့်ရင်း နောင်တရနေမိသည်။
" ဒီအအေးဘူးနဲ့တူတယ်"
ဟောပိုင်ကြည့်နေသော အအေးဘူးကို တိချိုးဟယ်က ကောက်ကိုင်လိုက်သည်။
ဟောပိုင်လဲ မျက်လုံးပြူးကာ တားဖို့ လက်လှမ်းလိုက်ပေမဲ့ နည်းနည်းနောက်ကျသွားကာ အအေးဘူးကို ကိုင်ထားသည့် တိချိုးဟယ်လက်ပေါ် အုပ်ကိုင်မိသွား၏။
တိချိုးဟယ်က မျက်မှောင်အနည်းငယ်ကျုံ့ကာ ကြောင်သွား၏။ ထို့နောက် မျက်ခုံးပင့်ကာ ဟောပိုင်ကို စိုက်ကြည့်လိုက်၏။
ဟောပိုင်သည်လဲ အသံပင် မထွက်နိုင်အောင် ကြောင်အနေသည်။
.. ဒီလက်လေး.. ဒီလက်လေးကို နေ့နေ့ညည ကိုင်တာ အသားကျနေတာ.. ငါ့ကိုလဲ ကြည့်ပါဦး.. အခုတော့ မတော်တဆထိမိတာကို အသားယူတဲ့သူလို စိုက်ကြည့်ခံနေရတာပဲ..
အန်းရှီရှီး၏ ခြေလှမ်းက သူတို့ကြားမှ တိတ်ဆိတ်မှုကို ဖြိုခွင်းသွား၏။
တိချိုးဟယ်က လက်ကိုချက်ချင်းပြန်ရုတ်ကာ အန်းရှီရှီးလက်ထဲမှ ဗန်းကိုတစ်ချက်ကြည့်သည်။
" ကျေးဇူးပဲ လက်ထောက်အန်း ကောင်းသောညပါ"
အန်းရှီရှီးက ဟောပိုင်ကို သတိနှင့်ကြည့်နေကာ ဗန်းကို စားပွဲပေါ်ချသည်။
" ရပါတယ် သခင်လေး.. ဒီမှာ သခင်လေးရဲ့ဆေးပါ.. ဒါပေမဲ့ ဆရာဝန်က ဆေးကို အစာမရှိပဲ မသောက်ဖို့ မှာထားတာမို့ ကျွန်မ ဆန်ပြုတ်မှာထားပေးပါတယ်.. တော်တော်လေးကောင်းတဲ့ဆန်ပြုတ်ပါ.. နောက်ပြီး ဒီဘက်က လူကြီးမင်း.. အခု အရမ်းလဲ နောက်ကျနေပြီ သခင်လေးက တစ်နေကုန် ပင်ပန်းထားတာမို့လို့ လူကြီးမင်းက ကျွန်မနဲ့ လိုက်ခဲ့ပါ"
