Unicode
ဧပြီလကုန်ရောက်တော့ တစ်ဝက်လောက် ရိုက်ကူးပြီးပြီဖြစ်သည့် ထာဝရရှင်သန်ခြင်း လမ်းစဥ်က သူ့ကို ပိုစတာရိုက်ပေးဖို့ လာကမ်းလှမ်းသည်။
Cheng's Army တုန်းက ရိုက်ထားသည့် အတွေ့အကြုံကြောင့်ရော အဓိကဇာတ်ဆောင်က တိချိုးဟယ်ဖြစ်သည့်အတွက်ပါ ရိုက်ကူးရေးက ထင်သလောက် မခက်ခဲခဲ့။ နှစ်ရက်ဟု စီစဥ်ထားသည့် ရိုက်ကူးရေးက တစ်ရက်နှင့် အပြီးသတ်နိုင်ခဲ့သည်။
" ပြတိုက်က တစ်ယောက် မင်းကို အခက်တွေ့အောင် လုပ်တယ်ဆို"
စားသောက်ဆိုင်တစ်ခုကို ရောက်တော့ တိချိုးဟယ်က ဟောပိုင်အတွက် လက်ဖက်ရည်ငှဲ့ပေးရင်း မေးလိုက်သည်။
" ခင်ဗျားကို ကျွင်းကျယ် ပြောပြတာလား"
ဟောပိုင်က မုန့်ပန်းကန်ကို သူ့နားဆွဲကာ တိချိုးဟယ်ပါးစပ်ထဲ တစ်ခုထည့်၍ သူလဲ တစ်ခုစားရင်း ပြန်ပြောသည်။
" အခက်တွေ့အောင် လုပ်တယ်ရယ်လို့လဲ မဟုတ်ပါဘူး.. သူက ကျွန်တော့်ကို အရည်အချင်းမရှိဘူး ဘာညာနဲ့ ပြောရုံလောက်ပဲ ဘာမှမဟုတ်ဘူး"
တိချိုးဟယ်က တူနှင့် ဇွန်းများကို တစ်ရှူးနှင့်ပွတ်ကာ ဟောပိုင်ရှေ့ ချပေးနေသည်။
" မင်း လုပ်လိုက်တာ မှန်တယ်.. အဲ့လိုလူမျိုးနဲ့ အလုပ်တွဲမလုပ်သင့်ဘူး.. အဲ့ဒီလို အကျင့်စရိုက်မျိုးနဲ့... စိတ်မပူနဲ့ ကိုယ့်မှာ အသိတွေအများကြီးရှိတယ်.. ပိုကောင်းတဲ့ ပြတိုက်တစ်ခု ဆက်သွယ်ပေးမယ်"
" ဟင့်အင်း"
ဟောပိုင်က ခေါင်းရမ်းကာ တိချိုးဟယ်ကို နဖူးတစ်ချက်တောက်လိုက်၏။
" ခင်ဗျားရဲ့ပုံကို ဘယ်သူ့ကိုမှ မယူစေချင်လို့လေ ချာတိတ်လေးရဲ့... ကိုယ့်ဟာကိုယ်ပဲ သိမ်းထားရအောင် ကျွန်တော်တို့ အိမ်ရဲ့ သုံးလွှာက photo wall လေးမှာ နေရာတစ်ဝက်တောင်လွတ်နေသေးတာကို"
တိချိုးဟယ်က ဟောပိုင်လက်ကို လှမ်းကိုင်ကာ တစ်ခုခုပြောရန် ပြင်လိုက်ပေမဲ့ စားပွဲထိုးဝင်လာသည့်အတွက် ခဏထိန်းလိုက်ရသည်။ ဟင်းပွဲများ ရောက်လာသည့်အတွက် တစ်ယောက်လက် တစ်ယောက်လွှတ်လိုက်ကြသည်။
ဟောပိုင်က အားရပါးရ စားနေပေမဲ့ တိချိုးဟယ်က ဟင်းပွဲများကို ဟိုနှိုက်သည်နှိုက်နှင့် စိတ်မပါ့တပါ စားနေသည်။ ဟောပိုင်ကိုလဲ တစ်ခုခုပြောချင်နေသလို ခဏခဏ လှမ်းကြည့်သည်။
