Unicode
ချန်ကျဲက သူ့ paper အတွက် ကော်ပီတစ်ခုကူးထားလိုက်ပြီး ကြမ်းပြင်ပေါ်ကျနေသော အဝတ်များကိုကောက်ကာ ဟောပိုင်ကိုကြည့်သည်။
" မင်းလဲ အဆောင်မှူးနဲ့ ဆရာ့သဘောကို တွေ့လိုက်တာပဲ... ငါတို့ တရားရုံးထိတက်မယ်ဆိုရင် အဆောင်မှူးနဲ့ရော ဆရာနဲ့ပါ ငါတို့ပြဿနာတက်လိမ့်မယ်"
ဝမ်ဟူက မတရားခံရသည်ကို ခံစားမိ၏။
" ဒါပေမဲ့ ငါတို့က နစ်နာသူတွေလေ"
" ငါက ဘွဲ့မရလဲ ကိစ္စမရှိဘူး အဆုံးထိ သူတို့နဲ့ အတိုက်အခံလုပ်လို့ရတယ်.. ဒါပေမဲ့ မင်းတို့က.."
နျို့ကျွင်းကျယ်က ဒေါသထွက်လာသည်။
" လောင်အာ့က ငါတို့ကျောင်းမှာ မာစတာထပ်တက်မှာ အဲ့ဒါဆို..."
ဟောပိုင်လဲ စိတ်တော့မကောင်း။ အဆောင်မှူးက သူတို့ကို တရားရုံးထိ မရောက်အောင်တားလိမ့်မည်။ လူငယ်ချင်း စနောက်တာပါဟူ၍ ခိုးသည့်အမှုကို လုံးဝပျောက်အောင် လုပ်လိမ့်မည်။ အခု သူတို့က ကျောင်းဂုဏ်သိက္ခာကျဆင်းမည်ဟူသော ခပ်တုံးတုံးအကြောင်းပြချက်အောက်တွင် ဘာမှမလုပ်ရန် ဖိအားပေးခံနေရ၏။ တကယ်လို့ သူတို့သဘောမတူပါက ကျောင်းနာမည်ကို ဖျက်ဆီးသူများစာရင်းထဲ အလိုလိုရောက်ကာ အမုန်းခံရတော့မည်ဖြစ်၏။
" အရင်ဆုံး အိပ်ရအောင်ဗျာ"
တိချိုးဟယ်ပြောသည့်အတိုင်း ဟောပိုင်က အကြံပြုသည်။ ထို့နောက် အကိုများနှင့်အတူ အခန်းရှင်း၍ အာရုံလွှဲလိုက်သည်။
နောက်တစ်နေ့မနက်စောစောတွင်တော့ ဝမ်ဟူက အဆောင်မှူးထံမှ ဖုန်းလက်ခံရသည်။ အခြေအမေတွေက ပြောင်းလဲသွားပြီဟုဆို၏။
ဓာတ်ပုံထဲက ကျောင်းသားမှာ ရဲစခန်းကို ရှေ့နေနှင့်အတူရောက်လာပြီး ဟွမ်ဝေ့ခိုးသည့်အကြောင်းကို လုံးဝမသိဟု ဘူးခံငြင်းသည်။ ရှေ့နေကလဲ ဟွမ်ဝေ့ကို ကားငှားလိုက်သော်လဲ သူ့ကိုသိပ်မခင်ပဲ မျက်မှန်းတန်းမိရုံလောက်သာ သိသည်ဟု ဖြေ၏။ ဟွမ်ဝေ့က သူ့ကို laptop တစ်လုံးလာပြကာ ရောင်းချင်သည်ဆိုပြီး ကားငှားရန် အကူအညီတောင်း၍သာ အားနေသည့်အတွက် အဖော်လိုက်ပေးခြင်းဖြစ်သည်ဟုဆိုသည်။ နောက်တော့ ပျင်းလာလို့ အတူမလိုက်ပဲ ကားသာငှားပေးလိုက်သည်ဟုပြော၏။
